Devi Narayaniyam Dasakam 24 – சதுர்விம்ஶ த³ஶகம் (24) – மஹிஷாஸுரவத⁴ம்-தே³வீஸ்துதி꞉

ஸ்தோத்ரநிதி → தே³வீ நாராயணீயம் → சதுர்விம்ஶ த³ஶகம் (24) – மஹிஷாஸுரவத⁴ம்-தே³வீஸ்துதி꞉

தே³வி த்வயா பா³ஷ்களது³ர்முகா²தி³-
-தை³த்யேஷு வீரேஷு ரணே ஹதேஷு ।
ஸத்³வாக்யதஸ்த்வாமநுநேதுகாமோ
மோக⁴ப்ரயத்நோ மஹிஷஶ்சுகோப ॥ 24-1 ॥

த்வாம் காமரூப꞉ கு²ரபுச்ச²ஶ்ருங்கை³-
-ர்நாநாஸ்த்ரஶஸ்த்ரைஶ்ச ப்⁴ருஶம் ப்ரஹர்தா ।
க³ர்ஜந்விநிந்த³ந்ப்ரஹஸந்த⁴ரித்ரீம்
ப்ரகம்பயம்ஶ்சாஸுரராட்³யுயோத⁴ ॥ 24-2 ॥

ஜபாருணாக்ஷீ மது⁴பாநதுஷ்டா
த்வம் சாரிணா(அ)ரேர்மஹிஷஸ்ய கண்ட²ம் ।
சி²த்வா ஶிரோ பூ⁴மிதலே நிபாத்ய
ரணாங்க³ணஸ்தா² விபு³தை⁴꞉ ஸ்துதா(அ)பூ⁴꞉ ॥ 24-3 ॥

மாதஸ்த்வயா நோ விபதோ³ நிரஸ்தா
அஶக்யமந்யைரித³மத்³பு⁴தாங்கி³ ।
ப்³ரஹ்மாண்ட³ஸர்க³ஸ்தி²திநாஶகர்த்ரீம்
கஸ்த்வாம் ஜயேத் கேந கத²ம் குதோ வா ॥ 24-4 ॥

வித்³யாஸ்வரூபா(அ)ஸி மஹேஶி யஸ்மிந்
ஸ வை பரேஷாம் ஸுக²த³꞉ கவிஶ்ச ।
த்வம் வர்தஸே யத்ர ஸதா³(அ)ப்யவித்³யா-
-ஸ்வரூபிணீ ஸ த்வத⁴ம꞉ பஶு꞉ ஸ்யாத் ॥ 24-5 ॥

க்ருபாகடாக்ஷாஸ்தவ தே³வி யஸ்மிந்
பதந்தி தஸ்யாத்மஜவித்ததா³ரா꞉ ।
யச்ச²ந்தி ஸௌக்²யம் ந பதந்தி யஸ்மிந்
த ஏவ து³꞉க²ம் த³த³தே(அ)ஸ்ய நூநம் ॥ 24-6 ॥

பஶ்யாம நித்யம் தவ ரூபமேத-
-த்கதா²ஶ்ச நாமாநி ச கீர்தயாம ।
நமாம மூர்த்⁴நா பத³பங்கஜே தே
ஸ்மராம காருண்யமஹாப்ரவாஹம் ॥ 24-7 ॥

த்வமேவ மாதா(அ)ஸி தி³வௌகஸாம் நோ
நாந்யா த்³விதீயா ஹிததா³நத³க்ஷா ।
அந்யே ஸுதா வா தவ ஸந்தி நோ வா
ந ரக்ஷிதா நஸ்த்வத்³ருதே மஹேஶி ॥ 24-8 ॥

க்வ த்வம் வயம் க்வேதி விசிந்த்ய ஸர்வம்
க்ஷமஸ்வ நோ தே³வ்யபராத⁴ஜாலம் ।
யதா³ யதா³ நோ விபதோ³ ப⁴வந்தி
ததா³ ததா³ பாலய பாலயாஸ்மாந் ॥ 24-9 ॥

இதி ஸ்துவத்ஸு த்ரித³ஶேஷு ஸத்³ய꞉
க்ருபாஶ்ருநேத்ரைவ திரோத³தா⁴த² ।
ததோ ஜக³த்³தே³வி விபூ⁴திபூர்ணம்
ப³பூ⁴வ த⁴ர்மிஷ்ட²ஸமஸ்தஜீவம் ॥ 24-10 ॥

த்வாம் ஸம்ஸ்மரேயம் ந ச வா ஸ்மரேயம்
விபத்ஸு மா விஸ்மர மாம் விமூட⁴ம் ।
ருத³ந் பி³டா³லார்ப⁴கவந்ந கிஞ்சி-
-ச்ச²க்நோமி கர்தும் ஶுப⁴தே³ நமஸ்தே ॥ 24-11 ॥

பஞ்சவிம்ஶ த³ஶகம் (25) – மஹாஸரஸ்வத்யவதாரம்-ஸும்பா⁴தி³வத⁴ம் >>

---

ஸம்பூர்ண தே³வீ நாராயணீயம் பார்க்க.

Did you see any mistake/variation in the content above? Click here to report mistakes and corrections in Stotranidhi content.