Aranya Kanda Sarga 37 – அரண்யகாண்ட³ ஸப்தத்ரிம்ஶ꞉ ஸர்க³꞉ (37)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ ஸப்தத்ரிம்ஶ꞉ ஸர்க³꞉ (37)

॥ அப்ரியபத்²யவசநம் ॥

தச்ச்²ருத்வா ராக்ஷஸேந்த்³ரஸ்ய வாக்யம் வாக்யவிஶாரத³꞉ ।
ப்ரத்யுவாச மஹாப்ராஜ்ஞோ மாரீசோ ராக்ஷஸேஶ்வரம் ॥ 1 ॥

ஸுலபா⁴꞉ புருஷா ராஜந் ஸததம் ப்ரியவாதி³ந꞉ ।
அப்ரியஸ்ய து பத்²யஸ்ய வக்தா ஶ்ரோதா ச து³ர்லப⁴꞉ ॥ 2 ॥

ந நூநம் பு³த்³த்⁴யஸே ராமம் மஹாவீர்யம் கு³ணோந்நதம் ।
அயுக்தசாரஶ்சபலோ மஹேந்த்³ரவருணோபமம் ॥ 3 ॥

அபி ஸ்வஸ்தி ப⁴வேத்தாத ஸர்வேஷாம் பு⁴வி ரக்ஷஸாம் ।
அபி ராமோ ந ஸங்க்ருத்³த⁴꞉ குர்யாள்லோகமராக்ஷஸம் ॥ 4 ॥

அபி தே ஜீவிதாந்தாய நோத்பந்நா ஜநகாத்மஜா ।
அபி ஸீதாநிமித்தம் ச ந ப⁴வேத்³வ்யஸநம் மம ॥ 5 ॥

அபி த்வமீஶ்வரம் ப்ராப்ய காமவ்ருத்தம் நிரங்குஶம் ।
ந விநஶ்யேத் புரீ லங்கா த்வயா ஸஹ ஸராக்ஷஸா ॥ 6 ॥

த்வத்³வித⁴꞉ காமவ்ருத்தோ ஹி து³꞉ஶீல꞉ பாபமந்த்ரித꞉ ।
ஆத்மாநம் ஸ்வஜநம் ராஷ்ட்ரம் ஸ ராஜா ஹந்தி து³ர்மதி꞉ ॥ 7 ॥

ந ச பித்ரா பரித்யக்தோ நாமர்யாத³꞉ கத²ஞ்சந ।
ந லுப்³தோ⁴ ந ச து³꞉ஶீலோ ந ச க்ஷத்ரியபாம்ஸந꞉ ॥ 8 ॥

ந ச த⁴ர்மகு³ணைர்ஹீந꞉ கௌஸல்யாநந்த³வர்த⁴ந꞉ ।
ந தீக்ஷ்ணோ ந ச பூ⁴தாநாம் ஸர்வேஷாமஹிதே ரத꞉ ॥ 9 ॥

வஞ்சிதம் பிதரம் த்³ருஷ்ட்வா கைகேய்யா ஸத்யவாதி³நம் ।
கரிஷ்யாமீதி த⁴ர்மாத்மா தாத ப்ரவ்ரஜிதோ வநம் ॥ 10 ॥

கைகேய்யா꞉ ப்ரியகாமார்த²ம் பிதுர்த³ஶரத²ஸ்ய ச ।
ஹித்வா ராஜ்யம் ச போ⁴கா³ம்ஶ்ச ப்ரவிஷ்டோ த³ண்ட³காவநம் ॥ 11 ॥

ந ராம꞉ கர்கஶஸ்தாத நாவித்³வாந்நாஜிதேந்த்³ரிய꞉ ।
அந்ருதம் து³꞉ஶ்ருதம் சைவ நைவ த்வம் வக்துமர்ஹஸி ॥ 12 ॥

ராமோ விக்³ரஹவாந் த⁴ர்ம꞉ ஸாது⁴꞉ ஸத்யபராக்ரம꞉ ।
ராஜா ஸர்வஸ்ய லோகஸ்ய தே³வாநாம் மக⁴வாநிவ ॥ 13 ॥

