Kishkindha Kanda Sarga 25 – கிஷ்கிந்தா⁴காண்ட³ பஞ்சவிம்ஶ꞉ ஸர்க³꞉ (25)

ஸ்தோத்ரநிதி → வால்மீகி ராமாயணே கிஷ்கிந்த⁴காண்ட³ → கிஷ்கிந்தா⁴காண்ட³ பஞ்சவிம்ஶ꞉ ஸர்க³꞉ (25)

॥ வாலிஸம்ஸ்கார꞉ ॥

ஸுக்³ரீவம் சைவ தாராம் ச ஸாங்க³த³ம் ஸஹலக்ஷ்மண꞉ ।
ஸமானஶோக꞉ காகுத்ஸ்த²꞉ ஸாந்த்வயன்னித³மப்³ரவீத் ॥ 1 ॥

ந ஶோகபரிதாபேன ஶ்ரேயஸா யுஜ்யதே ம்ருத꞉ ।
யத³த்ரானந்தரம் கார்யம் தத்ஸமாதா⁴துமர்ஹத² ॥ 2 ॥

லோகவ்ருத்தமனுஷ்டே²யம் க்ருதம் வோ பா³ஷ்பமோக்ஷணம் ।
ந காலாது³த்தரம் கிஞ்சித்கர்ம ஶக்யமுபாஸிதும் ॥ 3 ॥

நியதி꞉ காரணம் லோகே நியதி꞉ கர்மஸாத⁴னம் ।
நியதி꞉ ஸர்வபூ⁴தானாம் நியோகே³ஷ்விஹ காரணம் ॥ 4 ॥

ந கர்தா கஸ்யசித்கஶ்சிந்நியோகே³ சாபி நேஶ்வர꞉ ।
ஸ்வபா⁴வே வர்ததே லோகஸ்தஸ்ய கால꞉ பராயணம் ॥ 5 ॥

ந கால꞉ காலமத்யேதி ந கால꞉ பரிஹீயதே ।
ஸ்வபா⁴வம் ச ஸமாஸாத்³ய ந கஶ்சித³திவர்ததே ॥ 6 ॥

ந காலஸ்யாஸ்தி ப³ந்து⁴த்வம் ந ஹேதுர்ன பராக்ரம꞉ ।
ந மித்ரஜ்ஞாதிஸம்ப³ந்த⁴꞉ காரணம் நாத்மனோ வஶ꞉ ॥ 7 ॥

கிம் து காலபரீணாமோ த்³ரஷ்டவ்ய꞉ ஸாது⁴ பஶ்யதா ।
த⁴ர்மஶ்சார்த²ஶ்ச காமஶ்ச காலக்ரமஸமாஹிதா꞉ ॥ 8 ॥

இத꞉ ஸ்வாம் ப்ரக்ருதிம் வாலீ க³த꞉ ப்ராப்த꞉ க்ரியாப²லம் ।
த⁴ர்மார்த²காமஸம்யோகை³꞉ பவித்ரம் ப்லவகே³ஶ்வர꞉ ॥ 9 ॥

ஸ்வத⁴ர்மஸ்ய ச ஸம்யோகா³ஜ்ஜிதஸ்தேன மஹாத்மனா ।
ஸ்வர்க³꞉ பரிக்³ருஹீதஶ்ச ப்ராணானபரிரக்ஷதா ॥ 10 ॥

ஏஷா வை நியதி꞉ ஶ்ரேஷ்டா² யாம் க³தோ ஹரியூத²ப꞉ ।
தத³ளம் பரிதாபேன ப்ராப்தகாலமுபாஸ்யதாம் ॥ 11 ॥

வசனாந்தே து ராமஸ்ய லக்ஷ்மண꞉ பரவீரஹா ।
அவத³த்ப்ரஶ்ரிதம் வாக்யம் ஸுக்³ரீவம் க³தசேதஸம் ॥ 12 ॥

குரு த்வமஸ்ய ஸுக்³ரீவ ப்ரேதகார்யமனந்தரம் ।
தாராங்க³தா³ப்⁴யாம் ஸஹிதோ வாலினோ த³ஹனம் ப்ரதி ॥ 13 ॥

