Aranya Kanda Sarga 28 – அரண்யகாண்ட³ அஷ்டாவிம்ஶ꞉ ஸர்க³꞉ (28)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ அஷ்டாவிம்ஶ꞉ ஸர்க³꞉ (28)

॥ க²ரராமஸம்ப்ரஹார꞉ ॥

நிஹதம் தூ³ஷணம் த்³ருஷ்ட்வா ரணே த்ரிஶிரஸா ஸஹ ।
க²ரஸ்யாப்யப⁴வத்ராஸோ த்³ருஷ்ட்வா ராமஸ்ய விக்ரமம் ॥ 1 ॥

ஸ த்³ருஷ்ட்வா ராக்ஷஸம் ஸைந்யமவிஷஹ்யம் மஹாப³ல꞉ ।
ஹதமேகேந ராமேண த்ரிஶிரோதூ³ஷணாவபி ॥ 2 ॥

தத்³ப³லம் ஹதபூ⁴யிஷ்ட²ம் விமநா꞉ ப்ரேக்ஷ்ய ராக்ஷஸ꞉ ।
ஆஸஸாத³ க²ரோ ராமம் நமுசிர்வாஸவம் யதா² ॥ 3 ॥

விக்ருஷ்ய ப³லவச்சாபம் நாராசாந்ரக்தபோ⁴ஜநாந் ।
க²ரஶ்சிக்ஷேப ராமாய க்ருத்³தா⁴நாஶீவிஷாநிவ ॥ 4 ॥

ஜ்யாம் விது⁴ந்வந் ஸுப³ஹுஶ꞉ ஶிக்ஷயா(அ)ஸ்த்ராணி த³ர்ஶயந் ।
சகார ஸமரே மார்கா³ந் ஶரை ரத²க³த꞉ க²ர꞉ ॥ 5 ॥

ஸ ஸர்வாஶ்ச தி³ஶோ பா³ணை꞉ ப்ரதி³ஶஶ்ச மஹாரத²꞉ ।
பூரயாமாஸ தம் த்³ருஷ்ட்வா ராமோ(அ)பி ஸுமஹத்³த⁴நு꞉ ॥ 6 ॥

ஸ ஸாயகைர்து³ர்விஷஹை꞉ ஸஸ்பு²லிங்கை³ரிவாக்³நிபி⁴꞉ ।
நப⁴ஶ்சகாராவிவரம் பர்ஜந்ய இவ வ்ருஷ்டிபி⁴꞉ ॥ 7 ॥

தத்³ப³பூ⁴வ ஶிதைர்பா³ணை꞉ க²ரராமவிஸர்ஜிதை꞉ ।
பர்யாகாஶமநாகாஶம் ஸர்வத꞉ ஶரஸங்குலம் ॥ 8 ॥

ஶரஜாலாவ்ருத꞉ ஸூர்யோ ந ததா³ ஸ்ம ப்ரகாஶதே ।
அந்யோந்யவத⁴ஸம்ரம்பா⁴து³ப⁴யோ꞉ ஸம்ப்ரயுத்⁴யதோ꞉ ॥ 9 ॥

ததோ நாலீகநாராசைஸ்தீக்ஷ்ணாக்³ரைஶ்ச விகர்ணிபி⁴꞉ ।
ஆஜகா⁴ந க²ரோ ராமம் தோத்ரைரிவ மஹாத்³விபம் ॥ 10 ॥

தம் ரத²ஸ்த²ம் த⁴நுஷ்பாணிம் ராக்ஷஸம் பர்யவஸ்தி²தம் ।
த³த்³ருஶு꞉ ஸர்வபூ⁴தாநி பாஶஹஸ்தமிவாந்தகம் ॥ 11 ॥

ஹந்தாரம் ஸர்வஸைந்யஸ்ய பௌருஷே பர்யவஸ்தி²தம் ।
பரிஶ்ராந்தம் மஹாஸத்த்வம் மேநே ராமம் க²ரஸ்ததா³ ॥ 12 ॥

தம் ஸிம்ஹமிவ விக்ராந்தம் ஸிம்ஹவிக்ராந்தகா³மிநம் ।
த்³ருஷ்ட்வா நோத்³விஜதே ராம꞉ ஸிம்ஹ꞉ க்ஷுத்³ரம்ருக³ம் யதா² ॥ 13 ॥

தத꞉ ஸூர்யநிகாஶேந ரதே²ந மஹதா க²ர꞉ ।
ஆஸஸாத³ ரணே ராமம் பதங்க³ இவ பாவகம் ॥ 14 ॥

ததோ(அ)ஸ்ய ஸஶரம் சாபம் முஷ்டிதே³ஶே மஹாத்மந꞉ ।
க²ரஶ்சிச்சே²த³ ராமஸ்ய த³ர்ஶயந் பாணிலாக⁴வம் ॥ 15 ॥

ஸ புநஸ்த்வபராந் ஸப்த ஶராநாதா³ய வர்மணி ।
நிஜகா⁴ந க²ர꞉ க்ருத்³த⁴꞉ ஶக்ராஶநிஸமப்ரபா⁴ந் ॥ 16 ॥

ததஸ்தத்ப்ரஹதம் பா³ணை꞉ க²ரமுக்தை꞉ ஸுபர்வபி⁴꞉ ।
பபாத கவசம் பூ⁴மௌ ராமஸ்யாதி³த்யவர்சஸ꞉ ॥ 17 ॥

