Aranya Kanda Sarga 75 – அரண்யகாண்ட³ பஞ்சஸப்ததிதம꞉ ஸர்க³꞉ (75)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ பஞ்சஸப்ததிதம꞉ ஸர்க³꞉ (75)

॥ பம்பாத³ர்ஶநம் ॥

தி³வம் து தஸ்யாம் யாதாயாம் ஶப³ர்யாம் ஸ்வேந தேஜஸா ।
லக்ஷ்மணேந ஸஹ ப்⁴ராத்ரா சிந்தயாமாஸ ராக⁴வ꞉ ॥ 1 ॥

ஸ சிந்தயித்வா த⁴ர்மாத்மா ப்ரபா⁴வம் தம் மஹாத்மநாம் ।
ஹிதகாரிணமேகாக்³ரம் லக்ஷ்மணம் ராக⁴வோ(அ)ப்³ரவீத் ॥ 2 ॥

த்³ருஷ்டோ(அ)யமாஶ்ரம꞉ ஸௌம்ய ப³ஹ்வாஶ்சர்ய꞉ க்ருதாத்மநாம் ।
விஶ்வஸ்தம்ருக³ஶார்தூ³ளோ நாநாவிஹக³ஸேவித꞉ ॥ 3 ॥

ஸப்தாநாம் ச ஸமுத்³ராணாமேஷு தீர்தே²ஷு லக்ஷ்மண ।
உபஸ்ப்ருஷ்டம் ச விதி⁴வத்பிதரஶ்சாபி தர்பிதா꞉ ॥ 4 ॥

ப்ரநஷ்டமஶுப⁴ம் தத்தத்கல்யாணம் ஸமுபஸ்தி²தம் ।
தேந தத்த்வேந ஹ்ருஷ்டம் மே மநோ லக்ஷ்மண ஸம்ப்ரதி ॥ 5 ॥

ஹ்ருத³யே ஹி நரவ்யாக்⁴ர ஶுப⁴மாவிர்ப⁴விஷ்யதி ।
ததா³க³ச்ச² க³மிஷ்யாவ꞉ பம்பாம் தாம் ப்ரியத³ர்ஶநாம் ॥ 6 ॥

ருஶ்யமூகோ கி³ரிர்யத்ர நாதிதூ³ரே ப்ரகாஶதே ।
யஸ்மிந் வஸதி த⁴ர்மாத்மா ஸுக்³ரீவோ(அ)ம்ஶுமத꞉ ஸுத꞉ ॥ 7 ॥

நித்யம் வாலிப⁴யாத் த்ரஸ்தஶ்சதுர்பி⁴꞉ ஸஹ வாநரை꞉ ।
அபி⁴த்வரே ச தம் த்³ரஷ்டும் ஸுக்³ரீவம் வாநரர்ஷப⁴ம் ॥ 8 ॥

தத³தீ⁴நம் ஹி மே ஸௌம்ய ஸீதாயா꞉ பரிமார்க³ணம் ।
ஏவம் ப்³ருவாணம் தம் தீ⁴ரம் ராமம் ஸௌமித்ரிரப்³ரவீத் ॥ 9 ॥

க³ச்சா²வஸ்த்வரிதம் தத்ர மமாபி த்வரதே மந꞉ ।
ஆஶ்ரமாத்து ததஸ்தஸ்மாந்நிஷ்க்ரம்ய ஸ விஶாம் பதி꞉ ॥ 10 ॥

ஆஜகா³ம தத꞉ பம்பாம் லக்ஷ்மணேந ஸஹப்ரபு⁴꞉ ।
ஸ த³த³ர்ஶ தத꞉ புண்யாமுதா³ரஜநஸேவிதாம் ॥ 11 ॥

நாநாத்³ருமலதாகீர்ணாம் பம்பாம் பாநீயவாஹிநீம் ।
பத்³மை꞉ ஸௌக³ந்தி⁴கைஸ்தாம்ராம் ஶுக்லாம் குமுத³மண்ட³லை꞉ ॥ 12 ॥

நீலாம் குவலயோத்³கா⁴டைர்ப³ஹுவர்ணாம் குதா²மிவ ।
ஸ தாமாஸாத்³ய வை ராமௌ தூ³ராது³த³கவாஹிநீம் ॥ 13 ॥

மதங்க³ஸரஸம் நாம ஹ்ரத³ம் ஸமவகா³ஹத ।
அரவிந்தோ³த்பலவதீம் பத்³மஸௌக³ந்தி⁴காயுதாம் ॥ 14 ॥

புஷ்பிதாம்ரவணோபேதாம் ப³ர்ஹிணோத்³கு⁴ஷ்டநாதி³தாம் ।
திலகைர்பீ³ஜபூரைஶ்ச த⁴வை꞉ ஶுக்லத்³ருமைஸ்ததா² ॥ 15 ॥