ஸமாஜ்ஞாபய காஷ்டா²னி ஶுஷ்காணி ச ப³ஹூனி ச ।
சந்த³நாதீ³னி தி³வ்யானி வாலிஸம்ஸ்காரகாரணாத் ॥ 14 ॥

ஸமாஶ்வாஸய சைனம் த்வமங்க³த³ம் தீ³னசேதஸம் ।
மா பூ⁴ர்வாலிஶபு³த்³தி⁴ஸ்த்வம் த்வத³தீ⁴னமித³ம் புரம் ॥ 15 ॥

அங்க³த³ஸ்த்வானயேன்மால்யம் வஸ்த்ராணி விவிதா⁴னி ச ।
க்⁴ருதம் தைலமதோ² க³ந்தா⁴ன்யச்சாத்ர ஸமனந்தரம் ॥ 16 ॥

த்வம் தார ஶிபி³காம் ஶீக்⁴ரமாதா³யாக³ச்ச² ஸம்ப்⁴ரமாத் ।
த்வரா கு³ணவதீ யுக்தா ஹ்யஸ்மின்காலே விஶேஷத꞉ ॥ 17 ॥

ஸஜ்ஜீப⁴வந்து ப்லவகா³꞉ ஶிபி³காவஹனோசிதா꞉ ।
ஸமர்தா² ப³லினஶ்சைவ நிர்ஹரிஷ்யந்தி வாலினம் ॥ 18 ॥

ஏவமுக்த்வா து ஸுக்³ரீவம் ஸுமித்ரானந்த³வர்த⁴ன꞉ ।
தஸ்தௌ² ப்⁴ராத்ருஸமீபஸ்தோ² லக்ஷ்மண꞉ பரவீரஹா ॥ 19 ॥

லக்ஷ்மணஸ்ய வச꞉ ஶ்ருத்வா தார꞉ ஸம்ப்⁴ராந்தமானஸ꞉ ।
ப்ரவிவேஶ கு³ஹாம் ஶீக்⁴ரம் ஶிபி³காஸக்தமானஸ꞉ ॥ 20 ॥

ஆதா³ய ஶிபி³காம் தார꞉ ஸ து பர்யாபதத்புன꞉ ।
வானரைருஹ்யமானாம் தாம் ஶூரைருத்³வஹனோசிதை꞉ ॥ 21 ॥

தி³வ்யாம் ப⁴த்³ராஸனயுதாம் ஶிபி³காம் ஸ்யந்த³னோபமாம் ।
பக்ஷிகர்மபி⁴ராசித்ராம் த்³ருமகர்மவிபூ⁴ஷிதாம் ॥ 22 ॥

ஆசிதாம் சித்ரபத்தீபி⁴꞉ ஸுநிவிஷ்டாம் ஸமந்தத꞉ ।
விமானமிவ ஸித்³தா⁴னாம் ஜாலவாதாயனான்விதாம் ॥ 23 ॥

ஸுநியுக்தாம் விஶாலாம் ச ஸுக்ருதாம் விஶ்வகர்மணா ।
தா³ருபர்வதகோபேதாம் சாருகர்மபரிஷ்க்ருதாம் ॥ 24 ॥

வராப⁴ரணஹாரைஶ்ச சித்ரமால்யோபஶோபி⁴தாம் ।
கு³ஹக³ஹனஸஞ்ச²ன்னாம் ரக்தசந்த³னரூபிதாம் ॥ 25 ॥

புஷ்பௌகை⁴꞉ ஸமபி⁴ச்ச²ன்னாம் பத்³மமாலாபி⁴ரேவ ச ।
தருணாதி³த்யவர்ணாபி⁴ர்ப்⁴ராஜமாநாபி⁴ராவ்ருதாம் ॥ 26 ॥

ஈத்³ருஶீம் ஶிபி³காம் த்³ருஷ்ட்வா ராமோ லக்ஷ்மணமப்³ரவீத் ।
க்ஷிப்ரம் வினீயதாம் வாலீ ப்ரேதகார்யம் விதீ⁴யதாம் ॥ 27 ॥

