Dashavatara Stotram 2 – த³ஶாவதார ஸ்தோத்ரம் – 2 (ஶங்கராசார்ய க்ருதம்)

சலல்லோலகல்லோலகல்லோலிநீஶ-
-ஸ்பு²ரந்நக்ரசக்ராதிவக்ராம்பு³லீந꞉ ।
ஹதோ யேந மீநாவதாரேண ஶங்க²꞉
ஸ பாயாத³பாயாஜ்ஜக³த்³வாஸுதே³வ꞉ ॥ 1 ॥

த⁴ராநிர்ஜராராதிபா⁴ராத³பாரா-
-த³கூபாரநீராதுராத⁴꞉ பதந்தீ ।
த்⁴ருதா கூர்மரூபேண ப்ருஷ்டோ²பரிஷ்டே
ஸதே³வோ முதே³ வோ(அ)ஸ்து ஶேஷாங்க³ஶாயீ ॥ 2 ॥

உத்³ரக்³ரே ரதா³க்³ரே ஸகோ³த்ராபி கோ³த்ரா
ஸ்தி²தா தஸ்து²ஷ꞉ கேதகாக்³ரே ஷட³ங்க்⁴ரே꞉ ।
தநோதி ஶ்ரியம் ஸஶ்ரியம் நஸ்தநோது
ப்ரபு⁴꞉ ஶ்ரீவராஹாவதாரோ முராரி꞉ ॥ 3 ॥

உரோதா³ர ஆரம்ப⁴ஸம்ரம்பி⁴ணோ(அ)ஸௌ
ரமாஸம்ப்⁴ரமாப⁴ங்கு³ராக்³ரைர்நகா²க்³ரை꞉ ।
ஸ்வப⁴க்தாதிப⁴க்த்யா(அ)பி⁴வ்யக்தேந தா³ரு-
-ண்யகௌ⁴க⁴ம் ஸதா³ வ꞉ ஸ ஹிம்ஸ்யாந்ந்ருஸிம்ஹ꞉ ॥ 4 ॥

ச²லாதா³கலய்ய த்ரிலோகீம் ப³லீயாந்
ப³லிம் ஸம்ப³வந்த⁴ த்ரிலோகீப³லீய꞉ ।
தநுத்வம் த³தா⁴நாம் தநும் ஸந்த³தா⁴நோ
விமோஹம் மநோ வாமநோ வ꞉ ஸ குர்யாத் ॥ 5 ॥

ஹதக்ஷத்ரியாஸ்ருக் ப்ரபாநப்ரமத்த-
-ப்ரந்ருத்யத்பிஶாசப்ரகீ³தப்ரதாப꞉ ।
த⁴ராகாரி யேநாக்³ரஜந்மாக்³ரஹாரம்
விஹாரம் க்ரியாந்மாநஸே வ꞉ ஸ ராம꞉ ॥ 6 ॥

நதக்³ரீவஸுக்³ரீவஸாம்ராஜ்யஹேது-
-ர்த³ஶக்³ரீவஸந்தாநஸம்ஹாரகேது꞉ ।
த⁴நுர்யேந ப⁴க்³நம் மஹத்காமஹந்து꞉
ஸ மே ஜாநகீஜாநிரேநாம்ஸி ஹந்து ॥ 7 ॥

க⁴நாத்³கோ³த⁴நம் யேந கோ³வர்த⁴நேந
வ்யரக்ஷி ப்ரதாபேந கோ³வர்த⁴நேந ।
ஹதாராதிசக்ரீ ரணத்⁴வஸ்தசக்ரீ
பத³த்⁴வஸ்தசக்ரீ ஸ ந꞉ பாது சக்ரீ ॥ 8 ॥

த⁴ராப³த்³த⁴பத்³மாஸநஸ்தா²ங்க்⁴ரியஷ்டி-
-ர்நியம்யாநிலம் ந்யஸ்தநாஸாக்³ரத்³ருஷ்டி꞉ ।
ய ஆஸ்தே கலௌ யோகி³நாம் சக்ரவர்தீ
ஸ பு³த்³த⁴꞉ ப்ரபு³த்³தோ⁴(அ)ஸ்து நிஶ்சிந்தவர்தீ ॥ 9 ॥

து³ராபாரஸம்ஸாரஸம்ஹாரகாரீ
ப⁴வத்யஶ்வவார꞉ க்ருபாணப்ரஹாரீ ।
முராரிர்த³ஶாகாரதா⁴ரீஹ கல்கீ
கரோது த்³விஷாம் த்⁴வம்ஸநம் வ꞉ ஸ கல்கீ ॥ 10 ॥

இதி ஶ்ரீமச்ச²ங்கராசார்ய க்ருதம் த³ஶாவதார ஸ்தோத்ரம் ॥

Did you see any mistake/variation in the content above? Click here to report mistakes and corrections in Stotranidhi content.