Balakanda Sarga 29 – பா³லகாண்ட³ ஏகோநத்ரிம்ஶ꞉ ஸர்க³꞉ (29)

ஸ்தோத்ரநிதி → வால்மீகி ராமாயணே பா³லகாண்ட³ → பா³லகாண்ட³ ஏகோநத்ரிம்ஶ꞉ ஸர்க³꞉ (29)

॥ ஸித்³தா⁴ஶ்ரம꞉ ॥

அத² தஸ்யாப்ரமேயஸ்ய தத்³வநம் பரிப்ருச்ச²த꞉ ।
விஶ்வாமித்ரோ மஹாதேஜா வ்யாக்²யாதுமுபசக்ரமே ॥ 1 ॥

இஹ ராம மஹாபா³ஹோ விஷ்ணுர்தே³வவர꞉ ப்ரபு⁴꞉ ।
வர்ஷாணி ஸுப³ஹூந்யேவ ததா² யுக³ஶதாநி ச ॥ 2 ॥

தபஶ்சரணயோகா³ர்த²முவாஸ ஸுமஹாதபா꞉ ।
ஏஷ பூர்வாஶ்ரமோ ராம வாமநஸ்ய மஹாத்மந꞉ ॥ 3 ॥

ஸித்³தா⁴ஶ்ரம இதி க்²யாத꞉ ஸித்³தோ⁴ ஹ்யத்ர மஹாதபா꞉ ।
ஏதஸ்மிந்நேவ காலே து ராஜா வைரோசநிர்ப³லி꞉ ॥ 4 ॥

நிர்ஜித்ய தை³வதக³ணாந்ஸேந்த்³ராம்ஶ்ச ஸமருத்³க³ணாந் ।
காரயாமாஸ தத்³ராஜ்யம் த்ரிஷு லோகேஷு விஶ்ருத꞉ ॥ 5 ॥

[* யஜ்ஞம் சகார ஸுமஹாந் அஸுரேந்த்³ரோ மஹாப³ல꞉ । *]
ப³லேஸ்து யஜமாநஸ்ய தே³வா꞉ ஸாக்³நிபுரோக³மா꞉ ।
ஸமாக³ம்ய ஸ்வயம் சைவ விஷ்ணுமூசுரிஹாஶ்ரமே ॥ 6 ॥

ப³லிர்வைரோசநிர்விஷ்ணோ யஜதே யஜ்ஞமுத்தமம் ।
அஸமாப்தே க்ரதௌ தஸ்மிந் ஸ்வகார்யமபி⁴பத்³யதாம் ॥ 7 ॥

யே சைநமபி⁴வர்தந்தே யாசிதார இதஸ்தத꞉ ।
யச்ச யத்ர யதா²வச்ச ஸர்வம் தேப்⁴ய꞉ ப்ரயச்ச²தி ॥ 8 ॥

ஸ த்வம் ஸுரஹிதார்தா²ய மாயாயோக³முபாஶ்ரித꞉ ।
வாமநத்வம் க³தோ விஷ்ணோ குரு கல்யாணமுத்தமம் ॥ 9 ॥

ஏதஸ்மிந்நந்தரே ராம கஶ்யபோ(அ)க்³நிஸமப்ரப⁴꞉ ।
அதி³த்யா ஸஹிதோ ராம தீ³ப்யமாந இவௌஜஸா ॥ 10 ॥

தே³வீஸஹாயோ ப⁴க³வந்தி³வ்யம் வர்ஷஸஹஸ்ரகம் ।
வ்ரதம் ஸமாப்ய வரத³ம் துஷ்டாவ மது⁴ஸூத³நம் ॥ 11 ॥

தபோமயம் தபோராஶிம் தபோமூர்திம் தபாத்மகம் ।
தபஸா த்வாம் ஸுதப்தேந பஶ்யாமி புரோஷோத்தமம் ॥ 12 ॥

ஶரீரே தவ பஶ்யாமி ஜக³த்ஸர்வமித³ம் ப்ரபோ⁴ ।
த்வமநாதி³ரநிர்தே³ஶ்யஸ்த்வாமஹம் ஶரணம் க³த꞉ ॥ 13 ॥

தமுவாச ஹரி꞉ ப்ரீத꞉ கஶ்யபம் தூ⁴தகல்மஷம் ।
வரம் வரய ப⁴த்³ரம் தே வரார்ஹோ(அ)ஸி மதோ மம ॥ 14 ॥

தச்ச்²ருத்வா வசநம் தஸ்ய மாரீச꞉ கஶ்யபோ(அ)ப்³ரவீத் ।
அதி³த்யா தே³வதாநாம் ச மம சைவாநுயாசத꞉ ॥ 15 ॥

வரம் வரத³ ஸுப்ரீதோ தா³துமர்ஹஸி ஸுவ்ரத ।
புத்ரத்வம் க³ச்ச² ப⁴க³வந்நதி³த்யா மம சாநக⁴ ॥ 16 ॥

ப்⁴ராதா ப⁴வ யவீயாம்ஸ்த்வம் ஶக்ரஸ்யாஸுரஸூத³ந ।
ஶோகார்தாநாம் து தே³வாநாம் ஸாஹாய்யம் கர்துமர்ஹஸி ॥ 17 ॥

அயம் ஸித்³தா⁴ஶ்ரமோ நாம ப்ரஸாதா³த்தே ப⁴விஷ்யதி ।
ஸித்³தே⁴ கர்மணி தே³வேஶ உத்திஷ்ட² ப⁴க³வந்நித꞉ ॥ 18 ॥

அத² விஷ்ணுர்மஹாதேஜா அதி³த்யாம் ஸமஜாயத ।
வாமநம் ரூபமாஸ்தா²ய வைரோசநிமுபாக³மத் ॥ 19 ॥

த்ரீந்க்ரமாநத² பி⁴க்ஷித்வா ப்ரதிக்³ருஹ்ய ச மாநத³꞉ ।
ஆக்ரம்ய லோகாம்ˮல்லோகாத்மா ஸர்வலோகஹிதே ரத꞉ ॥ 20 ॥

மஹேந்த்³ராய புந꞉ ப்ராதா³ந்நியம்ய ப³லிமோஜஸா ।
த்ரைலோக்யம் ஸ மஹாதேஜாஶ்சக்ரே ஶக்ரவஶம் புந꞉ ॥ 21 ॥

தேநைஷ பூர்வமாக்ராந்த ஆஶ்ரம꞉ ஶ்ரமநாஶந꞉ ।
மயாபி ப⁴க்த்யா தஸ்யைஷ வாமநஸ்யோபபு⁴ஜ்யதே ॥ 22 ॥

ஏதமாஶ்ரமமாயாந்தி ராக்ஷஸா விக்⁴நகாரிண꞉ ।
அத்ரைவ புருஷவ்யாக்⁴ர ஹந்தவ்யா து³ஷ்டசாரிண꞉ ॥ 23 ॥

அத்³ய க³ச்சா²மஹே ராம ஸித்³தா⁴ஶ்ரமமநுத்தமம் ।

ததா³ஶ்ரமபத³ம் தாத தவாப்யேதத்³யதா² மம ।
[* இத்யுக்த்வா பரமப்ரீதோ க்³ருஹ்ய ராமம் ஸலக்ஷ்மணம் । *]
ப்ரவிஶந்நாஶ்ரம பத³ம் வ்யரோசத மஹாமுநி꞉ ॥ 24 ॥

ஶஶீவ க³தநீஹார꞉ புநர்வஸுஸமந்வித꞉ ।
தம் த்³ருஷ்ட்வா முநய꞉ ஸர்வே ஸித்³தா⁴ஶ்ரமநிவாஸிந꞉ ॥ 25 ॥

உத்பத்யோத்பத்ய ஸஹஸா விஶ்வாமித்ரமபூஜயந் ।
யதா²ர்ஹம் சக்ரிரே பூஜாம் விஶ்வாமித்ராய தீ⁴மதே ॥ 26 ॥

ததை²வ ராஜபுத்ராப்⁴யாமகுர்வந்நதிதி²க்ரியாம் ।
முஹூர்தமிவ விஶ்ராந்தௌ ராஜபுத்ராவரிந்த³மௌ ॥ 27 ॥

ப்ராஞ்ஜலீ முநிஶார்தூ³ளமூசதூ ரகு⁴நந்த³நௌ ।
அத்³யைவ தீ³க்ஷாம் ப்ரவிஶ ப⁴த்³ரம் தே முநிபுங்க³வ ॥ 28 ॥

ஸித்³தா⁴ஶ்ரமோ(அ)யம் ஸித்³த⁴꞉ ஸ்யாத்ஸத்யமஸ்து வசஸ்தவ ।
ஏவமுக்தோ மஹாதேஜா விஶ்வாமித்ரோ மஹாமுநி꞉ ॥ 29 ॥

ப்ரவிவேஶ ததோ தீ³க்ஷாம் நியதோ நியதேந்த்³ரிய꞉ ।
குமாராவபி தாம் ராத்ரிமுஷித்வா ஸுஸமாஹிதௌ ॥ 30 ॥

ப்ரபா⁴தகாலே சோத்தா²ய பூர்வாம் ஸந்த்⁴யாமுபாஸ்ய ச ।
ஸ்ப்ருஷ்டோத³கௌ ஶுசீ ஜப்யம் ஸமாப்ய நியமேந ச ।
ஹுதாக்³நிஹோத்ரமாஸீநம் விஶ்வாமித்ரமவந்த³தாம் ॥ 31 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே பா³லகாண்டே³ ஏகோநத்ரிம்ஶ꞉ ஸர்க³꞉ ॥ 29 ॥

பா³லகாண்ட³ த்ரிம்ஶ꞉ ஸர்க³꞉ (30) >>

---

ஸம்பூர்ண வால்மீகி ராமாயணே பா³லகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.