Sri Krishna Stavaraja 1 (Narada Krutam) – ஶ்ரீ க்ருஷ்ண ஸ்தவராஜ꞉ (நாரத³ க்ருதம்)

ஸ்தோத்ரநிதி → ஶ்ரீ க்ருஷ்ண ஸ்தோத்திரங்கள் → ஶ்ரீ க்ருஷ்ண ஸ்தவராஜ꞉ (நாரத³ க்ருதம்)

ப்ரஸீத³ ப⁴க³வந் மஹ்யமஜ்ஞாநாத்குண்டி²தாத்மநே ।
தவாங்க்⁴ரிபங்கஜரஜோராகி³ணீம் ப⁴க்திமுத்தமாம் ॥ 1 ॥

அஜ ப்ரஸீத³ ப⁴க³வந்நமிதத்³யுதிபஞ்ஜர ।
அப்ரமேய ப்ரஸீதா³ஸ்மத்³து³꞉க²ஹந் புருஷோத்தம ॥ 2 ॥

ஸ்வஸம்வேத்³ய ப்ரஸீதா³ஸ்மதா³நந்தா³த்மந்நநாமய ।
அசிந்த்யஸார விஶ்வாத்மந் ப்ரஸீத³ பரமேஶ்வர ॥ 3 ॥

ப்ரஸீத³ துங்க³ துங்கா³நாம் ப்ரஸீத³ ஶிவ ஶோப⁴ந ।
ப்ரஸீத³ கு³ணக³ம்பீ⁴ர க³ம்பீ⁴ராணாம் மஹாத்³யுதே ॥ 4 ॥

ப்ரஸீத³ வ்யக்த விஸ்தீர்ண விஸ்தீர்ணாநாமகோ³சர ।
ப்ரஸீதா³ர்த்³ரார்த்³ரஜாதீநாம் ப்ரஸீதா³ந்தாந்ததா³யிநாம் ॥ 5 ॥

கு³ரோர்க³ரீய꞉ ஸர்வேஶ ப்ரஸீதா³நந்த தே³ஹிநாம் ।
ஜய மாத⁴வ மாயாத்மந் ஜய ஶாஶ்வத ஶங்க²ப்⁴ருத் ॥ 6 ॥

ஜய ஶங்க²த⁴ர ஶ்ரீமந் ஜய நந்த³கநந்த³ந ।
ஜய சக்ரக³தா³பாணே ஜய தே³வ ஜநார்த³ந ॥ 7 ॥

ஜய ரத்நவராப³த்³த⁴கிரீடாக்ராந்தமஸ்தக ।
ஜய பக்ஷிபதிச்சா²யாநிருத்³தா⁴ர்ககராருண ॥ 8 ॥

நமஸ்தே நரகாராதே நமஸ்தே மது⁴ஸூத³ந ।
நமஸ்தே லலிதாபாங்க³ நமஸ்தே நரகாந்தக ॥ 9 ॥

நம꞉ பாபஹரேஶாந நம꞉ ஸர்வப⁴யாபஹ ।
நம꞉ ஸம்பூ⁴தஸர்வாத்மந் நம꞉ ஸம்ப்⁴ருதகௌஸ்துப⁴ ॥ 10 ॥

நமஸ்தே நயநாதீத நமஸ்தே ப⁴யஹாரக ।
நமோ விபி⁴ந்நவேஷாய நம꞉ ஶ்ருதிபதா²திக³ ॥ 11 ॥

நமஸ்த்ரிமூர்திபே⁴தே³ந ஸர்க³ஸ்தி²த்யந்தஹேதவே ।
விஷ்ணவே த்ரித³ஶாராதிஜிஷ்ணவே பரமாத்மநே ॥ 12 ॥

சக்ரபி⁴ந்நாரிசக்ராய சக்ரிணே சக்ரவள்லப⁴ ।
விஶ்வாய விஶ்வவந்த்³யாய விஶ்வபூ⁴தாநுவர்திநே ॥ 13 ॥

நமோ(அ)ஸ்து யோகி³த்⁴யேயாத்மந் நமோ(அ)ஸ்த்வத்⁴யாத்மரூபிணே ।
ப⁴க்திப்ரதா³ய ப⁴க்தாநாம் நமஸ்தே ப⁴க்திதா³யிநே ॥ 14 ॥

பூஜநம் ஹவநம் சேஜ்யா த்⁴யாநம் பஶ்சாந்நமஸ்க்ரியா ।
தே³வேஶ கர்ம ஸர்வம் மே ப⁴வேதா³ராத⁴நம் தவ ॥ 15 ॥

இதி ஹவநஜபார்சாபே⁴த³தோ விஷ்ணுபூஜா-
-நியதஹ்ருத³யகர்மா யஸ்து மந்த்ரீ சிராய ।
ஸ க²லு ஸகலகாமாந் ப்ராப்ய க்ருஷ்ணாந்தராத்மா
ஜநநம்ருதிவிமுக்தோ(அ)ப்யுத்தமாம் ப⁴க்திமேதி ॥ 16 ॥

கோ³கோ³பகோ³பிகாவீதம் கோ³பாலம் கோ³ஷு கோ³ப்ரத³ம் ।
கோ³பைரீட்³யம் கோ³ஸஹஸ்ரைர்நௌமி கோ³குலநாயகம் ॥ 17 ॥

ப்ரீணயேத³நயா ஸ்துத்யா ஜக³ந்நாத²ம் ஜக³ந்மயம் ।
த⁴ர்மார்த²காமமோக்ஷாணாமாப்தயே புருஷோத்தமம் ॥ 18 ॥

இதி ஶ்ரீநாரத³பாஞ்சராத்ரே ஜ்ஞாநாம்ருதஸாரே நாரத³ க்ருத ஶ்ரீ க்ருஷ்ண ஸ்தவராஜ꞉ ॥

---

மேலும் ஶ்ரீ க்ருஷ்ண ஸ்தோத்திரங்கள் பார்க்க.

Did you see any mistake/variation in the content above? Click here to report mistakes and corrections in Stotranidhi content.