Bhu Suktam – bhū sūktam

Read in తెలుగు / ಕನ್ನಡ / தமிழ் / देवनागरी / English (IAST)

stōtranidhi → vēda sūktāni → bhū sūktam

(tai.saṃ.1-5-3-1)
bhūmi̍rbhū̱mnādyaurva̍ri̱ṇā’ntari̍kṣaṃ mahi̱tvā |
u̱pasthe̍ te devyadite̱’gnima̍nnā̱dama̱nnādyā̱yā”da̍dhe ||

ā’yaṅgauḥ pṛśñi̍rakramī̱dasa̍nanmā̱tara̱ṃ puna̍: |
pi̱tara̍ñca pra̱yanthsuva̍: ||

tri̱g̱ṃśaddhāma̱ virā̍jati̱ vākpa̍ta̱ṅgāya̍ śiśriye |
pratya̍sya vaha̱ dyubhi̍: ||

a̱sya prā̱ṇāda̍pāna̱tya̍ntaśca̍rati roca̱nā |
vya̍khyanmahi̱ṣaḥ suva̍: ||

yattvā̎ kru̱ddhaḥ pa̍ro̱ vapa̍ ma̱nyunā̱ yadava̍rtyā |
su̱kalpa̍magne̱ tattava̱ puna̱stvoddī̍payāmasi ||

yatte̍ ma̱nyupa̍roptasya pṛthi̱vī manu̍dadhva̱se |
ā̱di̱tyā viśve̱tadde̱vā vasa̍vaśca sa̱mābha̍ran ||

me̱dinī̍ de̱vī va̱sundha̍rā syā̱dvasu̍dhā de̱vī vā̱savī̎ |
bra̱hma̱va̱rca̱saḥ pi̍tṛ̱ṇāṃ śrotra̱ṃ cakṣu̱rmana̍: ||

de̱vī hi̍raṇyaga̱rbhiṇī̍ de̱vī pra̍sū̱varī̎ |
sada̍ne sa̱tyāya̍ne sīda ||

sa̱mu̱drava̍tī sāvi̱trī āno̍ de̱vī mahya̍ṅgī |
ma̱ho dhara̍ṇī ma̱ho’tya̍tiṣṭhat ||

śṛ̱ṅge śṛ̍ṅge ya̱jñe ya̍jñe vibhī̱ṣaṇī̎ |
indra̍patnī vyā̱pinī̱ sara̍sija i̱ha |

vā̱yu̱matī̍ jala̱śaya̍nī sva̱yaṃ dhā̱rājā̍ sa̱tyaṃvo̱ pari̍medinī |
so̱pari̍dhattaṅgāya |
vi̱ṣṇu̱pa̱tnīṃ ma̍hīṃ de̱vī̱ṃ mā̱dhavī̎ṃ mādhava̱priyām |
lakṣmī̎ṃ pri̱yasa̍khīṃ de̱vī̱ṃ na̱mā̱myacyu̍ta va̱llabhām ||

dha̱nu̱rdha̱rāyai̍ vi̱dmahe̍ sarvasi̱ddhyai ca̍ dhīmahi |
tanno̍ dharāḥ praco̱dayā̎t |

(tai.brā.3-1-2-6)
ma̱hīṃ de̱vīṃ viṣṇu̍patnīmajū̱ryām |
pra̱tīcī̍menāgṃ ha̱viṣā̍ yajāmaḥ ||

tre̱dhā viṣṇu̍rurugā̱yo vica̍krame |
ma̱hīṃ diva̍ṃ pṛthi̱vīma̱ntari̍kṣam ||

tacchro̱ṇaiti̱ śrava̍ i̱cchamā̍nā |
puṇya̱gg̱ śloka̱ṃ yaja̍mānāya kṛṇva̱tī ||

(e.kā.2-15)
syo̱nā pṛ̍thivi̱ bhavā̍nṛkṣa̱rā ni̱veśa̍nī |
yacchā̍ na̱: śarma̍ sa̱prathā̎: |

adi̍tirde̱vā ga̍ndha̱rvā ma̍nu̱ṣyā̎: pi̱taro su̍rā̱steṣāg̍ṃ sarvabhū̱tānā̎ṃ mā̱tā me̱dīnī̍ maha̱tā ma̱hī sā̍vi̱trī gā̍ya̱trī jaga̍tyu̱rvī pṛ̱thvī ba̍hu̱lā viśvā̍ bhū̱tā ka̍ta̱mā kā yā sā sa̱tyetya̱mṛteti̍ vasi̱ṣṭhaḥ ||

ikṣuśāliyavasasyaphalāḍhyaiḥ pārijāta taruśobhitamūle |
svarṇaratnamaṇimaṃṭapamadhye cintayetsakalalokadharitrīm ||

śyāmāṃ vicitrāṃ navaratnabhūṣitāṃ
caturbhujāṃ tuṃgapayodharānvitām |
indīvarākṣīṃ navaśālimaṃjarīṃ
śukaṃ dadhānāṃ śaraṇaṃ bhajāmahe ||

(ṛ.ve.10-71-2)
saktu̍miva̱ tita̍unā pu̱nanto̱ yatra̱ dhīrā̱ mana̍sā̱ vāca̱makra̍ta |
atrā̱ sakhā̎yaḥ sa̱khyāni̍ jānate bha̱draiṣā̎ṃ la̱kṣmīrni̍hi̱tādhi̍ vā̱ci ||

oṃ śānti̱: śānti̱: śānti̍: ||

---

See more vēda sūktāni for chanting.