Kishkindha Kanda Sarga 7 – கிஷ்கிந்தா⁴காண்ட³ ஸப்தம꞉ ஸர்க³꞉ (7)

ஸ்தோத்ரநிதி → வால்மீகி ராமாயணே கிஷ்கிந்த⁴காண்ட³ → கிஷ்கிந்தா⁴காண்ட³ ஸப்தம꞉ ஸர்க³꞉ (7)

॥ ராமஸமாஶ்வாஸநம் ॥

ஏவமுக்தஸ்து ஸுக்³ரீவோ ராமேணார்தேந வாநர꞉ ।
அப்³ரவீத் ப்ராஞ்ஜலிர்வாக்யம் ஸபா³ஷ்பம் பா³ஷ்பக³த்³க³த³꞉ ॥ 1 ॥

ந ஜாநே நிலயம் தஸ்ய ஸர்வதா² பாபரக்ஷஸ꞉ ।
ஸாமர்த்²யம் விக்ரமம் வா(அ)பி தௌ³ஷ்குலேயஸ்ய வா குலம் ॥ 2 ॥

ஸத்யம் தே ப்ரதிஜாநாமி த்யஜ ஶோகமரிந்த³ம ।
கரிஷ்யாமி ததா² யத்நம் யதா² ப்ராப்யஸி மைதி²லீம் ॥ 3 ॥

ராவணம் ஸக³ணம் ஹத்வா பரிதோஷ்யாத்மபௌருஷம் ।
ததா²(அ)ஸ்மி கர்தா ந சிராத்³யதா² ப்ரீதோ ப⁴விஷ்யஸி ॥ 4 ॥

அலம் வைக்லவ்யமாலம்ப்³ய தை⁴ர்யமாத்மக³தம் ஸ்மர ।
த்வத்³விதா⁴நாமஸத்³ருஶமீத்³ருஶம் வித்³தி⁴ லாக⁴வம் ॥ 5 ॥

மயா(அ)பி வ்யஸநம் ப்ராப்தம் பா⁴ர்யாஹரணஜம் மஹத் ।
ந சாஹமேவம் ஶோசாமி ந ச தை⁴ர்யம் பரித்யஜே ॥ 6 ॥

நாஹம் தாமநுஶோசாமி ப்ராக்ருதோ வாநரோ(அ)பி ஸந் ।
மஹாத்மா ச விநீதஶ்ச கிம் புநர்த்⁴ருதிமாந் ப⁴வாந் ॥ 7 ॥

பா³ஷ்பமாபதிதம் தை⁴ர்யாந்நிக்³ரஹீதும் த்வமர்ஹஸி ।
மர்யாதா³ம் ஸத்த்வயுக்தாநாம் த்⁴ருதிம் நோத்ஸ்ரஷ்டுமர்ஹஸி ॥ 8 ॥

வ்யஸநே வார்த²க்ருச்ச்²ரே வா ப⁴யே வா ஜீவிதாந்தகே ।
விம்ருஶந் வை ஸ்வயா பு³த்³த்⁴யா த்⁴ருதிமாந்நாவஸீத³தி ॥ 9 ॥

பா³லிஶஸ்து நரோ நித்யம் வைக்லவ்யம் யோ(அ)நுவர்ததே ।
ஸ மஜ்ஜத்யவஶ꞉ ஶோகே பா⁴ராக்ராந்தேவ நௌர்ஜலே ॥ 10 ॥

ஏஷோ(அ)ஞ்ஜலிர்மயா ப³த்³த⁴꞉ ப்ரணயாத்த்வாம் ப்ரஸாத³யே ।
பௌருஷம் ஶ்ரய ஶோகஸ்ய நாந்தரம் தா³துமர்ஹஸி ॥ 11 ॥

யே ஶோகமநுவர்தந்தே ந தேஷாம் வித்³யதே ஸுக²ம் ।
தேஜஶ்ச க்ஷீயதே தேஷாம் ந த்வம் ஶோசிதுமர்ஹஸி ॥ 12 ॥

