Aranya Kanda Sarga 51 – அரண்யகாண்ட³ ஏகபஞ்சாஶ꞉ ஸர்க³꞉ (51)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ ஏகபஞ்சாஶ꞉ ஸர்க³꞉ (51)

॥ ஜடாயூராவணயுத்³த⁴ம் ॥

இத்யுக்தஸ்ய யதா²ந்யாயம் ராவணஸ்ய ஜடாயுஷா ।
க்ருத்³த⁴ஸ்யாக்³நிநிபா⁴꞉ ஸர்வா ரேஜுர்விம்ஶதித்³ருஷ்டய꞉ ॥ 1 ॥

ஸம்ரக்தநயந꞉ கோபாத்தப்தகாஞ்சநகுண்ட³ல꞉ ।
ராக்ஷஸேந்த்³ரோ(அ)பி⁴து³த்³ராவ பதகே³ந்த்³ரமமர்ஷண꞉ ॥ 2 ॥

ஸ ஸம்ப்ரஹாரஸ்துமுலஸ்தயோஸ்தஸ்மிந் மஹாவநே ।
ப³பூ⁴வ வாதோத்³த⁴தயோர்மேக⁴யோர்க³க³நே யதா² ॥ 3 ॥

தத்³ப³பூ⁴வாத்³பு⁴தம் யுத்³த⁴ம் க்³ருத்⁴ரராக்ஷஸயோஸ்ததா³ ।
ஸபக்ஷயோர்மால்யவதோர்மஹாபர்வதயோரிவ ॥ 4 ॥

ததோ நாலீகநாராசைஸ்தீக்ஷ்ணாக்³ரைஶ்ச விகர்ணிபி⁴꞉ ।
அப்⁴யவர்ஷந்மஹாகோ⁴ரைர்க்³ருத்⁴ரராஜம் மஹாப³ல꞉ ॥ 5 ॥

ஸ தாநி ஶரஜாலாநி க்³ருத்⁴ர꞉ பத்ரரதே²ஶ்வர꞉ ।
ஜடாயு꞉ ப்ரதிஜக்³ராஹ ராவணாஸ்த்ராணி ஸம்யுகே³ ॥ 6 ॥

தஸ்ய தீக்ஷ்ணநகா²ப்⁴யாம் து சரணாப்⁴யாம் மஹாப³ல꞉ ।
சகார ப³ஹுதா⁴ கா³த்ரே வ்ரணாந் பதக³ஸத்தம꞉ ॥ 7 ॥

அத² க்ரோதா⁴த்³த³ஶக்³ரீவோ ஜக்³ராஹ த³ஶ மார்க³ணாந் ।
ம்ருத்யுத³ண்ட³நிபா⁴ந் கோ⁴ராந் ஶத்ருமர்த³நகாங்க்ஷயா ॥ 8 ॥

ஸ தைர்பா³ணைர்மஹாவீர்ய꞉ பூர்ணமுக்தைரஜிஹ்மகை³꞉ ।
பி³பே⁴த³ நிஶிதைஸ்தீக்ஷ்ணைர்க்³ருத்⁴ரம் கோ⁴ரை꞉ ஶிலீமுகை²꞉ ॥ 9 ॥

ஸ ராக்ஷஸரதே² பஶ்யந் ஜாநகீம் பா³ஷ்பலோசநாம் ।
அசிந்தயித்வா தாந் பா³ணாந் ராக்ஷஸம் ஸமபி⁴த்³ரவத் ॥ 10 ॥

ததோ(அ)ஸ்ய ஸஶரம் சாபம் முக்தாமணிவிபூ⁴ஷிதம் ।
சரணாப்⁴யாம் மஹாதேஜா ப³ப⁴ஞ்ஜ பதகே³ஶ்வர꞉ ॥ 11 ॥

ததோ(அ)ந்யத்³த⁴நுராதா³ய ராவண꞉ க்ரோத⁴மூர்சி²த꞉ ।
வவர்ஷ ஶரவர்ஷாணி ஶதஶோ(அ)த² ஸஹஸ்ரஶ꞉ ॥ 12 ॥

ஶரைராவாரிதஸ்தஸ்ய ஸம்யுகே³ பதகே³ஶ்வர꞉ ।
குலாயமுபஸம்ப்ராப்த꞉ பக்ஷீவ ப்ரப³பௌ⁴ ததா³ ॥ 13 ॥

ஸ தாநி ஶரவர்ஷாணி பக்ஷாப்⁴யாம் ச விதூ⁴ய ச ।
சரணாப்⁴யாம் மஹாதேஜா ப³ப⁴ஞ்ஜாஸ்ய மஹத்³த⁴நு꞉ ॥ 14 ॥

தச்சாக்³நிஸத்³ருஶம் தீ³ப்தம் ராவணஸ்ய ஶராவரம் ।
பக்ஷாப்⁴யாம் ஸ மஹாவீர்யோ வ்யாது⁴நோத்பதகே³ஶ்வர꞉ ॥ 15 ॥

