Aranya Kanda Sarga 64 – அரண்யகாண்ட³ சது꞉ஷஷ்டிதம꞉ ஸர்க³꞉ (64)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ சது꞉ஷஷ்டிதம꞉ ஸர்க³꞉ (64)

॥ ராமக்ரோத⁴꞉ ॥

ஸ தீ³நோ தீ³நயா வாசா லக்ஷ்மணம் வாக்யமப்³ரவீத் ।
ஶீக்⁴ரம் லக்ஷ்மண ஜாநீஹி க³த்வா கோ³தா³வரீம் நதீ³ம் ॥ 1 ॥

அபி கோ³தா³வரீம் ஸீதா பத்³மாந்யாநயிதும் க³தா ।
ஏவமுக்தஸ்து ராமேண லக்ஷ்மண꞉ புநரேவ ஹி ॥ 2 ॥ [பரவீரஹா]

நதீ³ம் கோ³தா³வரீம் ரம்யாம் ஜகா³ம லகு⁴விக்ரம꞉ ।
தாம் லக்ஷ்மணஸ்தீர்த²வதீம் விசித்வா ராமமப்³ரவீத் ॥ 3 ॥

நைநாம் பஶ்யாமி தீர்தே²ஷு க்ரோஶதோ ந ஶ்ருணோதி மே ।
கம் நு ஸா தே³ஶமாபந்நா வைதே³ஹீ க்லேஶநாஶிநீ ॥ 4 ॥

ந ஹ்யஹம் வேத³ தம் தே³ஶம் யத்ர ஸா ஜநகாத்மஜா ।
லக்ஷ்மணஸ்ய வச꞉ ஶ்ருத்வா தீ³ந꞉ ஸந்தாபமோஹித꞉ ॥ 5 ॥

ராம꞉ ஸமபி⁴சக்ராம ஸ்வயம் கோ³தா³வரீம் நதீ³ம் ।
ஸ தாமுபஸ்தி²தோ ராம꞉ க்வ ஸீதேத்யேவமப்³ரவீத் ॥ 6 ॥

பூ⁴தாநி ராக்ஷஸேந்த்³ரேண வதா⁴ர்ஹேண ஹ்ருதாமிதி ।
ந தாம் ஶஶம்ஸூ ராமாய ததா² கோ³தா³வரீ நதீ³ ॥ 7 ॥

தத꞉ ப்ரசோதி³தா பூ⁴தை꞉ ஶம்ஸாஸ்மத்தாம் ப்ரியாமிதி ।
ந து ஸா(அ)ப்⁴யவத³த்ஸீதாம் ப்ருஷ்டா ராமேண ஶோசதா ॥ 8 ॥

ராவணஸ்ய ச தத்³ரூபம் கர்மாணி ச து³ராத்மந꞉ ।
த்⁴யாத்வா ப⁴யாத்து வைதே³ஹீம் ஸா நதீ³ ந ஶஶம்ஸ தாம் ॥ 9 ॥

நிராஶஸ்து தயா நத்³யா ஸீதாயா த³ர்ஶநே க்ருத꞉ ।
உவாச ராம꞉ ஸௌமித்ரிம் ஸீதா(அ)த³ர்ஶநகர்ஶித꞉ ॥ 10 ॥

ஏஷா கோ³தா³வரீ ஸௌம்ய கிஞ்சிந்ந ப்ரதிபா⁴ஷதே ।
கிந்நு லக்ஷ்மண வக்ஷ்யாமி ஸமேத்ய ஜநகம் வச꞉ ॥ 11 ॥

மாதரம் சைவ வைதே³ஹ்யா விநா தாமஹமப்ரியம் ।
யா மே ராஜ்யவிஹீநஸ்ய வநே வந்யேந ஜீவத꞉ ॥ 12 ॥

ஸர்வம் வ்யபநயேச்சோ²கம் வைதே³ஹீ க்வ நு ஸா க³தா ।
ஜ்ஞாதிபக்ஷவிஹீநஸ்ய ராஜபுத்ரீமபஶ்யத꞉ ॥ 13 ॥

மந்யே தீ³ர்கா⁴ ப⁴விஷ்யந்தி ராத்ரயோ மம ஜாக்³ரத꞉ ।
மந்தா³கிநீம் ஜநஸ்தா²நமிமம் ப்ரஸ்ரவணம் கி³ரிம் ॥ 14 ॥

ஸர்வாண்யநுசரிஷ்யாமி யதி³ ஸீதா ஹி த்³ருஶ்யதே ।
ஏதே ம்ருகா³ மஹாவீர்யா மாமீக்ஷந்தே முஹுர்முஹு꞉ ॥ 15 ॥

வக்துகாமா இவ ஹி மே இங்கி³தாந்யுபலக்ஷயே ।
தாம்ஸ்து த்³ருஷ்ட்வா நரவ்யாக்⁴ரோ ராக⁴வ꞉ ப்ரத்யுவாச ஹ ॥ 16 ॥

க்வ ஸீதேதி நிரீக்ஷந் வை பா³ஷ்பஸம்ருத்³த⁴யா த்³ருஶா ।
ஏவமுக்தா நரேந்த்³ரேண தே ம்ருகா³꞉ ஸஹஸோத்தி²தா꞉ ॥ 17 ॥

த³க்ஷிணாபி⁴முகா²꞉ ஸர்வே த³ர்ஶயந்தோ நப⁴꞉ஸ்த²லம் ।
மைதி²லீ ஹ்ரியமாணா ஸா தி³ஶம் யாமந்வபத்³யத ॥ 18 ॥

தேந மார்கே³ண தா⁴வந்தோ நிரீக்ஷந்தே நராதி⁴பம் ।
யேந மார்க³ம் ச பூ⁴மிம் ச நிரீக்ஷந்தே ஸ்ம தே ம்ருகா³꞉ ॥ 19 ॥

புநஶ்ச மார்க³மிச்ச²ந்தி லக்ஷ்மணேநோபலக்ஷிதா꞉ ।
தேஷாம் வசநஸர்வஸ்வம் லக்ஷயாமாஸ சேங்கி³தம் ॥ 20 ॥

உவாச லக்ஷ்மணோ ஜ்யேஷ்ட²ம் தீ⁴மாந் ப்⁴ராதரமார்தவத் ।
க்வ ஸீதேதி த்வயா ப்ருஷ்டா யதே²மே ஸஹஸோத்தி²தா꞉ ॥ 21 ॥

த³ர்ஶயந்தி க்ஷிதிம் சைவ த³க்ஷிணாம் ச தி³ஶம் ம்ருகா³꞉ ।
ஸாது⁴ க³ச்சா²வஹை தே³வ தி³ஶமேதாம் ஹி நைர்ருதிம் ॥ 22 ॥

யதி³ ஸ்யாதா³க³ம꞉ கஶ்சிதா³ர்யா வா ஸா(அ)த² லக்ஷ்யதே ।
பா³ட⁴மித்யேவ காகுத்ஸ்த²꞉ ப்ரஸ்தி²தோ த³க்ஷிணாம் தி³ஶம் ॥ 23 ॥

லக்ஷ்மணாநுக³த꞉ ஶ்ரீமாந் வீக்ஷமாணோ வஸுந்த⁴ராம் ।
ஏவம் ஸம்பா⁴ஷமாணௌ தாவந்யோந்யம் ப்⁴ராதராவுபௌ⁴ ॥ 24 ॥

வஸுந்த⁴ராயாம் பதிதம் புஷ்பமார்க³மபஶ்யதாம் ।
தாம் புஷ்பவ்ருஷ்டிம் பதிதாம் த்³ருஷ்ட்வா ராமோ மஹீதலே ॥ 25 ॥

உவாச லக்ஷ்மணம் வீரோ து³꞉கி²தோ து³꞉கி²தம் வச꞉ ।
அபி⁴ஜாநாமி புஷ்பாணி தாநீமாநீஹ லக்ஷ்மண ॥ 26 ॥

பிநத்³தா⁴நீஹ வைதே³ஹ்யா மயா த³த்தாநி காநநே ।
மந்யே ஸூர்யஶ்ச வாயுஶ்ச மேதி³நீ ச யஶஸ்விநீ ॥ 27 ॥

அபி⁴ரக்ஷந்தி புஷ்பாணி ப்ரகுர்வந்தோ மம ப்ரியம் ।
ஏவமுக்த்வா மஹாபா³ஹும் லக்ஷ்மணம் புருஷர்ஷப⁴꞉ ॥ 28 ॥

உவாச ராமோ த⁴ர்மாத்மா கி³ரிம் ப்ரஸ்ரவணாகுலம் ।
கச்சித் க்ஷிதிப்⁴ருதாம் நாத² த்³ருஷ்டா ஸர்வாங்க³ஸுந்த³ரீ ॥ 29 ॥

ராமா ரம்யே வநோத்³தே³ஶே மயா விரஹிதா த்வயா ।
க்ருத்³தோ⁴(அ)ப்³ரவீத்³கி³ரிம் தத்ர ஸிம்ஹ꞉ க்ஷுத்³ரம்ருக³ம் யதா² ॥ 30 ॥

