Read in తెలుగు / ಕನ್ನಡ / தமிழ் / देवनागरी / English (IAST)
|| సరమాసమాశ్వాసనమ్ ||
సీతాం తు మోహితాం దృష్ట్వా సరమా నామ రాక్షసీ |
ఆససాదాథ వైదేహీం ప్రియాం ప్రణయినీ సఖీమ్ || ౧ ||
మోహితాం రాక్షసేంద్రేణ సీతాం పరమదుఃఖితామ్ |
ఆశ్వాసయామాస తదా సరమా మృదుభాషిణీ || ౨ ||
సా హి తత్ర కృతా మిత్రం సీతయా రక్ష్యమాణయా |
రక్షంతీ రావణాదిష్టా సానుక్రోశా దృఢవ్రతా || ౩ ||
సా దదర్శ తతః సీతాం సరమా నష్టచేతనామ్ |
ఉపావృత్యోత్థితాం ధ్వస్తాం వడవామివ పాంసులామ్ || ౪ ||
తాం సమాశ్వాసయామాస సఖీస్నేహేన సువ్రతా |
సమాశ్వసిహి వైదేహి మాభూత్తే మనసో వ్యథా || ౫ ||
ఉక్తా యద్రావణేన త్వం ప్రత్యుక్తం చ స్వయం త్వయా |
సఖీస్నేహేన తద్భీరు మయా సర్వం ప్రతిశ్రుతమ్ || ౬ ||
లీనయా గగనే శూన్యే భయముత్సృజ్య రావణాత్ |
తవ హేతోర్విశాలాక్షి న హి మే జీవితం ప్రియమ్ || ౭ ||
స సంభ్రాంతశ్చ నిష్క్రాంతో యత్కృతే రాక్షసాధిపః |
తచ్చ మే విదితం సర్వమభినిష్క్రమ్య మైథిలి || ౮ ||
న శక్యం సౌప్తికం కర్తుం రామస్య విదితాత్మనః |
వధశ్చ పురుషవ్యాఘ్రే తస్మిన్నైవోపపద్యతే || ౯ ||
న త్వేవ వానరా హంతుం శక్యాః పాదపయోధినః |
సురా దేవర్షభేణేవ రామేణ హి సురక్షితాః || ౧౦ ||
దీర్ఘవృత్తభుజః శ్రీమాన్మహోరస్కః ప్రతాపవాన్ |
ధన్వీ సంహననోపేతో ధర్మాత్మా భువి విశ్రుతః || ౧౧ ||
విక్రాంతో రక్షితా నిత్యమాత్మనశ్చ పరస్య చ |
లక్ష్మణేన సహ భ్రాత్రా కుశలీ నయశాస్త్రవిత్ || ౧౨ || [కులీనో]
హంతా పరబలౌఘానామచింత్యబలపౌరుషః |
న హతో రాఘవః శ్రీమాన్ సీతే శత్రునిబర్హణః || ౧౩ ||
అయుక్తబుద్ధికృత్యేన సర్వభూతవిరోధినా |
ఇయం ప్రయుక్తా రౌద్రేణ మాయా మాయావిదా త్వయి || ౧౪ ||
శోకస్తే విగతః సర్వః కల్యాణం త్వాముపస్థితమ్ |
ధ్రువం త్వాం భజతే లక్ష్మీః ప్రియం ప్రీతికరం శృణు || ౧౫ ||
ఉత్తీర్య సాగరం రామః సహ వానరసేనయా |
సన్నివిష్టః సముద్రస్య తీరమాసాద్య దక్షిణమ్ || ౧౬ ||
దృష్టో మే పరిపూర్ణార్థః కాకుత్స్థః సహలక్ష్మణః |
స హి తైః సాగరాంతస్థైర్బలైస్తిష్ఠతి రక్షితః || ౧౭ ||
అనేన ప్రేషితా యే చ రాక్షసా లఘువిక్రమాః |
రాఘవస్తీర్ణ ఇత్యేవ ప్రవృత్తిస్తైరిహాహృతా || ౧౮ ||
స తాం శ్రుత్వా విశాలాక్షి ప్రవృత్తిం రాక్షసాధిపః |
ఏష మంత్రయతే సర్వైః సచివైః సహ రావణః || ౧౯ ||
ఇతి బ్రువాణా సరమా రాక్షసీ సీతయా సహ |
