Srimad Bhagavadgita Chapter 16 – ஷோட³ஶோ(அ)த்⁴யாய꞉ – தை³வாஸுரஸம்பத்³விபா⁴க³யோக³꞉

ஸ்தோத்ரநிதி → ஶ்ரீமத்³ப⁴க³வத்³கீ³தா → 16. தை³வாஸுரஸம்பத்³விபா⁴க³யோக³꞉

ஶ்ரீப⁴க³வாநுவாச ।
அப⁴யம் ஸத்த்வஸம்ஶுத்³தி⁴ர்ஜ்ஞாநயோக³வ்யவஸ்தி²தி꞉ ।
தா³நம் த³மஶ்ச யஜ்ஞஶ்ச ஸ்வாத்⁴யாயஸ்தப ஆர்ஜவம் ॥ 1 ॥

அஹிம்ஸா ஸத்யமக்ரோத⁴ஸ்த்யாக³꞉ ஶாந்திரபைஶுநம் ।
த³யா பூ⁴தேஷ்வலோலுப்த்வம் மார்த³வம் ஹ்ரீரசாபலம் ॥ 2 ॥

தேஜ꞉ க்ஷமா த்⁴ருதி꞉ ஶௌசமத்³ரோஹோ நாதிமாநிதா ।
ப⁴வந்தி ஸம்பத³ம் தை³வீமபி⁴ஜாதஸ்ய பா⁴ரத ॥ 3 ॥

த³ம்போ⁴ த³ர்போ(அ)பி⁴மாநஶ்ச க்ரோத⁴꞉ பாருஷ்யமேவ ச ।
அஜ்ஞாநம் சாபி⁴ஜாதஸ்ய பார்த² ஸம்பத³மாஸுரீம் ॥ 4 ॥

தை³வீ ஸம்பத்³விமோக்ஷாய நிப³ந்தா⁴யாஸுரீ மதா ।
மா ஶுச꞉ ஸம்பத³ம் தை³வீமபி⁴ஜாதோ(அ)ஸி பாண்ட³வ ॥ 5 ॥

த்³வௌ பூ⁴தஸர்கௌ³ லோகே(அ)ஸ்மின் தை³வ ஆஸுர ஏவ ச ।
தை³வோ விஸ்தரஶ꞉ ப்ரோக்த ஆஸுரம் பார்த² மே ஶ்ருணு ॥ 6 ॥

ப்ரவ்ருத்திம் ச நிவ்ருத்திம் ச ஜநா ந விது³ராஸுரா꞉ ।
ந ஶௌசம் நாபி சாசாரோ ந ஸத்யம் தேஷு வித்³யதே ॥ 7 ॥

அஸத்யமப்ரதிஷ்ட²ம் தே ஜக³தா³ஹுரநீஶ்வரம் ।
அபரஸ்பரஸம்பூ⁴தம் கிமந்யத் காமஹைதுகம் ॥ 8 ॥

ஏதாம் த்³ருஷ்டிமவஷ்டப்⁴ய நஷ்டாத்மாநோ(அ)ல்பபு³த்³த⁴ய꞉ ।
ப்ரப⁴வந்த்யுக்³ரகர்மாண꞉ க்ஷயாய ஜக³தோ(அ)ஹிதா꞉ ॥ 9 ॥

காமமாஶ்ரித்ய து³ஷ்பூரம் த³ம்ப⁴மாநமதா³ந்விதா꞉ ।
மோஹாத்³க்³ருஹீத்வாஸத்³க்³ராஹான் ப்ரவர்தந்தே(அ)ஶுசிவ்ரதா꞉ ॥ 10 ॥

சிந்தாமபரிமேயாம் ச ப்ரளயாந்தாமுபாஶ்ரிதா꞉ ।
காமோபபோ⁴க³பரமா ஏதாவதி³தி நிஶ்சிதா꞉ ॥ 11 ॥

ஆஶாபாஶஶதைர்ப³த்³தா⁴꞉ காமக்ரோத⁴பராயணா꞉ ।
ஈஹந்தே காமபோ⁴கா³ர்த²மந்யாயேநார்த²ஸஞ்சயான் ॥ 12 ॥

இத³மத்³ய மயா லப்³த⁴மிமம் ப்ராப்ஸ்யே மநோரத²ம் ।
இத³மஸ்தீத³மபி மே ப⁴விஷ்யதி புநர்த⁴நம் ॥ 13 ॥

அஸௌ மயா ஹத꞉ ஶத்ருர்ஹநிஷ்யே சாபராநபி ।
ஈஶ்வரோ(அ)ஹமஹம் போ⁴கீ³ ஸித்³தோ⁴(அ)ஹம் ப³லவான் ஸுகீ² ॥ 14 ॥

ஆட்⁴யோ(அ)பி⁴ஜநவாநஸ்மி கோ(அ)ந்யோ(அ)ஸ்தி ஸத்³ருஶோ மயா ।
யக்ஷ்யே தா³ஸ்யாமி மோதி³ஷ்ய இத்யஜ்ஞாநவிமோஹிதா꞉ ॥ 15 ॥

அநேகசித்தவிப்⁴ராந்தா மோஹஜாலஸமாவ்ருதா꞉ ।
ப்ரஸக்தா꞉ காமபோ⁴கே³ஷு பதந்தி நரகே(அ)ஶுசௌ ॥ 16 ॥

ஆத்மஸம்பா⁴விதா꞉ ஸ்தப்³தா⁴ த⁴நமாநமதா³ந்விதா꞉ ।
யஜந்தே நாமயஜ்ஞைஸ்தே த³ம்பே⁴நாவிதி⁴பூர்வகம் ॥ 17 ॥

அஹங்காரம் ப³லம் த³ர்பம் காமம் க்ரோத⁴ம் ச ஸம்ஶ்ரிதா꞉ ।
மாமாத்மபரதே³ஹேஷு ப்ரத்³விஷந்தோ(அ)ப்⁴யஸூயகா꞉ ॥ 18 ॥

தாநஹம் த்³விஷத꞉ க்ரூரான் ஸம்ஸாரேஷு நராத⁴மான் ।
க்ஷிபாம்யஜஸ்ரமஶுபா⁴நாஸுரீஷ்வேவ யோநிஷு ॥ 19 ॥

ஆஸுரீம் யோநிமாபந்நா மூடா⁴ ஜந்மநி ஜந்மநி ।
மாமப்ராப்யைவ கௌந்தேய ததோ யாந்த்யத⁴மாம் க³திம் ॥ 20 ॥

த்ரிவித⁴ம் நரகஸ்யேத³ம் த்³வாரம் நாஶநமாத்மந꞉ ।
காம꞉ க்ரோத⁴ஸ்ததா² லோப⁴ஸ்தஸ்மாதே³தத் த்ரயம் த்யஜேத் ॥ 21 ॥

ஏதைர்விமுக்த꞉ கௌந்தேய தமோத்³வாரைஸ்த்ரிபி⁴ர்நர꞉ ।
ஆசரத்யாத்மந꞉ ஶ்ரேயஸ்ததோ யாதி பராம் க³திம் ॥ 22 ॥

ய꞉ ஶாஸ்த்ரவிதி⁴முத்ஸ்ருஜ்ய வர்ததே காமகாரத꞉ ।
ந ஸ ஸித்³தி⁴மவாப்நோதி ந ஸுக²ம் ந பராம் க³திம் ॥ 23 ॥

தஸ்மாச்சா²ஸ்த்ரம் ப்ரமாணம் தே கார்யாகார்யவ்யவஸ்தி²தௌ ।
ஜ்ஞாத்வா ஶாஸ்த்ரவிதா⁴நோக்தம் கர்ம கர்துமிஹார்ஹஸி ॥ 24 ॥

இதி ஶ்ரீமத்³ப⁴க³வத்³கீ³தாஸூபநிஷத்ஸு ப்³ரஹ்மவித்³யாயாம் யோக³ஶாஸ்த்ரே ஶ்ரீக்ருஷ்ணார்ஜுநஸம்வாதே³ தை³வாஸுரஸம்பத்³விபா⁴க³யோகோ³ நாம ஷோட³ஶோ(அ)த்⁴யாய꞉ ॥ 16 ॥

ஸப்தத³ஶோ(அ)த்⁴யாய꞉ – ஶ்ரத்³தா⁴த்ரயவிபா⁴க³யோக³꞉ >>

---

ஸம்பூர்ண ஶ்ரீமத்³ப⁴க³வத்³கீ³தா பார்க்க.

Did you see any mistake/variation in the content above? Click here to report mistakes and corrections in Stotranidhi content.