தாம் ஹேமவர்ணாம் ஹேமாபா⁴ம் ஸீதாம் த³ர்ஶய பர்வத ।
யாவத்ஸாநூநி ஸர்வாணி ந தே வித்⁴வம்ஸயாம்யஹம் ॥ 31 ॥

ஏவமுக்தஸ்து ராமேண பர்வதோ மைதி²லீம் ப்ரதி ।
ஶம்ஸந்நிவ தத꞉ ஸீதாம் நாத³ர்ஶயத ராக⁴வே ॥ 32 ॥

ததோ தா³ஶரதீ² ராம உவாச ச ஶிலோச்சயம் ।
மம பா³ணாக்³நிநிர்த³க்³தோ⁴ ப⁴ஸ்மீபூ⁴தோ ப⁴விஷ்யஸி ॥ 33 ॥

அஸேவ்ய꞉ ஸந்ததம் சைவ நிஸ்த்ருணத்³ருமபல்லவ꞉ ।
இமாம் வா ஸரிதம் சாத்³ய ஶோஷயிஷ்யாமி லக்ஷ்மண ॥ 34 ॥

யதி³ நாக்²யாதி மே ஸீதாமார்யாம் சந்த்³ரநிபா⁴நநாம் ।
ஏவம் ஸ ருஷிதோ ராமோ தி³த⁴க்ஷந்நிவ சக்ஷுஷா ॥ 35 ॥

த³த³ர்ஶ பூ⁴மௌ நிஷ்க்ராந்தம் ராக்ஷஸஸ்ய பத³ம் மஹத் ।
த்ரஸ்தாயா ராமகாங்க்ஷிண்யா꞉ ப்ரதா⁴வந்த்யா இதஸ்தத꞉ ॥ 36 ॥

ராக்ஷஸேநாநுவ்ருத்தாயா மைதி²ல்யாஶ்ச பதா³ந்யத² ।
ஸ ஸமீக்ஷ்ய பரிக்ராந்தம் ஸீதாயா ராக்ஷஸஸ்ய ச ॥ 37 ॥

ப⁴க்³நம் த⁴நுஶ்ச தூணீ ச விகீர்ணம் ப³ஹுதா⁴ ரத²ம் ।
ஸம்ப்⁴ராந்தஹ்ருத³யோ ராம꞉ ஶஶம்ஸ ப்⁴ராதரம் ப்ரியம் ॥ 38 ॥

பஶ்ய லக்ஷ்மண வைதே³ஹ்யா꞉ ஶீர்ணா꞉ கநகபி³ந்த³வ꞉ ।
பூ⁴ஷணாநாம் ஹி ஸௌமித்ரே மால்யாநி விவிதா⁴நி ச ॥ 39 ॥

தப்தபி³ந்து³நிகாஶைஶ்ச சித்ரை꞉ க்ஷதஜபி³ந்து³பி⁴꞉ ।
ஆவ்ருதம் பஶ்ய ஸௌமித்ரே ஸர்வதோ த⁴ரணீதலம் ॥ 40 ॥

மந்யே லக்ஷ்மண வைதே³ஹீ ராக்ஷஸை꞉ காமரூபிபி⁴꞉ ।
பி⁴த்த்வா பி⁴த்த்வா விப⁴க்தா வா ப⁴க்ஷிதா வா ப⁴விஷ்யதி ॥ 41 ॥

தஸ்யா நிமித்தம் வைதே³ஹ்யா த்³வயோர்விவத³மாநயோ꞉ ।
ப³பூ⁴வ யுத்³த⁴ம் ஸௌமித்ரே கோ⁴ரம் ராக்ஷஸயோரிஹ ॥ 42 ॥

முக்தாமணிமயம் சேத³ம் தபநீயவிபூ⁴ஷிதம் ।
த⁴ரண்யாம் பதிதம் ஸௌம்ய கஸ்ய ப⁴க்³நம் மஹத்³த⁴நு꞉ ॥ 43 ॥

ராக்ஷஸாநாமித³ம் வத்ஸ ஸுராணாமத²வா(அ)பி வா ।
தருணாதி³த்யஸங்காஶம் வைடூ³ர்யகு³ளிகாசிதம் ॥ 44 ॥

விஶீர்ணம் பதிதம் பூ⁴மௌ கவசம் கஸ்ய காஞ்சநம் ।
ச²த்ரம் ஶதஶலாகம் ச தி³வ்யமால்யோபஶோபி⁴தம் ॥ 45 ॥

ப⁴க்³நத³ண்ட³மித³ம் கஸ்ய பூ⁴மௌ ஸம்யங்நிபாதிதம் ।
காஞ்சநோரஶ்ச²தா³ஶ்சேமே பிஶாசவத³நா꞉ க²ரா꞉ ॥ 46 ॥

பீ⁴மரூபா மஹாகாயா꞉ கஸ்ய வா நிஹதா ரணே ।
தீ³ப்தபாவகஸங்காஶோ த்³யுதிமாந் ஸமரத்⁴வஜ꞉ ॥ 47 ॥

அபவித்³த⁴ஶ்ச ப⁴க்³நஶ்ச கஸ்ய ஸாங்க்³ராமிகோ ரத²꞉ ।
ரதா²க்ஷமாத்ரா விஶிகா²ஸ்தபநீயவிபூ⁴ஷணா꞉ ॥ 48 ॥

கஸ்யேமே(அ)பி⁴ஹதா பா³ணா꞉ ப்ரகீர்ணா கோ⁴ரகர்மண꞉ ।
ஶராவரௌ ஶரை꞉ பூர்ணௌ வித்⁴வஸ்தௌ பஶ்ய லக்ஷ்மண ॥ 49 ॥

ப்ரதோதா³பீ⁴ஷுஹஸ்தோ வை கஸ்யாயம் ஸாரதி²ர்ஹத꞉ ।
கஸ்யேமௌ புருஷவ்யாக்⁴ர ஶயாதே நிஹதோ யுதி⁴ ॥ 50 ॥

சாமரக்³ராஹிணௌ ஸௌம்ய ஸோஷ்ணீஷமணிகுண்ட³லௌ ।
பத³வீ புருஷஸ்யைஷா வ்யக்தம் கஸ்யாபி ரக்ஷஸ꞉ ॥ 51 ॥

வைரம் ஶதகு³ணம் பஶ்ய மமேத³ம் ஜீவிதாந்தகம் ।
ஸுகோ⁴ரஹ்ருத³யை꞉ ஸௌம்ய ராக்ஷஸை꞉ காமரூபிபி⁴꞉ ॥ 52 ॥

ஹ்ருதா ம்ருதா வா ஸீதா ஸா ப⁴க்ஷிதா வா தபஸ்விநீ ।
ந த⁴ர்மஸ்த்ராயதே ஸீதாம் ஹ்ரியமாணாம் மஹாவநே ॥ 53 ॥

ப⁴க்ஷிதாயாம் ஹி வைதே³ஹ்யாம் ஹ்ருதாயாமபி லக்ஷ்மண ।
கே ஹி லோகே(அ)ப்ரியம் கர்தும் ஶக்தா꞉ ஸௌம்ய மமேஶ்வரா꞉ ॥ 54 ॥

கர்தாரமபி லோகாநாம் ஶூரம் கருணவேதி³நம் ।
அஜ்ஞாநாத³வமந்யேரந் ஸர்வபூ⁴தாநி லக்ஷ்மண ॥ 55 ॥

ம்ருது³ம் லோகஹிதே யுக்தம் தா³ந்தம் கருணவேதி³நம் ।
நிர்வீர்ய இதி மந்யந்தே நூநம் மாம் த்ரித³ஶேஶ்வரா꞉ ॥ 56 ॥

மாம் ப்ராப்ய ஹி கு³ணோ தோ³ஷ꞉ ஸம்வ்ருத்த꞉ பஶ்ய லக்ஷ்மண ।
அத்³யைவ ஸர்வபூ⁴தாநாம் ரக்ஷஸாமப⁴வாய ச ॥ 57 ॥

ஸம்ஹ்ருத்யைவ ஶஶிஜ்யோத்ஸ்நாம் மஹாந் ஸூர்ய இவோதி³த꞉ ।
ஸம்ஹ்ருத்யைவ கு³ணாந் ஸர்வாந் மம தேஜ꞉ ப்ரகாஶதே ॥ 58 ॥

நைவ யக்ஷா ந க³ந்த⁴ர்வா ந பிஶாசா ந ராக்ஷஸா꞉ ।
கிந்நரா வா மநுஷ்யா வா ஸுக²ம் ப்ராப்ஸ்யந்தி லக்ஷ்மண ॥ 59 ॥

மமாஸ்த்ரபா³ணஸம்பூர்ணமாகாஶம் பஶ்ய லக்ஷ்மண ।
நி꞉ஸம்பாதம் கரிஷ்யாமி ஹ்யத்³ய த்ரைலோக்யசாரிணாம் ॥ 60 ॥

ஸந்நிருத்³த⁴க்³ரஹணமாவாரிதநிஶாகரம் ।
விப்ரநஷ்டாநலமருத்³பா⁴ஸ்கரத்³யுதிஸம்வ்ருதம் ॥ 61 ॥

