Kishkindha Kanda Sarga 48 – கிஷ்கிந்தா⁴காண்ட³ அஷ்டசத்வாரிம்ஶ꞉ ஸர்க³꞉ (48)

ஸ்தோத்ரநிதி → வால்மீகி ராமாயணே கிஷ்கிந்த⁴காண்ட³ → கிஷ்கிந்தா⁴காண்ட³ அஷ்டசத்வாரிம்ஶ꞉ ஸர்க³꞉ (48)

॥ கண்டூ³வநாதி³விசய꞉ ॥

ஸஹ தாராங்க³தா³ப்⁴யாம் து க³த்வா ஸ ஹநுமாந் கபி꞉ ।
ஸுக்³ரீவேண யதோ²த்³தி³ஷ்டம் தம் தே³ஶமுபசக்ரமே ॥ 1 ॥

ஸ து தூ³ரமுபாக³ம்ய ஸர்வைஸ்தை꞉ கபிஸத்தமை꞉ ।
விசிநோதி ஸ்ம விந்த்⁴யஸ்ய கு³ஹாஶ்ச க³ஹநாநி ச ॥ 2 ॥

பர்வதாக்³ராந்நதீ³து³ர்கா³ந் ஸராம்ஸி விபுலாந் த்³ருமாந் ।
வ்ருக்ஷஷண்டா³ம்ஶ்ச விவிதா⁴ந் பர்வதாந் க⁴நபாத³பாந் ॥ 3 ॥

அந்வேஷமாணாஸ்தே ஸர்வே வாநரா꞉ ஸர்வதோ தி³ஶம் ।
ந ஸீதாம் த³த்³ருஶுர்வீரா மைதி²லீம் ஜநகாத்மஜாம் ॥ 4 ॥

தே ப⁴க்ஷயந்தோ மூலாநி ப²லாநி விவிதா⁴நி ச ।
அந்வேஷமாணா து³ர்த⁴ர்ஷா ந்யவஸம்ஸ்தத்ர தத்ர ஹ ॥ 5 ॥

ஸ து தே³ஶோ து³ரந்வேஷோ கு³ஹாக³ஹநவாந் மஹாந் ।
நிர்ஜலம் நிர்ஜநம் ஶூந்யம் க³ஹநம் ரோமஹர்ஷணம் ॥ 6 ॥

த்யக்த்வா து தம் ததா³ தே³ஶம் ஸர்வே வை ஹரியூத²பா꞉ ।
தாத்³ருஶாந்யப்யரண்யாநி விசித்ய ப்⁴ருஶபீடி³தா꞉ ॥ 7 ॥

தே³ஶமந்யம் து³ராத⁴ர்ஷம் விவிஶுஶ்சாகுதோப⁴யா꞉ ।
யத்ர வந்த்⁴யப²லா வ்ருக்ஷா விபுஷ்பா꞉ பர்ணவர்ஜிதா꞉ ॥ 8 ॥

நிஸ்தோயா꞉ ஸரிதோ யத்ர மூலம் யத்ர ஸுது³ர்லப⁴ம் ।
ந ஸந்தி மஹிஷா யத்ர ந ம்ருகா³ ந ச ஹஸ்திந꞉ ॥ 9 ॥

ஶார்தூ³ளா꞉ பக்ஷிணோ வாபி யே சாந்யே வநகோ³சரா꞉ ।
ந யத்ர வ்ருக்ஷா நௌஷத்⁴யோ ந லதா நாபி வீருத⁴꞉ ॥ 10 ॥

ஸ்நிக்³த⁴பத்ரா꞉ ஸ்த²லே யத்ர பத்³மிந்ய꞉ பு²ல்லபங்கஜா꞉ ।
ப்ரேக்ஷணீயா꞉ ஸுக³ந்தா⁴ஶ்ச ப்⁴ரமரைஶ்சாபி வர்ஜிதா꞉ ॥ 11 ॥