ததோ வாலினமுத்³யம்ய ஸுக்³ரீவ꞉ ஶிபி³காம் ததா³ ।
ஆரோபயத விக்ரோஶன்னங்க³தே³ன ஸஹைவ து ॥ 28 ॥

ஆரோப்ய ஶிபி³காம் சைவ வாலினம் க³தஜீவிதம் ।
அலங்காரைஶ்ச விவிதை⁴ர்மால்யைர்வஸ்த்ரைஶ்ச பூ⁴ஷிதம் ॥ 29 ॥

ஆஜ்ஞாபயத்ததா³ ராஜா ஸுக்³ரீவ꞉ ப்லவகே³ஶ்வர꞉ ।
ஔர்த்⁴வதை³ஹிகமார்யஸ்ய க்ரியதாமனுரூபத꞉ ॥ 30 ॥

விஶ்ராணயந்தோ ரத்னானி விவிதா⁴னி ப³ஹூன்யபி ।
அக்³ரத꞉ ப்லவகா³ யாந்து ஶிபி³கா ஸமனந்தரம் ॥ 31 ॥

ராஜ்ஞாம்ருத்³தி⁴விஶேஷா ஹி த்³ருஶ்யந்தே பு⁴வி யாத்³ருஶா꞉ ।
தாத்³ருஶம் வாலின꞉ க்ஷிப்ரம் ப்ராகுர்வன்னௌர்த்⁴வதை³ஹிகம் ॥ 32 ॥

அங்க³த³ம் பரிக்³ருஹ்யாஶு தாரப்ரப்⁴ருதயஸ்ததா³ ।
க்ரோஶந்த꞉ ப்ரயயு꞉ ஸர்வே வானரா ஹதபா³ந்த⁴வா꞉ ॥ 33 ॥

தத꞉ ப்ரணிஹிதா꞉ ஸர்வா வானர்யோ(அ)ஸ்ய வஶானுகா³꞉ ।
சுக்ருஶுர்வீர வீரேதி பூ⁴ய꞉ க்ரோஶந்தி தா꞉ ஸ்த்ரிய꞉ ॥ 34 ॥

தாராப்ரப்⁴ருதய꞉ ஸர்வா வானர்யோ ஹதயூத²பா꞉ ।
அனுஜக்³முர்ஹி ப⁴ர்தாரம் க்ரோஶந்த்ய꞉ கருணஸ்வனா꞉ ॥ 35 ॥

தாஸாம் ருதி³தஶப்³தே³ன வானரீணாம் வனாந்தரே ।
வனானி கி³ரய꞉ ஸர்வே விக்ரோஶந்தீவ ஸர்வத꞉ ॥ 36 ॥

புலினே கி³ரினத்³யாஸ்து விவிக்தே ஜலஸம்வ்ருதே ।
சிதாம் சக்ரு꞉ ஸுப³ஹவோ வானரா꞉ ஶோககர்ஶிதா꞉ ॥ 37 ॥

அவரோப்ய தத꞉ ஸ்கந்தா⁴ச்சி²பி³காம் வஹனோசிதா꞉ ।
தஸ்து²ரேகாந்தமாஶ்ரித்ய ஸர்வே ஶோகஸமன்விதா꞉ ॥ 38 ॥

ததஸ்தாரா பதிம் த்³ருஷ்ட்வா ஶிபி³காதலஶாயினம் ।
ஆரோப்யாங்கே ஶிரஸ்தஸ்ய விளலாப ஸுது³꞉கி²தா ॥ 39 ॥

ஹா வானரமஹாராஜ ஹா நாத² மம வத்ஸல ।
ஹா மஹார்ஹ மஹாபா³ஹோ ஹா மம ப்ரிய பஶ்ய மாம் ॥ 40 ॥

ஜனம் ந பஶ்யஸீமம் த்வம் கஸ்மாச்சோ²காபி⁴பீடி³தம் ।
ப்ரஹ்ருஷ்டமிவ தே வக்த்ரம் க³தாஸோரபி மானத³ ॥ 41 ॥

