Ayodhya Kanda Sarga 43 – அயோத்⁴யாகாண்ட³ த்ரிசத்வாரிம்ஶ꞉ ஸர்க³꞉ (43)

ஸ்தோத்ரநிதி → வால்மீகி ராமாயணே அயோத்⁴யகாண்ட³ → அயோத்⁴யாகாண்ட³ த்ரிசத்வாரிம்ஶ꞉ ஸர்க³꞉ (43)

॥ கௌஸல்யாபரிதே³விதம் ॥

தத꞉ ஸமீக்ஷ்ய ஶயநே ஸந்நம் ஶோகேந பார்தி²வம் ।
கௌஸல்யா புத்ரஶோகார்தா தமுவாச மஹீபதிம் ॥ 1 ॥

ராக⁴வே நரஶார்தூ³ளே விஷமுப்த்வாஹிஜிஹ்மகா³ ।
விசரிஷ்யதி கைகேயீ நிர்முக்தேவ ஹி பந்நகீ³ ॥ 2 ॥

விவாஸ்ய ராமம் ஸுப⁴கா³ லப்³த⁴காமா ஸமாஹிதா ।
த்ராஸயிஷ்யதி மாம் பூ⁴யோ து³ஷ்டாஹிரிவ வேஶ்மநி ॥ 3 ॥

அத² ஸ்ம நக³ரே ராமஶ்சரந்பை⁴க்ஷம் க்³ருஹே வஸேத் ।
காமகாரோ வரம் தா³துமபி தா³ஸம் மமாத்மஜம் ॥ 4 ॥

பாதயித்வா து கைகேய்யா ராமம் ஸ்தா²நாத்³யதே²ஷ்டத꞉ ।
ப்ரதி³ஷ்டோ ரக்ஷஸாம் பா⁴க³꞉ பர்வணீவாஹிதாக்³நிநா ॥ 5 ॥

க³ஜராஜக³திர்வீரோ மஹாபா³ஹுர்த⁴நுர்த⁴ர꞉ ।
வநமாவிஶதே நூநம் ஸபா⁴ர்ய꞉ ஸஹலக்ஷ்மண꞉ ॥ 6 ॥

வநே த்வத்³ருஷ்டது³꞉கா²நாம் கைகேய்யா(அ)நுமதே த்வயா ।
த்யக்தாநாம் வநவாஸாய காந்வவஸ்தா² ப⁴விஷ்யதி ॥ 7 ॥

தே ரத்நஹீநாஸ்தருணா꞉ ப²லகாலே விவாஸிதா꞉ ।
கத²ம் வத்ஸ்யந்தி க்ருபணா꞉ ப²லமூலை꞉ க்ருதாஶநா꞉ ॥ 8 ॥

அபீதா³நீம் ஸ கால꞉ ஸ்யாந்மம ஶோகக்ஷய꞉ ஶிவ꞉ ।
ஸபா⁴ர்யம் யத்ஸஹ ப்⁴ராத்ரா பஶ்யேயமிஹ ராக⁴வம் ॥ 9 ॥

ஸுப்த்வேவோபஸ்தி²தௌ வீரௌ கதா³யோத்⁴யாம் க³மிஷ்யத꞉ ।
யஶஸ்விநீ ஹ்ருஷ்டஜநா ஸூச்ச்²ரிதத்⁴வஜமாலிநீ ॥ 10 ॥

கதா³ ப்ரேக்ஷ்ய நரவ்யாக்⁴ராவரண்யாத்புநராக³தௌ ।
நந்தி³ஷ்யதி புரீ ஹ்ருஷ்டா ஸமுத்³ர இவ பர்வணி ॥ 11 ॥

கதா³(அ)யோத்⁴யாம் மஹாபா³ஹு꞉ புரீம் வீர꞉ ப்ரவேக்ஷ்யதி ।
புரஸ்க்ருத்ய ரதே² ஸீதாம் வ்ருஷபோ⁴ கோ³வதூ⁴மிவ ॥ 12 ॥

கதா³ ப்ராணிஸஹஸ்ராணி ராஜமார்கே³ மமாத்மஜௌ ।
லாஜைரவகரிஷ்யந்தி ப்ரவிஶந்தாவரிந்த³மௌ ॥ 13 ॥

ப்ரவிஶந்தௌ கதா³(அ)யோத்⁴யாம் த்³ரக்ஷ்யாமி ஶுப⁴குண்ட³லௌ ।
உத³க்³ராயுத⁴நிஸ்த்ரிம்ஶௌ ஸஶ்ருங்கா³விவ பர்வதௌ ॥ 14 ॥

கதா³ ஸுமநஸ꞉ கந்யா த்³விஜாதீநாம் ப²லாநி ச ।
ப்ரதி³ஶந்த꞉ புரீம் ஹ்ருஷ்டா꞉ கரிஷ்யந்தி ப்ரத³க்ஷிணம் ॥ 15 ॥

கதா³ பரிணதோ பு³த்³த்⁴யா வயஸா சாமரப்ரப⁴꞉ ।
அப்⁴யுபைஷ்யதி த⁴ர்மஜ்ஞஸ்த்ரிவர்ஷ இவ லாலயந் ॥ 16 ॥

நிஸ்ஸம்ஶயம் மயா மந்யே புரா வீர கத³ர்யயா ।
பாதுகாமேஷு வத்ஸேஷு மாத்ருணாம் ஶாதிதா꞉ ஸ்தநா꞉ ॥ 17 ॥

ஸாஹம் கௌ³ரிவ ஸிம்ஹேந விவத்ஸா வத்ஸலா க்ருதா ।
கைகேய்யா புருஷவ்யாக்⁴ர பா³லவத்ஸேவ கௌ³ர்ப³லாத் ॥ 18 ॥

ந ஹி தாவத்³கு³ணைர்ஜுஷ்டம் ஸர்வஶாஸ்த்ரவிஶாரத³ம் ।
ஏகபுத்ரா விநா புத்ரமஹம் ஜீவிதுமுத்ஸஹே ॥ 19 ॥

ந ஹி மே ஜீவிதே கிஞ்சித்ஸாமர்த்²யமிஹ கல்ப்யதே ।
அபஶ்யந்த்யா꞉ ப்ரியம் புத்ரம் மஹாபா³ஹும் மஹாப³லம் ॥ 20 ॥

அயம் ஹி மாம் தீ³பயதே ஸமுத்தி²த꞉
தநூஜஶோகப்ரப⁴வோ ஹுதாஶந꞉ ।
மஹீமிமாம் ரஶ்மிபி⁴ருத்³த⁴தப்ரபோ⁴
யதா² நிதா³கே⁴ ப⁴க³வாந்தி³வாகர꞉ ॥ 21 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அயோத்⁴யாகாண்டே³ த்ரிசத்வாரிம்ஶ꞉ ஸர்க³꞉ ॥ 43 ॥

அயோத்⁴யாகாண்ட³ சதுஶ்சத்வாரிம்ஶ꞉ ஸர்க³꞉ (44) >>

---

ஸம்பூர்ண வால்மீகி ராமாயணே அயோத்⁴யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.