தத꞉ ஶரஸஹஸ்ரேண ராமமப்ரதிமௌஜஸம் ।
அர்த³யித்வா மஹாநாத³ம் நநாத³ ஸமேரே க²ர꞉ ॥ 18 ॥

ஸ ஶரைரர்பித꞉ க்ருத்³த⁴꞉ ஸர்வகா³த்ரேஷு ராக⁴வ꞉ ।
ரராஜ ஸமரே ராமோ விதூ⁴மோ(அ)க்³நிரிவ ஜ்வலந் ॥ 19 ॥

ததோ க³ம்பீ⁴ரநிர்ஹ்ராத³ம் ராம꞉ ஶத்ருநிப³ர்ஹண꞉ ।
சகாராந்தாய ஸ ரிபோ꞉ ஸஜ்யமந்யந்மஹத்³த⁴நு꞉ ॥ 20 ॥

ஸுமஹத்³வைஷ்ணவம் யத்தத³திஸ்ருஷ்டம் மஹர்ஷிணா ।
வரம் தத்³த⁴நுருத்³யம்ய க²ரம் ஸமபி⁴தா⁴வத ॥ 21 ॥

தத꞉ கநகபுங்கை²ஸ்து ஶரை꞉ ஸந்நதபர்வபி⁴꞉ ।
பி³பே⁴த³ ராம꞉ ஸங்க்ருத்³த⁴꞉ க²ரஸ்ய ஸமரே த்⁴வஜம் ॥ 22 ॥

ஸ த³ர்ஶநீயோ ப³ஹுதா⁴ விகீர்ண꞉ காஞ்சநத்⁴வஜ꞉ ।
ஜகா³ம த⁴ரணீம் ஸூர்யோ தே³வதாநாமிவாஜ்ஞயா ॥ 23 ॥

தம் சதுர்பி⁴꞉ க²ர꞉ க்ருத்³தோ⁴ ராமம் கா³த்ரேஷு மார்க³ணை꞉ ।
விவ்யாத⁴ யுதி⁴ மர்மஜ்ஞோ மாதங்க³மிவ தோமரை꞉ ॥ 24 ॥

ஸ ராமோ ப³ஹுபி⁴ர்பா³ணை꞉ க²ரகார்முகநி꞉ஸ்ருதை꞉ ।
வித்³தோ⁴ ருதி⁴ரஸிக்தாங்கோ³ ப³பூ⁴வ ருஷிதோ ப்⁴ருஶம் ॥ 25 ॥

ஸ த⁴நுர்த⁴ந்விநாம் ஶ்ரேஷ்ட²꞉ ப்ரக்³ருஹ்ய பரமாஹவே ।
முமோச பரமேஷ்வாஸ꞉ ஷட் ஶராநபி⁴லக்ஷிதாந் ॥ 26 ॥

ஶிரஸ்யேகேந பா³ணேந த்³வாப்⁴யாம் பா³ஹ்வோரதா²ர்த³யத் ।
த்ரிபி⁴ஶ்சந்த்³ரார்த⁴வக்த்ரைஶ்ச வக்ஷஸ்யபி⁴ஜகா⁴ந ஹ ॥ 27 ॥

தத꞉ பஶ்சாந்மஹாதேஜா நாராசாந் பா⁴ஸ்கரோபமாந் ।
ஜிகா⁴ம்ஸூ ராக்ஷஸம் க்ருத்³த⁴ஸ்த்ரயோத³ஶ ஸமாத³தே³ ॥ 28 ॥

ததோ(அ)ஸ்ய யுக³மேகேந சதுர்பி⁴ஶ்சதுரோ ஹயாந் ।
ஷஷ்டே²ந து ஶிர꞉ ஸங்க்²யே க²ரஸ்ய ரத²ஸாரதே²꞉ ॥ 29 ॥

த்ரிபி⁴ஸ்த்ரிவேணும் ப³லவாந் த்³வாப்⁴யாமக்ஷம் மஹாப³ல꞉ ।
த்³வாத³ஶேந து பா³ணேந க²ரஸ்ய ஸஶரம் த⁴நு꞉ ॥ 30 ॥

சி²த்த்வா வஜ்ரநிகாஶேந ராக⁴வ꞉ ப்ரஹஸந்நிவ ।
த்ரயோத³ஶேநேந்த்³ரஸமோ பி³பே⁴த³ ஸமரே க²ரம் ॥ 31 ॥

ப்ரப⁴க்³நத⁴ந்வா விரதோ² ஹதாஶ்வோ ஹதஸாரதி²꞉ ।
க³தா³பாணிரவப்லுத்ய தஸ்தௌ² பூ⁴மௌ க²ரஸ்ததா³ ॥ 32 ॥

தத்கர்ம ராமஸ்ய மஹாரத²ஸ்ய
ஸமேத்ய தே³வாஶ்ச மஹர்ஷயஶ்ச ।
அபூஜயந் ப்ராஞ்ஜலய꞉ ப்ரஹ்ருஷ்டா-
-ஸ்ததா³ விமாநாக்³ரக³தா꞉ ஸமேதா꞉ ॥ 33 ॥

இத்யார்ஷே ஶ்ரீமத்³ராமாயணே வால்மீகியே அரண்யகாண்டே³ அஷ்டாவிம்ஶ꞉ ஸர்க³꞉ ॥ 28 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.