ஶோகேநாபி⁴ப்ரபந்நஸ்ய ஜீவிதே சாபி ஸம்ஶய꞉ ।
ஸ ஶோகம் த்யஜ ராஜேந்த்³ர தை⁴ர்யமாஶ்ரய கேவலம் ॥ 13 ॥

ஹிதம் வயஸ்யபா⁴வேந ப்³ரூமி நோபதி³ஶாமி தே ।
வயஸ்யதாம் பூஜயந்மே ந த்வம் ஶோசிதுமர்ஹஸி ॥ 14 ॥

மது⁴ரம் ஸாந்த்விதஸ்தேந ஸுக்³ரீவேண ஸ ராக⁴வ꞉ ।
முக²மஶ்ருபரிக்லிந்நம் வஸ்த்ராந்தேந ப்ரமார்ஜயத் ॥ 15 ॥

ப்ரக்ருதிஸ்த²ஸ்து காகுத்ஸ்த²꞉ ஸுக்³ரீவவசநாத் ப்ரபு⁴꞉ ।
ஸம்பரிஷ்வஜ்ய ஸுக்³ரீவமித³ம் வசநமப்³ரவீத் ॥ 16 ॥

கர்தவ்யம் யத்³வயஸ்யேந ஸ்நிக்³தே⁴ந ச ஹிதேந ச ।
அநுரூபம் ச யுக்தம் ச க்ருதம் ஸுக்³ரீவ தத்த்வயா ॥ 17 ॥

ஏஷ ச ப்ரக்ருதிஸ்தோ²(அ)ஹமநுநீதஸ்த்வயா ஸகே² ।
து³ர்லபோ⁴ ஹீத்³ருஶோ ப³ந்து⁴ரஸ்மிந் காலே விஶேஷத꞉ ॥ 18 ॥

கிம் து யத்நஸ்த்வயா கார்யோ மைதி²ல்யா꞉ பரிமார்க³ணே ।
ராக்ஷஸஸ்ய ச ரௌத்³ரஸ்ய ராவணஸ்ய து³ராத்மந꞉ ॥ 19 ॥

மயா ச யத³நுஷ்டே²யம் விஸ்ரப்³தே⁴ந தது³ச்யதாம் ।
வர்ஷாஸ்விவ ச ஸுக்ஷேத்ரே ஸர்வம் ஸம்பத்³யதே மயி ॥ 20 ॥

மயா ச யதி³த³ம் வாக்யமபி⁴மாநாத்ஸமீரிதம் ।
தத்த்வயா ஹரிஶார்தூ³ள தத்த்வமித்யுபதா⁴ர்யதாம் ॥ 21 ॥

அந்ருதம் நோக்தபூர்வம் மே ந ச வக்ஷ்யே கதா³சந ।
ஏதத்தே ப்ரதிஜாநாமி ஸத்யேநைவ ச தே ஶபே ॥ 22 ॥

தத꞉ ப்ரஹ்ருஷ்ட꞉ ஸுக்³ரீவோ வாநரை꞉ ஸசிவை꞉ ஸஹ ।
ராக⁴வஸ்ய வச꞉ ஶ்ருத்வா ப்ரதிஜ்ஞாதம் விஶேஷத꞉ ॥ 23 ॥

ஏவமேகாந்தஸம்ப்ருக்தௌ ததஸ்தௌ நரவாநரௌ ।
உபா⁴வந்யோந்யஸத்³ருஶம் ஸுக²ம் து³꞉க²ம் ப்ரபா⁴ஷதாம் ॥ 24 ॥

மஹாநுபா⁴வஸ்ய வசோ நிஶம்ய
ஹரிர்நராணாம்ருஷப⁴ஸ்ய தஸ்ய ।
க்ருதம் ஸ மேநே ஹரிவீரமுக்²ய-
-ஸ்ததா³ ஸ்வகார்யம் ஹ்ருத³யேந வித்³வாந் ॥ 25 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே கிஷ்கிந்தா⁴காண்டே³ ஸப்தம꞉ ஸர்க³꞉ ॥ 7 ॥

---

ஸம்பூர்ண வால்மீகி ராமாயணே கிஷ்கிந்த⁴காண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.