Aranya Kanda Sarga 1 – அரண்யகாண்ட³ ப்ரத²ம꞉ ஸர்க³꞉ (1)

॥ மஹர்ஷிஸங்க⁴꞉ ॥

ப்ரவிஶ்ய து மஹாரண்யம் த³ண்ட³காரண்யமாத்மவாந் ।
த³த³ர்ஶ ராமோ து³ர்த⁴ர்ஷஸ்தாபஸாஶ்ரமமண்ட³லம் ॥ 1 ॥

குஶசீரபரிக்ஷிப்தம் ப்³ராஹ்ம்யா லக்ஷ்ம்யா ஸமாவ்ருத்தம் ।
யதா² ப்ரதீ³ப்தம் து³ர்த³ர்ஶம் க³க³நே ஸூர்யமண்ட³லம் ॥ 2 ॥

ஶரண்யம் ஸர்வபூ⁴தாநாம் ஸுஸம்ம்ருஷ்டாஜிரம் ததா² ।
ம்ருகை³ர்ப³ஹுபி⁴ராகீர்ணம் பக்ஷிஸங்கை⁴꞉ ஸமாவ்ருதம் ॥ 3 ॥

பூஜிதம் சோபந்ருத்தம் ச நித்யமப்ஸரஸாம் க³ணை꞉ ।
விஶாலைரக்³நிஶரணை꞉ ஸ்ருக்³பா⁴ண்டை³ரஜிநை꞉ குஶை꞉ ॥ 4 ॥

ஸமித்³பி⁴ஸ்தோயகலஶை꞉ ப²லமூலைஶ்ச ஶோபி⁴தம் ।
ஆரண்யைஶ்ச மஹாவ்ருக்ஷை꞉ புண்யை꞉ ஸ்வாது³ப²லைர்வ்ருதம் ॥ 5 ॥

ப³லிஹோமார்சிதம் புண்யம் ப்³ரஹ்மகோ⁴ஷநிநாதி³தம் ।
புஷ்பைர்வந்யை꞉ பரிக்ஷிப்தம் பத்³மிந்யா ச ஸபத்³மயா ॥ 6 ॥

ப²லமூலாஶநைர்தா³ந்தைஶ்சீரக்ருஷ்ணாஜிநாம்ப³ரை꞉ ।
ஸூர்யவைஶ்வாநராபை⁴ஶ்ச புராணைர்முநிபி⁴ர்வ்ருதம் ॥ 7 ॥

புண்யைஶ்ச நியதாஹாரை꞉ ஶோபி⁴தம் பரமர்ஷிபி⁴꞉ ।
தத்³ப்³ரஹ்மப⁴வநப்ரக்²யம் ப்³ரஹ்மகோ⁴ஷநிநாதி³தம் ॥ 8 ॥

ப்³ரஹ்மவித்³பி⁴ர்மஹாபா⁴கை³ர்ப்³ராஹ்மணைருபஶோபி⁴தம் ।
ஸ த்³ருஷ்ட்வா ராக⁴வ꞉ ஶ்ரீமாம்ஸ்தாபஸாஶ்ரமமண்ட³லம் ॥ 9 ॥

அப்⁴யக³ச்ச²ந்மஹாதேஜா விஜ்யம் க்ருத்வா மஹத்³த⁴நு꞉ ।
தி³வ்யஜ்ஞாநோபபந்நாஸ்தே ராமம் த்³ருஷ்ட்வா மஹர்ஷய꞉ ॥ 10 ॥

அப்⁴யக³ச்ச²ம்ஸ்ததா² ப்ரீதா வைதே³ஹீம் ச யஶஸ்விநீம் ।
தே தம் ஸோமமிவோத்³யந்தம் த்³ருஷ்ட்வா வை த⁴ர்மசாரிண꞉ ॥ 11 ॥

லக்ஷ்மணம் சைவ த்³ருஷ்ட்வா து வைதே³ஹீம் ச யஶஸ்விநீம் ।
மங்க³ளாநி ப்ரயுஞ்ஜாநா꞉ ப்ரத்யக்³ருஹ்ணந் த்³ருட⁴வ்ரதா꞉ ॥ 12 ॥

ரூபஸம்ஹநநம் லக்ஷ்மீம் ஸௌகுமார்யம் ஸுவேஷதாம் ।
த³த்³ருஶுர்விஸ்மிதாகாரா ராமஸ்ய வநவாஸிந꞉ ॥ 13 ॥

வைதே³ஹீம் லக்ஷ்மணம் ராமம் நேத்ரைரநிமிஷைரிவ ।
ஆஶ்சர்யபூ⁴தாந் த³த்³ருஶு꞉ ஸர்வே தே வநசாரிண꞉ ॥ 14 ॥

அத்ரைநம் ஹி மஹாபா⁴கா³꞉ ஸர்வபூ⁴தஹிதே ரதம் ।
அதிதி²ம் பர்ணஶாலாயாம் ராக⁴வம் ஸம்ந்யவேஶயந் ॥ 15 ॥

ததோ ராமஸ்ய ஸத்க்ருத்ய விதி⁴நா பாவகோபமா꞉ ।
ஆஜஹ்ருஸ்தே மஹாபா⁴கா³꞉ ஸலிலம் த⁴ர்மசாரிண꞉ ॥ 16 ॥

மூலம் புஷ்பம் ப²லம் வந்யமாஶ்ரமம் ச மஹாத்மந꞉ ।
நிவேத³யித்வா த⁴ர்மஜ்ஞாஸ்தத꞉ ப்ராஞ்ஜலயோ(அ)ப்³ருவந் ॥ 17 ॥

த⁴ர்மபாலோ ஜநஸ்யாஸ்ய ஶரண்யஸ்த்வம் மஹாயஶா꞉ ।
பூஜநீயஶ்ச மாந்யஶ்ச ராஜா த³ண்ட³த⁴ரோ கு³ரு꞉ ॥ 18 ॥

இந்த்³ரஸ்யேஹ சதுர்பா⁴க³꞉ ப்ரஜா ரக்ஷதி ராக⁴வ ।
ராஜா தஸ்மாத்³வராந்போ⁴கா³ந்பு⁴ங்க்தே லோகநமஸ்க்ருத꞉ ॥ 19 ॥

தே வயம் ப⁴வதா ரக்ஷ்யா ப⁴வத்³விஷயவாஸிந꞉ ।
நக³ரஸ்தோ² வநஸ்தோ² வா த்வம் நோ ராஜா ஜநேஶ்வர꞉ ॥ 20 ॥

ந்யஸ்தத³ண்டா³ வயம் ராஜந் ஜிதக்ரோதா⁴ ஜிதேந்த்³ரியா꞉ ।
ரக்ஷிதவ்யாஸ்த்வயா ஶஶ்வத்³க³ர்ப⁴பூ⁴தாஸ்தபோத⁴நா꞉ ॥ 21 ॥

ஏவமுக்த்வா ப²லைர்மூலை꞉ புஷ்பைர்வந்யைஶ்ச ராக⁴வம் ।
அந்யைஶ்ச விவிதா⁴ஹாரை꞉ ஸலக்ஷ்மணமபூஜயந் ॥ 22 ॥

ததா²ந்யே தாபஸா꞉ ஸித்³தா⁴ ராமம் வைஶ்வாநரோபமா꞉ ।
ந்யாயவ்ருத்தா யதா²ந்யாயம் தர்பயாமாஸுரீஶ்வரம் ॥ 23 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ ப்ரத²ம꞉ ஸர்க³꞉ ॥ 1 ॥

Facebook Comments

You may also like...

error: Not allowed
%d bloggers like this: