Read in తెలుగు / ಕನ್ನಡ / தமிழ் / देवनागरी / English (IAST)
భవాని త్వాం వందే భవమహిషి సచ్చిత్సుఖవపుః
పరాకారాం దేవీమమృతలహరీమైందవకళామ్ |
మహాకాలాతీతాం కలితసరణీకల్పితతనుం
సుధాసింధోరంతర్వసతిమనిశం వాసరమయీమ్ || ౧ ||
మనస్తత్త్వం జిత్వా నయనమథ నాసాగ్రఘటితం
పునర్వ్యావృత్తాక్షః స్వయమపి యదా పశ్యతి పరామ్ |
తదానీమేవాస్య స్ఫురతి బహిరంతర్భగవతీ
పరానందాకారా పరశివపరా కాచిదపరా || ౨ ||
మనోమార్గం జిత్వా మరుత ఇహ నాడీగణజుషో
నిరుధ్యార్కం సేందుం దహనమపి సంజ్వాల్య శిఖయా |
సుషుమ్ణాం సంయోజ్య శ్లథయతి చ షడ్గ్రంథిశశినం
తవాజ్ఞాచక్రస్థం విలయతి మహాయోగిసమయీ || ౩ ||
యదా తౌ చంద్రార్కౌ నిజసదనసంరోధనవశా-
-దశక్తౌ పీయూషస్రవణహరణే సా చ భుజగీ |
ప్రబుద్ధా క్షుత్క్రుద్ధా దశతి శశినం బైందవగతం
సుధాధారాసారైః స్నపయసి తనుం బైందవకలే || ౪ ||
పృథివ్యాపస్తేజః పవనగగనే తత్ప్రకృతయః
స్థితాస్తన్మాత్రాస్తా విషయదశకం మానసమితి |
తతో మాయా విద్యా తదను చ మహేశః శివ ఇతః
పరం తత్త్వాతీతం మిలితవపురిందోః పరకలా || ౫ ||
కుమారీ యన్మంద్రం ధ్వనతి చ తతో యోషిదపరా
కులం త్యక్త్వా రౌతి స్ఫుటతి చ మహాకాలభుజగీ |
తతః పాతివ్రత్యం భజతి దహరాకాశకమలే
సుఖాసీనా యోషా భవసి భవసీత్కారరసికా || ౬ ||
త్రికోణం తే కౌలాః కులగృహమితి ప్రాహురపరే
చతుష్కోణం ప్రాహుః సమయిన ఇమే బైందవమితి |
సుధాసింధౌ తస్మిన్ సురమణిగృహే సూర్యశశినో-
-రగమ్యే రశ్మీనాం సమయసహితే త్వం విహరసే || ౭ ||
త్రిఖండం తే చక్రం శుచిరవిశశాంకాత్మకతయా
మయూఖైః షట్త్రింశద్దశయుతతయా ఖండకలితైః |
పృథివ్యాదౌ తత్త్వే పృథగుదితవద్భిః పరివృతం
భవేన్మూలాధారాత్ప్రభృతి తవ షట్చక్రసదనమ్ || ౮ ||
శతం చాష్టౌ వహ్నేః శతమపి కళాః షోడశ రవేః
శతం షట్ చ త్రింశత్సితమయమయూఖాశ్చరణజాః |
య ఏతే షష్టిశ్చ త్రిశతమభవంస్త్వచ్చరణజా
మహాకౌలేస్తస్మాన్న హి తవ శివే కాలకలనా || ౯ ||
త్రికోణం చాధారం త్రిపురతను తేఽష్టారమనఘే
భవేత్ స్వాధిష్ఠానం పునరపి దశారం మణిపురమ్ |
దశారం తే సంవిత్కమలమథ మన్వశ్రకముమే
విశుద్ధం స్యాదాజ్ఞా శివ ఇతి తతో బైందవగృహమ్ || ౧౦ ||
త్రికోణే తే వృత్తత్రితయమిభకోణే వసుదళం
కళాశ్రం మిశ్రేరే భవతి భువనాశ్రే చ భువనమ్ |
చతుశ్చక్రం శైవం నివసతి భగే శాక్తికముమే
ప్రధానైక్యం షోఢా భవతి చ తయోః శక్తిశివయోః || ౧౧ ||
కళాయాం బింద్వైక్యం తదను చ తయోర్నాదవిభవే
తయోర్నాదేనైక్యం తదను చ కళాయామపి తయోః |
తయోర్బిందావైక్యం త్రితయవిభవైక్యం పరశివే
తదేవం షోఢైక్యం భవతి హి సపర్యా సమయినామ్ || ౧౨ ||
కళా నాదో బిందుః క్రమశ ఇహ వర్ణాశ్చ చరణం
షడబ్జం చాధారప్రభృతికమమీషాం చ మిలనమ్ |
తదేవం షోఢైక్యం భవతి ఖలు యేషాం సమయినాం
చతుర్ధైక్యం తేషాం భవతి హి సపర్యా సమయినామ్ || ౧౩ ||
తడిల్లేఖామధ్యే స్ఫురతి మణిపూరే భగవతీ
చతుర్ధైక్యం తేషాం భవతి చ చతుర్బాహురుదితా |
ధనుర్బాణానిక్షూద్భవకుసుమజానంకుశవరం
తథా పాశం బిభ్రత్యుదితరవిబింబాకృతిరుచిః || ౧౪ ||
భవత్యైక్యం షోఢా భవతి భగవత్యాః సమయినాం
మరుత్వత్కోదండద్యుతినియుతభాసా సమరుచిః |
భవత్పాణివ్రాతో దశవిధ ఇతీదం మణిపురే
భవాని ప్రత్యక్షం తవ వపురుపాస్తే న హి పరమ్ || ౧౫ ||
ఇత్యైక్యనిరూపణమ్ ||
భవాని శ్రీహస్తైర్వహసి ఫణిపాశం సృణిమథో
ధనుః పౌండ్రం పౌష్పం శరమథ జపస్రక్ఛుకవరౌ |
అథ ద్వాభ్యాం ముద్రామభయవరదానైకరసికాం
క్వణద్వీణాం ద్వాభ్యాం త్వమురసి కరాభ్యాం చ బిభృషే || ౧౬ ||
త్రికోణైరష్టారం త్రిభిరపి దశారం సముదభూ-
-ద్దశారం భూగేహాదపి చ భువనాశ్రం సమభవత్ |
తతోఽభూన్నాగారం నృపతిదళమస్మాత్ త్రివలయం
చతుర్ద్వాఃప్రాకారత్రితయమిదమేవాంబ శరణమ్ || ౧౭ ||
చతుఃషష్టిస్తంత్రాణ్యపి కులమతం నిందితమభూ-
-ద్యదేతన్మిశ్రాఖ్యం మతమపి భవేన్నిందితమిహ |
శుభాఖ్యాః పంచైతాః శ్రుతిసరణిసిద్ధాః ప్రకృతయో
మహావిద్యాస్తాసాం భవతి పరమార్థో భగవతీ || ౧౮ ||
స్మరో మారో మారః స్మర ఇతి పరో మారమదనః
స్మరానంగాశ్చేతి స్మరమదనమారాః స్మర ఇతి |
త్రిఖండః ఖండాంతే కలితభువనేశ్యక్షరయుత-
-శ్చతుః పంచార్ణాస్తే త్రయ ఇతి చ పంచాక్షరమనుః || ౧౯ ||
త్రిఖండే త్వన్మంత్రే శశిసవితృవహ్న్యాత్మకతయా
స్వరాశ్చంద్రే లీనాః సవితరి కళాః కాదయ ఇహ |
యకారాద్యా వహ్నావథ కషయుగం బైందవగృహే
నిలీనం సాదాఖ్యే శివయువతి నిత్యైందవకళే || ౨౦ ||
కకారాకారాభ్యాం స్వరగణమవష్టభ్య నిఖిలం
కళాప్రత్యాహారాత్ సకలమభవద్వ్యంజనగణః |
త్రిఖండే స్యాత్ ప్రత్యాహరణమిదమన్వక్కషయుగం
క్షకారశ్చాకాశేఽక్షరతనుతయా చాక్షరమితి || ౨౧ ||
