Aranya Kanda Sarga 13 – அரண்யகாண்ட³ த்ரயோத³ஶ꞉ ஸர்க³꞉ (13)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ த்ரயோத³ஶ꞉ ஸர்க³꞉ (13)

॥ பஞ்சவடீக³மநம் ॥

ராம ப்ரீதோ(அ)ஸ்மி ப⁴த்³ரம் தே பரிதுஷ்டோ(அ)ஸ்மி லக்ஷ்மண ।
அபி⁴வாத³யிதும் யந்மாம் ப்ராப்தௌ ஸ்த²꞉ ஸஹ ஸீதயா ॥ 1 ॥

அத்⁴வஶ்ரமேண வாம் கே²தோ³ பா³த⁴தே ப்ரசுரஶ்ரம꞉ ।
வ்யக்தமுத்கண்ட²தே சாபி மைதி²லீ ஜநகாத்மஜா ॥ 2 ॥

ஏஷா ஹி ஸுகுமாரீ ச து³꞉கை²ஶ்ச ந விமாநிதா ।
ப்ராஜ்யதோ³ஷம் வநம் ப்ராப்தா ப⁴ர்த்ருஸ்நேஹப்ரசோதி³தா ॥ 3 ॥

யதை²ஷா ரமதே ராம இஹ ஸீதா ததா² குரு ।
து³ஷ்கரம் க்ருதவத்யேஷா வநே த்வாமநுக³ச்ச²தீ ॥ 4 ॥

ஏஷா ஹி ப்ரக்ருதி꞉ ஸ்த்ரீணாமாஸ்ருஷ்டே ரகு⁴நந்த³ந ।
ஸமஸ்த²மநுரஜ்யந்தி விஷமஸ்த²ம் த்யஜ்யந்தி ச ॥ 5 ॥

ஶதஹ்ரதா³நாம் லோலத்வம் ஶஸ்த்ராணாம் தீக்ஷ்ணதாம் ததா² ।
க³ருடா³நிலயோ꞉ ஶைக்⁴ர்யமநுக³ச்ச²ந்தி யோஷித꞉ ॥ 6 ॥

இயம் து ப⁴வதோ பா⁴ர்யா தோ³ஷைரேதைர்விவர்ஜிதா ।
ஶ்லாக்⁴யா ச வ்யபதே³ஶ்யா ச யதா² தே³வீ ஹ்யருந்த⁴தீ ॥ 7 ॥

அலங்க்ருதோ(அ)யம் தே³ஶஶ்ச யத்ர ஸௌமித்ரிணா ஸஹ ।
வைதே³ஹ்யா சாநயா ராம வத்ஸ்யஸி த்வமரிந்த³ம ॥ 8 ॥

ஏவமுக்த꞉ ஸ முநிநா ராக⁴வ꞉ ஸம்யதாஞ்ஜலி꞉ ।
உவாச ப்ரஶ்ரிதம் வாக்யம்ருஷிம் தீ³ப்தமிவாநலம் ॥ 9 ॥

த⁴ந்யோ(அ)ஸ்ம்யநுக்³ருஹீதோ(அ)ஸ்மி யஸ்ய மே முநிபுங்க³வ꞉ ।
கு³ணை꞉ ஸப்⁴ராத்ருபா⁴ர்யஸ்ய வரத³꞉ பரிதுஷ்யதி ॥ 10 ॥

கிம் து வ்யாதி³ஶ மே தே³ஶம் ஸோத³கம் ப³ஹுகாநநம் ।
யத்ராஶ்ரமபத³ம் க்ருத்வா வஸேயம் நிரத꞉ ஸுக²ம் ॥ 11 ॥

ததோ(அ)ப்³ரவீந்முநிஶ்ரேஷ்ட²꞉ ஶ்ருத்வா ராமஸ்ய தத்³வச꞉ ।
த்⁴யாத்வா முஹூர்தம் த⁴ர்மாத்மா தீ⁴ரோ தீ⁴ரதரம் வச꞉ ॥ 12 ॥

இதோ த்³வியோஜநே தாத ப³ஹுமூலப²லோத³க꞉ ।
தே³ஶோ ப³ஹும்ருக³꞉ ஶ்ரீமாந்பஞ்சவட்யபி⁴விஶ்ருத꞉ ॥ 13 ॥