விநிர்மதி²தஶைலாக்³ரம் ஶுஷ்யமாணஜலாஶயம் ।
த்⁴வஸ்தத்³ருமலதாகு³ள்மம் விப்ரணாஶிதஸாக³ரம் ॥ 62 ॥

த்ரைலோக்யம் து கரிஷ்யாமி ஸம்யுக்தம் காலத⁴ர்மணா ।
ந தாம் குஶலிநீம் ஸீதாம் ப்ரதா³ஸ்யந்தி யதீ³ஶ்வரா꞉ ॥ 63 ॥

அஸ்மிந் முஹூர்தே ஸௌமித்ரே மம த்³ரக்ஷ்யந்தி விக்ரமம் ।
நாகாஶமுத்பதிஷ்யந்தி ஸர்வபூ⁴தாநி லக்ஷ்மண ॥ 64 ॥

மம சாபகு³ணோந்முக்தைர்பா³ணஜாலைர்நிரந்தரம் ।
அர்தி³தம் மம நாராசைர்த்⁴வஸ்தப்⁴ராந்தம்ருக³த்³விஜம் ॥ 65 ॥

ஸமாகுலமமர்யாத³ம் ஜக³த்பஶ்யாத்³ய லக்ஷ்மண ।
ஆகர்ணபூர்ணைரிஷுபி⁴ர்ஜீவலோகம் து³ராஸதை³꞉ ॥ 66 ॥

கரிஷ்யே மைதி²லீஹேதோரபிஶாசமராக்ஷஸம் ।
மம ரோஷப்ரயுக்தாநாம் ஸாயகாநாம் ப³லம் ஸுரா꞉ ॥ 67 ॥

த்³ரக்ஷ்யந்த்யத்³ய விமுக்தாநாமதிதூ³ராதிகா³மிநாம் ।
நைவ தே³வா ந தை³தேயா ந பிஶாசா ந ராக்ஷஸா꞉ ॥ 68 ॥

ப⁴விஷ்யந்தி மம க்ரோதா⁴த் த்ரைலோக்யே விப்ரணாஶிதே ।
தே³வதா³நவயக்ஷாணாம் லோகா யே ரக்ஷஸாமபி ॥ 69 ॥

ப³ஹுதா⁴ ந ப⁴விஷ்யந்தி பா³ணௌகை⁴꞉ ஶகலீக்ருதா꞉ ।
நிர்மர்யாதா³நிமாந் லோகாந் கரிஷ்யாம்யத்³ய ஸாயகை꞉ ॥ 70 ॥

ஹ்ருதாம் ம்ருதாம் வா ஸௌமித்ரே ந தா³ஸ்யந்தி மமேஶ்வரா꞉ ।
ததா²ரூபாம் ஹி வைதே³ஹீம் ந தா³ஸ்யந்தி யதி³ ப்ரியாம் ॥ 71 ॥

நாஶயாமி ஜக³த்ஸர்வம் த்ரைலோக்யம் ஸசராசரம் ।
இத்யுக்த்வா ரோஷதாம்ராக்ஷோ ராமோ நிஷ்பீட்³ய கார்முகம் ॥ 72 ॥

ஶரமாதா³ய ஸந்தீ³ப்தம் கோ⁴ரமாஶீவிஷோபமம் ।
ஸந்தா⁴ய த⁴நுஷி ஶ்ரீமாந் ராம꞉ பரபுரஞ்ஜய꞉ ॥ 73 ॥

யுகா³ந்தாக்³நிரிவ க்ருத்³த⁴ இத³ம் வசநமப்³ரவீத் ।
யதா² ஜரா யதா² ம்ருத்யுர்யதா² காலோ யதா² விதி⁴꞉ ॥ 74 ॥

நித்யம் ந ப்ரதிஹந்யந்தே ஸர்வபூ⁴தேஷு லக்ஷ்மண ।
ததா²(அ)ஹம் க்ரோத⁴ஸம்யுக்தோ ந நிவார்யோ(அ)ஸ்மி ஸர்வதா² ॥ 75 ॥

புரேவ மே சாருத³தீமநிந்தி³தாம்
தி³ஶந்தி ஸீதாம் யதி³ நாத்³ய மைதி²லீம் ।
ஸதே³வக³ந்த⁴ர்வமநுஷ்யபந்நக³ம்
ஜக³த்ஸஶைலம் பரிவர்தயாம்யஹம் ॥ 76 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ சது꞉ஷஷ்டிதம꞉ ஸர்க³꞉ ॥ 64 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.