Ayodhya Kanda Sarga 86 – அயோத்⁴யாகாண்ட³ ஷட³ஶீதிதம꞉ ஸர்க³꞉ (86)

ஸ்தோத்ரநிதி → வால்மீகி ராமாயணே அயோத்⁴யகாண்ட³ → அயோத்⁴யாகாண்ட³ ஷட³ஶீதிதம꞉ ஸர்க³꞉ (86)

॥ கு³ஹவாக்யம் ॥

ஆசசக்ஷே(அ)த² ஸத்³பா⁴வம் லக்ஷ்மணஸ்ய மஹாத்மந꞉ ।
ப⁴ரதாயாப்ரமேயாய கு³ஹோ க³ஹநகோ³சர꞉ ॥ 1 ॥

தம் ஜாக்³ரதம் கு³ணைர்யுக்தம் ஶரசாபாஸிதா⁴ரிணம் ।
ப்⁴ராத்ருகு³ப்த்யர்த²மத்யந்தமஹம் லக்ஷ்மணமப்³ரவம் ॥ 2 ॥

இயம் தாத ஸுகா² ஶய்யா த்வத³ர்த²முபகல்பிதா ।
ப்ரத்யாஶ்வஸி ஹி ஶேஷ்வாஸ்யாம் ஸுக²ம் ராக⁴வநந்த³ந ॥ 3 ॥

உசிதோ(அ)யம் ஜந꞉ ஸர்வோ து³꞉கா²நாம் த்வம் ஸுகோ²சித꞉ ।
த⁴ர்மாத்மம்ஸ்தஸ்ய கு³ப்த்யர்த²ம் ஜாக³ரிஷ்யாமஹே வயம் ॥ 4 ॥

ந ஹி ராமாத்ப்ரியதரோ மமாஸ்தி பு⁴வி கஶ்சந ।
மோத்ஸுகோபூ⁴ர்ப்³ரவீம்யேதத³ப்யஸத்யம் தவாக்³ரத꞉ ॥ 5 ॥

அஸ்ய ப்ரஸாதா³தா³ஶம்ஸே லோகே(அ)ஸ்மிந் ஸுமஹத்³யஶ꞉ ।
த⁴ர்மாவாப்திம் ச விபுலாமர்தா²வாப்திம் ச கேவலாம் ॥ 6 ॥

ஸோ(அ)ஹம் ப்ரியஸக²ம் ராமம் ஶயாநம் ஸஹ ஸீதயா ।
ரக்ஷிஷ்யாமி த⁴நுஷ்பாணி꞉ ஸர்வை꞉ ஸ்வைர்ஜ்ஞாதிபி⁴꞉ ஸஹ ॥ 7 ॥

ந ஹி மே(அ)விதி³தம் கிஞ்சித்³வநே(அ)ஸ்மிம்ஶ்சரத꞉ ஸதா³ ।
சதுரங்க³ம் ஹ்யபி ப³லம் ப்ரஸஹேம வயம் யுதி⁴ ॥ 8 ॥

ஏவமஸ்மாபி⁴ருக்தேந லக்ஷ்மணேந மஹாத்மநா ।
அநுநீதா வயம் ஸர்வே த⁴ர்மமேவாநுபஶ்யதா ॥ 9 ॥

கத²ம் தா³ஶரதௌ² பூ⁴மௌ ஶயாநே ஸஹ ஸீதயா ।
ஶக்யா நித்³ரா மயா லப்³து⁴ம் ஜீவிதம் வா ஸுகா²நி வா ॥ 10 ॥

யோ ந தே³வாஸுரை꞉ ஸர்வை꞉ ஶக்ய꞉ ப்ரஸஹிதும் யுதி⁴ ।
தம் பஶ்ய கு³ஹ ஸம்விஷ்டம் த்ருணேஷு ஸஹ ஸீதயா ॥ 11 ॥

மஹதா தபஸா லப்³தோ⁴ விவிதை⁴ஶ்ச பரிஶ்ரமை꞉ ।
ஏகோ த³ஶரத²ஸ்யைஷ புத்ர꞉ ஸத்³ருஶலக்ஷண꞉ ॥ 12 ॥

