Balakanda Sarga 58 – பா³லகாண்ட³ அஷ்டபஞ்சாஶ꞉ ஸர்க³꞉ (58)

ஸ்தோத்ரநிதி → வால்மீகி ராமாயணே பா³லகாண்ட³ → பா³லகாண்ட³ அஷ்டபஞ்சாஶ꞉ ஸர்க³꞉ (58)

॥ த்ரிஶங்குஶாப꞉ ॥

ததஸ்த்ரிஶங்கோர்வசநம் ஶ்ருத்வா க்ரோத⁴ஸமந்விதம் ।
ருஷிபுத்ரஶதம் ராம ராஜாநமித³மப்³ரவீத் ॥ 1 ॥

ப்ரத்யாக்²யாதோ ஹி து³ர்பு³த்³தே⁴ கு³ருணா ஸத்யவாதி³நா ।
தம் கத²ம் ஸமதிக்ரம்ய ஶாகா²ந்தரமுபேயிவாந் ॥ 2 ॥

இக்ஷ்வாகூணாம் ஹி ஸர்வேஷாம் புரோதா⁴꞉ பரமோ கு³ரு꞉ ।
ந சாதிக்ரமிதும் ஶக்யம் வசநம் ஸத்யவாதி³ந꞉ ॥ 3 ॥

அஶக்யமிதி சோவாச வஸிஷ்டோ² ப⁴க³வாந்ருஷி꞉ ।
தம் வயம் வை ஸமாஹர்தும் க்ரதும் ஶக்தா꞉ கத²ம் தவ ॥ 4 ॥

பா³லிஶஸ்த்வம் நரஶ்ரேஷ்ட² க³ம்யதாம் ஸ்வபுரம் புந꞉ ।
யாஜநே ப⁴க³வாந் ஶக்தஸ்த்ரைலோக்யஸ்யாபி பார்தி²வ ॥ 5 ॥

அவமாநம் ச தத்கர்தும் தஸ்ய ஶக்ஷ்யாமஹே கத²ம் ।
தேஷாம் தத்³வசநம் ஶ்ருத்வா க்ரோத⁴பர்யாகுலாக்ஷரம் ॥ 6 ॥

ஸ ராஜா புநரேவைதாநித³ம் வசநமப்³ரவீத் ।
ப்ரத்யாக்²யாதோ(அ)ஸ்மி கு³ருணா கு³ருபுத்ரைஸ்ததை²வ ச ॥ 7 ॥

அந்யாம் க³திம் க³மிஷ்யாமி ஸ்வஸ்தி வோ(அ)ஸ்து தபோத⁴நா꞉ ।
ருஷிபுத்ராஸ்து தச்ச்²ருத்வா வாக்யம் கோ⁴ராபி⁴ஸம்ஹிதம் ॥ 8 ॥

ஶேபு꞉ பரமஸங்க்ருத்³தா⁴ஶ்சண்டா³லத்வம் க³மிஷ்யஸி ।
ஏவமுக்த்வா மஹாத்மாநோ விவிஶுஸ்தே ஸ்வமாஶ்ரமம் ॥ 9 ॥

அத² ராத்ர்யாம் வ்யதீதாயாம் ராஜா சண்டா³லதாம் க³த꞉ ।
நீலவஸ்த்ரத⁴ரோ நீல꞉ பருஷோ த்⁴வஸ்தமூர்த⁴ஜ꞉ ॥ 10 ॥

சித்யமால்யாநுலேபஶ்ச ஆயஸாப⁴ரணோ(அ)ப⁴வத் ।
தம் த்³ருஷ்ட்வா மந்த்ரிண꞉ ஸர்வே த்யஜ்ய சண்டா³லரூபிணம் ॥ 11 ॥

ப்ராத்³ரவந்ஸஹிதா ராம பௌரா யே(அ)ஸ்யாநுகா³மிந꞉ ।
ஏகோ ஹி ராஜா காகுத்ஸ்த² ஜகா³ம பரமாத்மவாந் ॥ 12 ॥