విదేహేంద్రాపత్యం శ్రుత ఇహ ఋషిర్యస్య చ మనో-
-రయం చార్థః సమ్యక్ శ్రుతిశిరసి తైత్తిర్యకఋచి |
ఋషిం హిత్వా చాస్యా హృదయకమలే నైతమృషిమి-
-త్యృచాభ్యుక్తః పూజావిధిరిహ భవత్యాః సమయినామ్ || ౨౨ ||
త్రిఖండస్త్వన్మంత్రస్తవ చ సరఘాయాం నివిశతే
శ్రియో దేవ్యాః శేషో యత ఇహ సమస్తాః శశికళాః |
త్రిఖండే త్రైఖండ్యం నివసతి సమంత్రే చ సుభగే
షడబ్జారణ్యానీ త్రితయయుతఖండే నివసతి || ౨౩ ||
త్రయం చైతత్ స్వాంతే పరమశివపర్యంకనిలయే
పరే సాదాఖ్యేఽస్మిన్నివసతి చతుర్ధైక్యకలనాత్ |
స్వరాస్తే లీనాస్తే భగవతి కళాశ్రే చ సకలాః
కకారాద్యా వృత్తే తదను చతురశ్రే చ యముఖాః || ౨౪ ||
హలో బిందుర్వర్గాష్టకమిభదళం శాంభవవపు-
-శ్చతుశ్చక్రం శక్రస్థితమనుభయం శక్తిశివయోః |
నిశాద్యా దర్శాద్యాః శ్రుతినిగదితాః పంచదశధా
భవేయుర్నిత్యాస్తాస్తవ జనని మంత్రాక్షరగణాః || ౨౫ ||
ఇమాస్తాః షోడశ్యాస్తవ చ సరఘాయాం శశికళా-
-స్వరూపాయాం లీనా నివసతి తవ శ్రీశశికళా |
అయం ప్రత్యాహారః శ్రుత ఇహ కళావ్యంజనగణః
కకారేణాకారః స్వరగణమశేషం కథయతి || ౨౬ ||
క్షకారః పంచాశత్కళ ఇతి హలో బైందవగృహం
కకారాదూర్ధ్వం స్యాజ్జనని తవ నామాక్షరమితి |
భవేత్పూజాకాలే మణిఖచితభూషాభిరభితః
ప్రభాభిర్వ్యాలీఢం భవతి మణిపూరం సరసిజమ్ || ౨౭ ||
వదంత్యేకే వృద్ధా మణిరితి జలం తేన నిబిడం
పరే తు త్వద్రూపం మణిధనురితీదం సమయినః |
అనాహత్యా నాదః ప్రభవతి సుషుమ్ణాధ్వజనిత-
-స్తదా వాయోస్తత్ర ప్రభవ ఇదమాహుః సమయినః || ౨౮ ||
తదేతత్తే సంవిత్కమలమితి సంజ్ఞాంతరముమే
భవేత్సంవిత్పూజా భవతి కమలేఽస్మిన్ సమయినామ్ |
విశుద్ధ్యాఖ్యే చక్రే వియదుదితమాహుః సమయినః
సదాపూర్వో దేవః శివ ఇతి హిమానీసమతనుః || ౨౯ ||
త్వదీయైరుద్ద్యోతైర్భవతి చ విశుద్ధ్యాఖ్యసదనం
భవేత్పూజా దేవ్యా హిమకరకళాభిః సమయినామ్ |
సహస్రారే చక్రే నివసతి కళాపంచదశకం
తదేతన్నిత్యాఖ్యం భ్రమతి సితపక్షే సమయినామ్ || ౩౦ ||
అతః శుక్లే పక్షే ప్రతిదినమిహ త్వాం భగవతీం
నిశాయాం సేవంతే నిశి చరమభాగే సమయినః |
శుచిః స్వాధిష్ఠానే రవిరుపరి సంవిత్సరసిజే
శశీ చాజ్ఞాచక్రే హరిహరవిధిగ్రంథయ ఇమే || ౩౧ ||
కళాయాః షోడశ్యాః ప్రతిఫలితబింబేన సహితం
తదీయైః పీయూషైః పునరధికమాప్లావితతనుః |
