Balakanda Sarga 62 – பா³லகாண்ட³ த்³விஷஷ்டிதம꞉ ஸர்க³꞉ (62)

ஸ்தோத்ரநிதி → வால்மீகி ராமாயணே பா³லகாண்ட³ → பா³லகாண்ட³ த்³விஷஷ்டிதம꞉ ஸர்க³꞉ (62)

॥ அம்ப³ரீஷயஜ்ஞ꞉ ॥

ஶுந꞉ஶேபம் நரஶ்ரேஷ்ட² க்³ருஹீத்வா து மஹாயஶா꞉ ।
வ்யஶ்ராம்யத்புஷ்கரே ராஜா மத்⁴யாஹ்நே ரகு⁴நந்த³ந ॥ 1 ॥

தஸ்ய விஶ்ரமமாணஸ்ய ஶுந꞉ஶேபோ மஹாயஶா꞉ ।
புஷ்கரக்ஷேத்ரமாக³ம்ய விஶ்வாமித்ரம் த³த³ர்ஶ ஹ ॥ 2 ॥

தப்யந்தம்ருஷிபி⁴꞉ ஸார்த⁴ம் மாதுலம் பரமாதுர꞉ ।
விவர்ணவத³நோ தீ³நஸ்த்ருஷ்ணயா ச ஶ்ரமேண ச ॥ 3 ॥

பபாதாங்கே முநௌ ராம வாக்யம் சேத³முவாச ஹ । [முநேராஶு]
ந மே(அ)ஸ்தி மாதா ந பிதா ஜ்ஞாதயோ பா³ந்த⁴வா꞉ குத꞉ ॥ 4 ॥

த்ராதுமர்ஹஸி மாம் ஸௌம்ய த⁴ர்மேண முநிபுங்க³வ꞉ ।
த்ராதா த்வம் ஹி முநிஶ்ரேஷ்ட² ஸர்வேஷாம் த்வம் ஹி பா⁴வந꞉ ॥ 5 ॥

ராஜா ச க்ருதகார்ய꞉ ஸ்யாத³ஹம் தீ³ர்கா⁴யுரவ்யய꞉ ।
ஸ்வர்க³ளோகமுபாஶ்நீயாம் தபஸ்தப்த்வா ஹ்யநுத்தமம் ॥ 6 ॥

த்வம் மே நாதோ² ஹ்யநாத²ஸ்ய ப⁴வ ப⁴வ்யேந சேதஸா ।
பிதேவ புத்ரம் த⁴ர்மாத்மம்ஸ்த்ராதுமர்ஹஸி கில்பி³ஷாத் ॥ 7 ॥

தஸ்ய தத்³வசநம் ஶ்ருத்வா விஶ்வாமித்ரோ மஹாதபா꞉ ।
ஸாந்த்வயித்வா ப³ஹுவித⁴ம் புத்ராநித³முவாச ஹ ॥ 8 ॥

யத்க்ருதே பிதர꞉ புத்ராஞ்ஜநயந்தி ஶுபா⁴ர்தி²ந꞉ ।
பரளோகஹிதார்தா²ய தஸ்ய காலோ(அ)யமாக³த꞉ ॥ 9 ॥

அயம் முநிஸுதோ பா³லோ மத்த꞉ ஶரணமிச்ச²தி ।
அஸ்ய ஜீவிதமாத்ரேண ப்ரியம் குருத புத்ரகா꞉ ॥ 10 ॥

ஸர்வே ஸுக்ருதகர்மாண꞉ ஸர்வே த⁴ர்மபராயணா꞉ ।
பஶுபூ⁴தா நரேந்த்³ரஸ்ய த்ருப்திமக்³நே꞉ ப்ரயச்ச²த ॥ 11 ॥

நாத²வாம்ஶ்ச ஶுந꞉ஶேபோ யஜ்ஞஶ்சாவிக்⁴நிதோ ப⁴வேத் ।
தே³வதாஸ்தர்பிதாஶ்ச ஸ்யுர்மம சாபி க்ருதம் வச꞉ ॥ 12 ॥

முநேஸ்து வசநம் ஶ்ருத்வா மது⁴ஷ்யந்தா³த³ய꞉ ஸுதா꞉ ।
ஸாபி⁴மாநம் நரஶ்ரேஷ்ட² ஸலீலமித³மப்³ருவந் ॥ 13 ॥

கத²மாத்மஸுதாந்ஹித்வா த்ராயஸே(அ)ந்யஸுதம் விபோ⁴ ।
அகார்யமிவ பஶ்யாம꞉ ஶ்வமாம்ஸமிவ போ⁴ஜநே ॥ 14 ॥

