Kishkindha Kanda Sarga 52 – கிஷ்கிந்தா⁴காண்ட³ த்³விபஞ்சாஶ꞉ ஸர்க³꞉ (52)

ஸ்தோத்ரநிதி → வால்மீகி ராமாயணே கிஷ்கிந்த⁴காண்ட³ → கிஷ்கிந்தா⁴காண்ட³ த்³விபஞ்சாஶ꞉ ஸர்க³꞉ (52)

॥ பி³லப்ரவேஶகாரணகத²நம் ॥

அத² தாநப்³ரவீத்ஸர்வாந் விக்ராந்தாந் ஹரிபுங்க³வாந் ।
இத³ம் வசநமேகாக்³ரா தாபஸீ த⁴ர்மசாரிணீ ॥ 1 ॥

வாநரா யதி³ வ꞉ கே²த³꞉ ப்ரநஷ்ட꞉ ப²லப⁴க்ஷணாத் ।
யதி³ சைதந்மயா ஶ்ராவ்யம் ஶ்ரோதுமிச்சா²மி கத்²யதாம் ॥ 2 ॥

தஸ்யாஸ்தத்³வசநம் ஶ்ருத்வா ஹநுமாந் மாருதாத்மஜ꞉ ।
ஆர்ஜவேந யதா²தத்த்வமாக்²யாதுமுபசக்ரமே ॥ 3 ॥

ராஜா ஸர்வஸ்ய லோகஸ்ய மஹேந்த்³ரவருணோபம꞉ ।
ராமோ தா³ஶரதி²꞉ ஶ்ரீமாந் ப்ரவிஷ்டோ த³ண்ட³காவநம் ॥ 4 ॥

லக்ஷ்மணேந ஸஹ ப்⁴ராத்ரா வைதே³ஹ்யா சாபி பா⁴ர்யயா ।
தஸ்ய பா⁴ர்யா ஜநஸ்தா²நாத்³ராவணேந ஹ்ருதா ப³லாத் ॥ 5 ॥

வீரஸ்தஸ்ய ஸகா² ராஜ்ஞ꞉ ஸுக்³ரீவோ நாம வாநர꞉ ।
ராஜா வாநரமுக்²யாநாம் யேந ப்ரஸ்தா²பிதா வயம் ॥ 6 ॥

அக³ஸ்த்யசரிதாமாஶாம் த³க்ஷிணாம் யமரக்ஷிதாம் ।
ஸஹைபி⁴ர்வாநரைர்கோ⁴ரைரங்க³த³ப்ரமுகை²ர்வயம் ॥ 7 ॥

ராவணம் ஸஹிதா꞉ ஸர்வே ராக்ஷஸம் காமரூபிணம் ।
ஸீதயா ஸஹ வைதே³ஹ்யா மார்க³த்⁴வமிதி சோதி³தா꞉ ॥ 8 ॥

விசித்ய து வயம் ஸர்வே ஸமக்³ராம் த³க்ஷிணாம் தி³ஶம் ।
பு³பு⁴க்ஷிதா꞉ பரிஶ்ராந்தா வ்ருக்ஷமூலமுபாஶ்ரிதா꞉ ॥ 9 ॥

விவர்ணவத³நா꞉ ஸர்வே ஸர்வே த்⁴யாநபராயணா꞉ ।
நாதி⁴க³ச்சா²மஹே பாரம் மக்³நாஶ்சிந்தாமஹார்ணவே ॥ 10 ॥

சாரயந்தஸ்ததஶ்சக்ஷுர்த்³ருஷ்டவந்தோ வயம் பி³லம் ।
லதாபாத³பஸஞ்ச²ந்நம் திமிரேண ஸமாவ்ருதம் ॥ 11 ॥

அஸ்மாத்³த⁴ம்ஸா ஜலக்லிந்நா꞉ பக்ஷை꞉ ஸலிலவிஸ்ரவை꞉ ।
குரரா꞉ ஸாரஸாஶ்சைவ நிஷ்பதந்தி பதத்த்ரிண꞉ ॥ 12 ॥

ஸாத்⁴வத்ர ப்ரவிஶாமேதி மயா தூக்தா꞉ ப்லவங்க³மா꞉ ।
தேஷாமபி ஹி ஸர்வேஷாமநுமாநமுபாக³தம் ॥ 13 ॥

க³ச்சா²ம ப்ரவிஶாமேதி ப⁴ர்த்ருகார்யத்வராந்விதா꞉ ।
ததோ கா³ட⁴ம் நிபதிதா க்³ருஹ்ய ஹஸ்தௌ பரஸ்பரம் ॥ 14 ॥

இத³ம் ப்ரவிஷ்டா꞉ ஸஹஸா பி³லம் திமிரஸம்வ்ருதம் ।
ஏதந்ந꞉ கார்யமேதேந க்ருத்யேந வயமாக³தா꞉ ॥ 15 ॥

த்வாம் சைவோபக³தா꞉ ஸர்வே பரித்³யூநா பு³பு⁴க்ஷிதா꞉ ।
ஆதித்²யத⁴ர்மத³த்தாநி மூலாநி ச ப²லாநி ச ॥ 16 ॥

அஸ்மாபி⁴ருபபு⁴க்தாநி பு³பு⁴க்ஷாபரிபீடி³தை꞉ ।
யத்த்வயா ரக்ஷிதா꞉ ஸர்வே ம்ரியமாணா பு³பு⁴க்ஷயா ॥ 17 ॥

ப்³ரூஹி ப்ரத்யுபகாரார்த²ம் கிம் தே குர்வந்து வாநரா꞉ ।
ஏவமுக்தா து ஸர்வஜ்ஞா வாநரைஸ்தை꞉ ஸ்வயம்ப்ரபா⁴ ॥ 18 ॥

ப்ரத்யுவாச தத꞉ ஸர்வாநித³ம் வாநரயூத²பாந் ।
ஸர்வேஷாம் பரிதுஷ்டா(அ)ஸ்மி வாநராணாம் தரஸ்விநாம் ।
சரந்த்யா மம த⁴ர்மேண ந கார்யமிஹ கேநசித் ॥ 19 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே கிஷ்கிந்தா⁴காண்டே³ த்³விபஞ்சாஶ꞉ ஸர்க³꞉ ॥ 52 ॥

---

ஸம்பூர்ண வால்மீகி ராமாயணே கிஷ்கிந்த⁴காண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.