கண்டு³ர்நாம மஹாபா⁴க³꞉ ஸத்யவாதீ³ தபோத⁴ந꞉ ।
மஹர்ஷி꞉ பரமாமர்ஷீ நியமைர்து³ஷ்ப்ரத⁴ர்ஷண꞉ ॥ 12 ॥

தஸ்ய தஸ்மிந்வநே புத்ரோ பா³ல꞉ ஷோட³ஶவார்ஷிக꞉ ।
ப்ரநஷ்டோ ஜீவிதாந்தாய க்ருத்³த⁴ஸ்தத்ர மஹாமுநி꞉ ॥ 13 ॥

தேந த⁴ர்மாத்மநா ஶப்தம் க்ருத்ஸ்நம் தத்ர மஹத்³வநம் ।
அஶரண்யம் து³ராத⁴ர்ஷம் ம்ருக³பக்ஷிவிவர்ஜிதம் ॥ 14 ॥

தஸ்ய தே காநநாந்தாம்ஶ்ச கி³ரீணாம் கந்த³ராணி ச ।
ப்ரப⁴வாணி நதீ³நாம் ச விசிந்வந்தி ஸமாஹிதா꞉ ॥ 15 ॥

தத்ர சாபி மஹாத்மாநோ நாபஶ்யந் ஜநகாத்மஜாம் ।
ஹர்தாரம் ராவணம் வாபி ஸுக்³ரீவப்ரியகாரிண꞉ ॥ 16 ॥

தே ப்ரவிஶ்யாஶு தம் பீ⁴மம் லதாகு³ள்மஸமாவ்ருதம் ।
த³த்³ருஶு꞉ க்ரூரகர்மாணமஸுரம் ஸுரநிர்ப⁴யம் ॥ 17 ॥

தம் த்³ருஷ்ட்வா வாநரா கோ⁴ரம் ஸ்தி²தம் ஶைலமிவாபரம் ।
கா³ட⁴ம் பரிஹிதா꞉ ஸர்வே த்³ருஷ்ட்வா தம் பர்வதோபமம் ॥ 18 ॥

ஸோ(அ)பி தாந்வாநராந் ஸர்வாந் நஷ்டா꞉ ஸ்தே²த்யப்³ரவீத்³ப³லீ ।
அப்⁴யதா⁴வத ஸங்க்ருத்³தோ⁴ முஷ்டிமுத்³யம்ய ஸம்ஹிதம் ॥ 19 ॥

தமாபதந்தம் ஸஹஸா வாலிபுத்ரோ(அ)ங்க³த³ஸ்ததா³ ।
ராவணோ(அ)யமிதி ஜ்ஞாத்வா தலேநாபி⁴ஜகா⁴ந ஹ ॥ 20 ॥

ஸ வாலிபுத்ராபி⁴ஹதோ வக்த்ராச்சோ²ணிதமுத்³வமந் ।
அஸுரோ ந்யபதத்³பூ⁴மௌ பர்யஸ்த இவ பர்வத꞉ ॥ 21 ॥

தே(அ)பி தஸ்மிந்நிருச்ச்²வாஸே வாநரா ஜிதகாஶிந꞉ ।
வ்யசிந்வந் ப்ராயஶஸ்தத்ர ஸர்வம் தத்³கி³ரிக³ஹ்வரம் ॥ 22 ॥

விசிதம் து தத꞉ க்ருத்வா ஸர்வே தே காநநம் புந꞉ ।
அந்யதே³வாபரம் கோ⁴ரம் விவிஶுர்கி³ரிக³ஹ்வரம் ॥ 23 ॥

தே விசித்ய புந꞉ கி²ந்நா விநிஷ்பத்ய ஸமாக³தா꞉ ।
ஏகாந்தே வ்ருக்ஷமூலே து நிஷேது³ர்தீ³நமாநஸா꞉ ॥ 24 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே கிஷ்கிந்தா⁴காண்டே³ அஷ்டசத்வாரிம்ஶ꞉ ஸர்க³꞉ ॥ 48 ॥

---

ஸம்பூர்ண வால்மீகி ராமாயணே கிஷ்கிந்த⁴காண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.