அஸ்மிந்ப்ரவ்ராஜிதே ராஜா ந சிரம் வர்தயிஷ்யதி ।
வித⁴வா மேதி³நீ நூநம் க்ஷிப்ரமேவ ப⁴விஷ்யதி ॥ 13 ॥

விநத்³ய ஸுமஹாநாத³ம் ஶ்ரமேணோபரதா꞉ ஸ்த்ரிய꞉ ।
நிர்கோ⁴ஷோபரதம் நூநமத்³ய ராஜநிவேஶநம் ॥ 14 ॥ [விரதோ]

கௌஸல்யா சைவ ராஜா ச ததை²வ ஜநநீ மம ।
நாஶம்ஸே யதி³ ஜீவேயு꞉ ஸர்வே தே ஶர்வரீமிமாம் ॥ 15 ॥

ஜீவேத³பி ஹி மே மாதா ஶத்ருக்⁴நஸ்யாந்வவேக்ஷயா ।
து³꞉கி²தா யா து கௌஸல்யா வீரஸூர்விநஶிஷ்யதி ॥ 16 ॥

அதிக்ராந்தமதிக்ராந்தமநவாப்ய மநோரத²ம் ।
ராஜ்யே ராமமநிக்ஷிப்ய பிதா மே விநஶிஷ்யதி ॥ 17 ॥

ஸித்³தா⁴ர்தா²꞉ பிதரம் வ்ருத்தம் தஸ்மிந்காலே ஹ்யுபஸ்தி²தே ।
ப்ரேதகார்யேஷு ஸர்வேஷு ஸம்ஸ்கரிஷ்யந்தி பூ⁴மிபம் ॥ 18 ॥

ரம்யசத்வரஸம்ஸ்தா²நாம் ஸுவிப⁴க்த மஹாபதா²ம் ।
ஹர்ம்யப்ராஸாத³ஸம்பந்நாம் ஸர்வரத்நவிபூ⁴ஷிதாம் ॥ 19 ॥

க³ஜாஶ்வரத²ஸம்பா³தா⁴ம் தூர்யநாத³விநாதி³தாம் ।
ஸர்வகல்யாணஸம்பூர்ணாம் ஹ்ருஷ்டபுஷ்டஜநாகுலாம் ॥ 20 ॥

ஆராமோத்³யாநஸம்பூர்ணாம் ஸமாஜோத்ஸவஶாலிநீம் ।
ஸுகி²தா விசரிஷ்யந்தி ராஜதா⁴நீம் பிதுர்மம ॥ 21 ॥

அபி ஸத்யப்ரதிஜ்நேந ஸார்த⁴ம் குஶலிநா வயம் ।
நிவ்ருத்தே ஸமயே ஹ்யஸ்மிந் ஸுகி²தா꞉ ப்ரவிஶேமஹி ॥ 22 ॥

பரிதே³வயமாநஸ்ய தஸ்யைவம் ஸுமஹாத்மந꞉ ।
திஷ்ட²தோ ராஜபுத்ரஸ்ய ஶர்வரீ ஸா(அ)த்யவர்தத ॥ 23 ॥

ப்ரபா⁴தே விமலே ஸூர்யே காரயித்வா ஜடாவுபௌ⁴ ।
அஸ்மிந் பா⁴கீ³ரதீ²தீரே ஸுக²ம் ஸந்தாரிதௌ மயா ॥ 24 ॥

ஜடா த⁴ரௌ தௌ த்³ருமசீரவாஸஸௌ
மஹாப³லௌ குஞ்ஜர யூத²போபமௌ ।
வரேஷுசாபாஸித⁴ரௌ பரந்தபௌ
வ்யவேக்ஷமாணௌ ஸஹ ஸீதயா க³தௌ ॥ 25 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அயோத்⁴யாகாண்டே³ ஷட³ஶீதிதம꞉ ஸர்க³꞉ ॥ 86 ॥

அயோத்⁴யாகாண்ட³ ஸப்தாஶீதிதம꞉ ஸர்க³꞉ (87) >>

---

ஸம்பூர்ண வால்மீகி ராமாயணே அயோத்⁴யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.