Kishkindha Kanda Sarga 53 – கிஷ்கிந்தா⁴காண்ட³ த்ரிபஞ்சாஶ꞉ ஸர்க³꞉ (53)

ஸ்தோத்ரநிதி → வால்மீகி ராமாயணே கிஷ்கிந்த⁴காண்ட³ → கிஷ்கிந்தா⁴காண்ட³ த்ரிபஞ்சாஶ꞉ ஸர்க³꞉ (53)

॥ அங்க³தா³தி³நிர்வேத³꞉ ॥

ஏவமுக்த꞉ ஶுப⁴ம் வாக்யம் தாபஸ்யா த⁴ர்மஸம்ஹிதம் ।
உவாச ஹநுமாந் வாக்யம் தாமநிந்தி³தசேஷ்டிதாம் ॥ 1 ॥

ஶரணம் த்வாம் ப்ரபந்நா꞉ ஸ்ம꞉ ஸர்வே வை த⁴ர்மசாரிணி ।
ய꞉ க்ருத꞉ ஸமயோ(அ)ஸ்மாகம் ஸுக்³ரீவேண மஹாத்மநா ॥ 2 ॥

ஸ ச காலோ ஹ்யதிக்ராந்தோ பி³லே ச பரிவர்ததாம் ।
ஸா த்வமஸ்மாத்³பி³லாத்³கோ⁴ராது³த்தாரயிதுமர்ஹஸி ॥ 3 ॥

தஸ்மாத்ஸுக்³ரீவவசநாத³திக்ராந்தாந் க³தாயுஷ꞉ ।
த்ராதுமர்ஹஸி ந꞉ ஸர்வாந் ஸுக்³ரீவப⁴யகர்ஶிதாந் ॥ 4 ॥

மஹச்ச கார்யமஸ்மாபி⁴꞉ கர்தவ்யம் த⁴ர்மசாரிணி ।
தச்சாபி ந க்ருதம் கார்யமஸ்மாபி⁴ரிஹவாஸிபி⁴꞉ ॥ 5 ॥

ஏவமுக்தா ஹநுமதா தாபஸீ வாக்யமப்³ரவீத் ।
ஜீவதா து³ஷ்கரம் மந்யே ப்ரவிஷ்டேந நிவர்திதும் ॥ 6 ॥

தபஸஸ்து ப்ரபா⁴வேண நியமோபார்ஜிதேந ச ।
ஸர்வாநேவ பி³லாத³ஸ்மாது³த்³த⁴ரிஷ்யாமி வாநராந் ॥ 7 ॥

நிர்மீலயத சக்ஷூம்ஷி ஸர்வே வாநரபுங்க³வா꞉ ।
ந ஹி நிஷ்க்ரமிதும் ஶக்யமநிமீலிதலோசநை꞉ ॥ 8 ॥

தத꞉ ஸம்மீலிதா꞉ ஸர்வே ஸுகுமாராங்கு³ளை꞉ கரை꞉ ।
ஸஹஸா பித³து⁴ர்த்³ருஷ்டிம் ஹ்ருஷ்டா க³மநகாங்க்ஷிண꞉ ॥ 9 ॥

வாநராஸ்து மஹாத்மாநோ ஹஸ்தருத்³த⁴முகா²ஸ்ததா³ ।
நிமேஷாந்தரமாத்ரேண பி³லாது³த்தாரிதாஸ்தயா ॥ 10 ॥

ததஸ்தாந்வாநராந் ஸர்வாம்ஸ்தாபஸீ த⁴ர்மசாரிணீ ।
நி꞉ஸ்ருதாந் விஷமாத்தஸ்மாத்ஸமாஶ்வாஸ்யேத³மப்³ரவீத் ॥ 11 ॥

ஏஷ விந்த்⁴யோ கி³ரி꞉ ஶ்ரீமாந்நாநாத்³ருமலதாகுல꞉ ।
ஏஷ ப்ரஸ்ரவண꞉ ஶைல꞉ ஸாக³ரோ(அ)யம் மஹோத³தி⁴꞉ ॥ 12 ॥

ஸ்வஸ்தி வோ(அ)ஸ்து க³மிஷ்யாமி ப⁴வநம் வாநரர்ஷபா⁴꞉ ।
இத்யுக்த்வா தத்³பி³லம் ஶ்ரீமத் ப்ரவிவேஶ ஸ்வயம்ப்ரபா⁴ ॥ 13 ॥

ததஸ்தே த³த்³ருஶுர்கோ⁴ரம் ஸாக³ரம் வருணாலயம் ।
அபாரமபி⁴க³ர்ஜந்தம் கோ⁴ரைரூர்மிபி⁴ராவ்ருதம் ॥ 14 ॥

மயஸ்ய மாயாவிஹிதம் கி³ரிது³ர்க³ம் விசிந்வதாம் ।
தேஷாம் மாஸோ வ்யதிக்ராந்தோ யோ ராஜ்ஞா ஸமய꞉ க்ருத꞉ ॥ 15 ॥

விந்த்⁴யஸ்ய து கி³ரே꞉ பாதே³ ஸம்ப்ரபுஷ்பிதபாத³பே ।
உபவிஶ்ய மஹாத்மாநஶ்சிந்தாமாபேதி³ரே ததா³ ॥ 16 ॥

தத꞉ புஷ்பாதிபா⁴ராக்³ராந் லதாஶதஸமாவ்ருதாந் ।
த்³ருமாந் வாஸந்திகாந் த்³ருஷ்ட்வா ப³பூ⁴வுர்ப⁴யஶங்கிதா꞉ ॥ 17 ॥

தே வஸந்தமநுப்ராப்தம் ப்ரதிபு³த்³த்⁴வா பரஸ்பரம் ।
நஷ்டஸந்தே³ஶகாலார்தா² நிபேதுர்த⁴ரணீதலே ॥ 18 ॥

ததஸ்தாந் கபிவ்ருத்³தா⁴ம்ஸ்து ஶிஷ்டாம்ஶ்சைவ வநௌகஸ꞉ ।
வாசா மது⁴ரயா(ஆ)பா⁴ஷ்ய யதா²வத³நுமாந்ய ச ॥ 19 ॥

ஸ து ஸிம்ஹவ்ருஷஸ்கந்த⁴꞉ பீநாயதபு⁴ஜ꞉ கபி꞉ ।
யுவராஜோ மஹாப்ராஜ்ஞ அங்க³தோ³ வாக்யமப்³ரவீத் ॥ 20 ॥

ஶாஸநாத்கபிராஜஸ்ய வயம் ஸர்வே விநிர்க³தா꞉ ।
மாஸ꞉ பூர்ணோ பி³லஸ்தா²நாம் ஹரய꞉ கிம் ந பு³த்⁴யதே ॥ 21 ॥

வயமாஶ்வயுஜே மாஸி காலஸங்க்²யாவ்யவஸ்தி²தா꞉ ।
ப்ரஸ்தி²தா꞉ ஸோ(அ)பி சாதீத꞉ கிமத꞉ கார்யமுத்தரம் ॥ 22 ॥

ப⁴வந்த꞉ ப்ரத்யயம் ப்ராப்தா நீதிமார்க³விஶாரதா³꞉ ।
ஹிதேஷ்வபி⁴ரதா ப⁴ர்துர்நிஸ்ருஷ்டா꞉ ஸர்வகர்மஸு ॥ 23 ॥

கர்மஸ்வப்ரதிமா꞉ ஸர்வே தி³க்ஷு விஶ்ருதபௌருஷா꞉ ।
மாம் புரஸ்க்ருத்ய நிர்யாதா꞉ பிங்கா³க்ஷப்ரதிசோதி³தா꞉ ॥ 24 ॥

இதா³நீமக்ருதார்தா²நாம் மர்தவ்யம் நாத்ர ஸம்ஶய꞉ ।
ஹரிராஜஸ்ய ஸந்தே³ஶமக்ருத்வா க꞉ ஸுகீ² ப⁴வேத் ॥ 25 ॥

தஸ்மிந்நதீதே காலே து ஸுக்³ரீவேண க்ருதே ஸ்வயம் ।
ப்ராயோபவேஶநம் யுக்தம் ஸர்வேஷாம் ச வநௌகஸாம் ॥ 26 ॥

தீக்ஷ்ண꞉ ப்ரக்ருத்யா ஸுக்³ரீவ꞉ ஸ்வாமிபா⁴வே வ்யவஸ்தி²த꞉ ।
ந க்ஷமிஷ்யதி ந꞉ ஸர்வாநபராத⁴க்ருதோ க³தாந் ॥ 27 ॥

அப்ரவ்ருத்தௌ ச ஸீதாயா꞉ பாபமேவ கரிஷ்யதி ।
தஸ்மாத்க்ஷமமிஹாத்³யைவ ப்ராயோபவிஶநம் ஹி ந꞉ ॥ 28 ॥

த்யக்த்வா புத்ராம்ஶ்ச தா³ராம்ஶ்ச த⁴நாநி ச க்³ருஹாணி ச ।
த்⁴ருவம் நோ ஹிம்ஸிதா ராஜா ஸர்வாந் ப்ரதிக³தாநித꞉ ॥ 29 ॥

வதே⁴நாப்ரதிரூபேண ஶ்ரேயாந் ம்ருத்யுரிஹைவ ந꞉ ।
ந சாஹம் யௌவராஜ்யேந ஸுக்³ரீவேணாபி⁴ஷேசித꞉ ॥ 30 ॥

நரேந்த்³ரேணாபி⁴ஷிக்தோ(அ)ஸ்மி ராமேணாக்லிஷ்டகர்மணா ।
ஸ பூர்வம் ப³த்³த⁴வைரோ மாம் ராஜா த்³ருஷ்ட்வா வ்யதிக்ரமம் ॥ 31 ॥

கா⁴தயிஷ்யதி த³ண்டே³ந தீக்ஷ்ணேந க்ருதநிஶ்சய꞉ ।
கிம் மே ஸுஹ்ருத்³பி⁴ர்வ்யஸநம் பஶ்யத்³பி⁴ர்ஜீவிதாந்தரே ॥ 32 ॥

இஹைவ ப்ராயமாஸிஷ்யே புண்யே ஸாக³ரரோத⁴ஸி ।
ஏதச்ச்²ருத்வா குமாரேண யுவராஜேந பா⁴ஷிதம் ॥ 33 ॥

ஸர்வே தே வாநரஶ்ரேஷ்டா²꞉ கருணம் வாக்யமப்³ருவந் ।
தீக்ஷ்ண꞉ ப்ரக்ருத்யா ஸுக்³ரீவ꞉ ப்ரியாஸக்தஶ்ச ராக⁴வ꞉ ॥ 34 ॥

அத்³ருஷ்டாயாம் து வைதே³ஹ்யாம் த்³ருஷ்ட்வா சைவ ஸமாக³தாந் ।
ராக⁴வப்ரியகாமார்த²ம் கா⁴தயிஷ்யத்யஸம்ஶயம் ॥ 35 ॥

ந க்ஷமம் சாபராத்³தா⁴நாம் க³மநம் ஸ்வாமிபார்ஶ்வத꞉ ।
இஹைவ ஸீதாமந்விஷ்ய ப்ரவ்ருத்திமுபலப்⁴ய வா ।
நோ சேத்³க³ச்சா²ம தம் வீரம் க³மிஷ்யாமோ யமக்ஷயம் ॥ 36 ॥

ப்லவங்க³மாநாம் து ப⁴யார்தி³தாநாம்
ஶ்ருத்வா வசஸ்தார இத³ம் ப³பா⁴ஷே ।
அலம் விஷாதே³ந பி³லம் ப்ரவிஶ்ய
வஸாம ஸர்வே யதி³ ரோசதே வ꞉ ॥ 37 ॥

இத³ம் ஹி மாயாவிஹிதம் ஸுது³ர்க³மம்
ப்ரபூ⁴தவ்ருக்ஷோத³கபோ⁴ஜ்யபேயகம் ।
இஹாஸ்தி நோ நைவ ப⁴யம் புரந்த³ரா-
-ந்ந ராக⁴வாத்³வாநரராஜதோ(அ)பி வா ॥ 38 ॥

ஶ்ருத்வாங்க³த³ஸ்யாபி வசோ(அ)நுகூல-
-மூசுஶ்ச ஸர்வே ஹரய꞉ ப்ரதீதா꞉ ।
யதா² ந ஹிம்ஸ்யேம ததா² விதா⁴ந-
-மஸக்தமத்³யைவ விதீ⁴யதாம் ந꞉ ॥ 39 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே கிஷ்கிந்தா⁴காண்டே³ த்ரிபஞ்சாஶ꞉ ஸர்க³꞉ ॥ 53 ॥

---

ஸம்பூர்ண வால்மீகி ராமாயணே கிஷ்கிந்த⁴காண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.