புஷ்பிதை꞉ கரவீரைஶ்ச புந்நாகை³ஶ்ச ஸுபுஷ்பிதை꞉ ।
மாலதீகுந்த³கு³ள்மைஶ்ச பா⁴ண்டீ³ரைர்நிசுலைஸ்ததா² ॥ 16 ॥

அஶோகை꞉ ஸப்தபர்ணைஶ்ச கேதகைரதிமுக்தகை꞉ ।
அந்யைஶ்ச விவிதை⁴ர்வ்ருக்ஷை꞉ ப்ரமதா³மிவ பூ⁴ஷிதாம் ॥ 17 ॥

ஸமீக்ஷமாணௌ புஷ்பாட்⁴யம் ஸர்வதோ விபுலத்³ருமம் ।
கோயஷ்டிகைஶ்சார்ஜுநகை꞉ ஶதபத்த்ரைஶ்ச கீரகை꞉ ॥ 18 ॥

ஏதைஶ்சாந்யைஶ்ச விஹகை³ர்நாதி³தம் து வநம் மஹத் ।
ததோ ஜக்³மதுரவ்யக்³ரௌ ராக⁴வௌ ஸுஸமாஹிதௌ ॥ 19 ॥

தத்³வநம் சைவ ஸரஸ꞉ பஶ்யந்தௌ ஶகுநைர்யுதம் ।
ஸ த³த³ர்ஶ தத꞉ பம்பாம் ஶீதவாரிநிதி⁴ம் ஶுபா⁴ம் ॥ 20 ॥

ப்ரஹ்ருஷ்டநாநாஶகுநாம் பாத³பைருபஶோபி⁴தாம் ।
ஸ ராமோ விவிதா⁴ந் வ்ருக்ஷாந் ஸராம்ஸி விவிதா⁴நி ச ॥ 21 ॥

பஶ்யந் காமாபி⁴ஸந்தப்தோ ஜகா³ம பரமம் ஹ்ரத³ம் ।
புஷ்பிதோபவநோபேதாம் ஸாலசம்பகஶோபி⁴தாம் ॥ 22 ॥

ஷட்பதௌ³க⁴ஸமாவிஷ்டாம் ஶ்ரீமதீமதுலப்ரபா⁴ம் ।
[* ரம்யோ பவநஸம்பா³தா⁴ரம்ய ஸம்பீடி³தோத³கம் । *]
ஸ்ப²டிகோபமதோயாட்⁴யாம் ஶ்லக்ஷ்ணவாலுகஸம்யுதாம் ॥ 23 ॥

ஸ தாம் த்³ருஷ்ட்வா புந꞉ பம்பாம் பத்³மஸௌக³ந்தி⁴கைர்யுதாம் ।
இத்யுவாச ததா³ வாக்யம் லக்ஷ்மணம் ஸத்யவிக்ரம꞉ ॥ 24 ॥

அஸ்யாஸ்தீரே து பூர்வோக்த꞉ பர்வதோ தா⁴துமண்டி³த꞉ ।
ருஶ்யமூக இதி க்²யாத꞉ புண்ய꞉ புஷ்பிதபாத³ப꞉ ॥ 25 ॥

ஹரேர்ருக்ஷரஜோநாம்ந꞉ புத்ரஸ்தஸ்ய மஹாத்மந꞉ ।
அத்⁴யாஸ்தே தம் மஹாவீர்ய꞉ ஸுக்³ரீவ இதி விஶ்ருத꞉ ॥ 26 ॥

ஸுக்³ரீவமபி⁴க³ச்ச² த்வம் வாநரேந்த்³ரம் நரர்ஷப⁴ ।
இத்யுவாச புநர்வாக்யம் லக்ஷ்மணம் ஸத்யவிக்ரமம் ॥ 27 ॥

ராஜ்யப்⁴ரஷ்டேந தீ³நேந தஸ்யாமாஸக்தசேதஸா ।
கத²ம் மயா விநா ஶக்யம் ஸீதாம் லக்ஷ்மண ஜீவிதும் ॥ 28 ॥

இத்யேவமுக்த்வா மத³நாபி⁴பிடி³த꞉
ஸ லக்ஷ்மணம் வாக்யமநந்யசேதஸம் ।
விவேஶ பம்பாம் ளீநீம் மநோஹராம்
ரகூ⁴த்தம꞉ ஶோகவிஷாத³யந்த்ரித꞉ ॥ 29 ॥

ததோ மஹத்³வர்த்ம ஸுதூ³ரஸங்க்ரம꞉
க்ரமேண க³த்வா ப்ரதிகூலத⁴ந்வநம் ।
த³த³ர்ஶ பம்பாம் ஶுப⁴த³ர்ஶகாநநா-
-மநேகநாநாவித⁴பக்ஷிஜாலகாம் ॥ 30 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ பஞ்சஸப்ததிதம꞉ ஸர்க³꞉ ॥ 75 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

---