Read in తెలుగు / ಕನ್ನಡ / தமிழ் / देवनागरी / English (IAST)
|| నికుంభిలాభియానమ్ ||
తస్య తద్వచనం శ్రుత్వా రాఘవః శోకకర్శితః |
నోపధారయతే వ్యక్తం యదుక్తం తేన రక్షసా || ౧ ||
తతో ధైర్యమవష్టభ్య రామః పరపురంజయః |
విభీషణముపాసీనమువాచ కపిసన్నిధౌ || ౨ ||
నైరృతాధిపతే వాక్యం యదుక్తం తే విభీషణ |
భూయస్తచ్ఛ్రోతుమిచ్ఛామి బ్రూహి యత్తే వివక్షితమ్ || ౩ ||
రాఘవస్య వచః శ్రుత్వా వాక్యం వాక్యవిశారదః |
యత్తత్పునరిదం వాక్యం బభాషే స విభీషణః || ౪ ||
యథాజ్ఞప్తం మహాబాహో త్వయా గుల్మనివేశనమ్ |
తత్తథాఽనుష్ఠితం వీర త్వద్వాక్యసమనంతరమ్ || ౫ ||
తాన్యనీకాని సర్వాణి విభక్తాని సమంతతః |
విన్యస్తా యూథపాశ్చైవ యథాన్యాయం విభాగశః || ౬ ||
భూయస్తు మమ విజ్ఞాప్యం తచ్ఛృణుష్వ మహాయశః |
త్వయ్యకారణసంతప్తే సంతప్తహృదయా వయమ్ || ౭ ||
త్యజ రాజన్నిమం శోకం మిథ్యా సంతాపమాగతమ్ |
తదియం త్యజ్యతాం చింతా శత్రుహర్షవివర్ధనీ || ౮ ||
ఉద్యమః క్రియతాం వీర హర్షః సముపసేవ్యతామ్ |
ప్రాప్తవ్యా యది తే సీతా హంతవ్యాశ్చ నిశాచరాః || ౯ ||
రఘునందన వక్ష్యామి శ్రూయతాం మే హితం వచః |
సాధ్వయం యాతు సౌమిత్రిర్బలేన మహతా వృతః || ౧౦ ||
నికుంభిలాయాం సంప్రాప్య హంతుం రావణిమాహవే |
ధనుర్మండలనిర్ముక్తైరాశీవిషవిషోపమైః || ౧౧ ||
శరైర్హంతుం మహేష్వాసో రావణిం సమితింజయః |
తేన వీర్యేణ తపసా వరదానాత్స్వయంభువః || ౧౨ ||
అస్త్రం బ్రహ్మశిరః ప్రాప్తం కామగాశ్చ తురంగమాః |
స ఏష సహ సైన్యేన ప్రాప్తః కిల నికుంభిలామ్ || ౧౩ ||
యద్యుత్తిష్ఠేత్కృతం కర్మ హతాన్సర్వాంశ్చ విద్ధి నః |
నికుంభిలామసంప్రాప్తమహుతాగ్నిం చ యో రిపుః || ౧౪ ||
త్వామాతతాయినం హన్యాదింద్రశత్రోః స తే వధః |
వరో దత్తో మహాబాహో సర్వలోకేశ్వరేణ వై || ౧౫ ||
ఇత్యేవం విహితో రాజన్ వధస్తస్యైష ధీమతః |
వధాయేంద్రజితో రామ సందిశస్వ మహాబల || ౧౬ ||
హతే తస్మిన్హతం విద్ధి రావణం ససుహృజ్జనమ్ |
విభీషణవచః శ్రుత్వా రాఘవో వాక్యమబ్రవీత్ || ౧౭ ||
జానామి తస్య రౌద్రస్య మాయాం సత్యపరాక్రమ |
స హి బ్రహ్మాస్త్రవిత్ప్రాజ్ఞో మహామాయో మహాబలః || ౧౮ ||
కరోత్యసంజ్ఞాన్సంగ్రామే దేవాన్సవరుణానపి |
తస్యాంతరిక్షే చరతో రథస్థస్య మహాయశః || ౧౯ ||