సితే పక్షే సర్వాస్తిథయ ఇహ కృష్ణేఽపి చ సమా
యదా చామావాస్యా భవతి న హి పూజా సమయినామ్ || ౩౨ ||
ఇడాయాం పింగళ్యాం చరత ఇహ తౌ సూర్యశశినౌ
తమస్యాధారే తౌ యది తు మిళితౌ సా తిథిరమా |
తదాజ్ఞాచక్రస్థం శిశిరకరబింబే రవినిభం
దృఢవ్యాలీఢం సద్విగళితసుధాసారవిసరమ్ || ౩౩ ||
మహావ్యోమస్థేందోరమృతలహరీప్లావితతనుః
ప్రశుష్యద్వై నాడీప్రకరమనిశం ప్లావయతి తత్ |
యదాజ్ఞాయాం విద్యున్నియుతనియుతాభాక్షరమయీ
స్థితా విద్యుల్లేఖా భగవతి విధిగ్రంథిమభినత్ || ౩౪ ||
తతో గత్వా జ్యోత్స్నామయసమయలోకం సమయినాం
పరాఖ్యా సాదాఖ్యా జయతి శివతత్త్వేన మిళితా |
సహస్రారే పద్మే శిశిరమహసాం బింబమపరం
తదేవ శ్రీచక్రం సరఘమితి తద్బైందవమితి || ౩౫ ||
వదంత్యేకే సంతః పరశివపదే తత్త్వమిళితే
తతస్త్వం షడ్వింశీ భవసి శివయోర్మేళనవపుః |
త్రిఖండేఽస్మిన్ స్వాంతే పరమపదపర్యంకసదనే
పరే సాదాఖ్యేఽస్మిన్నివసతి చతుర్ధైక్యకలనాత్ || ౩౬ ||
క్షితౌ వహ్నిర్వహ్నౌ వసుదళజలే దిఙ్మరుతి దిక్-
-కళాశ్రే మన్వశ్రం దృశి వసురథో రాజకమలే |
ప్రతిద్వైతగ్రంథిస్తదుపరి చతుర్ద్వారసహితం
మహీచక్రం చైకం భవతి భగకోణైక్యకలనాత్ || ౩౭ ||
ఇతి మంత్రచక్రైక్యమ్ ||
షడబ్జారణ్యే త్వాం సమయిన ఇమే పంచకసమాం
యదా సంవిద్రూపాం విదధతి చ షోఢైక్యకలితామ్ |
మనో జిత్వా చాజ్ఞాసరసిజ ఇహ ప్రాదురభవత్
తడిల్లేఖా నిత్యా భగవతి తవాధారసదనాత్ || ౩౮ ||
భవత్సామ్యం కేచిత్ త్రితయమితి కౌళప్రభృతయః
పరం తత్త్వాఖ్యం చేత్యపరమిదమాహుః సమయినః |
క్రియావస్థారూపం ప్రకృతిరభిధాపంచకసమం
తదేషాం సామ్యం స్యాదవనిషు చ యో వేత్తి స మునిః || ౩౯ ||
ఇత్యైక్యనిరూపణమ్ ||
వశిన్యాద్యా అష్టావకచటతపాద్యాః ప్రకృతయః
స్వవర్గస్థాః స్వస్వాయుధకలితహస్తాః స్వవిషయాః |
యథావర్గం వర్ణప్రచురతనవో యాభిరభవం-
-స్తవ ప్రస్తారాస్తే త్రయ ఇతి జగుస్తే సమయినః || ౪౦ ||
ఇమా నిత్యా వర్ణాస్తవ చరణసమ్మేళనవశా-
-న్మహామేరుస్థాః స్యుర్మనుమిలనకైలాసవపుషః |
వశిన్యాద్యా ఏతా అపి తవ సబింద్వాత్మకతయా
మహీప్రస్తారోఽయం క్రమ ఇతి రహస్యం సమయినామ్ || ౪౧ ||
ఇతి ప్రస్తారత్రయనిరూపణమ్ ||
భవేన్మూలాధారం తదుపరితనం చక్రమపి త-
-ద్ద్వయం తామిస్రాఖ్యం శిఖికిరణసమ్మేళనవశాత్ |
తదేతత్కౌలానాం ప్రతిదినమనుష్ఠేయముదితం
