Sri Gopala Vimsathi – ஶ்ரீ கோபால விம்ஶதி

ஸ்தோத்ரநிதி → ஶ்ரீ க்ருஷ்ண ஸ்தோத்திரங்கள் → ஶ்ரீ கோபால விம்ஶதி

ஶ்ரீமாந்வேங்கடநாதா²ர்ய꞉ கவிதார்கிக கேஸரீ ।
வேதா³ந்தாசார்யவர்யோ மே ஸந்நித⁴த்தாம் ஸதா³ ஹ்ருதி³ ॥

வந்தே³ ப்³ருந்தா³வநசரம் வல்லவீஜநவல்லப⁴ம் ।
ஜயந்தீஸம்ப⁴வம் தா⁴ம வைஜயந்தீவிபூ⁴ஷணம் ॥ 1 ॥

வாசம் நிஜாங்கரஸிகாம் ப்ரஸமீக்ஷமாணோ
வக்த்ராரவிந்த³விநிவேஶிதபாஞ்சஜந்ய꞉ ।
வர்ணத்ரிகோணருசிரே வரபுண்ட³ரீகே
ப³த்³தா⁴ஸநோ ஜயதி வல்லவசக்ரவர்தீ ॥ 2 ॥

ஆம்நாயக³ந்தி⁴ருதி³தஸ்பு²ரிதாத⁴ரோஷ்ட²ம்
ஆஸ்ராவிளேக்ஷணமநுக்ஷணமந்த³ஹாஸம் ।
கோ³பாலடி³ம்ப⁴வபுஷம் குஹநாஜநந்யா꞉
ப்ராணஸ்தநந்த⁴யமவைமி பரம் புமாம்ஸம் ॥ 3 ॥

ஆவிர்ப⁴வத்வநிப்⁴ருதாப⁴ரணம் புரஸ்தாத்
ஆகுஞ்சிதைகசரணம் நிப்⁴ருதாந்யபாத³ம் ।
த³த்⁴நா நிமந்த²முக²ரேண நிப³த்³த⁴தாலம்
நாத²ஸ்ய நந்த³ப⁴வநே நவநீதநாட்யம் ॥ 4 ॥

ஹர்தும் கும்பே⁴ விநிஹிதகர꞉ ஸ்வாது³ ஹையங்க³வீநம்
த்³ருஷ்ட்வா தா³மக்³ரஹணசடுலாம் மாதரம் ஜாதரோஷாம் ।
பாயாதீ³ஷத் ப்ரசலிதபதோ³ நாபக³ச்ச²ந் ந திஷ்ட²ந்
மித்²யாகோ³ப꞉ ஸபதி³ நயநே மீலயந் விஶ்வகோ³ப்தா ॥ 5 ॥

வ்ரஜயோஷித³பாங்க³வேத⁴நீயம்
மது⁴ராபா⁴க்³யமநந்யபோ⁴க்³யமீடே³ ।
வஸுதே³வவதூ⁴ஸ்தநந்த⁴யம் தத்
கிமபி ப்³ரஹ்ம கிஶோரபா⁴வத்³ருஶ்யம் ॥ 6 ॥

பரிவர்திதகந்த⁴ரம் ப⁴யேந
ஸ்மிதபு²ல்லாத⁴ரபல்லவம் ஸ்மராமி ।
விடபித்வநிராஸகம் கயோஶ்சித்
விபுலோலூக²லகர்ஷகம் குமாரம் ॥ 7 ॥

நிகடேஷு நிஶாமயாமி நித்யம்
நிக³மாந்தைரது⁴நா(அ)பி ம்ருக்³யமாணம் ।
யமலார்ஜுநத்³ருஷ்டபா³லகேலிம்
யமுநாஸாக்ஷிகயௌவநம் யுவாநம் ॥ 8 ॥

பத³வீமத³வீயஸீம் விமுக்தே꞉
அடவீஸம்பத³மம்பு³வாஹயந்தீம் ।
அருணாத⁴ரஸாபி⁴லாஷவம்ஶாம்
கருணாம் காரணமாநுஷீம் ப⁴ஜாமி ॥ 9 ॥

அநிமேஷநிஷேவணீயமக்ஷ்ணோ꞉
அஜஹத்³யௌவநமாவிரஸ்து சித்தே ।
கலஹாயிதகுந்தலம் கலாபை꞉
கருணோந்மாத³கவிப்⁴ரமம் மஹோ மே ॥ 10 ॥

அநுயாயிமநோஜ்ஞவம்ஶநாலை꞉
அவது ஸ்பர்ஶிதவல்லவீவிமோஹை꞉ ।
அநக⁴ஸ்மிதஶீதளைரஸௌ மாம்
அநுகம்பாஸரித³ம்பு³ஜைரபாங்கை³꞉ ॥ 11 ॥

அத⁴ராஹிதசாருவம்ஶநாலா꞉
மகுடாலம்பி³மயூரபிஞ்ச²மாலா꞉ ।
ஹரிநீலஶிலாவிப⁴ங்க³நீலா꞉
ப்ரதிபா⁴꞉ ஸந்து மமாந்திமப்ரயாணே ॥ 12 ॥

அகி²லாநவலோகயாமி காலாந்
மஹிலாதீ⁴நபு⁴ஜாந்தரஸ்ய யூந꞉ ।
அபி⁴லாஷபத³ம் வ்ரஜாங்க³நாநாம்
அபி⁴லாபக்ரமதூ³ரமாபி⁴ரூப்யம் ॥ 13 ॥

ஹ்ருதி³ முக்³த⁴ஶிக²ண்ட³மண்ட³நோ
லிகி²த꞉ கேந மமைஷ ஶில்பிநா ।
மத³நாதுரவல்லவாங்க³நா-
-வத³நாம்போ⁴ஜதி³வாகரோ யுவா ॥ 14 ॥

மஹஸே மஹிதாய மௌளிநா
விநதேநாஞ்ஜலிமஞ்ஜநத்விஷே ।
கலயாமிவிமுக்³த⁴வள்லவீ-
-வலயாபா⁴ஷிதமஞ்ஜுவேணவே ॥ 15 ॥

ஜயதி லலிதவ்ருத்திம் ஶிக்ஷிதோ வல்லவீநாம்
ஶிதி²லவலயஶிஞ்ஜாஶீதளைர்ஹஸ்ததாலை꞉ ।
அகி²லபு⁴வநரக்ஷாகோ³பவேஷஸ்ய விஷ்ணோ꞉
அத⁴ரமணிஸுதா⁴யாமம்ஶவாந் வம்ஶநால꞉ ॥ 16 ॥

சித்ராகல்ப꞉ ஶ்ரவஸி கலயந் லாங்க³ளீகர்ணபூரம்
ப³ர்ஹோத்தம்ஸஸ்பு²ரிதசிகுரோ ப³ந்து⁴ஜீவம் த³தா⁴ந꞉ ।
கு³ஞ்ஜாப³த்³தா⁴முரஸி லலிதாம் தா⁴ரயந் ஹாரயஷ்டிம்
கோ³பஸ்த்ரீணாம் ஜயதி கிதவ꞉ கோ(அ)பி கௌமாரஹாரீ ॥ 17 ॥

லீலாயஷ்டிம் கரகிஸலயே த³க்ஷிணே ந்யஸ்ய த⁴ந்யாம்
அம்ஸே தே³வ்யா꞉ புலகருசிரே ஸந்நிவிஷ்டாந்யபா³ஹு꞉ ।
மேக⁴ஶ்யாமோ ஜயதி லலிதோ மேக²லாத³த்தவேணு꞉
கு³ஞ்ஜாபீட³ஸ்பு²ரிதசிகுரோ கோ³பகந்யாபு⁴ஜங்க³꞉ ॥ 18 ॥

ப்ரத்யாளீட⁴ஸ்தி²திமதி⁴க³தாம் ப்ராப்தகா³டா⁴ங்கபாலிம்
பஶ்சாதீ³ஷந்மிலிதநயநாம் ப்ரேயஸீம் ப்ரேக்ஷமாண꞉ ।
ப⁴ஸ்த்ராயந்த்ரப்ரணிஹிதகரோ ப⁴க்தஜீவாதுரவ்யாத்
வாரிக்ரீடா³நிபி³ட³வஸநோ வல்லவீவல்லபோ⁴ ந꞉ ॥ 19 ॥

வாஸோ ஹ்ருத்வா தி³நகரஸுதாஸந்நிதௌ⁴ வல்லவீநாம்
லீலாஸ்மேரோ ஜயதி லலிதாமாஸ்தி²த꞉ குந்த³ஶாகா²ம் ।
ஸவ்ரீடா³பி⁴ஸ்தத³நு வஸநே தாபி⁴ரப்⁴யர்த்²யமாநே
காமீ கஶ்சித் கரகமலயோரஞ்ஜலிம் யாசமாந꞉ ॥ 20 ॥

இத்யநந்யமநஸா விநிர்மிதாம்
வேங்கடேஶகவிநா ஸ்துதிம் பட²ந் ।
தி³வ்யவேணுரஸிகம் ஸமீக்ஷதே
தை³வதம் கிமபி யௌவதப்ரியம் ॥ 21 ॥

இதி ஶ்ரீவேதா³ந்தாதே³ஶிகாசார்ய க்ருத ஶ்ரீ கோ³பால விம்ஶதி꞉ ॥

---

மேலும் ஶ்ரீ க்ருஷ்ண ஸ்தோத்திரங்கள் பார்க்க.

Did you see any mistake/variation in the content above? Click here to report mistakes and corrections in Stotranidhi content.