Sri Narayana Ashtakam – ஶ்ரீ நாராயணாஷ்டகம்


வாத்ஸல்யாத³ப⁴யப்ரதா³நஸமயாதா³ர்தார்திநிர்வாபணா-
-தௌ³தா³ர்யாத³க⁴ஶோஷணாத³க³ணிதஶ்ரேய꞉ பத³ப்ராபணாத் ।
ஸேவ்ய꞉ ஶ்ரீபதிரேக ஏவ ஜக³தாமேதே(அ)ப⁴வத்ஸாக்ஷிண꞉
ப்ரஹ்லாத³ஶ்ச விபீ⁴ஷணஶ்ச கரிராட் பாஞ்சால்யஹல்யாத்⁴ருவ꞉ ॥ 1 ॥

ப்ரஹ்லாதா³ஸ்தி யதீ³ஶ்வரோ வத³ ஹரி꞉ ஸர்வத்ர மே த³ர்ஶய
ஸ்தம்பே⁴ சைவமிதி ப்³ருவந்தமஸுரம் தத்ராவிராஸீத்³த⁴ரி꞉ ।
வக்ஷஸ்தஸ்ய விதா³ரயந்நிஜநகை²ர்வாத்ஸல்யமாபாத³ய-
-நார்தத்ராணபராயண꞉ ஸ ப⁴க³வாந்நாராயணோ மே க³தி꞉ ॥ 2 ॥

ஶ்ரீராமோ(அ)த்ர விபீ⁴ஷணோ(அ)யமநகோ⁴ ரக்ஷோப⁴யாதா³க³த꞉
ஸுக்³ரீவாநய பாலயைநமது⁴நா பௌலஸ்த்யமேவாக³தம் ।
இத்யுக்த்வா(அ)ப⁴யமஸ்ய ஸர்வவிதி³தம் யோ ராக⁴வோ த³த்தவாந்
ஆர்தத்ராணபராயண꞉ ஸ ப⁴க³வாந்நாராயணோ மே க³தி꞉ ॥ 3 ॥

நக்ரக்³ரஸ்தபத³ம் ஸமுத்³த்⁴ருதகரம் ப்³ரஹ்மாத³யோ போ⁴꞉ ஸுரா
ரக்ஷந்தாமிதி தீ³நவாக்யகரிணம் தே³வேஷ்வஶக்தேஷு ய꞉ ।
மா பை⁴ஷீரிதி தஸ்ய நக்ரஹநநே சக்ராயுத⁴꞉ ஶ்ரீத⁴ரோ
ஹ்யார்தத்ராணபராயண꞉ ஸ ப⁴க³வாந்நாராயணோ மே க³தி꞉ ॥ 4 ॥

போ⁴ க்ருஷ்ணாச்யுத போ⁴ க்ருபாலய ஹரே போ⁴ பாண்ட³வாநாம் ஸகே²
க்வாஸி க்வாஸி ஸுயோத⁴நாத்³யபஹ்ருதாம் போ⁴ ரக்ஷ மாமாதுராம் ।
இத்யுக்தோ(அ)க்ஷயவஸ்த்ரஸம்ப்⁴ருததநுர்யோ(அ)பாலயத்³த்³ரௌபதீ³ம்
ஆர்தத்ராணபராயண꞉ ஸ ப⁴க³வாந்நாராயணோ மே க³தி꞉ ॥ 5 ॥

யத்பாதா³ப்³ஜநகோ²த³கம் த்ரிஜக³தாம் பாபௌக⁴வித்⁴வம்ஸநம்
யந்நாமாம்ருதபூரகம் ச பிப³தாம் ஸம்ஸாரஸந்தாரகம் ।
பாஷாணோ(அ)பி யத³ங்க்⁴ரிபத்³மரஜஸா ஶாபாந்முநேர்மோசிதோ
ஹ்யார்தத்ராணபராயண꞉ ஸ ப⁴க³வாந்நாராயணோ மே க³தி꞉ ॥ 6 ॥

பித்ரா ப்⁴ராதரமுத்தமாஸநக³தம் ஹ்யௌத்தாநபாதி³ர்த்⁴ருவோ
த்³ருஷ்ட்வா தத்ஸமமாருருக்ஷுரதி⁴கம் மாத்ரா(அ)வமாநம் க³த꞉ ।
யம் க³த்வா ஶரணம் யதா³ப தபஸா ஹேமாத்³ரிஸிம்ஹாஸநம்
ஹ்யார்தத்ராணபராயண꞉ ஸ ப⁴க³வாந்நாராயணோ மே க³தி꞉ ॥ 7 ॥

ஆர்தா விஷண்ணா꞉ ஶிதி²லாஶ்ச பீ⁴தா
கோ⁴ரேஷு ச வ்யாதி⁴ஷு வர்தமாநா꞉ ।
ஸங்கீர்த்ய நாராயணஶப்³த³மாத்ரம்
விமுக்தது³꞉கா²꞉ ஸுகி²நோ ப⁴வந்தி ॥ 8

இதி ஶ்ரீ கூரேஶஸ்வாமி க்ருத ஶ்ரீ நாராயணாஷ்டகம் ।

Report mistakes and corrections in Stotranidhi content.

Facebook Comments

மறுமொழி இடவும்

உங்கள் மின்னஞ்சல் வெளியிடப்பட மாட்டாது

error: Not allowed
%d bloggers like this: