Aranya Kanda Sarga 53 – அரண்யகாண்ட³ த்ரிபஞ்சாஶ꞉ ஸர்க³꞉ (53)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ த்ரிபஞ்சாஶ꞉ ஸர்க³꞉ (53)

॥ ராவணப⁴ர்த்ஸநம் ॥

க²முத்பதந்தம் தம் த்³ருஷ்ட்வா மைதி²லீ ஜநகாத்மஜா ।
து³꞉கி²தா பரமோத்³விக்³நா ப⁴யே மஹதி வர்திநீ ॥ 1 ॥

ரோஷரோத³நதாம்ராக்ஷீ பீ⁴மாக்ஷம் ராக்ஷஸாதி⁴பம் ।
ருத³ந்தீ கருணம் ஸீதா ஹ்ரியமாணேத³மப்³ரவீத் ॥ 2 ॥

ந வ்யபத்ரபஸே நீச கர்மணா(அ)நேந ராவண ।
ஜ்ஞாத்வா விரஹிதாம் யந்மாம் சோரயித்வா பலாயஸே ॥ 3 ॥

த்வயைவ நூநம் து³ஷ்டாத்மந் பீ⁴ருணா ஹர்துமிச்ச²தா ।
மமாபவாஹிதோ ப⁴ர்தா ம்ருக³ரூபேண மாயயா ॥ 4 ॥

யோ ஹி மாமுத்³யதஸ்த்ராதும் ஸோ(அ)ப்யயம் விநிபாதித꞉ ।
க்³ருத்⁴ரராஜ꞉ புராணோ(அ)ஸௌ ஶ்வஶுரஸ்ய ஸகா² மம ॥ 5 ॥

பரமம் க²லு தே வீர்யம் த்³ருஶ்யதே ராக்ஷஸாத⁴ம ।
விஶ்ராவ்ய நாமதே⁴யம் ஹி யுத்³தே⁴ நாஸ்மி ஜிதா த்வயா ॥ 6 ॥

ஈத்³ருஶம் க³ர்ஹிதம் கர்ம கத²ம் க்ருத்வா ந லஜ்ஜஸே ।
ஸ்த்ரியாஶ்ச ஹரணம் நீச ரஹிதே து பரஸ்ய ச ॥ 7 ॥

கத²யிஷ்யந்தி லோகேஷு புருஷா꞉ கர்ம குத்ஸிதம் ।
ஸுந்ருஶம்ஸமத⁴ர்மிஷ்ட²ம் தவ ஶௌண்டீ³ர்யமாநிந꞉ ॥ 8 ॥

தி⁴க் தே ஶௌர்யம் ச ஸத்த்வம் ச யத்த்வம் கதி²தவாம்ஸ்ததா³ ।
குலாக்ரோஶகரம் லோகே தி⁴க் தே சாரித்ரமீத்³ருஶம் ॥ 9 ॥

கிம் கர்தும் ஶக்யமேவம் ஹி யஜ்ஜவேநைவ தா⁴வஸி ।
முஹூர்தமபி திஷ்ட²ஸ்வ ந ஜீவந் ப்ரதியாஸ்யஸி ॥ 10 ॥

ந ஹி சக்ஷுஷ்பத²ம் ப்ராப்ய தயோ꞉ பார்தி²வபுத்ரயோ꞉ ।
ஸஸைந்யோ(அ)பி ஸமர்த²ஸ்த்வம் முஹூர்தமபி ஜீவிதும் ॥ 11 ॥

ந த்வம் தயோ꞉ ஶரஸ்பர்ஶம் ஸோடு⁴ம் ஶக்த꞉ கத²ஞ்சந ।
வநே ப்ரஜ்வலிதஸ்யேவ ஸ்பர்ஶமக்³நேர்விஹங்க³ம꞉ ॥ 12 ॥

ஸாது⁴ க்ருத்வா(ஆ)த்மந꞉ பத்²யம் ஸாது⁴ மாம் முஞ்ச ராவண ।
மத்ப்ரத⁴ர்ஷணருஷ்டோ ஹி ப்⁴ராத்ரா ஸஹ பதிர்மம ॥ 13 ॥

விதா⁴ஸ்யதி விநாஶாய த்வம் மாம் யதி³ ந முஞ்சஸி ।
யேந த்வம் வ்யவஸாயேந ப³லாந்மாம் ஹர்துமிச்ச²ஸி ॥ 14 ॥

வ்யவஸாய꞉ ஸ தே நீச ப⁴விஷ்யதி நிரர்த²க꞉ ।
ந ஹ்யஹம் தமபஶ்யந்தீ ப⁴ர்தாரம் விபு³தோ⁴பமம் ॥ 15 ॥

உத்ஸஹே ஶத்ருவஶகா³ ப்ராணாந் தா⁴ரயிதும் சிரம் ।
ந நூநம் சாத்மந꞉ ஶ்ரேய꞉ பத்²யம் வா ஸமவேக்ஷஸே ॥ 16 ॥

ம்ருத்யுகாலே யதா² மர்த்யோ விபரீதாநி ஸேவதே ।
முமூர்ஷூணாம் ஹி ஸர்வேஷாம் யத்பத்²யம் தந்ந ரோசதே ॥ 17 ॥

பஶ்யாம்யத்³ய ஹி கண்டே² த்வாம் காலபாஶாவபாஶிதம் ।
யதா² சாஸ்மிந் ப⁴யஸ்தா²நே ந பி³பே⁴ஷி த³ஶாநந ॥ 18 ॥

வ்யக்தம் ஹிரண்மயாந் ஹி த்வம் ஸம்பஶ்யஸி மஹீருஹாந் ।
நதீ³ம் வைதரணீம் கோ⁴ராம் ரிதி⁴ரௌக⁴நிவாஸிநீம் ॥ 19 ॥

அஸிபத்ரவநம் சைவ பீ⁴மம் பஶ்யஸி ராவண ।
தப்தகாஞ்சநபுஷ்பாம் ச வைடூ³ர்யப்ரவரச்ச²தா³ம் ॥ 20 ॥

த்³ரக்ஷ்யஸே ஶால்மலீம் தீக்ஷ்ணாமாயஸை꞉ கண்டகைஶ்சிதாம் ।
ந ஹி த்வமீத்³ருஶம் க்ருத்வா தஸ்யாளீகம் மஹாத்மந꞉ ॥ 21 ॥

த⁴ரிதும் ஶக்ஷ்யஸி சிரம் விஷம் பீத்வேவ நிர்க்⁴ருண꞉ ।
ப³த்³த⁴ஸ்த்வம் காலபாஶேந து³ர்நிவாரேண ராவண ॥ 22 ॥

க்வ க³தோ லப்ஸ்யஸே ஶர்ம ப⁴ர்துர்மம மஹாத்மந꞉ ।
நிமேஷாந்தரமாத்ரேண விநா ப்⁴ராத்ரா மஹாவநே ॥ 23 ॥

ராக்ஷஸா நிஹதா யேந ஸஹஸ்ராணி சதுர்த³ஶ ।
ஸ கத²ம் ராக⁴வோ வீர꞉ ஸர்வாஸ்த்ரகுஶலோ ப³லீ ॥ 24 ॥

ந த்வாம் ஹந்யாச்ச²ரைஸ்தீக்ஷ்ணைரிஷ்டபா⁴ர்யாபஹாரிணம் ।
ஏதச்சாந்யச்ச பருஷம் வைதே³ஹீ ராவணாங்ககா³ ।
ப⁴யஶோகஸமாவிஷ்டா கருணம் விளலாப ஹ ॥ 25 ॥

ததா² ப்⁴ருஶார்தாம் ப³ஹு சைவ பா⁴ஷிணீம்
விளாபபூர்வம் கருணம் ச பா⁴மிநீம் ।
ஜஹார பாப꞉ கருணம் விவேஷ்டதீம்
ந்ருபாத்மஜாமாக³தகா³த்ரவேபது²ம் ॥ 26 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ த்ரிபஞ்சாஶ꞉ ஸர்க³꞉ ॥ 53 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.

---