கத²ம் த்வம் தஸ்ய வைதே³ஹீம் ரக்ஷிதாம் ஸ்வேந தேஜஸா ।
இச்ச²ஸி ப்ரஸப⁴ம் ஹர்தும் ப்ரபா⁴மிவ விவஸ்வத꞉ ॥ 14 ॥

ஶரார்சிஷமநாத்⁴ருஷ்யம் சாபக²ட்³கே³ந்த⁴நம் ரணே ।
ராமாக்³நிம் ஸஹஸா தீ³ப்தம் ந ப்ரவேஷ்டும் த்வமர்ஹஸி ॥ 15 ॥

த⁴நுர்வ்யாதி³ததீ³ப்தாஸ்யம் ஶரார்சிஷமமர்ஷணம் ।
சாபபாஶத⁴ரம் வீரம் ஶத்ருஸைந்யபஹாரிணம் ॥ 16 ॥

ராஜ்யம் ஸுக²ம் ச ஸந்த்யஜ்ய ஜீவிதம் சேஷ்டமாத்மந꞉ ।
நாத்யாஸாத³யிதும் தாத ராமாந்தகமிஹார்ஹஸி ॥ 17 ॥

அப்ரமேயம் ஹி தத்தேஜோ யஸ்ய ஸா ஜநகாத்மஜா ।
ந த்வம் ஸமர்த²ஸ்தாம் ஹர்தும் ராமசாபாஶ்ரயாம் வநே ॥ 18 ॥

தஸ்ய ஸா நரஸிம்ஹஸ்ய ஸிம்ஹோரஸ்கஸ்ய பா⁴மிநீ ।
ப்ராணேப்⁴யோ(அ)பி ப்ரியதரா பா⁴ர்யா நித்யமநுவ்ரதா ॥ 19 ॥

ந ஸா த⁴ர்ஷயிதும் ஶக்யா மைதி²ல்யோஜஸ்விந꞉ ப்ரியா ।
தீ³ப்தஸ்யேவ ஹுதாஶஸ்ய ஶிகா² ஸீதா ஸுமத்⁴யமா ॥ 20 ॥

கிமுத்³யமமிமம் வ்யர்த²ம் க்ருத்வா தே ராக்ஷஸாதி⁴ப ।
த்³ருஷ்டஶ்சேத்த்வம் ரணே தேந தத³ந்தம் தவ ஜீவிதம் ॥ 21 ॥

ஜீவிதம் ச ஸுக²ம் சைவ ராஜ்யம் சைவ ஸுது³ர்லப⁴ம் ।
யதீ³ச்ச²ஸி சிரம் போ⁴க்தும் மா க்ருதா² ராமவிப்ரியம் ॥ 22 ॥

ஸ ஸர்வை꞉ ஸசிவை꞉ ஸார்த⁴ம் விபீ⁴ஷணபுரோக³மை꞉ ।
மந்த்ரயித்வா து த⁴ர்மிஷ்டை²꞉ க்ருத்வா நிஶ்சயமாத்மந꞉ ॥ 23 ॥

தோ³ஷாணாம் ச கு³ணாநாம் ச ஸம்ப்ரதா⁴ர்ய ப³லாப³லம் ।
ஆத்மநஶ்ச ப³லம் ஜ்ஞாத்வா ராக⁴வஸ்ய ச தத்த்வத꞉ ।
ஹிதாஹிதம் விநிஶ்சித்ய க்ஷமம் த்வம் கர்துமர்ஹஸி ॥ 24 ॥

அஹம் து மந்யே தவ ந க்ஷமம் ரணே
ஸமாக³மம் கோஸலராஜஸூநுநா ।
இத³ம் ஹி பூ⁴ய꞉ ஶ்ருணு வாக்யமுத்தமம்
க்ஷமம் ச யுக்தம் ச நிஶாசரேஶ்வர ॥ 25 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ ஸப்தத்ரிம்ஶ꞉ ஸர்க³꞉ ॥ 37 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.