Read in తెలుగు / ಕನ್ನಡ / தமிழ் / देवनागरी / English (IAST)
ಹಯಗ್ರೀವ ಉವಾಚ |
ಇತ್ಯೇತನ್ನಾಮಸಾಹಸ್ರಂ ಕಥಿತಂ ತೇ ಘಟೋದ್ಭವ |
ರಹಸ್ಯಾನಾಂ ರಹಸ್ಯಂ ಚ ಲಲಿತಾಪ್ರೀತಿದಾಯಕಮ್ || ೧ ||
ಅನೇನ ಸದೃಶಂ ಸ್ತೋತ್ರಂ ನ ಭೂತಂ ನ ಭವಿಷ್ಯತಿ |
ಸರ್ವರೋಗಪ್ರಶಮನಂ ಸರ್ವಸಂಪತ್ಪ್ರವರ್ಧನಮ್ || ೨ ||
ಸರ್ವಾಪಮೃತ್ಯುಶಮನಂ ಕಾಲಮೃತ್ಯುನಿವಾರಣಮ್ |
ಸರ್ವಾಜ್ವರಾರ್ತಿಶಮನಂ ದೀರ್ಘಾಯುಷ್ಯಪ್ರದಾಯಕಮ್ || ೩ ||
ಪುತ್ರಪ್ರದಮಪುತ್ರಾಣಾಂ ಪುರುಷಾರ್ಥಪ್ರದಾಯಕಮ್ |
ಇದಂ ವಿಶೇಷಾಚ್ಛ್ರೀದೇವ್ಯಾಃ ಸ್ತೋತ್ರಂ ಪ್ರೀತಿವಿಧಾಯಕಮ್ || ೪ ||
ಜಪೇನ್ನಿತ್ಯಂ ಪ್ರಯತ್ನೇನ ಲಲಿತೋಪ್ರಾಸ್ತಿತತ್ಪರಃ |
ಪ್ರಾತಃ ಸ್ನಾತ್ವಾ ವಿಧಾನೇನ ಸಂಧ್ಯಾಕರ್ಮ ಸಮಾಪ್ಯ ಚ || ೫ ||
ಪೂಜಾಗೃಹಂ ತತೋ ಗತ್ವಾ ಚಕ್ರರಾಜಂ ಸಮರ್ಚಯೇತ್ |
ವಿದ್ಯಾಂ ಜಪೇತ್ಸಹಸ್ರಂ ವಾ ತ್ರಿಶತಂ ಶತಮೇವ ವಾ || ೬ ||
ರಹಸ್ಯನಾಮಸಾಹಸ್ರಮಿದಂ ಪಶ್ಚಾತ್ಪಠೇನ್ನರಃ |
ಜನ್ಮಮಧ್ಯೇ ಸಕೃಚ್ಚಾಪಿ ಯ ಏತತ್ಪಠತೇ ಸುಧೀಃ || ೭ ||
ತಸ್ಯ ಪುಣ್ಯಫಲಂ ವಕ್ಷ್ಯೇ ಶೃಣು ತ್ವಂ ಕುಂಭಸಂಭವ |
ಗಂಗಾದಿಸರ್ವತೀರ್ಥೇಷು ಯಃ ಸ್ನಾಯಾತ್ಕೋಟಿಜನ್ಮಸು || ೮ ||
ಕೋಟಿಲಿಂಗಪ್ರತಿಷ್ಠಾಂ ಚ ಯಃ ಕುರ್ಯಾದವಿಮುಕ್ತಕೇ |
ಕುರುಕ್ಷೇತ್ರೇ ತು ಯೋ ದದ್ಯಾತ್ಕೋಟಿವಾರಂ ರವಿಗ್ರಹೇ || ೯ ||
