Read in తెలుగు / ಕನ್ನಡ / தமிழ் / देवनागरी / English (IAST)
॥ ராமாஸ்த்ரமஹிமா ॥
கதா³சித³ப்யஹம் வீர்யாத் பர்யடந் ப்ருதி²வீமிமாம் ।
ப³லம் நாக³ஸஹஸ்ரஸ்ய தா⁴ரயந் பர்வதோபம꞉ ॥ 1 ॥
நீலஜீமூதஸங்காஶஸ்தப்தகாஞ்சநகுண்ட³ல꞉ ।
ப⁴யம் லோகஸ்ய ஜநயந் கிரீடீ பரிகா⁴யுத⁴꞉ ॥ 2 ॥
வ்யசரம் த³ண்ட³காரண்யே ருஷிமாம்ஸாநி ப⁴க்ஷயந் ।
விஶ்வாமித்ரோ(அ)த² த⁴ர்மாத்மா மத்³வித்ரஸ்தோ மஹாமுநி꞉ ॥ 3 ॥
ஸ்வயம் க³த்வா த³ஶரத²ம் நரேந்த்³ரமித³மப்³ரவீத் ।
அத்³ய ரக்ஷது மாம் ராம꞉ பர்வகாலே ஸமாஹித꞉ ॥ 4 ॥
மாரீசாந்மே ப⁴யம் கோ⁴ரம் ஸமுத்பந்நம் நரேஶ்வர ।
இத்யேவமுக்தோ த⁴ர்மாத்மா ராஜா த³ஶரத²ஸ்ததா³ ॥ 5 ॥
ப்ரத்யுவாச மஹாபா⁴க³ம் விஶ்வாமித்ரம் மஹாமுநிம் ।
பா³லோ த்³வாத³ஶவர்ஷோ(அ)யமக்ருதாஸ்த்ரஶ்ச ராக⁴வ꞉ ॥ 6 ॥
காமம் து மம யத்ஸைந்யம் மயா ஸஹ க³மிஷ்யதி ।
ப³லேந சதுரங்கே³ண ஸ்வயமேத்ய நிஶாசராந் ॥ 7 ॥
வதி⁴ஷ்யாமி முநிஶ்ரேஷ்ட² ஶத்ரூம்ஸ்தே மநஸேப்ஸிதம் ।
இத்யேவமுக்த꞉ ஸ முநீ ராஜாநமித³மப்³ரவீத் ॥ 8 ॥
ராமாந்நாந்யத்³ப³லம் லோகே பர்யாப்தம் தஸ்ய ரக்ஷஸ꞉ ।
தே³வதாநாமபி ப⁴வாந் ஸமரேஷ்வபி⁴பாலக꞉ ॥ 9 ॥
ஆஸீத்தவ க்ருதம் கர்ம த்ரிலோகே விதி³தம் ந்ருப ।
காமமஸ்து மஹத்ஸைந்யம் திஷ்ட²த்விஹ பரந்தப ॥ 10 ॥
பா³லோ(அ)ப்யேஷ மஹாதேஜா꞉ ஸமர்த²ஸ்தஸ்ய நிக்³ரஹே ।
க³மிஷ்யே ராமமாதா³ய ஸ்வஸ்தி தே(அ)ஸ்து பரந்தப ॥ 11 ॥
ஏவமுக்த்வா து ஸ முநிஸ்தமாதா³ய ந்ருபாத்மஜம் ।
ஜகா³ம பரமப்ரீதோ விஶ்வாமித்ர꞉ ஸ்வமாஶ்ரமம் ॥ 12 ॥
தம் ததா³ த³ண்ட³காரண்யே யஜ்ஞமுத்³தி³ஶ்ய தீ³க்ஷிதம் ।
ப³பூ⁴வோபஸ்தி²தோ ராமஶ்சித்ரம் விஸ்பா²ரயந் த⁴நு꞉ ॥ 13 ॥
அஜாதவ்யஞ்ஜந꞉ ஶ்ரீமாந் பத்³மபத்ரநிபே⁴க்ஷண꞉ ।
ஏகவஸ்த்ரத⁴ரோ த⁴ந்வீ ஶிகீ² கநகமாலயா ॥ 14 ॥
ஶோப⁴யந் த³ண்ட³காரண்யம் தீ³ப்தேந ஸ்வேந தேஜஸா ।
அத்³ருஶ்யத ததோ ராமோ பா³லசந்த்³ர இவோதி³த꞉ ॥ 15 ॥
ததோ(அ)ஹம் மேக⁴ஸங்காஶஸ்தப்தகாஞ்சநகுண்ட³ல꞉ ।
ப³லீ த³த்தவரோ த³ர்பாதா³ஜகா³ம ததா³ஶ்ரமம் ॥ 16 ॥
தேந த்³ருஷ்ட꞉ ப்ரவிஷ்டோ(அ)ஹம் ஸஹஸைவோத்³யதாயுத⁴꞉ ।
மாம் து த்³ருஷ்டா த⁴நு꞉ ஸஜ்யமஸம்ப்⁴ராந்தஶ்சகார ஸ꞉ ॥ 17 ॥
அவஜாநந்நஹம் மோஹாத்³பா³லோ(அ)யமிதி ராக⁴வம் ।
விஶ்வாமித்ரஸ்ய தாம் வேதி³மப்⁴யதா⁴வம் க்ருதத்வர꞉ ॥ 18 ॥
தேந முக்தஸ்ததோ பா³ண꞉ ஶித꞉ ஶத்ருநிப³ர்ஹண꞉ ।
தேநாஹம் த்வாஹத꞉ க்ஷிப்த꞉ ஸமுத்³ரே ஶதயோஜநே ॥ 19 ॥
நேச்ச²தா தாத மாம் ஹந்தும் ததா³ வீரேண ரக்ஷித꞉ ।
ராமஸ்ய ஶரவேகே³ந நிரஸ்தோ(அ)ஹமசேதந꞉ ॥ 20 ॥
பாதிதோ(அ)ஹம் ததா³ தேந க³ம்பீ⁴ரே ஸாக³ராம்ப⁴ஸி ।
ப்ராப்ய ஸஞ்ஜ்ஞாம் சிராத்தாத லங்காம் ப்ரதி க³த꞉ புரீம் ॥ 21 ॥
ஏவமஸ்மி ததா³ முக்த꞉ ஸஹாயாஸ்து நிபாதிதா꞉ ।
அக்ருதாஸ்த்ரேண பா³லேந ராமேணாக்லிஷ்டகர்மணா ॥ 22 ॥
தந்மயா வார்யமாணஸ்த்வம் யதி³ ராமேண விக்³ரஹம் ।
கரிஷ்யஸ்யாபத³ம் கோ⁴ராம் க்ஷிப்ரம் ப்ராப்ஸ்யஸி ராவண ॥ 23 ॥
க்ரீடா³ரதிவிதி⁴ஜ்ஞாநாம் ஸமாஜோத்ஸவஶாலிநாம் ।
ரக்ஷஸாம் சைவ ஸந்தாபமநர்த²ம் சாஹரிஷ்யஸி ॥ 24 ॥
ஹர்ம்யப்ராஸாத³ஸம்பா³தா⁴ம் நாநாரத்நவிபூ⁴ஷிதாம் ।
த்³ரக்ஷ்யஸி த்வம் புரீம் லங்காம் விநஷ்டாம் மைதி²லீக்ருதே ॥ 25 ॥
அகுர்வந்தோ(அ)பி பாபாநி ஶுசய꞉ பாபஸம்ஶ்ரயாத் ।
பரபாபைர்விநஶ்யந்தி மத்ஸ்யா நாக³ஹ்ரதே³ யதா² ॥ 26 ॥
தி³வ்யசந்த³நதி³க்³தா⁴ங்கா³ந் தி³வ்யாப⁴ரணபூ⁴ஷிதாந் ।
த்³ரக்ஷ்யஸ்யபி⁴ஹதாந் பூ⁴மௌ தவ தோ³ஷாத்து ராக்ஷஸாந் ॥ 27 ॥
ஹ்ருததா³ராந் ஸதா³ராம்ஶ்ச த³ஶ வித்³ரவதோ தி³ஶ꞉ ।
ஹதஶேஷாநஶரணாந் த்³ரக்ஷ்யஸி த்வம் நிஶாசராந் ॥ 28 ॥
ஶரஜாலபரிக்ஷிப்தாமக்³நிஜ்வாலாஸமாவ்ருதாம் ।
ப்ரத³க்³த⁴ப⁴வநாம் லங்காம் த்³ரக்ஷ்யஸி த்வம் ந ஸம்ஶய꞉ ॥ 29 ॥
பரதா³ராபி⁴மர்ஶாத்து நாந்யத்பாபதரம் மஹத் ।
ப்ரமதா³நாம் ஸஹஸ்ராணி தவ ராஜந் பரிக்³ரஹ꞉ ॥ 30 ॥
ப⁴வ ஸ்வதா³ரநிரத꞉ ஸ்வகுலம் ரக்ஷ ராக்ஷஸ ।
மாநம்ருத்³தி⁴ம் ச ராஜ்யம் ச ஜீவிதம் சேஷ்டமாத்மந꞉ ॥ 31 ॥
களத்ராணி ச ஸௌம்யாநி மித்ரவர்க³ம் ததை²வ ச ।
யதீ³ச்ச²ஸி சிரம் போ⁴க்தும் மா க்ருதா² ராமவிப்ரியம் ॥ 32 ॥
நிவார்யமாண꞉ ஸுஹ்ருதா³ மயா ப்⁴ருஶம்
ப்ரஸஹ்ய ஸீதாம் யதி³ த⁴ர்ஷயிஷ்யஸி ।
க³மிஷ்யஸி க்ஷீணப³ல꞉ ஸபா³ந்த⁴வோ
யமக்ஷயம் ராமஶராத்தஜீவித꞉ ॥ 33 ॥
இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ அஷ்டாத்ரிம்ஶ꞉ ஸர்க³꞉ ॥ 38 ॥
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
