Aranya Kanda Sarga 61 – அரண்யகாண்ட³ ஏகஷஷ்டிதம꞉ ஸர்க³꞉ (61)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ ஏகஷஷ்டிதம꞉ ஸர்க³꞉ (61)

॥ ஸீதாந்வேஷணம் ॥

த்³ருஷ்ட்வா(ஆ)ஶ்ரமபத³ம் ஶூந்யம் ராமோ த³ஶரதா²த்மஜ꞉ ।
ரஹிதாம் பர்ணஶாலாம் ச வித்⁴வஸ்தாந்யாஸநாநி ச ॥ 1 ॥

அத்³ருஷ்ட்வா தத்ர வைதே³ஹீம் ஸந்நிரீக்ஷ்ய ச ஸர்வஶ꞉ ।
உவாச ராம꞉ ப்ராக்ருஶ்ய ப்ரக்³ருஹ்ய ருசிரௌ பு⁴ஜௌ ॥ 2 ॥

க்வ நு லக்ஷ்மண வைதே³ஹீ கம் வா தே³ஶமிதோ க³தா ।
கேநாஹ்ருதா வா ஸௌமித்ரே ப⁴க்ஷிதா கேந வா ப்ரியா ॥ 3 ॥

வ்ருக்ஷேணாச்சா²த்³ய யதி³ மாம் ஸீதே ஹஸிதுமிச்ச²ஸி ।
அலம் தே ஹஸிதேநாத்³ய மாம் ப⁴ஜஸ்வ ஸுது³꞉கி²தம் ॥ 4 ॥

யை꞉ ஸஹ க்ரீட³ஸே ஸீதே விஶ்வஸ்தைர்ம்ருக³போதகை꞉ ।
ஏதே ஹீநாஸ்த்வாயா ஸௌம்யே த்⁴யாயந்த்யாஸ்ராவிளேக்ஷணா꞉ ॥ 5 ॥

ஸீதயா ரஹிதோ(அ)ஹம் வை ந ஹி ஜீவாமி லக்ஷ்மண ।
ம்ருதம் ஶோகேந மஹதா ஸீதாஹரணஜேந மாம் ॥ 6 ॥

பரளோகே மஹாராஜோ நூநம் த்³ரக்ஷ்யதி மே பிதா ।
கத²ம் ப்ரதிஜ்ஞாம் ஸம்ஶ்ருத்ய மயா த்வமபி⁴யோஜித꞉ ॥ 7 ॥

அபூரயித்வா தம் காலம் மத்ஸகாஶமிஹாக³த꞉ ।
காமவ்ருத்தமநார்யம் மாம் ம்ருஷாவாதி³நமேவ ச ॥ 8 ॥

தி⁴க்த்வாமிதி பரே லோகே வ்யக்தம் வக்ஷ்யதி மே பிதா ।
விவஶம் ஶோகஸந்தப்தம் தீ³நம் ப⁴க்³நமநோரத²ம் ॥ 9 ॥

மாமிஹோத்ஸ்ருஜ்ய கருணம் கீர்திர்நரமிவாந்ருஜும் ।
க்வ க³ச்ச²ஸி வராரோஹே மாம் நோத்ஸ்ருஜ ஸுமத்⁴யமே ॥ 10 ॥

த்வயா விரஹிதஶ்சாஹம் மோக்ஷ்யே ஜீவிதமாத்மந꞉ ।
இதீவ விளபந் ராம꞉ ஸீதாத³ர்ஶநலாலஸ꞉ ॥ 11 ॥

ந த³த³ர்ஶ ஸுது³꞉கா²ர்தோ ராக⁴வோ ஜநகாத்மஜாம் ।
அநாஸாத³யமாநம் தம் ஸீதாம் த³ஶராதா²த்மஜம் ॥ 12 ॥

பங்கமாஸாத்³ய விபுலம் ஸீத³ந்தமிவ குஞ்ஜரம் ।
லக்ஷ்மணோ ராமமத்யர்த²முவாச ஹிதகாம்யயா ॥ 13 ॥

மா விஷாத³ம் மஹாபா³ஹோ குரு யத்நம் மயா ஸஹ ।
இத³ம் ச ஹி வநம் ஶூர ப³ஹுகந்த³ரஶோபி⁴தம் ॥ 14 ॥

ப்ரியகாநநஸஞ்சாரா வநோந்மத்தா ச மைதி²லீ ।
ஸா வநம் வா ப்ரவிஷ்டா ஸ்யாந்நலிநீம் வா ஸுபுஷ்பிதாம் ॥ 15 ॥

ஸரிதம் வா(அ)பி ஸம்ப்ராப்தா꞉ மீநவஞ்ஜுளஸேவிதாம் ।
ஸ்நாதுகாமா நிலீநா ஸ்யாத்³தா⁴ஸகாமா வநே க்வசித் ॥ 16 ॥

