Read in తెలుగు / ಕನ್ನಡ / தமிழ் / देवनागरी / English (IAST)
|| రాక్షసీపరివారః ||
తతః కుముదషండాభో నిర్మలో నిర్మలం స్వయమ్ |
ప్రజగామ నభశ్చంద్రో హంసో నీలమివోదకమ్ || ౧ ||
సాచివ్యమివ కుర్వన్స ప్రభయా నిర్మలప్రభః |
చంద్రమా రశ్మిభిః శీతైః సిషేవే పవనాత్మజమ్ || ౨ ||
స దదర్శ తతః సీతాం పూర్ణచంద్రనిభాననామ్ |
శోకభారైరివ న్యస్తాం భారైర్నావమివాంభసి || ౩ ||
దిదృక్షమాణో వైదేహీం హనుమాన్మారుతాత్మజః |
స దదర్శావిదూరస్థా రాక్షసీర్ఘోరదర్శనాః || ౪ ||
ఏకాక్షీమేకకర్ణాం చ కర్ణప్రావరణాం తథా |
అకర్ణాం శంకుకర్ణాం చ మస్తకోచ్ఛ్వాసనాసికామ్ || ౫ ||
అతికాయోత్తమాంగీం చ తనుదీర్ఘశిరోధరామ్ |
ధ్వస్తకేశీం తథాకేశీం కేశకంబలధారిణీమ్ || ౬ ||
లంబకర్ణలలాటాం చ లంబోదరపయోధరామ్ |
లంబోష్ఠీం చుబుకోష్ఠీం చ లంబాస్యాం లంబజానుకామ్ || ౭ ||
హ్రస్వ దీర్ఘాం తథా కుబ్జాం వికటాం వామనాం తథా |
కరాలాం భుగ్నవక్త్రాం చ పింగాక్షీం వికృతాననామ్ || ౮ ||
వికృతాః పింగలాః కాలీః క్రోధనాః కలహప్రియాః |
కాలాయసమహాశూలకూటముద్గరధారిణీః || ౯ ||
వరాహమృగశార్దూలమహిషాజశివాముఖీః |
గజోష్ట్రహయపాదీశ్చ నిఖాతశిరసోఽపరాః || ౧౦ ||
ఏకహస్తైకపాదాశ్చ ఖరకర్ణ్యశ్వకర్ణికాః |
గోకర్ణీర్హస్తికర్ణీశ్చ హరికర్ణీస్తథాపరాః || ౧౧ ||
అనాసా అతినాసాశ్చ తీర్యఙ్నాసా వినాసికాః |
గజనన్నిభనాసాశ్చ లలాటోచ్ఛ్వాసనాసికాః || ౧౨ ||
హస్తిపాదా మహాపాదా గోపాదాః పాదచూలికాః |
అతిమాత్రశిరోగ్రీవా అతిమాత్రకుచోదరీః || ౧౩ ||
అతిమాత్రాస్యనేత్రాశ్చ దీర్ఘజిహ్వానఖాస్తథా |
అజాముఖీర్హస్తిముఖీర్గోముఖీః సూకరీముఖీః || ౧౪ ||
హయోష్ట్రఖరవక్త్రాశ్చ రాక్షసీర్ఘోరదర్శనాః |
శూలముద్గరహస్తాశ్చ క్రోధనాః కలహప్రియాః || ౧౫ ||
కరాలా ధూమ్రకేశీశ్చ రాక్షసీర్వికృతాననాః |
పిబంతీః సతతం పానం సదా మాంససురాప్రియాః || ౧౬ ||
మాంసశోణితదిగ్ధాంగీర్మాంసశోణితభోజనాః |
తా దదర్శ కపిశ్రేష్ఠో రోమహర్షణదర్శనాః || ౧౭ ||
స్కంధవంతముపాసీనాః పరివార్య వనస్పతిమ్ |
తస్యాధస్తాచ్చ తాం దేవీం రాజపుత్రీమనిందితామ్ || ౧౮ ||
లక్షయామాస లక్ష్మీవాన్ హనుమాన్ జనకాత్మజామ్ |
నిష్ప్రభాం శోకసంతప్తాం మలసంకులమూర్ధజామ్ || ౧౯ ||
క్షీణపుణ్యాం చ్యుతాం భూమౌ తారాం నిపతితామివ |
చారిత్రవ్యపదేశాఢ్యాం భర్తృదర్శనదుర్గతామ్ || ౨౦ ||
భూషణైరుత్తమైర్హీనాం భర్తృవాత్సల్యభూషణామ్ |
రాక్షసాధిపసంరుద్ధాం బంధుభిశ్చ వినాకృతామ్ || ౨౧ ||
వియూథాం సింహసంరుద్ధాం బద్ధాం గజవధూమివ |
చంద్రరేఖాం పయోదాంతే శారదాభ్రైరివావృతామ్ || ౨౨ ||
క్లిష్టరూపామసంస్పర్శాదయుక్తామివ వల్లకీమ్ |
సీతాం భర్తృవశే యుక్తామయుక్తాం రాక్షసీవశే || ౨౩ ||
అశోకవనికామధ్యే శోకసాగరమాప్లుతామ్ |
తాభిః పరివృతాం తత్ర సగ్రహామివ రోహిణీమ్ || ౨౪ ||
దదర్శ హనుమాన్దేవీం లతామకుసుమామివ |
సా మలేన చ దిగ్ధాంగీ వపుషా చాప్యలంకృతా || ౨౫ ||
మృణాలీ పంకదిగ్ధేవ విభాతి న విభాతి చ |
మలినేన తు వస్త్రేణ పరిక్లిష్టేన భామినీమ్ || ౨౬ ||
సంవృతాం మృగశాబాక్షీం దదర్శ హనుమాన్కపిః |
తాం దేవీం దీనవదనామదీనాం భర్తృతేజసా || ౨౭ ||
రక్షితాం స్వేన శీలేన సీతామసితలోచనామ్ |
తాం దృష్ట్వా హనుమాన్ సీతాం మృగశాబనిభేక్షణామ్ || ౨౮ ||
మృగకన్యామివ త్రస్తాం వీక్షమాణాం సమంతతః |
దహంతీమివ నిఃశ్వాసైర్వృక్షాన్పల్లవధారిణః || ౨౯ ||
సంఘాతమివ శోకానాం దుఃఖస్యోర్మిమివోత్థితామ్ |
తాం క్షమాం సువిభక్తాంగీం వినాభరణశోభినీమ్ || ౩౦ ||
ప్రహర్షమతులం లేభే మారుతిః ప్రేక్ష్య మైథిలీమ్ |
హర్షజాని చ సోఽశ్రూణి తాం దృష్ట్వా మదిరేక్షణామ్ || ౩౧ ||
ముమోచ హనుమాంస్తత్ర నమశ్చక్రే చ రాఘవమ్ |
నమస్కృత్వా స రామాయ లక్ష్మణాయ చ వీర్యవాన్ |
సీతాదర్శనసంహృష్టో హనుమాన్ సంవృతోఽభవత్ || ౩౨ ||
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే సప్తదశః సర్గః || ౧౭ ||
సుందరకాండ – అష్టాదశః సర్గః( ౧౮) >>
సంపూర్ణ వాల్మీకి సుందరకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.