Aranya Kanda Sarga 40 – அரண்யகாண்ட³ சத்வாரிம்ஶ꞉ ஸர்க³꞉ (40)


॥ மாயாம்ருக³ரூபபரிக்³ரஹநிர்ப³ந்த⁴꞉ ॥

மாரீசேந து தத்³வாக்யம் க்ஷமம் யுக்தம் நிஶாசர꞉ ।
உக்தோ ந ப்ரதிஜக்³ராஹ மர்துகாம இவௌஷத⁴ம் ॥ 1 ॥

தம் பத்²யஹிதவக்தாரம் மாரீசம் ராக்ஷஸாதி⁴ப꞉ ।
அப்³ரவீத்பருஷம் வாக்யமயுக்தம் காலசோதி³த꞉ ॥ 2 ॥

யத்கிலைதத³யுக்தார்த²ம் மாரீச மயி கத்²யதே ।
வாக்யம் நிஷ்ப²லமத்யர்த²முப்தம் பீ³ஜமிவோஷரே ॥ 3 ॥

த்வத்³வாக்யைர்ந து மாம் ஶக்யம் பே⁴த்தும் ராமஸ்ய ஸம்யுகே³ ।
பாபஶீலஸ்ய மூர்க²ஸ்ய மாநுஷஸ்ய விஶேஷத꞉ ॥ 4 ॥

யஸ்த்யக்த்வா ஸுஹ்ருதோ³ ராஜ்யம் மாதரம் பிதரம் ததா² ।
ஸ்த்ரீவாக்யம் ப்ராக்ருதம் ஶ்ருத்வா வநமேகபதே³ க³த꞉ ॥ 5 ॥

அவஶ்யம் து மயா தஸ்ய ஸம்யுகே³ க²ரகா⁴திந꞉ ।
ப்ராணை꞉ ப்ரியதரா ஸீதா ஹர்தவ்யா தவ ஸந்நிதௌ⁴ ॥ 6 ॥

ஏவம் மே நிஶ்சிதா பு³த்³தி⁴ர்ஹ்ருதி³ மாரீச வர்ததே ।
ந வ்யாவர்தயிதும் ஶக்யா ஸேந்த்³ரைரபி ஸுராஸுரை꞉ ॥ 7 ॥

தோ³ஷம் கு³ணம் வா ஸம்ப்ருஷ்டஸ்த்வமேவம் வக்துமர்ஹஸி ।
அபாயம் வா(அ)ப்யுபாயம் வா கார்யஸ்யாஸ்ய விநிஶ்சயே ॥ 8 ॥

ஸம்ப்ருஷ்டேந து வக்தவ்யம் ஸசிவேந விபஶ்சிதா ।
உத்³யதாஞ்ஜலிநா ராஜ்ஞே ய இச்சே²த்³பூ⁴திமாத்மந꞉ ॥ 9 ॥

வாக்யமப்ரதிகூலம் து ம்ருது³பூர்வம் ஹிதம் ஶுப⁴ம் ।
உபசாரேண யுக்தம் ச வக்தவ்யோ வஸுதா⁴தி⁴ப꞉ ॥ 10 ॥

ஸாவமர்த³ம் து யத்³வாக்யம் மாரீச ஹிதமுச்யதே ।
நாபி⁴நந்த³தி தத்³ராஜா மாநார்ஹோ மாநவர்ஜிதம் ॥ 11 ॥

பஞ்ச ரூபாணி ராஜாநோ தா⁴ரயந்த்யமிதௌஜஸ꞉ ।
அக்³நேரிந்த்³ரஸ்ய ஸோமஸ்ய வருணஸ்ய யமஸ்ய ச ॥ 12 ॥

ஔஷ்ண்யம் ததா² விக்ரமம் ச ஸௌம்யம் த³ண்ட³ம் ப்ரஸந்நதாம் ।
தா⁴ரயந்தி மஹாத்மாநோ ராஜாந꞉ க்ஷணதா³சர ॥ 13 ॥

தஸ்மாத்ஸர்வாஸ்வவஸ்தா²ஸு மாந்யா꞉ பூஜ்யாஶ்ச பார்தி²வா꞉ ।
த்வம் து த⁴ர்மமவிஜ்ஞாய கேவலம் மோஹமாஸ்தி²த꞉ ॥ 14 ॥

அப்⁴யாக³தம் மாம் தௌ³ராத்ம்யாத் பருஷம் வக்துமிச்ச²ஸி ।
கு³ணதோ³ஷௌ ந ப்ருச்சா²மி க்ஷமம் சாத்மநி ராக்ஷஸ ॥ 15 ॥

மயோக்தம் தவ சைதாவத் ஸம்ப்ரத்யமிதவிக்ரம ।
அஸ்மிம்ஸ்து த்வம் மஹாக்ருத்யே ஸாஹாய்யம் கர்துமர்ஹஸி ॥ 16 ॥

ஶ்ருணு தத்கர்ம ஸாஹாய்யே யத்கார்யம் வசநாந்மம ।
ஸௌவர்ணஸ்த்வம் ம்ருகோ³ பூ⁴த்வா சித்ரோ ரஜதபி³ந்து³பி⁴꞉ ॥ 17 ॥

ஆஶ்ரமே தஸ்ய ராமஸ்ய ஸீதாயா꞉ ப்ரமுகே² சர ।
ப்ரளோப⁴யித்வா வைதே³ஹீம் யதே²ஷ்டம் க³ந்துமர்ஹஸி ॥ 18 ॥

த்வாம் து மாயாம்ருக³ம் த்³ருஷ்ட்வா காஞ்சநம் ஜாதவிஸ்மயா ।
ஆநயைநமிதி க்ஷிப்ரம் ராமம் வக்ஷ்யதி மைதி²லீ ॥ 19 ॥

அபக்ராந்தே ச காகுத்ஸ்தே² தூ³ரம் யாத்வாப்யுதா³ஹர ।
ஹா ஸீதே லக்ஷ்மணேத்யேவம் ராமவாக்யாநுரூபகம் ॥ 20 ॥

தச்ச்²ருத்வா ராமபத³வீம் ஸீதாயா ச ப்ரசோதி³த꞉ ।
அநுக³ச்ச²தி ஸம்ப்⁴ராந்த꞉ ஸௌமித்ரிரபி ஸௌஹ்ருதா³த் ॥ 21 ॥

அபக்ராந்தே ச காகுத்ஸ்தே² லக்ஷ்மணே ச யதா²ஸுக²ம் ।
ஆநயிஷ்யாமி வைதே³ஹீம் ஸஹஸ்ராக்ஷ꞉ ஶசீமிவ ॥ 22 ॥

ஏவம் க்ருத்வா த்வித³ம் கார்யம் யதே²ஷ்டம் க³ச்ச² ராக்ஷஸ ।
ராஜ்யஸ்யார்த⁴ம் ப்ரயச்சா²மி மாரீச தவ ஸுவ்ரத ॥ 23 ॥

க³ச்ச² ஸௌம்ய ஶிவம் மார்க³ம் கார்யஸ்யஸ்ய விவ்ருத்³த⁴யே ।
அஹம் த்வா(அ)நுக³மிஷ்யாமி ஸரதோ² த³ண்ட³காவநம் ॥ 24 ॥

ப்ராப்ய ஸீதாமயுத்³தே⁴ந வஞ்சயித்வா து ராக⁴வம் ।
லங்காம் ப்ரதி க³மிஷ்யாமி க்ருதகார்ய꞉ ஸஹ த்வயா ॥ 25 ॥

ந சேத் கரோஷி மாரீச ஹந்மி த்வாமஹமத்³ய வை ।
ஏதத்கார்யமவஶ்யம் மே ப³லாத³பி கரிஷ்யஸி ।
ராஜ்ஞோ ஹி ப்ரதிகூலஸ்தோ² ந ஜாது ஸுக²மேத⁴தே ॥ 26 ॥

ஆஸாத்³ய தம் ஜீவிதஸம்ஶயஸ்தே
ம்ருத்யுர்த்⁴ருவோ ஹ்யத்³ய மயா விருத்³த்⁴ய ।
ஏதத்³யதா²வத்ப்ரதிக்³ருஹ்ய பு³த்³த்⁴யா
யத³த்ர பத்²யம் குரு தத்ததா² த்வம் ॥ 27 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ சத்வாரிம்ஶ꞉ ஸர்க³꞉ ॥ 40 ॥


గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed