Balakanda Sarga 38 – பா³லகாண்ட³ அஷ்டத்ரிம்ஶ꞉ ஸர்க³꞉ (38)

ஸ்தோத்ரநிதி → வால்மீகி ராமாயணே பா³லகாண்ட³ → பா³லகாண்ட³ அஷ்டத்ரிம்ஶ꞉ ஸர்க³꞉ (38)

॥ ஸக³ரபுத்ரஜந்ம ॥

தாம் கதா²ம் கௌஶிகோ ராமே நிவேத்³ய மது⁴ராக்ஷரம் ।
புநரேவாபரம் வாக்யம் காகுத்ஸ்த²மித³மப்³ரவீத் ॥ 1 ॥

அயோத்⁴யாதி⁴பதி꞉ ஶூர꞉ பூர்வமாஸீந்நராதி⁴ப꞉ ।
ஸக³ரோ நாம த⁴ர்மாத்மா ப்ரஜாகாம꞉ ஸ சாப்ரஜா꞉ ॥ 2 ॥

வைத³ர்ப⁴து³ஹிதா ராம கேஶிநீ நாம நாமத꞉ ।
ஜ்யேஷ்டா² ஸக³ரபத்நீ ஸா த⁴ர்மிஷ்டா² ஸத்யவாதி³நீ ॥ 3 ॥

அரிஷ்டநேமிது³ஹிதா ரூபேணாப்ரதிமா பு⁴வி ।
த்³விதீயா ஸக³ரஸ்யாஸீத்பத்நீ ஸுமதிஸஞ்ஜ்ஞிதா ॥ 4 ॥

தாப்⁴யாம் ஸஹ ததா³ ராஜா பத்நீப்⁴யாம் தப்தவாம்ஸ்தப꞉ ।
ஹிமவந்தம் ஸமாஸாத்³ய ப்⁴ருகு³ப்ரஸ்ரவணே கி³ரௌ ॥ 5 ॥

அத² வர்ஷஶதே பூர்ணே தபஸா(ஆ)ராதி⁴தோ முநி꞉ ।
ஸக³ராய வரம் ப்ராதா³த்³ப்⁴ருகு³꞉ ஸத்யவதாம் வர꞉ ॥ 6 ॥

அபத்யலாப⁴꞉ ஸுமஹாந்ப⁴விஷ்யதி தவாநக⁴ ।
கீர்திம் சாப்ரதிமாம் லோகே ப்ராப்ஸ்யஸே புருஷர்ஷப⁴ ॥ 7 ॥

ஏகா ஜநயிதா தாத புத்ரம் வம்ஶகரம் தவ ।
ஷஷ்டிம் புத்ரஸஹஸ்ராணி அபரா ஜநயிஷ்யதி ॥ 8 ॥

பா⁴ஷமாணம் மஹாத்மாநம் ராஜபுத்ர்யௌ ப்ரஸாத்³ய தம் ।
ஊசது꞉ பரமப்ரீதே க்ருதாஞ்ஜலிபுடே ததா³ ॥ 9 ॥

ஏக꞉ கஸ்யா꞉ ஸுதோ ப்³ரஹ்மந்கா ப³ஹூந்ஜநயிஷ்யதி ।
ஶ்ரோதுமிச்சா²வஹே ப்³ரஹ்மந்ஸத்யமஸ்து வசஸ்தவ ॥ 10 ॥

தயோஸ்தத்³வசநம் ஶ்ருத்வா ப்⁴ருகு³꞉ பரமதா⁴ர்மிக꞉ ।
உவாச பரமாம் வாணீம் ஸ்வச்ச²ந்தோ³(அ)த்ர விதீ⁴யதாம் ॥ 11 ॥

ஏகோ வம்ஶகரோ வா(அ)ஸ்து ப³ஹவோ வா மஹாப³லா꞉ ।
கீர்திமந்தோ மஹோத்ஸாஹா꞉ கா வா கம் வரமிச்ச²தி ॥ 12 ॥

முநேஸ்து வசநம் ஶ்ருத்வா கேஶிநீ ரகு⁴நந்த³ந ।
புத்ரம் வம்ஶகரம் ராம ஜக்³ராஹ ந்ருபஸந்நிதௌ⁴ ॥ 13 ॥

ஷஷ்டிம் புத்ரஸஹஸ்ராணி ஸுபர்ணப⁴கி³நீ ததா³ ।
மஹோத்ஸாஹாந்கீர்திமதோ ஜக்³ராஹ ஸுமதி꞉ ஸுதாந் ॥ 14 ॥

ப்ரத³க்ஷிணம்ருஷிம் க்ருத்வா ஶிரஸா(அ)பி⁴ப்ரணம்ய ச ।
ஜகா³ம ஸ்வபுரம் ராஜா ஸபா⁴ர்யோ ரகு⁴நந்த³ந ॥ 15 ॥

அத² காலே க³தே தஸ்மிந் ஜ்யேஷ்டா² புத்ரம் வ்யஜாயத ।
அஸமஞ்ஜ இதி க்²யாதம் கேஶிநீ ஸக³ராத்மஜம் ॥ 16 ॥

ஸுமதிஸ்து நரவ்யாக்⁴ர க³ர்ப⁴தும்ப³ம் வ்யஜாயத ।
ஷஷ்டி꞉ புத்ரா꞉ ஸஹஸ்ராணி தும்ப³பே⁴தா³த்³விநிஸ்ஸ்ருதா꞉ ॥ 17 ॥

க்⁴ருதபூர்ணேஷு கும்பே⁴ஷு தா⁴த்ர்யஸ்தாந்ஸமவர்த⁴யந் ।
காலேந மஹதா ஸர்வே யௌவநம் ப்ரதிபேதி³ரே ॥ 18 ॥

அத² தீ³ர்கே⁴ண காலேந ரூபயௌவநஶாலிந꞉ ।
ஷஷ்டி꞉ புத்ரஸஹஸ்ராணி ஸக³ரஸ்யாப⁴வம்ஸ்ததா³ ॥ 19 ॥

ஸ ச ஜ்யேஷ்டோ² நரஶ்ரேஷ்ட²꞉ ஸக³ரஸ்யாத்மஸம்ப⁴வ꞉ ।
பா³லாந்க்³ருஹீத்வா து ஜலே ஸரய்வா ரகு⁴நந்த³ந ॥ 20 ॥

ப்ரக்ஷிப்ய ப்ரஹஸந்நித்யம் மஜ்ஜதஸ்தாந்நிரீக்ஷ்ய வை ।
ஏவம் பாபஸமாசார꞉ ஸஜ்ஜநப்ரதிபா³த⁴க꞉ ॥ 21 ॥

பௌராணாமஹிதே யுக்த꞉ புத்ரோ நிர்வாஸித꞉ புராத் ।
தஸ்ய புத்ரோம்ஶுமாந்நாம அஸமஞ்ஜஸ்ய வீர்யவாந் ॥ 22 ॥

ஸம்மத꞉ ஸர்வலோகஸ்ய ஸர்வஸ்யாபி ப்ரியம் வத³꞉ ।
தத꞉ காலேந மஹதா மதி꞉ ஸமபி⁴ஜாயத ।
ஸக³ரஸ்ய நரஶ்ரேஷ்ட² யஜேயமிதி நிஶ்சிதா ॥ 23 ॥

ஸ க்ருத்வா நிஶ்சயம் ராம ஸோபாத்⁴யாயக³ணஸ்ததா³ ।
யஜ்ஞகர்மணி வேத³ஜ்ஞோ யஷ்டும் ஸமுபசக்ரமே ॥ 24 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே பா³லகாண்டே³ அஷ்டத்ரிம்ஶ꞉ ஸர்க³꞉ ॥ 38 ॥

பா³லகாண்ட³ ஏகோநசத்வாரிம்ஶ꞉ ஸர்க³꞉ (39) >>

---

ஸம்பூர்ண வால்மீகி ராமாயணே பா³லகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.