Ayodhya Kanda Sarga 81 – அயோத்⁴யாகாண்ட³ ஏகாஶீதிதம꞉ ஸர்க³꞉ (81)

॥ ஸபா⁴ஸ்தாநம் ॥

ததோ நாந்தீ³முகீ²ம் ராத்ரிம் ப⁴ரதம் ஸூதமாக³தா⁴꞉ ।
துஷ்டுவுர்வாக்³விஶேஷஜ்ஞா꞉ ஸ்தவை꞉ மங்க³ளஸம்ஹிதை꞉ ॥ 1 ॥

ஸுவர்ண கோணாபி⁴ஹத꞉ ப்ராணத³த்³யாமது³ந்து³பி⁴꞉ ।
த³த்⁴மு꞉ ஶங்கா²ம்ஶ்ச ஶதஶோ நாதா³ம்ஶ்சோச்சாவசஸ்வராந் ॥ 2 ॥

ஸ தூர்யகோ⁴ஷ꞉ ஸுமஹாந் தி³வமாபூரயந்நிவ ।
ப⁴ரதம் ஶோகஸந்தப்தம் பூ⁴ய꞉ ஶோகைரரந்த்⁴ரயத் ॥ 3 ॥

தத꞉ ப்ரபு³த்³தோ⁴ ப⁴ரதஸ்தம் கோ⁴ஷம் ஸம்நிவர்த்ய ச ।
நாஹம் ராஜேதி சாப்யுக்த்வா ஶத்ருக்⁴நமித³மப்³ரவீத் ॥ 4 ॥

பஶ்ய ஶத்ருக்⁴ந கைகேய்யா லோகஸ்யாபக்ருதம் மஹத் ।
விஸ்ருஜ்ய மயி து³꞉கா²நி ராஜா த³ஶரதோ² க³த꞉ ॥ 5 ॥

தஸ்யைஷா த⁴ர்மராஜஸ்ய த⁴ர்மமூலா மஹாத்மந꞉ ।
பரிப்⁴ரமதி ராஜஶ்ரீ꞉ நௌரிவாகர்ணிகா ஜலே ॥ 6 ॥

யோ ஹி ந꞉ ஸுமஹாந்நாத²꞉ ஸோ(அ)பி ப்ரவ்ராஜிதோ வநம் ।
அநயா த⁴ர்மமுத்ஸ்ருஜ்ய மாத்ரா மே ராக⁴வ꞉ ஸ்வயம் ॥ 7 ॥

இத்யேவம் ப⁴ரதம் ப்ரேக்ஷ்ய விளபந்தம் விசேதநம் ।
க்ருபணம் ருருது³꞉ ஸர்வா꞉ ஸஸ்வரம் யோஷிதஸ்ததா³ ॥ 8 ॥

ததா² தஸ்மிந்விளபதி வஸிஷ்டோ² ராஜத⁴ர்மவித் ।
ஸபா⁴மிக்ஷ்வாகுநாத²ஸ்ய ப்ரவிவேஶ மஹாயஶா꞉ ॥ 9 ॥

ஶாதகும்ப⁴மயீம் ரம்யாம் மணிரத்நஸமாகுலாம் ।
ஸுத⁴ர்மாமிவ த⁴ர்மாத்மா ஸக³ண꞉ ப்ரத்யபத்³யத ॥ 10 ॥

ஸ காஞ்சநமயம் பீட²ம் ஸுகா²ஸ்தரணஸம்வ்ருதம் ।
அத்⁴யாஸ்த ஸர்வவேத³ஜ்ஞோ தூ³தாநநுஶஶாஸ ச ॥ 11 ॥

ப்³ராஹ்மணாந் க்ஷத்ரியாந் வைஶ்யாந் அமாத்யாந் க³ணவல்லபா⁴ந் ।
க்ஷிப்ரமாநயதாவ்யக்³ரா꞉ க்ருத்யமாத்யயிகம் ஹி ந꞉ ॥ 12 ॥

ஸராஜப்⁴ருத்யம் ஶத்ருக்⁴நம் ப⁴ரதம் ச யஶஸ்விநம் ।
யுதா⁴ஜிதம் ஸுமந்த்ரம் ச யே ச தத்ர ஹிதா ஜநா꞉ ॥ 13 ॥

தத꞉ ஹலஹலாஶப்³தோ³ மஹாந்ஸமுத³பத்³யத ।
ரதை²ரஶ்வை꞉ க³ஜைஶ்சாபி ஜநாநாமுபக³ச்ச²தாம் ॥ 14 ॥

தத꞉ ப⁴ரதமாயாந்தம் ஶதக்ரதுமிவாமரா꞉ ।
ப்ரத்யநந்த³ந் ப்ரக்ருதயோ யதா² த³ஶரத²ம் ததா² ॥ 15 ॥

ஹ்ரதை³வ திமிநாக³ஸம்வ்ருத꞉
ஸ்திமிதஜலோ மணிஶங்க²ஶர்கர꞉ ।
த³ஶரத²ஸுதஶோபி⁴தா ஸபா⁴
ஸத³ஶரதே²வ ப³பௌ⁴ யதா² புரா ॥ 16 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அயோத்⁴யாகாண்டே³ ஏகாஶீதிதம꞉ ஸர்க³꞉ ॥ 81 ॥

அயோத்⁴யாகாண்ட³ த்³வ்யஶீதிதம꞉ ஸர்க³꞉ (82) >>

---

ஸம்பூர்ண வால்மீகி ராமாயணே அயோத்⁴யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.