அஸ்தார்கஸமவர்ணம் ச லக்ஷ்யதே ஜீவதோ யதா² ।
ஏஷ த்வாம் ராமரூபேண கால꞉ கர்ஷதி வானர ॥ 42 ॥

யேன ஸ்ம வித⁴வா꞉ ஸர்வா꞉ க்ருதா ஏகேஷுணா ரணே ।
இமாஸ்தாஸ்தவ ராஜேந்த்³ர வானர்யோ வல்லபா⁴꞉ ஸதா³ ॥ 43 ॥

பாதை³ர்விக்ருஷ்டமத்⁴வானமாக³தா꞉ கிம் ந பு³த்⁴யஸே ।
தவேஷ்டா நனு நாமைதா பா⁴ர்யாஶ்சந்த்³ரனிபா⁴னனா꞉ ॥ 44 ॥

இதா³னீம் நேக்ஷஸே கஸ்மாத்ஸுக்³ரீவம் ப்லவகே³ஶ்வரம் ।
ஏதே ஹி ஸசிவா ராஜம்ஸ்தாரப்ரப்⁴ருதயஸ்தவ ॥ 45 ॥

புரவாஸீ ஜனஶ்சாயம் பரிவார்யா(ஆ)ஸதே(அ)னக⁴ ।
விஸர்ஜயைதான் ப்லவகா³ன் யதோ²சிதமரிந்த³ம ॥ 46 ॥

தத꞉ க்ரீடா³மஹே ஸர்வா வனேஷு மத³னோத்கடா꞉ ।
ஏவம் விளபதீம் தாராம் பதிஶோகபரிப்லுதாம் ॥ 47 ॥

உத்தா²பயந்தி ஸ்ம ததா³ வானர்ய꞉ ஶோககர்ஶிதா꞉ ।
ஸுக்³ரீவேண தத꞉ ஸார்த⁴மங்க³த³꞉ பிதரம் ருத³ன் ॥ 48 ॥

சிதாமாரோபயாமாஸ ஶோகேநாபி⁴ஹதேந்த்³ரிய꞉ ।
ததோ(அ)க்³னிம் விதி⁴வத்³த³த்த்வா ஸோ(அ)பஸவ்யம் சகார ஹ ॥ 49 ॥

பிதரம் தீ³ர்க⁴மத்⁴வானம் ப்ரஸ்தி²தம் வ்யாகுலேந்த்³ரிய꞉ ।
ஸம்ஸ்க்ருத்ய வாலினம் தே து விதி⁴பூர்வம் ப்லவங்க³மா꞉ ॥ 50 ॥

ஆஜக்³முருத³கம் கர்தும் நதீ³ம் ஶீதஜலாம் ஶிவாம் ।
ததஸ்தே ஸஹிதாஸ்தத்ர ஹ்யங்க³த³ம் ஸ்தா²ப்ய சாக்³ரத꞉ ॥ 51 ॥

ஸுக்³ரீவதாராஸஹிதா꞉ ஸிஷிசுர்வாலினே ஜலம் ।
ஸுக்³ரீவேணைவ தீ³னேன தீ³னோ பூ⁴த்வா மஹாப³ல꞉ ।
ஸமானஶோக꞉ காகுத்ஸ்த²꞉ ப்ரேதகார்யாண்யகாரயத் ॥ 52 ॥

ததஸ்து தம் வாலினமக்³ர்யபௌருஷம்
ப்ரகாஶமிக்ஷ்வாகுவரேஷுணா ஹதம் ।
ப்ரதீ³ப்ய தீ³ப்தாக்³நிஸமௌஜஸம் ததா³
ஸலக்ஷ்மணம் ராமமுபேயிவான் ஹரி꞉ ॥ 53 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே கிஷ்கிந்தா⁴காண்டே³ பஞ்சவிம்ஶ꞉ ஸர்க³꞉ ॥ 25 ॥

---

ஸம்பூர்ண வால்மீகி ராமாயணே கிஷ்கிந்த⁴காண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.