న గతిర్జ్ఞాయతే తస్య సూర్యస్యేవాభ్రసంప్లవే |
రాఘవస్తు రిపోర్జ్ఞాత్వా మాయావీర్యం దురాత్మనః || ౨౦ ||
లక్ష్మణం కీర్తిసంపన్నమిదం వచనమబ్రవీత్ |
యద్వానరేంద్రస్య బలం తేన సర్వేణ సంవృతః || ౨౧ ||
హనుమత్ప్రముఖైశ్చైవ యూథపైః సహ లక్ష్మణ |
జాంబవేనర్క్షపతినా సహసైన్యేన సంవృతః || ౨౨ ||
జహి తం రాక్షససుతం మాయాబలవిశారదమ్ |
అయం త్వాం సచివైః సార్ధం మహాత్మా రజనీచరః || ౨౩ ||
అభిజ్ఞస్తస్య దేశస్య పృష్ఠతోఽనుగమిష్యతి |
రాఘవస్య వచః శ్రుత్వా లక్ష్మణః సవిభీషణః || ౨౪ ||
జాగ్రాహ కార్ముకశ్రేష్ఠమత్యద్భుతపరాక్రమః |
సన్నద్ధః కవచీ ఖడ్గీ సశరో హేమచాపధృత్ || ౨౫ ||
రామపాదావుపస్పృశ్య హృష్టః సౌమిత్రిరబ్రవీత్ |
అద్య మత్కార్ముకోన్ముక్తాః శరా నిర్భిద్య రావణిమ్ || ౨౬ ||
లంకామభిపతిష్యంతి హంసాః పుష్కరిణీమివ |
అద్యైవ తస్య రౌద్రస్య శరీరం మామకాః శరాః || ౨౭ ||
విధమిష్యంతి భిత్త్వా తం మహాచాపగుణచ్యుతాః |
స ఏవముక్త్వా ద్యుతిమాన్వచనం భ్రాతురగ్రతః || ౨౮ ||
స రావణివధాకాంక్షీ లక్ష్మణస్త్వరితో యయౌ |
సోఽభివాద్య గురోః పాదౌ కృత్వా చాపి ప్రదక్షిణమ్ || ౨౯ ||
నికుంభిలామభియయౌ చైత్యం రావణిపాలితమ్ |
విభీషణేన సహితో రాజపుత్రః ప్రతాపవాన్ || ౩౦ ||
కృతస్వస్త్యయనో భ్రాత్రా లక్ష్మణస్త్వరితో యయౌ |
వానరాణాం సహస్రైస్తు హనుమాన్బహుభిర్వృతః || ౩౧ ||
విభీషణశ్చ సామాత్యస్తదా లక్ష్మణమన్వగాత్ |
మహతా హరిసైన్యేన సవేగమభిసంవృతః || ౩౨ ||
ఋక్షరాజబలం చైవ దదర్శ పథి విష్ఠితమ్ |
స గత్వా దూరమధ్వానం సౌమిత్రిర్మిత్రనందనః || ౩౩ ||
రాక్షసేంద్రబలం దూరాదపశ్యద్వ్యూహమాస్థితమ్ |
స తం ప్రాప్య ధనుష్పాణిర్మాయాయోగమరిందమః || ౩౪ ||
తస్థౌ బ్రహ్మవిధానేన విజేతుం రఘునందనః |
విభీషణేన సహితో రాజపుత్రః ప్రతాపవాన్ |
అంగదేన చ వీరేణ తథాఽనిలసుతేన చ || ౩౫ ||
వివిధమమలశస్త్రభాస్వరం త-
-ద్ధ్వజగహనం విపులం మహారథైశ్చ |
ప్రతిభయతమమప్రమేయవేగం
తిమిరమివ ద్విషతాం బలం వివేశ || ౩౬ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే పంచాశీతితమః సర్గః || ౮౫ ||
యుద్ధకాండ షడశీతితమః సర్గః (౮౬) >>
సంపూర్ణ శ్రీవాల్మీకి రామాయణ యుద్ధకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.