Sri Nagna Bhairava Stuti (Mudgala Purane) – ஶ்ரீ நக்³நபை⁴ரவ ஸ்துதி꞉ (முத்³க³ளபுராணே)

ப்⁴ரூஶுண்ட்³யுவாச ।
ஸர்வமாயாவிஹீநாய ஸர்வமாயாப்ரசாலக ।
ஸர்வாந்தர்யாமிணே நித்யம் நக்³நபை⁴ரவ தே நம꞉ ॥ 1 ॥

மயூரேஶபராயைவ மயூரபுரபாலக ।
த⁴ர்மிஷ்டா²நாம் ஸுபாலாய நக்³நபை⁴ரவ தே நம꞉ ॥ 2 ॥

அத⁴ர்மநிரதாம்ஶ்சைவ ப³ஹி꞉காராய தே³வப ।
ஸதா³ ஸ்வாநந்த³நிஷ்டா²ய நக்³நபை⁴ரவ தே நம꞉ ॥ 3 ॥

ஸம்ஸ்காரயுக்தபா⁴வேந பாபகர்மபராத்மநாம் ।
மயூரே த³ண்ட³கர்த்ரே வை நக்³நபை⁴ரவ தே நம꞉ ॥ 4 ॥

மஹாப³லத⁴ராயைவ ப்³ரஹ்மாதீ³நாம் ப்ரசாலக ।
அமேயஶக்தயே தே³வ நக்³நபை⁴ரவ தே நம꞉ ॥ 5 ॥

பு⁴க்திமுக்திப்ரதா³த்ரே ச த⁴நதா⁴ந்யவிவர்த⁴ந ।
கா³ணேஶாநாம் ப்ரபாலாய நக்³நபை⁴ரவ தே நம꞉ ॥ 6 ॥

ப்ரளயே ஶூலமுத்³யம்ய ப்³ரஹ்மாண்ட³ப⁴யகாரக ।
ஶூலப்ரோதமஹாண்டா³ய நக்³நபை⁴ரவ தே நம꞉ ॥ 7 ॥

அட்டஹாஸேந தே³வேந்த்³ராம்ஸ்ததா² ஸந்த்ராஸ்ய சாஸுராந் ।
ந்ருத்யஸே க³ணநாதா²க்³ரே நக்³நபை⁴ரவ தே நம꞉ ॥ 8 ॥

விஶ்வம் ததம் ஸர்வமித³ம் த்வயேஶ
ஆத்³யந்தமத்⁴யேஷு மஹாநுபா⁴வ ।
ஸம்ரக்ஷ தே³வேஶ மயூரஸம்ஸ்தா²-
-நஸ்மாந் குருஷ்வ த்வமநந்யபா⁴வாந் ॥ 9 ॥

ஶூலிந்நமஸ்தே(அ)கி²லகாரணாய
த்வத்³பீ⁴திபா⁴வேந ஜக³த்ப்ரவ்ருத்தி꞉ ।
வ்யாபாரயுக்தம் விவிதே⁴ஷு நித்யம்
ஸ்வஸ்வப்ரகார்யம் ப்ரகரோதி சாத்மந் ॥ 10 ॥

அதஸ்த்வதா³தா⁴ரமயம் பரேஶ
ஸுரக்ஷ தே ப⁴க்தியுதம் குருஷ்வ ।
க³ணேஶக்ஷேத்ரம் த்வத³தீ⁴நக³ம் தும்
க³ணேஶஸம்ஸ்த²ம் குரு தே நமோ வை ॥ 11 ॥

இத³ம் ஸ்தோத்ரம் மஹேஶாநா நக்³நபை⁴ரவகஸ்ய ச ।
ய꞉ படே²ச்ச்²ருணுயாத்³வா(அ)பி ஸ ஸர்வம் ப்ரளபே⁴ச்சு²ப⁴ம் ॥ 12 ॥

த⁴நதா⁴ந்யாதி³கம் ஸர்வம் பு⁴க்திமுக்திஸமந்விதம் ।
லபே⁴த³நேந தே³வேஶாஸ்துவித்⁴வம் நக்³நபை⁴ரவம் ॥ 13 ॥

மயூரக்ஷேத்ரத்யாக³ஶ்ச கதா³பி ந ப⁴வேந்ந்ருணாம் ।
ஸ்தோத்ரேண ஸ்துவதாம் நித்யம் ந கிஞ்சித்³து³ர்லப⁴ம் ப⁴வேத் ॥ 14 ॥

இதி ஶ்ரீமந்முத்³க³ளே மஹாபுராணே ஷஷ்டே² க²ண்டே³ அஷ்டாவிம்ஶதிதமோ(அ)த்⁴யாயே ப்⁴ரூஶுண்டி³ க்ருத ஶ்ரீ நக்³நபை⁴ரவ ஸ்துதி꞉ ॥

---