భవత్యా వామాఖ్యం మతమపి పరిత్యాజ్యముభయమ్ || ౪౨ ||
అమీషాం కౌలానాం భగవతి భవేత్పూజనవిధి-
-స్తవ స్వాధిష్ఠానే తదను చ భవేన్మూలసదనే |
అతో బాహ్యా పూజా భవతి భగరూపేణ చ తతో
నిషిద్ధాచారోఽయం నిగమవిరహోఽనింద్యచరితే || ౪౩ ||
నవవ్యూహం కౌలప్రభృతికమతం తేన స విభు-
-ర్నవాత్మా దేవోఽయం జగదుదయకృద్భైరవవపుః |
నవాత్మా వామాదిప్రభృతిభిరిదం భైరవవపు-
-ర్మహాదేవీ తాభ్యాం జనకజననీమజ్జగదిదమ్ || ౪౪ ||
భవేదేతచ్చక్రద్వితయమతిదూరం సమయినాం
విసృజ్యైతద్యుగ్మం తదను మణిపూరాఖ్యసదనే |
త్వయా సృష్టైర్వారిప్రతిఫలితసూర్యేందుకిరణై-
-ర్ద్విధా లోకే పూజాం విదధతి భవత్యాః సమయినః || ౪౫ ||
అధిష్ఠానాధారద్వితయమిదమేవం దశదళం
సహస్రారాజ్జాతం మణిపురమతోఽభూద్దశదళమ్ |
హృదంభోజాన్మూలాన్నృపదలమభూత్ స్వాంతకమలం
తదేవైకో బిందుర్భవతి జగదుత్పత్తికృదయమ్ || ౪౬ ||
సహస్రారం బిందుర్భవతి చ తతో బైందవగృహం
తదేతస్మాజ్జాతం జగదిదమశేషం సకరణమ్ |
తతో మూలాధారాద్ద్వితయమభవత్ తద్దశదళం
సహస్రారాజ్జాతం తదితి దశధా బిందురభవత్ || ౪౭ ||
తదేతద్బిందోర్యద్దశకమభవత్తత్ప్రకృతికం
దశారం సూర్యారం నృపదళమభూత్ స్వాంతకమలమ్ |
రహస్యం కౌలానాం ద్వితయమభవన్మూలసదనం
తథాధిష్ఠానం చ ప్రకృతిమిహ సేవంత ఇహ తే || ౪౮ ||
అతస్తే కౌలాస్తే భగవతి దృఢప్రాకృతజనా
ఇతి ప్రాహుః ప్రాజ్ఞాః కులసమయమార్గద్వయవిదః |
మహాంతః సేవంతే సకలజననీం బైందవగృహే
శివాకారాం నిత్యామమృతఝరికామైందవకళామ్ || ౪౯ ||
ఇదం కాలోత్పత్తిస్థితిలయకరం పద్మనికరం
త్రిఖండం శ్రీచక్రం మనురపి చ తేషాం చ మిలనమ్ |
తదైక్యం షోఢా వా భవతి చ చతుర్ధేతి చ తథా
తయోః సామ్యం పంచప్రకృతికమిదం శాస్త్రముదితమ్ || ౫౦ ||
ఉపాస్తేరేతస్యాః ఫలమపి చ సర్వాధికమభూ-
-త్తదేతత్కౌలానాం ఫలమిహ హి చైతత్ సమయినామ్ |
సహస్రారే పద్మే సుభగసుభగోదేతి సుభగే
పరం సౌభాగ్యం యత్తదిహ తవ సాయుజ్యపదవీ || ౫౧ ||
అతోఽస్యాః సంసిద్ధౌ సుభగసుభగాఖ్యా గురుకృపా-
-కటాక్షవ్యాసంగాత్ స్రవదమృతనిష్యందసులభా |
తయా విద్ధో యోగీ విచరతి నిశాయామపి దివా
దివా భానూ రాత్రౌ విధురివ కృతార్థీకృతమతిః || ౫౨ ||
ఇతి పరమపూజ్య శ్రీగౌడపాదాచర్య విరచితా సుభగోదయ స్తుతిః ||
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.