ಕೋಟಿಂ ಸುವರ್ಣಭಾರಾಣಾಂ ಶ್ರೋತ್ರಿಯೇಷು ದ್ವಿಜನ್ಮಸು |
ಯಃ ಕೋಟಿಂ ಹಯಮೇಧಾನಾಮಾಹರೇದ್ಗಾಂಗರೋಧಸಿ || ೧೦ ||
ಆಚರೇತ್ಕೂಪಕೋಟೀರ್ಯೋ ನಿರ್ಜಲೇ ಮರುಭೂತಲೇ |
ದುರ್ಭಿಕ್ಷೇ ಯಃ ಪ್ರತಿದಿನಂ ಕೋಟಿಬ್ರಾಹ್ಮಣಭೋಜನಮ್ || ೧೧ ||
ಶ್ರದ್ಧಯಾ ಪರಯಾ ಕುರ್ಯಾತ್ಸಹಸ್ರಪರಿವತ್ಸರಾನ್ |
ತತ್ಪುಣ್ಯಂ ಕೋಟಿಗುಣಿತಂ ಭವೇತ್ಪುಣ್ಯಮನುತ್ತಮಮ್ || ೧೨ ||
ರಹಸ್ಯನಾಮಸಾಹಸ್ರೇ ನಾಮ್ನೋಽಪ್ಯೇಕಸ್ಯ ಕೀರ್ತನಾತ್ |
ರಹಸ್ಯನಾಮಸಾಹಸ್ರೇ ನಾಮೈಕಮಪಿ ಯಃ ಪಠೇತ್ || ೧೩ ||
ತಸ್ಯ ಪಾಪಾನಿ ನಶ್ಯಂತಿ ಮಹಾಂತ್ಯಪಿ ನ ಸಂಶಯಃ |
ನಿತ್ಯಕರ್ಮಾನನುಷ್ಠಾನಾನ್ನಿಷಿದ್ಧಕರಣಾದಪಿ || ೧೪ ||
ಯತ್ಪಾಪಂ ಜಾಯತೇ ಪುಂಸಾಂ ತತ್ಸರ್ವಂ ನಶ್ಯತಿ ಧ್ರುವಮ್ |
ಬಹುನಾತ್ರ ಕಿಮುಕ್ತೇನ ಶೃಣು ತ್ವಂ ಕುಂಭಸಂಭವ || ೧೫ ||
ಅತ್ರೈಕನಾಮ್ನೋ ಯಾ ಶಕ್ತಿಃ ಪಾತಕಾನಾಂ ನಿವರ್ತನೇ |
ತನ್ನಿವರ್ತ್ಯಮಘಂ ಕರ್ತುಂ ನಾಲಂ ಲೋಕಾಶ್ಚತುರ್ದಶ || ೧೬ ||
ಯಸ್ತ್ಯಕ್ತ್ವಾ ನಾಮಸಾಹಸ್ರಂ ಪಾಪಹಾನಿಮಭೀಪ್ಸತಿ |
ಸ ಹಿ ಶೀತನಿವೃತ್ತ್ಯರ್ಥಂ ಹಿಮಶೈಲಂ ನಿಷೇವತೇ || ೧೭ ||
ಭಕ್ತೋ ಯಃ ಕೀರ್ತಯೇನ್ನಿತ್ಯಮಿದಂ ನಾಮಸಹಸ್ರಕಮ್ |
ತಸ್ಮೈ ಶ್ರೀಲಲಿತಾದೇವೀ ಪ್ರೀತಾಽಭೀಷ್ಟಂ ಪ್ರಯಚ್ಛತಿ || ೧೮ ||
ಅಕೀರ್ತಯನ್ನಿದಂ ಸ್ತೋತ್ರಂ ಕಥಂ ಭಕ್ತೋ ಭವಿಷ್ಯತಿ |
ನಿತ್ಯಂ ಸಂಕೀರ್ತನಾಶಕ್ತಃ ಕೀರ್ತಯೇತ್ಪುಣ್ಯವಾಸರೇ || ೧೯ ||