காஞ்சநோரஶ்ச²தா³ந் தி³வ்யாந் பிஶாசவத³நாந் க²ராந் ।
தாம்ஶ்சாஸ்ய ஜவஸம்பந்நாந் ஜகா⁴ந ஸமரே ப³லீ ॥ 16 ॥

வரம் த்ரிவேணுஸம்பந்நம் காமக³ம் பாவகார்சிஷம் ।
மணிஹேமவிசித்ராங்க³ம் ப³ப⁴ஞ்ஜ ச மஹாரத²ம் ॥ 17 ॥

பூர்ணசந்த்³ரப்ரதீகாஶம் ச²த்ரம் ச வ்யஜநை꞉ ஸஹ ।
பாதயாமாஸ வேகே³ந க்³ராஹிபீ⁴ ராக்ஷஸை꞉ ஸஹ ॥ 18 ॥

ஸாரதே²ஶ்சாஸ்ய வேகே³ந துண்டே³நைவ மஹச்சி²ர꞉ ।
புநர்வ்யபாஹரச்ச்²ரீமாந் பக்ஷிராஜோ மஹாப³ல꞉ ॥ 19 ॥

ஸ ப⁴க்³நத⁴ந்வா விரதோ² ஹதாஶ்வோ ஹதஸாரதி²꞉ ।
அங்கேநாதா³ய வைதே³ஹீம் பபாத பு⁴வி ராவண꞉ ॥ 20 ॥

த்³ருஷ்ட்வா நிபதிதம் பூ⁴மௌ ராவணம் ப⁴க்³நவாஹநம் ।
ஸாது⁴ ஸாத்⁴விதி பூ⁴தாநி க்³ருத்⁴ரராஜமபூஜயந் ॥ 21 ॥

பரிஶ்ராந்தம் து தம் த்³ருஷ்ட்வா ஜரயா பக்ஷியூத²பம் ।
உத்பபாத புநர்ஹ்ருஷ்டோ மைதி²லீம் க்³ருஹ்ய ராவண꞉ ॥ 22 ॥

தம் ப்ரஹ்ருஷ்டம் நிதா⁴யாங்கே க³ச்ச²ந்தம் ஜநகாத்மஜாம் ।
க்³ருத்⁴ரராஜ꞉ ஸமுத்பத்ய ஸமபி⁴த்³ருத்ய ராவணம் ॥ 23 ॥

ஸமாவார்ய மஹாதேஜா ஜடாயுரித³மப்³ரவீத் ।
வஜ்ரஸம்ஸ்பர்ஶபா³ணஸ்ய பா⁴ர்யாம் ராமஸ்ய ராவண ॥ 24 ॥

அல்பபு³த்³தே⁴ ஹரஸ்யேநாம் வதா⁴ய க²லு ரக்ஷஸாம் ।
ஸமித்ரப³ந்து⁴꞉ ஸாமாத்ய꞉ ஸப³ல꞉ ஸபரிச்ச²த³꞉ ॥ 25 ॥

விஷபாநம் பிப³ஸ்யேதத்பிபாஸித இவோத³கம் ।
அநுப³ந்த⁴மஜாநந்த꞉ கர்மணாமவிசக்ஷணா꞉ ॥ 26 ॥

ஶீக்⁴ரமேவ விநஶ்யந்தி யதா² த்வம் விநஶிஷ்யஸி ।
ப³த்³த⁴ஸ்த்வம் காலபாஶேந க்வ க³தஸ்தஸ்ய மோக்ஷ்யஸே ॥ 27 ॥

வதா⁴ய ப³டி³ஶம் க்³ருஹ்ய ஸாமிஷம் ஜலஜோ யதா² ।
ந ஹி ஜாது து³ராத⁴ர்ஷோ காகுத்ஸ்தௌ² தவ ராவண ॥ 28 ॥

த⁴ர்ஷணம் சாஶ்ரமஸ்யாஸ்ய க்ஷமிஷ்யேதே து ராக⁴வௌ ।
யதா² த்வயா க்ருதம் கர்ம பீ⁴ருணா லோகக³ர்ஹிதம் ॥ 29 ॥

தஸ்கராசரிதோ மார்கோ³ நைஷ வீரநிஷேவித꞉ ।
யுத்³த்⁴யஸ்வ யதி³ ஶூரோ(அ)ஸி முஹூர்தம் திஷ்ட² ராவண ॥ 30 ॥

ஶயிஷ்யஸே ஹதோ பூ⁴மௌ யதா² ப்⁴ராதா க²ரஸ்ததா² ।
பரேதகாலே புருஷோ யத்கர்ம ப்ரதிபத்³யதே ॥ 31 ॥

