Aranya Kanda Sarga 57 – அரண்யகாண்ட³ ஸப்தபஞ்சாஶ꞉ ஸர்க³꞉ (57)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ ஸப்தபஞ்சாஶ꞉ ஸர்க³꞉ (57)

॥ ராமப்ரத்யாக³மநம் ॥

ராக்ஷஸம் ம்ருக³ரூபேண சரந்தம் காமரூபிணம் ।
நிஹத்ய ராமோ மாரீசம் தூர்ணம் பதி² நிவர்ததே ॥ 1 ॥

தஸ்ய ஸந்த்வரமாணஸ்ய த்³ரஷ்டுகாமஸ்ய மைதி²லீம் ।
க்ரூரஸ்வநோ(அ)த² கோ³மாயுர்விநநாதா³ஸ்ய ப்ருஷ்ட²த꞉ ॥ 2 ॥

ஸ தஸ்ய ஸ்வரமாஜ்ஞாய தா³ருணம் ரோமஹர்ஷணம் ।
சிந்தயாமாஸ கோ³மாயோ꞉ ஸ்வரேண பரிஶங்கித꞉ ॥ 3 ॥

அஶுப⁴ம் ப³த மந்யே(அ)ஹம் கோ³மாயுர்வாஶ்யதே யதா² ।
ஸ்வஸ்தி ஸ்யாத³பி வைதே³ஹ்யா ராக்ஷஸைர்ப⁴க்ஷணம் விநா ॥ 4 ॥

மாரீசேந து விஜ்ஞாய ஸ்வரமாலம்ப்³ய மாமகம் ।
விக்ருஷ்டம் ம்ருக³ருபேண லக்ஷ்மண꞉ ஶ்ருணுயாத்³யதி³ ॥ 5 ॥

ஸ ஸௌமித்ரி꞉ ஸ்வரம் ஶ்ருத்வா தாம் ச ஹித்வா ச மைதி²லீம் ।
தயைவ ப்ரஹித꞉ க்ஷிப்ரம் மத்ஸகாஶமிஹைஷ்யதி ॥ 6 ॥

ராக்ஷஸை꞉ ஸஹிதைர்நூநம் ஸீதாயா ஈப்ஸிதோ வத⁴꞉ ।
காஞ்சநஶ்ச ம்ருகோ³ பூ⁴த்வா வ்யபநீயாஶ்ரமாத்து மாம் ॥ 7 ॥

தூ³ரம் நீத்வா து மாரீசோ ராக்ஷஸோ(அ)பூ⁴ச்ச²ராஹத꞉ ।
ஹா லக்ஷ்மண ஹதோ(அ)ஸ்மீதி யத்³வாக்யம் வ்யாஜஹார ச ॥ 8 ॥

அபி ஸ்வஸ்தி ப⁴வேத்தாப்⁴யாம் ரஹிதாப்⁴யாம் மஹாவநே ।
ஜநஸ்தா²நநிமித்தம் ஹி க்ருதவைரோ(அ)ஸ்மி ராக்ஷஸை꞉ ॥ 9 ॥

நிமித்தாநி ச கோ⁴ராணி த்³ருஶ்யந்தே(அ)த்³ய ப³ஹூநி ச ।
இத்யேவம் சிந்தயந் ராம꞉ ஶ்ருத்வா கோ³மாயுநி꞉ஸ்வநம் ॥ 10 ॥

ஆத்மநஶ்சாபநயநாந் ம்ருக³ரூபேண ரக்ஷஸா ।
ஆஜக³ம ஜநஸ்தா²நம் ராக⁴வ꞉ பரிஶங்கித꞉ ॥ 11 ॥

தம் தீ³நமநஸோ தீ³நமாஸேது³ர்ம்ருக³பக்ஷிண꞉ ।
ஸவ்யம் க்ருத்வா மஹாத்மாநம் கோ⁴ராம்ஶ்ச ஸஸ்ருஜு꞉ ஸ்வராந் ॥ 12 ॥

தாநி த்³ருஷ்ட்வா நிமித்தாநி மஹாகோ⁴ராணி ராக⁴வ꞉ ।
ந்யவர்ததாத² த்வரிதோ ஜவேநாஶ்ரமமாத்மந꞉ ॥ 13 ॥

ஸ து ஸீதாம் வராரோஹாம் லக்ஷ்மணம் ச மஹாப³லம் ।
ஆஜகா³ம ஜநஸ்தா²நம் சிந்தயந்நேவ ராக⁴வ꞉ ॥ 14 ॥

ததோ லக்ஷ்மணமாயாந்தம் த³த³ர்ஶ விக³தப்ரப⁴ம் ।
ததோ(அ)விதூ³ரே ராமேண ஸமீயாய ஸ லக்ஷ்மண꞉ ॥ 15 ॥

விஷண்ண꞉ ஸுவிஷண்ணேந து³꞉கி²தோ து³꞉க²பா⁴கி³நா ।
ஸஞ்ஜக³ர்ஹே(அ)த² தம் ப்⁴ராதா ஜ்யேஷ்டோ² லக்ஷ்மணமாக³தம் ॥ 16 ॥

விஹாய ஸீதாம் விஜநே வநே ராக்ஷஸஸேவிதே ।
க்³ருஹீத்வா ச கரம் ஸவ்யம் லக்ஷ்மணம் ரகு⁴நந்த³ந꞉ ॥ 17 ॥

உவாச மது⁴ரோத³ர்கமித³ம் பருஷமார்திமத் ।
அஹோ லக்ஷ்மண க³ர்ஹ்யம் தே க்ருதம் யஸ்த்வம் விஹாய தாம் ॥ 18 ॥

ஸீதாமிஹாக³த꞉ ஸௌம்ய கஞ்சித் ஸ்வஸ்தி ப⁴வேதி³ஹ ।
ந மே(அ)ஸ்தி ஸம்ஶயோ வீர ஸர்வதா² ஜநகாத்மஜா ॥ 19 ॥

விநஷ்டா ப⁴க்ஷிதா வாபி ராக்ஷஸைர்வநசாரிபி⁴꞉ ।
அஶுபா⁴ந்யேவ பூ⁴யிஷ்ட²ம் யதா² ப்ராது³ர்ப⁴வந்தி மே ॥ 20 ॥

அபி லக்ஷ்மண ஸீதாயா꞉ ஸாமக்³ர்யம் ப்ராப்நுயாவஹே ।
ஜீவந்த்யா꞉ புருஷவ்யாக்⁴ர ஸுதாயா ஜநகஸ்ய வை ॥ 21 ॥

யதா² வை ம்ருக³ஸங்கா⁴ஶ்ச கோ³மாயுஶ்சைவ பை⁴ரவம் ।
வாஶ்யந்தே ஶகுநாஶ்சாபி ப்ரதீ³ப்தாமபி⁴தோ தி³ஶம் ।
அபி ஸ்வஸ்தி ப⁴வேத்தஸ்யா ராஜபுத்ர்யா மஹாப³ல ॥ 22 ॥

இத³ம் ஹி ரக்ஷோ ம்ருக³ஸந்நிகாஶம்
ப்ரளோப்⁴ய மாம் தூ³ரமநுப்ரயாதம் ।
ஹதம் கத²ஞ்சிந்மஹதா ஶ்ரமேண
ஸ ராக்ஷஸோ(அ)பூ⁴ந்ம்ரியமாண ஏவ ॥ 23 ॥

மநஶ்ச மே தீ³நமிஹாப்ரஹ்ருஷ்டம்
சக்ஷுஶ்ச ஸவ்யம் குருதே விகாரம் ।
அஸம்ஶயம் லக்ஷ்மண நாஸ்தி ஸீதா
ஹ்ருதா ம்ருதா வா பதி² வர்ததே வா ॥ 24 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ ஸப்தபஞ்சாஶ꞉ ஸர்க³꞉ ॥ 57 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.