ಸಂಕ್ರಾಂತೌ ವಿಷುವೇ ಚೈವ ಸ್ವಜನ್ಮತ್ರಿತಯೇಽಯನೇ |
ನವಮ್ಯಾಂ ವಾ ಚತುರ್ದಶ್ಯಾಂ ಸಿತಾಯಾಂ ಶುಕ್ರವಾಸರೇ || ೨೦ ||
ಕೀರ್ತಯೇನ್ನಾಮಸಾಹಸ್ರಂ ಪೌರ್ಣಮಾಸ್ಯಾಂ ವಿಶೇಷತಃ |
ಪೌರ್ಣಮಾಸ್ಯಾಂ ಚಂದ್ರಬಿಂಬೇ ಧ್ಯಾತ್ವಾ ಶ್ರೀಲಲಿತಾಂಬಿಕಾಮ್ || ೨೧ ||
ಪಂಚೋಪಚಾರೈಃ ಸಂಪೂಜ್ಯ ಪಠೇನ್ನಾಮಸಾಹಸ್ರಕಮ್ |
ಸರ್ವೇರೋಗಾಃ ಪ್ರಣಶ್ಯಂತಿ ದೀರ್ಘಾಯುಷ್ಯಂ ಚ ವಿಂದತಿ || ೨೨ ||
ಅಯಮಾಯುಷ್ಕರೋ ನಾಮ ಪ್ರಯೋಗಃ ಕಲ್ಪಚೋದಿತಃ |
ಜ್ವರಾರ್ತಂ ಶಿರಸಿ ಸ್ಪೃಷ್ಟ್ವಾ ಪಠೇನ್ನಾಮಸಹಸ್ರಕಮ್ || ೨೩ ||
ತತ್ಕ್ಷಣಾತ್ಪ್ರಶಮಂ ಯಾತಿ ಶಿರಸ್ತೋದೋ ಜ್ವರೋಽಪಿ ಚ |
ಸರ್ವವ್ಯಾಧಿನಿವೃತ್ತ್ಯರ್ಥಂ ಸ್ಪಷ್ಟ್ವಾ ಭಸ್ಮ ಜಪೇದಿದಮ್ || ೨೪ ||
ತದ್ಭಸ್ಮಧಾರಣಾದೇವ ನಶ್ಯಂತಿ ವ್ಯಾಧಯಃ ಕ್ಷಣಾತ್ |
ಜಲಂ ಸಮ್ಮಂತ್ರ್ಯ ಕುಂಭಸ್ಥಂ ನಾಮಸಾಹಸ್ರತೋ ಮುನೇ || ೨೫ ||
ಅಭಿಷಿಂಚೇದ್ಗ್ರಹಗ್ರಸ್ತಾನ್ಗ್ರಹಾ ನಶ್ಯಂತಿ ತತ್ಕ್ಷಣಾತ್ |
ಸುಧಾಸಾಗರಮಧ್ಯಸ್ಥಾಂ ಧ್ಯಾತ್ವಾ ಶ್ರೀಲಲಿತಾಂಬಿಕಾಮ್ || ೨೬ ||
ಯಃ ಪಠೇನ್ನಾಮಸಾಹಸ್ರಂ ವಿಷಂ ತಸ್ಯ ವಿನಶ್ಯತಿ |
ವಂಧ್ಯಾನಾಂ ಪುತ್ರಲಾಭಾಯ ನಾಮಸಾಹಸ್ರಮಂತ್ರಿತಮ್ || ೨೭ ||
ನವನೀತಂ ಪ್ರದದ್ಯಾತ್ತು ಪುತ್ರಲಾಭೋ ಭವೇದ್ಧ್ರುವಮ್ |
ದೇವ್ಯಾಃ ಪಾಶೇನ ಸಂಬದ್ಧಾಮಾಕೃಷ್ಟಾಮಂಕುಶೇನ ಚ || ೨೮ ||
ಧ್ಯಾತ್ವಾಽಭೀಷ್ಟಾಂ ಸ್ತ್ರಿಯಂ ರಾತ್ರೌ ಜಪೇನ್ನಾಮಸಹಸ್ರಕಮ್ |
ಆಯಾತಿ ಸ್ವಸಮೀಪಂ ಸಾ ಯದ್ಯಪ್ಯಂತಃಪುರಂ ಗತಾ || ೨೯ ||
ರಾಜಾಕರ್ಷಣಕಾಮಶ್ಚೇದ್ರಾಜಾವಸಥದಿಙ್ಮುಖಃ |
ತ್ರಿರಾತ್ರಂ ಯಃ ಪಠೇದೇತಚ್ಛ್ರೀದೇವೀಧ್ಯಾನತತ್ಪರಃ || ೩೦ ||
ಸ ರಾಜಾ ಪಾರವಶ್ಯೇನ ತುರಂಗಂ ವಾ ಮತಂಗಜಮ್ |
ಆರುಹ್ಯಾಯಾತಿ ನಿಕಟಂ ದಾಸವತ್ಪ್ರಣಿಪತ್ಯ ಚ || ೩೧ ||
ತಸ್ಮೈ ರಾಜ್ಯಂ ಚ ಕೋಶಂ ಚ ದದಾತ್ಯೇವ ವಶಂ ಗತಃ |
ರಹಸ್ಯನಾಮಸಾಹಸ್ರಂ ಯಃ ಕೀರ್ತಯತಿ ನಿತ್ಯಶಃ || ೩೨ ||
ತನ್ಮುಖಾಲೋಕಮಾತ್ರೇಣ ಮುಹ್ಯೇಲ್ಲೋಕತ್ರಯಂ ಮುನೇ |
ಯಸ್ತ್ವಿದಂ ನಾಮಸಾಹಸ್ರಂ ಸಕೃತ್ಪಠತಿ ಭಕ್ತಿಮಾನ್ || ೩೩ ||
ತಸ್ಯ ಯೇ ಶತ್ರವಸ್ತೇಷಾಂ ನಿಹಂತಾ ಶರಭೇಶ್ವರಃ |
ಯೋ ವಾಽಭಿಚಾರಂ ಕುರುತೇ ನಾಮಸಾಹಸ್ರಪಾಠಕೇ || ೩೪ ||
ನಿವರ್ತ್ಯ ತತ್ಕ್ರಿಯಾಂ ಹನ್ಯಾತ್ತಂ ವೈ ಪ್ರತ್ಯಂಗಿರಾ ಸ್ವಯಮ್ |
ಯೇ ಕ್ರೂರದೃಷ್ಟ್ಯಾ ವೀಕ್ಷಂತೇ ನಾಮಸಾಹಸ್ರಪಾಠಕಮ್ || ೩೫ ||
ತಾನಂಧಾನ್ಕುರುತೇ ಕ್ಷಿಪ್ರಂ ಸ್ವಯಂ ಮಾರ್ತಾಂಡಭೈರವಃ |
ಧನಂ ಯೋ ಹರತೇ ಚೋರೈರ್ನಾಮಸಾಹಸ್ರಜಾಪಿನಃ || ೩೬ ||
ಯತ್ರ ಕುತ್ರ ಸ್ಥಿತಂ ವಾಪಿ ಕ್ಷೇತ್ರಪಾಲೋ ನಿಹಂತಿ ತಮ್ |
ವಿದ್ಯಾಸು ಕುರುತೇ ವಾದಂ ಯೋ ವಿದ್ವಾನ್ನಾಮಜಾಪಿನಾ || ೩೭ ||
ತಸ್ಯ ವಾಕ್ ಸ್ತಂಭನಂ ಸದ್ಯಃ ಕರೋತಿ ನಕುಲೇಶ್ವರೀ |
ಯೋ ರಾಜಾ ಕುರುತೇ ವೈರಂ ನಾಮಸಾಹಸ್ರಜಾಪಿನಾ || ೩೮ ||
ಚತುರಂಗಬಲಂ ತಸ್ಯ ದಂಡಿನೀ ಸಂಹಾರೇತ್ಸ್ವಯಮ್ |
ಯಃ ಪಠೇನ್ನಾಮಸಾಹಸ್ರಂ ಷಣ್ಮಾಸಂ ಭಕ್ತಿಸಂಯುತಃ || ೩೯ ||
ಲಕ್ಷ್ಮೀಶ್ಚಾಂಚಲ್ಯರಹಿತಾ ಸದಾ ತಿಷ್ಠತಿ ತದ್ಗೃಹೇ |
ಮಾಸಮೇಕಂ ಪ್ರತಿದಿನಂ ತ್ರಿವಾರಂ ಯಃ ಪಠೇನ್ನರಃ || ೪೦ ||
ಭಾರತೀ ತಸ್ಯ ಜಿಹ್ವಾಗ್ರೇ ರಂಗೇ ನೃತ್ಯತಿ ನಿತ್ಯಶಃ |
ಯಸ್ತ್ವೇಕವಾರಂ ಪಠತಿ ಪಕ್ಷಮಾತ್ರಮತಂದ್ರಿತಃ || ೪೧ ||
ಮುಹ್ಯಂತಿ ಕಾಮವಶಗಾ ಮೃಗಾಕ್ಷ್ಯಸ್ತಸ್ಯ ವೀಕ್ಷಣಾತ್ |
ಯಃ ಪಠೇನ್ನಾಮಸಾಹಸ್ರಂ ಜನ್ಮಮಧ್ಯೇ ಸಕೃನ್ನರಃ || ೪೨ ||
ತದ್ದೃಷ್ಟಿಗೋಚರಾಃ ಸರ್ವೇ ಮುಚ್ಯಂತೇ ಸರ್ವಕಿಲ್ಬಿಷೈಃ |
ಯೋ ವೇತ್ತಿ ನಾಮಸಾಹಸ್ರಂ ತಸ್ಮೈ ದೇಯಂ ದ್ವಿಜನ್ಮನೇ || ೪೩ ||
ಅನ್ನಂ ವಸ್ತ್ರಂ ಧನಂ ಧಾನ್ಯಂ ನಾನ್ಯೇಭ್ಯಸ್ತು ಕದಾಚನ |
ಶ್ರೀಮಂತ್ರರಾಜಂ ಯೋ ವೇತ್ತಿ ಶ್ರೀಚಕ್ರಂ ಯಃ ಸಮರ್ಚತಿ || ೪೪ ||
ಯಃ ಕೀರ್ತಯತಿ ನಾಮಾನಿ ತಂ ಸತ್ಪಾತ್ರಂ ವಿದುರ್ಬುಧಾಃ |
ತಸ್ಮೈ ದೇಯಂ ಪ್ರಯತ್ನೇನ ಶ್ರೀದೇವೀಪ್ರೀತಿಮಿಚ್ಛತಾ || ೪೫ ||
ನ ಕೀರ್ತಯತಿ ನಾಮಾನಿ ಮಂತ್ರರಾಜಂ ನ ವೇತ್ತಿ ಯಃ |
ಪಶುತುಲ್ಯಃ ಸ ವಿಜ್ಞೇಯಸ್ತಸ್ಮೈ ದತ್ತಂ ನಿರರ್ಥಕಮ್ || ೪೬ ||
ಪರೀಕ್ಷ್ಯ ವಿದ್ಯಾವಿದುಷಸ್ತೇಭ್ಯೋ ದದ್ಯಾದ್ವಿಚಕ್ಷಣಃ |
ಶ್ರೀಮಂತ್ರರಾಜಸದೃಶೋ ಯಥಾ ಮಂತ್ರೋ ನ ವಿದ್ಯತೇ || ೪೭ ||
ದೇವತಾ ಲಲಿತಾತುಲ್ಯಾ ಯಥಾ ನಾಸ್ತಿ ಘಟೋದ್ಭವ |