விநாஶாயாத்மநோ(அ)த⁴ர்ம்யம் ப்ரதிபந்நோ(அ)ஸி கர்ம தத் ।
பாபாநுப³ந்தோ⁴ வை யஸ்ய கர்மண꞉ கர்ம கோ நு தத் ॥ 32 ॥

குர்வீத லோகாதி⁴பதி꞉ ஸ்வயம்பூ⁴ர்ப⁴க³வாநபி ।
ஏவமுக்த்வா ஶுப⁴ம் வாக்யம் ஜடாயுஸ்தஸ்ய ரக்ஷஸ꞉ ॥ 33 ॥

நிபபாத ப்⁴ருஶம் ப்ருஷ்டே² த³ஶக்³ரீவஸ்ய வீர்யவாந் ।
தம் க்³ருஹீத்வா நகை²ஸ்தீக்ஷ்ணைர்விரராத³ ஸமந்தத꞉ ॥ 34 ॥

அதி⁴ரூடோ⁴ க³ஜாரோஹோ யதா² ஸ்யாத்³து³ஷ்டவாரணம் ।
விரராத³ நகை²ரஸ்ய துண்ட³ம் ப்ருஷ்டே² ஸமர்பயந் ॥ 35 ॥

கேஶாம்ஶ்சோத்பாடயாமாஸ நக²பக்ஷமுகா²யுத⁴꞉ ।
ஸ ததா² க்³ருத்⁴ரராஜேந க்லிஶ்யமாநோ முஹுர்முஹு꞉ ॥ 36 ॥

அமர்ஷஸ்பு²ரிதோஷ்ட²꞉ ஸந் ப்ராகம்பத ஸ ராவண꞉ ।
ஸ பரிஷ்வஜ்ய வைதே³ஹீம் வாமேநாங்கேந ராவண꞉ ॥ 37 ॥

தலேநாபி⁴ஜகா⁴நாஶு ஜடாயும் க்ரோத⁴மூர்சி²த꞉ ।
ஜடாயுஸ்தமபி⁴க்ரம்ய துண்டே³நாஸ்ய க²கா³தி⁴ப꞉ ॥ 38 ॥

வாமபா³ஹூந் த³ஶ ததா³ வ்யபாஹரத³ரிந்த³ம꞉ ।
ஸஞ்சி²ந்நபா³ஹோ꞉ ஸத்³யைவ பா³ஹவ꞉ ஸஹஸா(அ)ப⁴வந் ॥ 39 ॥

விஷஜ்வாலாவளீயுக்தா வல்மீகாதி³வ பந்நகா³꞉ ।
தத꞉ க்ரோதா⁴த்³த³ஶக்³ரீவ꞉ ஸீதாமுத்ஸ்ருஜ்ய ராவண꞉ ॥ 40 ॥

முஷ்டிப்⁴யாம் சரணாப்⁴யாம் ச க்³ருத்⁴ரராஜமபோத²யத் ।
ததோ முஹூர்தம் ஸங்க்³ராமோ ப³பூ⁴வாதுலவீர்யயோ꞉ ॥ 41 ॥

ராக்ஷஸாநாம் ச முக்²யஸ்ய பக்ஷிணாம் ப்ரவரஸ்ய ச ।
தஸ்ய வ்யாயச்ச²மாநஸ்ய ராமஸ்யார்தே² ஸ ராவண꞉ ॥ 42 ॥

பக்ஷௌ பார்ஶ்வௌ ச பாதௌ³ ச க²ட்³க³முத்³த்⁴ருத்ய ஸோ(அ)ச்சி²நத் ।
ஸ ச்சி²ந்நபக்ஷ꞉ ஸஹஸா ரக்ஷஸா ரௌத்³ரகர்மணா ।
நிபபாத ஹதோ க்³ருத்⁴ரோ த⁴ரண்யாமள்பஜீவித꞉ ॥ 43 ॥

தம் த்³ருஷ்ட்வா பதிதம் பூ⁴மௌ க்ஷதஜார்த்³ரம் ஜடாயுஷம் ।
அப்⁴யதா⁴வத வைத³ஹீ ஸ்வப³ந்து⁴மிவ து³꞉கி²தா ॥ 44 ॥

தம் நீலஜீமூதநிகாஶகல்பம்
ஸுபாண்டு³ரோரஸ்கமுதா³ரவீர்யம் ।
த³த³ர்ஶ லங்காதி⁴பதி꞉ ப்ருதி²வ்யாம்
ஜடாயுஷம் ஶாந்தமிவாக்³நிதா³வம் ॥ 45 ॥

ததஸ்து தம் பத்ரரத²ம் மஹீதலே
நிபாதிதம் ராவணவேக³மர்தி³தம் ।
புந꞉ பரிஷ்வஜ்ய ஶஶிப்ரபா⁴நநா
ருரோத³ ஸீதா ஜநகாத்மஜா ததா³ ॥ 46 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ ஏகபஞ்சாஶ꞉ ஸர்க³꞉ ॥ 51 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.