த³ஹ்யமாநோ தி³வாராத்ரம் விஶ்வாமித்ரம் தபோத⁴நம் ।
விஶ்வாமித்ரஸ்து தம் த்³ருஷ்ட்வா ராஜாநம் விப²லீக்ருதம் ॥ 13 ॥

சண்டா³லரூபிணம் ராம முநி꞉ காருண்யமாக³த꞉ ।
காருண்யாத்ஸ மஹாதேஜா வாக்யம் பரமதா⁴ர்மிக꞉ ॥ 14 ॥

இத³ம் ஜகா³த³ ப⁴த்³ரம் தே ராஜாநம் கோ⁴ரரூபிணம் ।
கிமாக³மநகார்யம் தே ராஜபுத்ர மஹாப³ல ॥ 15 ॥

அயோத்⁴யாதி⁴பதே வீர ஶாபாச்சண்டா³லதாம் க³த꞉ ।
அத² தத்³வாக்யமாகர்ண்ய ராஜா சண்டா³லதாம் க³த꞉ ॥ 16 ॥

அப்³ரவீத்ப்ராஞ்ஜலிர்வாக்யம் வாக்யஜ்ஞோ வாக்யகோவித³ம் ।
ப்ரத்யாக்²யாதோ(அ)ஸ்மி கு³ருணா கு³ருபுத்ரைஸ்ததை²வ ச ॥ 17 ॥

அநவாப்யைவ தம் காமம் மயா ப்ராப்தோ விபர்யய꞉ ।
ஸஶரீரோ தி³வம் யாயாமிதி மே ஸௌம்யத³ர்ஶநம் ॥ 18 ॥

மயா சேஷ்டம் க்ரதுஶதம் தச்ச நாவாப்யதே ப²லம் ।
அந்ருதம் நோக்தபூர்வம் மே ந ச வக்ஷ்யே கதா³சந ॥ 19 ॥

க்ருச்ச்²ரேஷ்வபி க³த꞉ ஸௌம்ய க்ஷத்ரத⁴ர்மேண தே ஶபே ।
யஜ்ஞைர்ப³ஹுவிதை⁴ரிஷ்டம் ப்ரஜா த⁴ர்மேண பாலிதா꞉ ॥ 20 ॥

கு³ரவஶ்ச மஹாத்மாந꞉ ஶீலவ்ருத்தேந தோஷிதா꞉ ।
த⁴ர்மே ப்ரயதமாநஸ்ய யஜ்ஞம் சாஹர்துமிச்ச²த꞉ ॥ 21 ॥

பரிதோஷம் ந க³ச்ச²ந்தி கு³ரவோ முநிபுங்க³வ ।
தை³வமேவ பரம் மந்யே பௌருஷம் து நிரர்த²கம் ॥ 22 ॥

தை³வேநாக்ரம்யதே ஸர்வம் தை³வம் ஹி பரமா க³தி꞉ ।
தஸ்ய மே பரமார்தஸ்ய ப்ரஸாத³மபி⁴காங்க்ஷத꞉ ॥ 23 ॥

கர்துமர்ஹஸி ப⁴த்³ரம் தே தை³வோபஹதகர்மண꞉ ।
நாந்யாம் க³திம் க³மிஷ்யாமி நாந்ய꞉ ஶரணமஸ்தி மே ।
தை³வம் புருஷகாரேண நிவர்தயிதுமர்ஹஸி ॥ 24 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே பா³லகாண்டே³ அஷ்டபஞ்சாஶ꞉ ஸர்க³꞉ ॥ 58 ॥

பா³லகாண்ட³ ஏகோநஷஷ்டி²தம꞉ ஸர்க³꞉ (59) >>

---

ஸம்பூர்ண வால்மீகி ராமாயணே பா³லகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.