Sundarakanda Sarga (Chapter) 64 – ஸுந்த³ரகாண்ட³ சது꞉ஷஷ்டிதம꞉ ஸர்க³꞉ (64)

ஸ்தோத்ரநிதி → வால்மீகி ராமாயணே ஸுந்த³ரகாண்ட³ → ஸுந்த³ரகாண்ட³ சது꞉ஷஷ்டிதம꞉ ஸர்க³꞉ (64)

॥ ஹநூமாத்³யாக³மநம் ॥

ஸுக்³ரீவேணைவமுக்தஸ்து ஹ்ருஷ்டோ த³தி⁴முக²꞉ கபி꞉ ।
ராக⁴வம் லக்ஷ்மணம் சைவ ஸுக்³ரீவம் சாப்⁴யவாத³யத் ॥ 1 ॥

ஸ ப்ரணம்ய ச ஸுக்³ரீவம் ராக⁴வௌ ச மஹாப³லௌ ।
வாநரை꞉ ஸஹ தை꞉ ஶூரைர்தி³வமேவோத்பபாத ஹ ॥ 2 ॥

ஸ யதை²வாக³த꞉ பூர்வம் ததை²வ த்வரிதம் க³த꞉ ।
நிபத்ய க³க³நாத்³பூ⁴மௌ தத்³வநம் ப்ரவிவேஶ ஹ ॥ 3 ॥

ஸ ப்ரவிஷ்டோ மது⁴வநம் த³த³ர்ஶ ஹரியூத²பாந் ।
விமதா³நுத்தி²தாந்ஸர்வாந்மேஹமாநாந்மதூ⁴த³கம் ॥ 4 ॥

ஸ தாநுபாக³மத்³வீரோ ப³த்³த்⁴வா கரபுடாஞ்ஜலிம் ।
உவாச வசநம் ஶ்லக்ஷ்ணமித³ம் ஹ்ருஷ்டவத³ங்க³த³ம் ॥ 5 ॥

ஸௌம்ய ரோஷோ ந கர்தவ்யோ யதே³பி⁴ரபி⁴வாரித꞉ ।
அஜ்ஞாநாத்³ரக்ஷிபி⁴꞉ க்ரோதா⁴த்³ப⁴வந்த꞉ ப்ரதிஷேதி⁴தா꞉ ॥ 6 ॥

யுவராஜஸ்த்வமீஶஶ்ச வநஸ்யாஸ்ய மஹாப³ல ।
மௌர்க்²யாத்பூர்வம் க்ருதோ தோ³ஷஸ்தம் ப⁴வாந் க்ஷந்துமர்ஹதி ॥ 7 ॥

ஆக்²யாதம் ஹி மயா க³த்வா பித்ருவ்யஸ்ய தவாநக⁴ ।
இஹோபயாதம் ஸர்வேஷாமேதேஷாம் வநசாரிணாம் ॥ 8 ॥

ஸ த்வதா³க³மநம் ஶ்ருத்வா ஸஹைபி⁴ர்ஹரியூத²பை꞉ ।
ப்ரஹ்ருஷ்டோ ந து ருஷ்டோ(அ)ஸௌ வநம் ஶ்ருத்வா ப்ரத⁴ர்ஷிதம் ॥ 9 ॥

ப்ரஹ்ருஷ்டோ மாம் பித்ருவ்யஸ்தே ஸுக்³ரீவோ வாநரேஶ்வர꞉ ।
ஶீக்⁴ரம் ப்ரேஷய ஸர்வாம்ஸ்தாநிதி ஹோவாச பார்தி²வ꞉ ॥ 10 ॥

ஶ்ருத்வா த³தி⁴முக²ஸ்தைதத்³வசநம் ஶ்லக்ஷ்ணமங்க³த³꞉ ।
அப்³ரவீத்தாந்ஹரிஶ்ரேஷ்டோ² வாக்யம் வாக்யவிஶாரத³꞉ ॥ 11 ॥

ஶங்கே ஶ்ருதோ(அ)யம் வ்ருத்தாந்தோ ராமேண ஹரியூத²பா꞉ ।
தத்க்ஷமம் நேஹ ந꞉ ஸ்தா²தும் க்ருதே கார்யே பரந்தபா꞉ ॥ 12 ॥

பீத்வா மது⁴ யதா²காமம் விஶ்ராந்தா வநசாரிண꞉ ।
கிம் ஶேஷம் க³மநம் தத்ர ஸுக்³ரீவோ யத்ர மே கு³ரு꞉ ॥ 13 ॥