సర్వోద్యోగేన సైన్యానాం శబ్దం శుశ్రావ భైరవమ్ || ౨౦ ||
దండనిర్ఘాతవాదిన్యాః శ్రుత్వా భేర్యా మహాస్వనమ్ |
ఉవాచ సరమా సీతామిదం మధురభాషిణీ || ౨౧ ||
సన్నాహజననీ హ్యేషా భైరవా భీరు భేరికా |
భేరీనాదం చ గంభీరం శృణు తోయదనిఃస్వనమ్ || ౨౨ ||
కల్ప్యంతే మత్తమాతంగా యుజ్యంతే రథవాజినః |
హృష్యంతే తురగారూఢాః ప్రాసహస్తాః సహస్రశః || ౨౩ ||
తత్ర తత్ర చ సన్నద్ధాః సంపతంతి పదాతయః |
ఆపూర్యంతే రాజమార్గాః సైన్యైరద్భుతదర్శనైః || ౨౪ ||
వేగవద్భిర్నదద్భిశ్చ తోయౌఘైరివ సాగరః |
శస్త్రాణాం చ ప్రసన్నానాం చర్మణాం వర్మణాం తథా || ౨౫ ||
రథవాజిగజానాం చ భూషితానాం చ రక్షసామ్ |
ప్రభాం విసృజతాం పశ్య నానావర్ణాం సముత్థితామ్ || ౨౬ ||
వనం నిర్దహతో ఘర్మే యథా రూపం విభావసోః |
ఘంటానాం శృణు నిర్ఘోషం రథానాం శృణు నిఃస్వనమ్ || ౨౭ ||
హయానాం హేషమాణానాం శృణు తూర్యధ్వనిం యథా |
ఉద్యతాయుధహస్తానాం రాక్షసేంద్రానుయాయినామ్ || ౨౮ ||
సంభ్రమో రక్షసామేష తుములో రోమహర్షణః |
శ్రీస్త్వాం భజతి శోకఘ్నీ రక్షసాం భయమాగతమ్ || ౨౯ ||
రామః కమలపత్రాక్షోఽదైత్యానామివ వాసవః |
వినిర్జిత్య జితక్రోధస్త్వామచింత్యపరాక్రమః || ౩౦ ||
రావణం సమరే హత్వా భర్తా త్వాధిగమిష్యతి |
విక్రమిష్యతి రక్షఃసు భర్తా తే సహలక్ష్మణః || ౩౧ ||
యథా శత్రుషు శత్రుఘ్నో విష్ణునా సహ వాసవః |
ఆగతస్య హి రామస్య క్షిప్రమంకగతాం సతీమ్ || ౩౨ ||
అహం ద్రక్ష్యామి సిద్ధార్థాం త్వాం శత్రౌ వినిపాతితే |
అశ్రూణ్యానందజాని త్వం వర్తయిష్యసి శోభనే || ౩౩ ||
సమాగమ్య పరిష్వజ్య తస్యోరసి మహోరసః |
అచిరాన్మోక్ష్యతే సీతే దేవి తే జఘనం గతామ్ || ౩౪ ||
ధృతామేతాం బహూన్మాసాన్వేణీం రామో మహాబలః |
తస్య దృష్ట్వా ముఖం దేవి పూర్ణచంద్రమివోదితమ్ || ౩౫ ||
మోక్ష్యసే శోకజం వారి నిర్మోకమివ పన్నగీ |
రావణం సమరే హత్వా న చిరాదేవ మైథిలి || ౩౬ ||
త్వయా సమగ్రః ప్రియయా సుఖార్హో లప్స్యతే సుఖమ్ |
సమాగతా త్వం వీర్యేణ మోదిష్యసి మహాత్మనా |
సువర్షేణ సమాయుక్తా యథా సస్యేన మేదినీ || ౩౭ ||
గిరివరమభితోఽనువర్తమానో
హయ ఇవ మండలమాశు యః కరోతి |
తమిహ శరణమభ్యుపేహి దేవం
దివసకరం ప్రభవో హ్యయం ప్రజానామ్ || ౩౮ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే త్రయస్త్రింశః సర్గః || ౩౩ ||
యుద్ధకాండ చతుస్త్రింశః సర్గః (౩౪) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.