Read in తెలుగు / ಕನ್ನಡ / தமிழ் / देवनागरी / English (IAST)
|| కుంభకర్ణమతిః ||
స తాం పరిషదం కృత్స్నాం సమీక్ష్య సమితింజయః |
ప్రచోదయామాస తదా ప్రహస్తం వాహినీపతిమ్ || ౧ ||
సేనాపతే యథా తే స్యుః కృతవిద్యాశ్చతుర్విధాః |
యోధా నగరరక్షాయాం తథా వ్యాదేష్టుమర్హసి || ౨ ||
స ప్రహస్తః ప్రణీతాత్మా చికీర్షన్ రాజశాసనమ్ |
వినిక్షిపద్బలం సర్వం బహిరంతశ్చ మందిరే || ౩ ||
తతో వినిక్షిప్య బలం పృథఙ్నగరగుప్తయే |
ప్రహస్తః ప్రముఖే రాజ్ఞో నిషసాద జగాద చ || ౪ ||
నిహితం బహిరంతశ్చ బలం బలవతస్తవ |
కురుష్వావిమనాః క్షిప్రం యదభిప్రేతమస్తి తే || ౫ ||
ప్రహస్తస్య వచః శ్రుత్వా రాజా రాజ్యహితే రతః |
సుఖేప్సుః సుహృదాం మధ్యే వ్యాజహార స రావణః || ౬ ||
ప్రియాప్రియే సుఖం దుఃఖం లాభాలాభౌ హితాహితే |
ధర్మకామార్థకృచ్ఛ్రేషు యూయమార్హథ వేదితుమ్ || ౭ ||
సర్వకృత్యాని యుష్మాభిః సమారబ్ధాని సర్వదా |
మంత్రకర్మనియుక్తాని న జాతు విఫలాని మే || ౮ ||
ససోమగ్రహనక్షత్రైర్మరుద్భిరివ వాసవః |
భవద్భిరహమత్యర్థం వృతః శ్రియమవాప్నుయామ్ || ౯ ||
అహం తు ఖలు సర్వాన్వః సమర్థయితుముద్యతః |
కుంభకర్ణస్య తు స్వప్నాన్నేమమర్థమచోదయమ్ || ౧౦ ||
అయం హి సుప్తః షణ్మాసాన్కుంభకర్ణో మహాబలః |
సర్వశస్త్రభృతాం ముఖ్యః స ఇదానీం సముత్థితః || ౧౧ ||
ఇయం చ దండకారణ్యాద్రామస్య మహిషీ ప్రియా |
రక్షోభిశ్చరితాద్దేశాదానీతా జనకాత్మజా || ౧౨ ||
సా మే న శయ్యామారోఢుమిచ్ఛత్యలసగామినీ |
త్రిషు లోకేషు చాన్యా మే న సీతాసదృశీ మతా || ౧౩ ||
తనుమధ్యా పృథుశ్రోణీ శారదేందునిభాననా |
హేమబింబనిభా సౌమ్యా మాయేవ మయనిర్మితా || ౧౪ ||
సులోహితతలౌ శ్లక్ష్ణౌ చరణౌ సుప్రతిష్ఠితౌ |
దృష్ట్వా తామ్రనఖౌ తస్యా దీప్యతే మే శరీరజః || ౧౫ ||
హుతాగ్నేరర్చిసంకాశామేనాం సౌరీమివ ప్రభామ్ |
దృష్వా సీతాం విశాలాక్షీం కామస్య వశమేయివాన్ || ౧౬ ||
ఉన్నసం వదనం వల్గు విపులం చారులోచనమ్ |
పశ్యంస్తదాఽవశస్తస్యాః కామస్య వశమేయివాన్ || ౧౭ ||
క్రోధహర్షసమానేన దుర్వర్ణకరణేన చ |
శోకసంతాపనిత్యేన కామేన కలుషీకృతః || ౧౮ ||
సా తు సంవత్సరం కాలం మామయాచత భామినీ |
ప్రతీక్షమాణా భర్తారం రామమాయతలోచనా || ౧౯ ||
తన్మయా చారునేత్రాయాః ప్రతిజ్ఞాతం వచః శుభమ్ |
శ్రాంతోఽహం సతతం కామాద్యాతో హయ ఇవాధ్వని || ౨౦ ||
కథం సాగరమక్షోభ్యం ఉత్తరంతి వనౌకసః | [తరిష్యంతి]
బహుసత్త్వసమాకీర్ణం తౌ వా దశరథాత్మజౌ || ౨౧ || [ఝషా]
అథవా కపినైకేన కృతం నః కదనం మహత్ |
దుర్జ్ఞేయాః కార్యగతయో బ్రూత యస్య యథామతి || ౨౨ ||
మానుషాన్మే భయం నాస్తి తథాపి తు విమృశ్యతామ్ |
తదా దేవాసురే యుద్ధే యుష్మాభిః సహితోఽజయమ్ || ౨౩ ||
తే మే భవంతశ్చ తథా సుగ్రీవప్రముఖాన్ హరీన్ |
పరే పారే సముద్రస్య పురస్కృత్య నృపాత్మజౌ || ౨౪ ||
సీతాయాః పదవీం ప్రాప్తౌ సంప్రాప్తౌ వరుణాలయమ్ |
అదేయా చ యథా సీతా వధ్యౌ దశరథాత్మజౌ || ౨౫ ||
భవద్భిర్మంత్ర్యతాం మంత్రః సునీతిశ్చాభిధీయతామ్ |
న హి శక్తిం ప్రపశ్యామి జగత్యన్యస్య కస్యచిత్ || ౨౬ ||
సాగరం వానరైస్తీర్త్వా నిశ్చయేన జయో మమ |
తస్య కామపరీతస్య నిశమ్య పరిదేవితమ్ |
కుంభకర్ణః ప్రచుక్రోధ వచనం చేదమబ్రవీత్ || ౨౭ ||
యదా తు రామస్య సలక్ష్మణస్య
ప్రసహ్య సీతా ఖలు సా ఇహాహృతా |
సకృత్సమీక్ష్యైవ సునిశ్చితం తదా
భజేత చిత్తం యమునేవ యామునమ్ || ౨౮ ||
సర్వమేతన్మహారాజ కృతమప్రతిమం తవ |
విధీయేత సహాస్మాభిరాదావేవాస్య కర్మణః || ౨౯ ||
న్యాయేన రాజకార్యాణి యః కరోతి దశానన |
న స సంతప్యతే పశ్చాన్నిశ్చితార్థమతిర్నృపః || ౩౦ ||
అనుపాయేన కర్మాణి విపరీతాని యాని చ |
క్రియమాణాని దుష్యంతి హవీంష్యప్రయతేష్వివ || ౩౧ ||
యః పశ్చాత్పూర్వకార్యాణి కర్మాణ్యభిచికీర్షతి |
పూర్వం చాపరకార్యాణి న స వేద నయానయౌ || ౩౨ ||
చపలస్య తు కృత్యేషు ప్రసమీక్ష్యాధికం బలమ్ |
క్షిప్రమన్యే ప్రపద్యంతే క్రౌంచస్య ఖమివ ద్విజాః || ౩౩ ||
త్వయేదం మహదారబ్ధం కార్యమప్రతిచింతితమ్ |
దిష్ట్యా త్వాం నావధీద్రామో విషమిశ్రమివామిషమ్ || ౩౪ ||
తస్మాత్త్వయా సమారబ్ధం కర్మ హ్యప్రతిమం పరైః |
అహం సమీకరిష్యామి హత్వా శత్రూంస్తవానఘ || ౩౫ ||
[* అహముత్సాదయిష్యామి శత్రూంస్తవ విశాంపతే | *]
యది శక్రవివస్వంతౌ యది పావకమారుతౌ |
తావహం యోధయిష్యామి కుబేరవరుణావపి || ౩౬ ||
గిరిమాత్రశరీరస్య మహాపరిఘయోధినః |
నర్దతస్తీక్ష్ణదంష్ట్రస్య బిభియాద్వై పురందరః || ౩౭ ||
పునర్మాం స ద్వితీయేన శరేణ నిహనిష్యతి |
తతోఽహం తస్య పాస్యామి రుధిరం కామమాశ్వస || ౩౮ ||
వధేన వై దాశరథేః సుఖావహం
జయం తవాహర్తుమహం యతిష్యే |
హత్వా చ రామం సహ లక్ష్మణేన
ఖాదామి సర్వాన్ హరియూథముఖ్యాన్ || ౩౯ ||
రమస్వ కామం పిబ చాగ్ర్యవారుణీం
కురుష్వ కార్యాణి హితాని విజ్వరః |
మయా తు రామే గమితే యమక్షయం
చిరాయ సీతా వశగా భవిష్యతి || ౪౦ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే ద్వాదశః సర్గః || ౧౨ ||
యుద్ధకాండ త్రయోదశః సర్గః (౧౩) >>
సంపూర్ణ శ్రీవాల్మీకి రామాయణ యుద్ధకాండ చూడండి
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.