ஸர்வே யதா² மாம் வக்ஷ்யந்தி ஸமேத்ய ஹரியூத²பா꞉ ।
ததா²(அ)ஸ்மி கர்தா கர்தவ்யே ப⁴வத்³பி⁴꞉ பரவாநஹம் ॥ 14 ॥

நாஜ்ஞாபயிதுமீஶோ(அ)ஹம் யுவராஜோ(அ)ஸ்மி யத்³யபி ।
அயுக்தம் க்ருதகர்மாணோ யூயம் த⁴ர்ஷயிதும் மயா ॥ 15 ॥

ப்³ருவதஶ்சாங்க³த³ஸ்யைவம் ஶ்ருத்வா வசநமவ்யயம் ।
ப்ரஹ்ருஷ்டமநஸோ வாக்யமித³மூசுர்வநௌகஸ꞉ ॥ 16 ॥

ஏவம் வக்ஷ்யதி கோ ராஜந்ப்ரபு⁴꞉ ஸந்வாநரர்ஷப⁴ ।
ஐஶ்வர்யமத³மத்தோ ஹி ஸர்வோ(அ)ஹமிதி மந்யதே ॥ 17 ॥

தவ சேத³ம் ஸுஸத்³ருஶம் வாக்யம் நாந்யஸ்ய கஸ்யசித் ।
ஸந்நதிர்ஹி தவாக்²யாதி ப⁴விஷ்யச்சு²ப⁴யோக்³யதாம் ॥ 18 ॥

ஸர்வே வயமபி ப்ராப்தாஸ்தத்ர க³ந்தும் க்ருதக்ஷணா꞉ ।
ஸ யத்ர ஹரிவீராணாம் ஸுக்³ரீவ꞉ பதிரவ்யய꞉ ॥ 19 ॥

த்வயா ஹ்யநுக்தைர்ஹரிபி⁴ர்நைவ ஶக்யம் பதா³த்பத³ம் ।
க்வசித்³க³ந்தும் ஹரிஶ்ரேஷ்ட² ப்³ரூம꞉ ஸத்யமித³ம் து தே ॥ 20 ॥

ஏவம் து வத³தாம் தேஷாமங்க³த³꞉ ப்ரத்யபா⁴ஷத ।
பா³ட⁴ம் க³ச்சா²ம இத்யுக்த்வா உத்பபாத மஹீதலாத் ॥ 21 ॥ [க²முத்பேதுர்மஹாப³லா꞉]

உத்பதந்தமநூத்பேது꞉ ஸர்வே தே ஹரியூத²பா꞉ ।
க்ருத்வாகாஶம் நிராகாஶம் யந்த்ரோத்க்ஷிப்தா இவாசலா꞉ ॥ 22 ॥

[* அங்க³த³ம் புரத꞉ க்ருத்வா ஹநூமந்தம் ச வாநரம் । *]
தேம்ப³ரம் ஸஹஸோத்பத்ய வேக³வந்த꞉ ப்லவங்க³மா꞉ ।
விநத³ந்தோ மஹாநாத³ம் க⁴நா வாதேரிதா யதா² ॥ 23 ॥

அங்க³தே³ ஸமநுப்ராப்தே ஸுக்³ரீவோ வாநராதி⁴ப꞉ ।
உவாச ஶோகோபஹதம் ராமம் கமலலோசநம் ॥ 24 ॥

ஸமாஶ்வஸிஹி ப⁴த்³ரம் தே த்³ருஷ்டா தே³வீ ந ஸம்ஶய꞉ ।
நாக³ந்துமிஹ ஶக்யம் தைரதீதே ஸமயே ஹி ந꞉ ॥ 25 ॥

ந மத்ஸகாஶமாக³ச்சே²த்க்ருத்யே ஹி விநிபாதிதே ।
யுவராஜோ மஹாபா³ஹு꞉ ப்லவதாம் ப்ரவரோங்க³த³꞉ ॥ 26 ॥

யத்³யப்யக்ருதக்ருத்யாநாமீத்³ருஶ꞉ ஸ்யாது³பக்ரம꞉ ।
ப⁴வேத்ஸ தீ³நவத³நோ ப்⁴ராந்தவிப்லுதமாநஸ꞉ ॥ 27 ॥

