Ayodhya Kanda Sarga 108 – அயோத்⁴யாகாண்ட³ அஷ்டோத்தரஶததம꞉ ஸர்க³꞉ (108)

॥ ஜாபா³லிவாக்யம் ॥

ஆஶ்வாஸயந்தம் ப⁴ரதம் ஜாபா³லிர்ப்³ராஹ்மணோத்தம꞉ ।
உவாச ராமம் த⁴ர்மஜ்ஞம் த⁴ர்மாபேதமித³ம் வச꞉ ॥ 1 ॥

ஸாது⁴ ராக⁴வ மாபூ⁴த்தே பு³த்³தி⁴ரேவம் நிரர்தி²கா ।
ப்ராக்ருதஸ்ய நரஸ்யேவ ஹ்யார்யபு³த்³தே⁴ர்மநஸ்விந꞉ ॥ 2 ॥

க꞉ கஸ்ய புருஷோ ப³ந்து⁴꞉ கிமாப்யம் கஸ்ய கேநசித் ।
யதே³கோ ஜாயதே ஜந்துரேகைவ விநஶ்யதி ॥ 3 ॥

தஸ்மாந்மாதா பிதா சேதி ராம ஸஜ்ஜேதயோ நர꞉ ।
உந்மத்த இவ ஸ ஜ்ஞேயோ நாஸ்தி கஶ்சித்³தி⁴ கஸ்யசித் ॥ 4 ॥

யதா² க்³ராமாந்தரம் க³ச்ச²ந் நர꞉ கஶ்சித் க்வசித்³வஸேத் ।
உத்ஸ்ருஜ்ய ச தமாவாஸம் ப்ரதிஷ்டே²தாபரே(அ)ஹநி ॥ 5 ॥

ஏவமேவ மநுஷ்யாணாம் பிதா மாதா க்³ருஹம் வஸு ।
ஆவாஸமாத்ரம் காகுத்ஸ்த² ஸஜ்ஜந்தே நாத்ர ஸஜ்ஜநா꞉ ॥ 6 ॥

பித்ர்யம் ராஜ்யம் பரித்யஜ்ய ஸ நார்ஹஸி நரோத்தம ।
ஆஸ்தா²தும் காபத²ம் து³꞉க²ம் விஷமம் ப³ஹுகண்டகம் ॥ 7 ॥

ஸம்ருத்³தா⁴யாமயோத்⁴யாயாமாத்மாநமபி⁴ஷேசய ।
ஏகவேணீத⁴ரா ஹி த்வாம் நக³ரீ ஸம்ப்ரதீக்ஷதே ॥ 8 ॥

ராஜபோ⁴கா³நநுப⁴வந் மஹார்ஹாந் பார்தி²வாத்மஜ ।
விஹர த்வமயோத்⁴யாயாம் யதா² ஶக்ரஸ்த்ரிவிஷ்டபே ॥ 9 ॥

ந தே கஶ்சித்³த³ஶரத²ஸ்த்வம் ச தஸ்ய ந கஶ்சந ।
அந்யோ ராஜா த்வமந்ய꞉ ஸ தஸ்மாத் குரு யது³ச்யதே ॥ 10 ॥

பீ³ஜமாத்ரம் பிதா ஜந்தோ꞉ ஶுக்லம் ருதி⁴ரமேவ ச ।
ஸம்யுக்தம்ருதுமந்மாத்ரா புருஷஸ்யேஹ ஜந்ம தத் ॥ 11 ॥

க³த꞉ ஸ ந்ருபதிஸ்தத்ர க³ந்தவ்யம் யத்ர தேந வை ।
ப்ரவ்ருத்திரேஷா மர்த்யாநாம் த்வம் து மித்²யா விஹந்யஸே ॥ 12 ॥

அர்த²த⁴ர்மபரா யே யே தாம்ஸ்தாந் ஶோசாமி நேதராந் ।
தே ஹி து³꞉க²மிஹ ப்ராப்ய விநாஶம் ப்ரேத்ய பே⁴ஜிரே ॥ 13 ॥

அஷ்டகா பித்ருதை³வத்யமித்யயம் ப்ரஸ்ருதோ ஜந꞉ ।
அந்நஸ்யோபத்³ரவம் பஶ்ய ம்ருதோ ஹி கிமஶிஷ்யதி ॥ 14 ॥

யதி³ பு⁴க்தமிஹாந்யேந தே³ஹமந்யஸ்ய க³ச்ச²தி ।
த³த்³யாத் ப்ரவஸத꞉ ஶ்ராத்³த⁴ம் ந தத் பத்²யஶநம் ப⁴வேத் ॥ 15 ॥

தா³நஸம்வநநா ஹ்யேதே க்³ரந்தா² மேதா⁴விபி⁴꞉ க்ருதா꞉ ।
யஜஸ்வ தே³ஹி தீ³க்ஷஸ்வ தபஸ்தப்யஸ்வ ஸந்த்யஜ ॥ 16 ॥

ஸ நாஸ்தி பரமித்யேவ குரு பு³த்³தி⁴ம் மஹாமதே ।
ப்ரத்யக்ஷம் யத்ததா³திஷ்ட² பரோக்ஷம் ப்ருஷ்ட²த꞉ குரு ॥ 17 ॥

ஸ தாம் பு³த்³தி⁴ம் புரஸ்க்ருத்ய ஸர்வலோகநித³ர்ஶிநீம் ।
ராஜ்யம் த்வம் ப்ரதிக்³ருஹ்ணீஷ்வ ப⁴ரதேந ப்ரஸாதி³த꞉ ॥ 18 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அயோத்⁴யாகாண்டே³ அஷ்டோத்தரஶததம꞉ ஸர்க³꞉ ॥ 108 ॥

அயோத்⁴யாகாண்ட³ நவோத்தரஶததம꞉ ஸர்க³꞉ (109) >>

---

ஸம்பூர்ண வால்மீகி ராமாயணே அயோத்⁴யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.