வித்ராஸயிதுகாமா வா லீநா ஸ்யாத்காநநே க்வசித் ।
ஜிஜ்ஞாஸமாநா வைதே³ஹீ த்வாம் மாம் ச புருஷர்ஷப⁴ ॥ 17 ॥

தஸ்யா ஹ்யந்வேஷணே ஶ்ரீமந் க்ஷிப்ரமேவ யதாவஹை ।
வநம் ஸர்வம் விசிநுவோ யத்ர ஸா ஜநகாத்மஜா ॥ 18 ॥

மந்யஸே யதி³ காகுத்ஸ்த² மா ஸ்ம ஶோகே மந꞉ க்ருதா²꞉ ।
ஏவமுக்தஸ்து ஸௌஹார்தா³ள்லக்ஷ்மணேந ஸமாஹித꞉ ॥ 19 ॥

ஸஹ ஸௌமித்ரிணா ராமோ விசேதுமுபசக்ரமே ।
தௌ வநாநி கி³ரீம்ஶ்சைவ ஸரிதஶ்ச ஸராம்ஸி ச ॥ 20 ॥

நிகி²லேந விசிந்வாநௌ ஸீதாம் த³ஶரதா²த்மஜௌ ।
தஸ்ய ஶைலஸ்ய ஸாநூநி கு³ஹாஶ்ச ஶிக²ராணி ச ॥ 21 ॥

நிகி²லேந விசிந்வாநௌ நைவ தாமபி⁴ஜக்³மது꞉ ।
விசித்ய ஸர்வத꞉ ஶைலம் ராமோ லக்ஷ்மணமப்³ரவீத் ॥ 22 ॥

நேஹ பஶ்யாமி ஸௌமித்ரே வைதே³ஹீம் பர்வதே ஶுபா⁴ம் ।
ததோ து³꞉கா²பி⁴ஸந்தப்தோ லக்ஷ்மணோ வாக்யமப்³ரவீத் ॥ 23 ॥

விசரந் த³ண்ட³காரண்யம் ப்⁴ராதரம் தீ³ப்ததேஜஸம் ।
ப்ராப்ஸ்யஸி த்வம் மஹாப்ராஜ்ஞ மைதி²லீம் ஜநகாத்மஜாம் ॥ 24 ॥

யதா² விஷ்ணுர்மஹாபா³ஹுர்ப³லிம் ப³த்⁴வா மஹீமிமாம் ।
ஏவமுக்தஸ்து ஸௌஹார்தா³ள்லக்ஷ்மணேந ஸ ராக⁴வ꞉ ॥ 25 ॥

உவாச தீ³நயா வாசா து³꞉கா²பி⁴ஹதசேதந꞉ ।
வநம் ஸர்வம் ஸுவிசிதம் பத்³மிந்ய꞉ பு²ல்லபங்கஜா꞉ ॥ 26 ॥

கி³ரிஶ்சாயம் மஹாப்ராஜ்ஞ ப³ஹுகந்த³ரநிர்ஜ²ர꞉ ।
ந ஹி பஶ்யாமி வைதே³ஹீம் ப்ராணேப்⁴யோ(அ)பி க³ரீயஸீம் ॥ 27 ॥

ஏவம் ஸ விளபந் ராம꞉ ஸீதாஹரணகர்ஶித꞉ ।
தீ³ந꞉ ஶோகஸமாவிஷ்டோ முஹூர்தம் விஹ்வலோ(அ)ப⁴வத் ॥ 28 ॥

ஸந்தப்தோ ஹ்யவஸந்நாங்கோ³ க³தபு³த்³தி⁴ர்விசேதந꞉ ।
நிஷஸாதா³துரோ தீ³நோ நி꞉ஶ்வஸ்யாயதமாயதம் ॥ 29 ॥

ப³ஹுளம் ஸ து நி꞉ஶ்வஸ்ய ராமோ ராஜீவலோசந꞉ ।
ஹா ப்ரியேதி விசுக்ரோஶ ப³ஹுளோ பா³ஷ்பக³த்³க³த³꞉ ॥ 30 ॥

தம் தத꞉ ஸாந்த்வயாமாஸ லக்ஷ்மண꞉ ப்ரியபா³ந்த⁴வ꞉ ।
ப³ஹுப்ரகாரம் த⁴ர்மஜ்ஞ꞉ ப்ரஶ்ரிதம் ப்ரஶ்ரிதாஞ்ஜலி꞉ ॥ 31 ॥

அநாத்³ருத்ய து தத்³வாக்யம் லக்ஷ்மணோஷ்ட²புடாச்ச்யுதம் ।
அபஶ்யம்ஸ்தாம் ப்ரியாம் ஸீதாம் ப்ராக்ரோஶத் ஸ புந꞉ புந꞉ ॥ 32 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ ஏகஷஷ்டிதம꞉ ஸர்க³꞉ ॥ 61 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

---