பித்ருபைதாமஹம் சைதத்பூர்வகைரபி⁴ரக்ஷிதம் ।
ந மே மது⁴வநம் ஹந்யாத³ஹ்ருஷ்ட꞉ ப்லவகே³ஶ்வர꞉ ॥ 28 ॥

கௌஸல்யா ஸுப்ரஜா ராம ஸமாஶ்வஸிஹி ஸுவ்ரத ।
த்³ருஷ்டா தே³வீ ந ஸந்தே³ஹோ ந சாந்யேந ஹநூமதா ॥ 29 ॥

ந ஹ்யந்ய꞉ கர்மணோ ஹேது꞉ ஸாத⁴நே(அ)ஸ்ய ஹநூமத꞉ ।
ஹநூமதி ஹி ஸித்³தி⁴ஶ்ச மதிஶ்ச மதிஸத்தம ॥ 30 ॥

வ்யவஸாயஶ்ச வீர்யம் ச ஸூர்யே தேஜ இவ த்⁴ருவம் ।
ஜாம்ப³வாந்யத்ர நேதா ஸ்யாத³ங்க³த³ஶ்ச ப³லேஶ்வர꞉ ॥ 31 ॥

ஹநுமாம்ஶ்சாப்யதி⁴ஷ்டா²தா ந தஸ்ய க³திரந்யதா² ।
மா பூ⁴ஶ்சிந்தாஸமாயுக்த꞉ ஸம்ப்ரத்யமிதவிக்ரம ॥ 32 ॥

தத꞉ கிலகிலாஶப்³த³ம் ஶுஶ்ராவாஸந்நமம்ப³ரே ।
ஹநுமத்கர்மத்³ருப்தாநாம் நர்த³தாம் காநநௌகஸாம் ॥ 33 ॥

கிஷ்கிந்தா⁴முபயாதாநாம் ஸித்³தி⁴ம் கத²யதாமிவ ।
தத꞉ ஶ்ருத்வா நிநாத³ம் தம் கபீநாம் கபிஸத்தம꞉ ॥ 34 ॥

ஆயதாஞ்சிதலாங்கூ³ள꞉ ஸோ(அ)ப⁴வத்³த்⁴ருஷ்டமாநஸ꞉ ।
ஆஜக்³முஸ்தே(அ)பி ஹரயோ ராமத³ர்ஶநகாங்க்ஷிண꞉ ॥ 35 ॥

அங்க³த³ம் புரத꞉ க்ருத்வா ஹநூமந்தம் ச வாநரம் ।
தே(அ)ங்க³த³ப்ரமுகா² வீரா꞉ ப்ரஹ்ருஷ்டாஶ்ச முதா³ந்விதா꞉ ॥ 36 ॥

நிபேதுர்ஹரிராஜஸ்ய ஸமீபே ராக⁴வஸ்ய ச ।
ஹநுமாம்ஶ்ச மஹாப³ஹு꞉ ப்ரணம்ய ஶிரஸா தத꞉ ॥ 37 ॥

நியதாமக்ஷதாம் தே³வீம் ராக⁴வாய ந்யவேத³யத் ॥ 38 ॥

[* அதி⁴கபாட²꞉ –
த்³ருஷ்டா தே³வீதி ஹநுமத்³வத³நாத³ம்ருதோபமம் ।
ஆகர்ண்ய வசநம் ராமோ ஹர்ஷமாப ஸலக்ஷ்மண꞉ ॥
*]

நிஶ்சிதார்த²ஸ்ததஸ்தஸ்மிந்ஸுக்³ரீவ꞉ பவநாத்மஜே ।
லக்ஷ்மண꞉ ப்ரீதிமாந்ப்ரீதம் ப³ஹுமாநாத³வைக்ஷத ॥ 39 ॥

ப்ரீத்யா ச ரமமாணோ(அ)த² ராக⁴வ꞉ பரவீரஹா ।
ப³ஹுமாநேந மஹதா ஹநூமந்தமவைக்ஷத ॥ 40 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ சது꞉ஷஷ்டிதம꞉ ஸர்க³꞉ ॥ 64 ॥

ஸுந்த³ரகாண்ட³ பஞ்சஷஷ்டிதம꞉ ஸர்க³꞉ (65)>>

---

ஸம்பூர்ண வால்மீகி ஸுந்த³ரகாண்ட³ம் பார்க்க.

Did you see any mistake/variation in the content above? Click here to report mistakes and corrections in Stotranidhi content.