Sundarakanda Sarga (Chapter) 50 – ஸுந்த³ரகாண்ட³ பஞ்சாஶ꞉ ஸர்க³꞉ (50)

ஸ்தோத்ரநிதி → வால்மீகி ராமாயணே ஸுந்த³ரகாண்ட³ → ஸுந்த³ரகாண்ட³ பஞ்சாஶ꞉ ஸர்க³꞉ (50)

॥ ப்ரஹஸ்தப்ரஶ்ந꞉ ॥

தமுத்³வீக்ஷ்ய மஹாபா³ஹு꞉ பிங்கா³க்ஷம் புரத꞉ ஸ்தி²தம் ।
ரோஷேண மஹதாவிஷ்டோ ராவணோ லோகராவண꞉ ॥ 1 ॥ [கோபேந]

ஶங்காஹதாத்மா த³த்⁴யௌ ஸ கபீந்த்³ரம் தேஜஸாவ்ருதம் ।
கிமேஷ ப⁴க³வாந்நந்தீ³ ப⁴வேத்ஸாக்ஷாதி³ஹாக³த꞉ ॥ 2 ॥

யேந ஶப்தோ(அ)ஸ்மி கைலாஸே மயா ஸஞ்சாலிதே புரா ।
ஸோ(அ)யம் வாநரமூர்தி꞉ ஸ்யாத்கிம்ஸ்வித்³பா³ணோ(அ)பி வாஸுர꞉ ॥ 3 ॥

ஸ ராஜா ரோஷதாம்ராக்ஷ꞉ ப்ரஹஸ்தம் மந்த்ரிஸத்தமம் ।
காலயுக்தமுவாசேத³ம் வசோ விபுலமர்த²வத் ॥ 4 ॥

து³ராத்மா ப்ருச்ச்²யதாமேஷ குத꞉ கிம் வாஸ்ய காரணம் ।
வநப⁴ங்கே³ ச கோ(அ)ஸ்யார்தோ² ராக்ஷஸீநாம் ச தர்ஜநே ॥ 5 ॥

மத்புரீமப்ரத்⁴ருஷ்யாம் வாக³மநே கிம் ப்ரயோஜநம் ।
ஆயோத⁴நே வா கிம் கார்யம் ப்ருச்ச்²யதாமேஷ து³ர்மதி꞉ ॥ 6 ॥

ராவணஸ்ய வச꞉ ஶ்ருத்வா ப்ரஹஸ்தோ வாக்யமப்³ரவீத் ।
ஸமாஶ்வஸிஹி ப⁴த்³ரம் தே ந பீ⁴꞉ கார்யா த்வயா கபே ॥ 7 ॥

யதி³ தாவத்த்வமிந்த்³ரேண ப்ரேஷிதோ ராவணாலயம் ।
தத்த்வமாக்²யாஹி மா பூ⁴த்தே ப⁴யம் வாநர மோக்ஷ்யஸே ॥ 8 ॥

யதி³ வைஶ்ரவணஸ்ய த்வம் யமஸ்ய வருணஸ்ய ச ।
சாரரூபமித³ம் க்ருத்வா ப்ரவிஷ்டோ ந꞉ புரீமிமாம் ॥ 9 ॥

விஷ்ணுநா ப்ரேஷிதோ வாபி தூ³தோ விஜயகாங்க்ஷிணா ।
ந ஹி தே வாநரம் தேஜோ ரூபமாத்ரம் து வாநரம் ॥ 10 ॥

தத்த்வத꞉ கத²யஸ்வாத்³ய ததோ வாநர மோக்ஷ்யஸே ।
அந்ருதம் வத³தஶ்சாபி து³ர்லப⁴ம் தவ ஜீவிதம் ॥ 11 ॥

அத²வா யந்நிமித்தம் தே ப்ரவேஶோ ராவணாலயே ।
ஏவமுக்தோ ஹரிஶ்ரேஷ்ட²ஸ்ததா³ ரக்ஷோக³ணேஶ்வரம் ॥ 12 ॥

அப்³ரவீந்நாஸ்மி ஶக்ரஸ்ய யமஸ்ய வருணஸ்ய வா ।
த⁴நதே³ந ந மே ஸக்²யம் விஷ்ணுநா நாஸ்மி சோதி³த꞉ ॥ 13 ॥

ஜாதிரேவ மம த்வேஷா வாநரோ(அ)ஹமிஹாக³த꞉ ।
த³ர்ஶநே ராக்ஷஸேந்த்³ரஸ்ய து³ர்லபே⁴ ததி³த³ம் மயா ॥ 14 ॥

வநம் ராக்ஷஸராஜஸ்ய த³ர்ஶநார்தே² விநாஶிதம் ।
ததஸ்தே ராக்ஷஸா꞉ ப்ராப்தா ப³லிநோ யுத்³த⁴காங்க்ஷிண꞉ ॥ 15 ॥

ரக்ஷணார்த²ம் து தே³ஹஸ்ய ப்ரதியுத்³தா⁴ மயா ரணே ।
அஸ்த்ரபாஶைர்ந ஶக்யோ(அ)ஹம் ப³த்³து⁴ம் தே³வாஸுரைரபி ॥ 16 ॥

பிதாமஹாதே³வ வரோ மமாப்யேஷோப்⁴யுபாக³த꞉ ।
ராஜாநம் த்³ரஷ்டுகாமேந மயாஸ்த்ரமநுவர்திதம் ॥ 17 ॥

விமுக்தோ ஹ்யஹமஸ்த்ரேண ராக்ஷஸைஸ்த்வபி⁴பீடி³த꞉ ।
கேநசித்³ராஜகார்யேண ஸம்ப்ராப்தோ(அ)ஸ்மி தவாந்திகம் ॥ 18 ॥

தூ³தோ(அ)ஹமிதி விஜ்ஞேயோ ராக⁴வஸ்யாமிதௌஜஸ꞉ ।
ஶ்ரூயதாம் சாபி வசநம் மம பத்²யமித³ம் ப்ரபோ⁴ ॥ 19 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ பஞ்சாஶ꞉ ஸர்க³꞉ ॥ 50 ॥

ஸுந்த³ரகாண்ட³ ஏகபஞ்சாஶ꞉ ஸர்க³꞉ (51)>>

---

ஸம்பூர்ண வால்மீகி ஸுந்த³ரகாண்ட³ம் பார்க்க.

Did you see any mistake/variation in the content above? Click here to report mistakes and corrections in Stotranidhi content.