தத்ர க³த்வாஶ்ரமபத³ம் க்ருத்வா ஸௌமித்ரிணா ஸஹ ।
ரம்ஸ்யஸே த்வம் பிதுர்வாக்யம் யதோ²க்தமநுபாலயன் ॥ 14 ॥

காலோ(அ)யம் க³தபூ⁴யிஷ்டோ² ய꞉ காலஸ்தவ ராக⁴வ ।
ஸமயோ யோ நரேந்த்³ரேண க்ருதோ த³ஶரதே²ந தே ॥ 15 ॥

தீர்ணப்ரதிஜ்ஞ꞉ காகுத்ஸ்த² ஸுக²ம் ராஜ்யே நிவத்ஸ்யஸி ।
த⁴ந்யஸ்தே ஜநகோ ராம ஸ ராஜா ரகு⁴நந்த³ந ॥ 16 ॥

யஸ்த்வயா ஜ்யேஷ்ட²புத்ரேண யயாதிரிவ தாரித꞉ ।
விதி³தோ ஹ்யேஷ வ்ருத்தாந்தோ மம ஸர்வஸ்தவாநக⁴ ॥ 17 ॥

தபஸஶ்ச ப்ரபா⁴வேந ஸ்நேஹாத்³த³ஶரத²ஸ்ய ச ।
ஹ்ருத³யஸ்த²ஶ்ச தே ச²ந்தோ³ விஜ்ஞாதஸ்தபஸா மயா ॥ 18 ॥

இஹ வாஸம் ப்ரதிஜ்ஞாய மயா ஸஹ தபோவநே ।
வஸந்தம் த்வாம் ஜநா꞉ ஸர்வே ஜ்ஞாஸ்யந்தி ரகு⁴நந்த³ந ॥ 19 ॥

அதஶ்ச த்வாமஹம் ப்³ரூமி க³ச்ச² பஞ்சவடீமிதி ।
ஸ ஹி ரம்யோ வநோத்³தே³ஶோ மைதி²லீ தத்ர ரம்ஸ்யதே ॥ 20 ॥

ஸ தே³ஶ꞉ ஶ்லாக⁴நீயஶ்ச நாதிதூ³ரே ச ராக⁴வ ।
கோ³தா³வர்யா꞉ ஸமீபே ச மைதி²லீ தத்ர ரம்ஸ்யதே ॥ 21 ॥

ப்ராஜ்யமூலப²லஶ்சைவ நாநாத்³விஜக³ணாயுத꞉ ।
விவிக்தஶ்ச மஹாபா³ஹோ புண்யோ ரம்யஸ்ததை²வ ச ॥ 22 ॥

ப⁴வாநபி ஸதா³ரஶ்ச ஶக்தஶ்ச பரிரக்ஷணே ।
அபி சாத்ர வஸந்ராம தாபஸாந்பாலயிஷ்யஸி ॥ 23 ॥

ஏததா³ளக்ஷ்யதே வீர மதூ⁴காநாம் மஹத்³வநம் ।
உத்தரேணாஸ்ய க³ந்தவ்யம் ந்யக்³ரோத⁴மபி⁴க³ச்ச²தா ॥ 24 ॥

தத꞉ ஸ்த²லமுபாருஹ்ய பர்வதஸ்யாவிதூ³ரத꞉ ।
க்²யாத꞉ பஞ்சவடீத்யேவ நித்யபுஷ்பிதகாநந꞉ ॥ 25 ॥

அக³ஸ்த்யேநைவமுக்தஸ்து ராம꞉ ஸௌமித்ரிணா ஸஹ ।
ஸத்க்ருத்யாமந்த்ரயாமாஸ தம்ருஷிம் ஸத்யவாதி³நம் ॥ 26 ॥

தௌ து தேநாப்⁴யநுஜ்ஞாதௌ க்ருதபாதா³பி⁴வந்த³நௌ ।
ததா³ஶ்ரமாத்பஞ்சவடீம் ஜக்³மது꞉ ஸஹ ஸீதயா ॥ 27 ॥

க்³ருஹீதசாபௌ து நராதி⁴பாத்மஜௌ
விஷக்ததூணௌ ஸமரேஷ்வகாதரௌ ।
யதோ²பதி³ஷ்டேந பதா² மஹர்ஷிணா
ப்ரஜக்³மது꞉ பஞ்சவடீம் ஸமாஹிதௌ ॥ 28 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ த்ரயோத³ஶ꞉ ஸர்க³꞉ ॥ 13 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.