Read in తెలుగు / ಕನ್ನಡ / தமிழ் / देवनागरी / English (IAST)
|| రావణనిశ్చయకథనమ్ ||
అథ తాం జాతసంతాపాం తేన వాక్యేన మోహితామ్ |
సరమా హ్లాదయామాస పృథివీం ద్యౌరివాంభసా || ౧ ||
తతస్తస్యా హితం సఖ్యాశ్చికీర్షంతీ సఖీవచః |
ఉవాచ కాలే కాలజ్ఞా స్మితపూర్వాభిభాషిణీ || ౨ ||
ఉత్సహేయమహం గత్వా త్వద్వాక్యమసితేక్షణే |
నివేద్య కుశలం రామే ప్రతిచ్ఛన్నా నివర్తితుమ్ || ౩ ||
న హి మే క్రమమాణాయా నిరాలంబే విహాయసి |
సమర్థో గతిమన్వేతుం పవనో గరుడోఽపి వా || ౪ ||
ఏవం బ్రువాణాం తాం సీతా సరమాం పునరబ్రవీత్ |
మధురం శ్లక్ష్ణయా వాచా పూర్వం శోకాభిపన్నయా || ౫ ||
సమర్థా గగనం గంతుమపి వా త్వం రసాతలమ్ |
అవగచ్ఛామ్యకర్తవ్యం కర్తవ్యం తే మదంతరే || ౬ ||
మత్ప్రియం యది కర్తవ్యం యది బుద్ధిః స్థిరా తవ |
జ్ఞాతుమిచ్ఛామి తం గత్వా కిం కరోతీతి రావణః || ౭ ||
స హి మాయాబలః క్రూరో రావణః శత్రురావణః |
మాం మోహయతి దుష్టాత్మా పీతమాత్రేవ వారుణీ || ౮ ||
తర్జాపయతి మాం నిత్యం భర్త్సాపయతి చాసకృత్ |
రాక్షసీభిః సుఘోరాభిర్యా మాం రక్షంతి నిత్యశః || ౯ ||
ఉద్విగ్నా శంకితా చాస్మి న స్వస్థం చ మనో మమ |
తద్భయాచ్చాహముద్విగ్నా అశోకవనికాం గతా || ౧౦ ||
యది నామ కథా తస్య నిశ్చితం వాఽపి యద్భవేత్ |
నివేదయేథాః సర్వం తత్పరో మే స్యాదనుగ్రహః || ౧౧ ||
సా త్వేవం బ్రువతీం సీతాం సరమా వల్గుభాషిణీ |
ఉవాచ వదనం తస్యాః స్పృశంతీ బాష్పవిక్లవమ్ || ౧౨ ||
ఏష తే యద్యభిప్రాయస్తదా గచ్ఛామి జానకి |
గృహ్య శత్రోరభిప్రాయముపావృత్తాం చ పశ్య మామ్ || ౧౩ ||
ఏవముక్త్వా తతో గత్వా సమీపం తస్య రక్షసః |
శుశ్రావ కథితం తస్య రావణస్య సమంత్రిణః || ౧౪ ||
సా శ్రుత్వా నిశ్చయం తస్య నిశ్చయజ్ఞా దురాత్మనః |
పునరేవాగమత్ క్షిప్రమశోకవనికాం తదా || ౧౫ ||
సా ప్రవిష్టా పునస్తత్ర దదర్శ జనకాత్మజామ్ |
ప్రతీక్షమాణాం స్వామేవ భ్రష్టపద్మామివ శ్రియమ్ || ౧౬ ||
తాం తు సీతా పునః ప్రాప్తాం సరమాం వల్గుభాషిణీమ్ |
పరిష్వజ్య చ సుస్నిగ్ధం దదౌ చ స్వయమాసనమ్ || ౧౭ ||
ఇహాసీనా సుఖం సర్వమాఖ్యాహి మమ తత్త్వతః |
క్రూరస్య నిశ్చయం తస్య రావణస్య దురాత్మనః || ౧౮ ||
ఏవముక్తా తు సరమా సీతయా వేపమానయా |
కథితం సర్వమాచష్ట రావణస్య సమంత్రిణః || ౧౯ ||
జనన్యా రాక్షసేంద్రో వై త్వన్మోక్షార్థం బృహద్వచః |
అవిద్ధేన చ వైదేహి మంత్రివృద్ధేన బోధితః || ౨౦ ||
దీయతామభిసత్కృత్య మనుజేంద్రాయ మైథిలీ |
నిదర్శనం తే పర్యాప్తం జనస్థానే యదద్భుతమ్ || ౨౧ ||
లంఘనం చ సముద్రస్య దర్శనం చ హనూమతః |
వధం చ రక్షసాం యుద్ధే కః కుర్యాన్మానుషో భువి || ౨౨ ||
ఏవం స మంత్రివృద్ధైశ్చావిద్ధేన బహు భాషితః |
న త్వాముత్సహతే మోక్తుమర్థమర్థపరో యథా || ౨౩ ||
నోత్సహత్యమృతో మోక్తుం యుద్ధే త్వామితి మైథిలి |
సామాత్యస్య నృశంసస్య నిశ్చయో హ్యేష వర్తతే || ౨౪ ||
తదేషా నిశ్చితా బుద్ధిర్మృత్యులోభాదుపస్థితా |
భయాన్న శక్తస్త్వాం మోక్తుమనిరస్తస్తు సంయుగే || ౨౫ ||
రాక్షసానాం చ సర్వేషామాత్మనశ్చ వధేన హి |
నిహత్య రావణం సంఖ్యే సర్వథా నిశితైః శరైః || ౨౬ ||
ప్రతినేష్యతి రామస్త్వామయోధ్యామసితేక్షణే |
ఏతస్మిన్నంతరే శబ్దో భేరీశంఖసమాకులః |
శ్రుతో వానరసైన్యానాం కంపయన్ధరణీతలమ్ || ౨౭ ||
శ్రుత్వా తు తద్వానరసైన్యశబ్దం
లంకాగతా రాక్షసరాజభృత్యాః |
నష్టౌజసో దైన్యపరీతచేష్టాః
శ్రేయో న పశ్యంతి నృపస్య దోషైః || ౨౮ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే చతుస్త్రింశః సర్గః || ౩౪ ||
యుద్ధకాండ పంచత్రింశః సర్గః (౩౫) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.