Aranya Kanda Sarga 7 – அரண்யகாண்ட³ ஸப்தம꞉ ஸர்க³꞉ (7)

॥ ஸுதீக்ஷ்ணாஶ்ரம꞉ ॥

ராமஸ்து ஸஹிதோ ப்⁴ராத்ரா ஸீதயா ச பரந்தப꞉ ।
ஸுதீக்ஷ்ணஸ்யாஶ்ரமபத³ம் ஜகா³ம ஸஹ தைர்த்³விஜை꞉ ॥ 1 ॥

ஸ க³த்வா(அ)தூ³ரமத்⁴வாநம் நதீ³ஸ்தீர்த்வா ப³ஹூத³கா꞉ ।
த³த³ர்ஶ விபுலம் ஶைலம் மஹாமேக⁴மிவோந்நதம் ॥ 2 ॥

ததஸ்ததி³க்ஷ்வாகுவரௌ ஸந்ததம் விவிதை⁴ர்த்³ருமை꞉ ।
காநநம் தௌ விவிஶது꞉ ஸீதயா ஸஹ ராக⁴வௌ ॥ 3 ॥

ப்ரவிஷ்டஸ்து வநம் கோ⁴ரம் ப³ஹுபுஷ்பப²லத்³ருமம் ।
த³த³ர்ஶாஶ்ரமமேகாந்தே சீரமாலாபரிஷ்க்ருதம் ॥ 4 ॥

தத்ர தாபஸமாஸீநம் மலபங்கஜடாத⁴ரம் ।
ராம꞉ ஸுதீக்ஷ்ணம் விதி⁴வத்தபோவ்ருத்³த⁴மபா⁴ஷத ॥ 5 ॥

ராமோ(அ)ஹமஸ்மி ப⁴க³வந்ப⁴வந்தம் த்³ரஷ்டுமாக³த꞉ ।
த்வம் மா(அ)பி⁴வத³ த⁴ர்மஜ்ஞ மஹர்ஷே ஸத்யவிக்ரம ॥ 6 ॥

ஸ நிரீக்ஷ்ய ததோ வீரம் ராமம் த⁴ர்மப்⁴ருதாம் வரம் ।
ஸமாஶ்லிஷ்ய ச பா³ஹுப்⁴யாமித³ம் வசநமப்³ரவீத் ॥ 7 ॥

ஸ்வாக³தம் க²லு தே வீர ராம த⁴ர்மப்⁴ருதாம் வர ।
ஆஶ்ரமோ(அ)யம் த்வயாக்ராந்த꞉ ஸநாத² இவ ஸாம்ப்ரதம் ॥ 8 ॥

ப்ரதீக்ஷமாணஸ்த்வாமேவ நாரோஹே(அ)ஹம் மாஹாயஶ꞉ ।
தே³வலோகமிதோ வீர தே³ஹம் த்யக்த்வா மஹீதலே ॥ 9 ॥

சித்ரகூடமுபாதா³ய ராஜ்யப்⁴ரஷ்டோ(அ)ஸி மே ஶ்ருத꞉ ।
இஹோபயாத꞉ காகுத்ஸ்த² தே³வராஜ꞉ ஶதக்ரது꞉ ॥ 10 ॥

உபாக³ம்ய ச மாம் தே³வோ மஹாதே³வ꞉ ஸுரேஶ்வர꞉ ।
ஸர்வாம்ˮல்லோகாஞ்ஜிதாநாஹ மம புண்யேந கர்மணா ॥ 11 ॥

தேஷு தே³வர்ஷிஜுஷ்டேஷு ஜிதேஷு தபஸா மயா ।
மத்ப்ரஸாதா³த்ஸபா⁴ர்யஸ்த்வம் விஹரஸ்வ ஸலக்ஷ்மண꞉ ॥ 12 ॥

தமுக்³ரதபஸா யுக்தம் மஹர்ஷிம் ஸத்யவாதி³நம் ।
ப்ரத்யுவாசாத்மவாந்ராமோ ப்³ரஹ்மாணமிவ காஶ்யப꞉ ॥ 13 ॥

அஹமேவாஹரிஷ்யாமி ஸ்வயம் லோகாந்மஹாமுநே ।
ஆவாஸம் த்வஹமிச்சா²மி ப்ரதி³ஷ்டமிஹ காநநே ॥ 14 ॥

ப⁴வாந்ஸர்வத்ர குஶல꞉ ஸர்வபூ⁴தஹிதே ரத꞉ ।
ஆக்²யாத꞉ ஶரப⁴ங்கே³ண கௌ³தமேந மஹாத்மநா ॥ 15 ॥

ஏவமுக்தஸ்து ராமேண மஹர்ஷிர்லோகவிஶ்ருத꞉ ।
அப்³ரவீந்மது⁴ரம் வாக்யம் ஹர்ஷேண மஹதா(ஆ)ப்லுத꞉ ॥ 16 ॥

அயமேவாஶ்ரமோ ராம கு³ணவாந்ரம்யதாமிஹ ।
ருஷிஸங்கா⁴நுசரித꞉ ஸதா³ மூலப²லாந்வித꞉ ॥ 17 ॥

இமமாஶ்ரமமாக³ம்ய ம்ருக³ஸங்கா⁴ மஹாயஶா꞉ ।
அடித்வா ப்ரதிக³ச்ச²ந்தி லோப⁴யித்வாகுதோப⁴யா꞉ ॥ 18 ॥

நாந்யோ தோ³ஷோ ப⁴வேத³த்ர ம்ருகே³ப்⁴யோ(அ)ந்யத்ர வித்³தி⁴ வை ।
தச்ச்²ருத்வா வசநம் தஸ்ய மஹர்ஷேர்லக்ஷ்மணாக்³ரஜ꞉ ॥ 19 ॥

உவாச வசநம் தீ⁴ரோ விக்ருஷ்ய ஸஶரம் த⁴நு꞉ ।
தாநஹம் ஸுமஹாபா⁴க³ ம்ருக³ஸங்கா⁴ந்ஸமாக³தான் ॥ 20 ॥

ஹந்யாம் நிஶிததா⁴ரேண ஶரேணாஶநிவர்சஸா ।
ப⁴வாம்ஸ்தத்ராபி⁴ஷஜ்யேத கிம் ஸ்யாத்க்ருச்ச்²ரதரம் தத꞉ ॥ 21 ॥

ஏதஸ்மிந்நாஶ்ரமே வாஸம் சிரம் து ந ஸமர்த²யே ।
தமேவமுக்த்வா வரத³ம் ராம꞉ ஸந்த்⁴யாமுபாக³மத் ॥ 22 ॥

அந்வாஸ்ய பஶ்சிமாம் ஸந்த்⁴யாம் தத்ர வாஸமகல்பயத் ।
ஸுதீக்ஷ்ணஸ்யாஶ்ரமே ரம்யே ஸீதயா லக்ஷ்மணேந ச ॥ 23 ॥

தத꞉ ஶுப⁴ம் தாபஸபோ⁴ஜ்யமந்நம்
ஸ்வயம் ஸுதீக்ஷ்ண꞉ புருஷர்ஷபா⁴ப்⁴யாம் ।
தாப்⁴யாம் ஸுஸத்க்ருத்ய த³தௌ³ மஹாத்மா
ஸந்த்⁴யாநிவ்ருத்தௌ ரஜநீமவேக்ஷ்ய ॥ 24 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ ஸப்தம꞉ ஸர்க³꞉ ॥ 7 ॥

Did you see any mistake/variation in the content above? Click here to report mistakes and corrections in Stotranidhi content.