தேஷாம் தத்³வசநம் ஶ்ருத்வா புத்ராணாம் முநிபுங்க³வ꞉ ।
க்ரோத⁴ஸம்ரக்தநயநோ வ்யாஹர்துமுபசக்ரமே ॥ 15 ॥

நி꞉ஸாத்⁴வஸமித³ம் ப்ரோக்தம் த⁴ர்மாத³பி விக³ர்ஹிதம் ।
அதிக்ரம்ய து மத்³வாக்யம் தா³ருணம் ரோமஹர்ஷணம் ॥ 16 ॥

ஶ்வமாம்ஸபோ⁴ஜிந꞉ ஸர்வே வாஸிஷ்டா² இவ ஜாதிஷு ।
பூர்ணம் வர்ஷஸஹஸ்ரம் து ப்ருதி²வ்யாமநுவத்ஸ்யத² ॥ 17 ॥

க்ருத்வா ஶாபஸமாயுக்தாந்புத்ராந்முநிவரஸ்ததா³ ।
ஶுந꞉ஶேபமுவாசார்தம் க்ருத்வா ரக்ஷாம் நிராமயாம் ॥ 18 ॥

பவித்ரபாஶைராஸக்தோ ரக்தமால்யாநுலேபந꞉ ।
வைஷ்ணவம் யூபமாஸாத்³ய வாக்³பி⁴ரக்³நிமுதா³ஹர ॥ 19 ॥

இமே து கா³தே² த்³வே தி³வ்யே கா³யேதா² முநிபுத்ரக ।
அம்ப³ரீஷஸ்ய யஜ்ஞே(அ)ஸ்மிம்ஸ்தத꞉ ஸித்³தி⁴மவாப்ஸ்யஸி ॥ 20 ॥

ஶுந꞉ஶேபோ க்³ருஹீத்வா தே த்³வே கா³தே² ஸுஸமாஹித꞉ ।
த்வரயா ராஜஸிம்ஹம் தமம்ப³ரீஷமுவாச ஹ ॥ 21 ॥

ராஜஸிம்ஹ மஹாஸத்த்வ ஶீக்⁴ரம் க³ச்சா²வஹே ஸத³꞉ ।
நிர்வர்தயஸ்வ ராஜேந்த்³ர தீ³க்ஷாம் ச ஸமுபாவிஶ ॥ 22 ॥

தத்³வாக்யம்ருஷிபுத்ரஸ்ய ஶ்ருத்வா ஹர்ஷஸமுத்ஸுக꞉ ।
ஜகா³ம ந்ருபதி꞉ ஶீக்⁴ரம் யஜ்ஞவாடமதந்த்³ரித꞉ ॥ 23 ॥

ஸத³ஸ்யாநுமதே ராஜா பவித்ரக்ருதலக்ஷணம் ।
பஶும் ரக்தாம்ப³ரம் க்ருத்வா யூபே தம் ஸமப³ந்த⁴யத் ॥ 24 ॥

ஸ ப³த்³தோ⁴ வாக்³பி⁴ரக்³ர்யாபி⁴ரபி⁴துஷ்டாவ வை ஸுரௌ ।
இந்த்³ரமிந்த்³ராநுஜம் சைவ யதா²வந்முநிபுத்ரக꞉ ॥ 25 ॥

தத꞉ ப்ரீத꞉ ஸஹஸ்ராக்ஷோ ரஹஸ்யஸ்துதிதர்பித꞉ ।
தீ³ர்க⁴மாயுஸ்ததா³ ப்ராதா³ச்சு²ந꞉ஶேபாய ராக⁴வ ॥ 26 ॥

ஸ ச ராஜா நரஶ்ரேஷ்ட² யஜ்ஞஸ்யாந்தமவாப்தவாந் ।
ப²லம் ப³ஹுகு³ணம் ராம ஸஹஸ்ராக்ஷப்ரஸாத³ஜம் ॥ 27 ॥

விஶ்வாமித்ரோ(அ)பி த⁴ர்மாத்மா பூ⁴யஸ்தேபே மஹாதபா꞉ ।
புஷ்கரேஷு நரஶ்ரேஷ்ட² த³ஶவர்ஷஶதாநி ச ॥ 28 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே பா³லகாண்டே³ த்³விஷஷ்டி²தம꞉ ஸர்க³꞉ ॥ 62 ॥

பா³லகாண்ட³ த்ரிஷஷ்டிதம꞉ ஸர்க³꞉ (63) >>

---

ஸம்பூர்ண வால்மீகி ராமாயணே பா³லகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.