ರಹಸ್ಯನಾಮಸಾಹಸ್ರತುಲ್ಯಾ ನಾಸ್ತಿ ತಥಾ ಸ್ತುತಿಃ || ೪೮ ||
ಲಿಖಿತ್ವಾ ಪುಸ್ತಕೇ ಯಸ್ತು ನಾಮಸಾಹಸ್ರಮುತ್ತಮಮ್ |
ಸಮರ್ಚಯೇತ್ಸದಾ ಭಕ್ತ್ಯಾ ತಸ್ಯ ತುಷ್ಯತಿ ಸುಂದರೀ || ೪೯ ||
ಬಹುನಾತ್ರ ಕಿಮುಕ್ತೇನ ಶೃಣು ತ್ವಂ ಕುಂಭಸಂಭವ |
ನಾನೇನ ಸದೃಶಂ ಸ್ತೋತ್ರಂ ಸರ್ವತಂತ್ರೇಷು ದೃಶ್ಯತೇ || ೫೦ ||
ತಸ್ಮಾದುಪಾಸಕೋ ನಿತ್ಯಂ ಕೀರ್ತಯೇದಿದಮಾದರಾತ್ |
ಏಭಿರ್ನಾಮಸಹಸ್ರೈಸ್ತು ಶ್ರೀಚಕ್ರಂ ಯೋಽರ್ಚಯೇತ್ಸಕೃತ್ || ೫೧ ||
ಪದ್ಮೈರ್ವಾ ತುಲಸೀಪುಷ್ಪೈಃ ಕಲ್ಹಾರೈರ್ವಾ ಕದಂಬಕೈಃ |
ಚಂಪಕೈರ್ಜಾತಿಕುಸುಮೈರ್ಮಲ್ಲಿಕಾಕರವೀರಕೈಃ || ೫೨ ||
ಉತ್ಪಲೈರ್ಬಿಲ್ವಪತ್ರೈರ್ವಾ ಕುಂದಕೇಸರಪಾಟಲೈಃ |
ಅನ್ಯೈಃ ಸುಗಂಧಿಕುಸುಮೈಃ ಕೇತಕೀಮಾಧವೀಮುಖೈಃ || ೫೩ ||
ತಸ್ಯ ಪುಣ್ಯಫಲಂ ವಕ್ತುಂ ನ ಶಕ್ನೋತಿ ಮಹೇಶ್ವರಃ |
ಸಾ ವೇತ್ತಿ ಲಲಿತಾದೇವೀ ಸ್ವಚಕ್ರಾರ್ಚನಜಂ ಫಲಮ್ || ೫೪ ||
ಅನ್ಯೇ ಕಥಂ ವಿಜಾನೀಯುರ್ಬ್ರಹ್ಮಾದ್ಯಾಃ ಸ್ವಲ್ಪಮೇಧಸಃ |
ಪ್ರತಿಮಾಸಂ ಪೌರ್ಣಮಾಸ್ಯಾಮೇಭಿರ್ನಾಮಸಹಸ್ರಕೈಃ || ೫೫ ||
ರಾತ್ರೌ ಯಶ್ಚಕ್ರರಾಜಸ್ಥಾಮರ್ಚಯೇತ್ಪರದೇವತಾಮ್ |
ಸ ಏವ ಲಲಿತಾರೂಪಸ್ತದ್ರೂಪಾ ಲಲಿತಾ ಸ್ವಯಮ್ || ೫೬ ||
ನ ತಯೋರ್ವಿದ್ಯತೇ ಭೇದೋ ಭೇದಕೃತ್ಪಾಪಕೃದ್ಭವೇತ್ |
ಮಹಾನವಮ್ಯಾಂ ಯೋ ಭಕ್ತಃ ಶ್ರೀದೇವೀಂ ಚಕ್ರಮಧ್ಯಗಾಮ್ || ೫೭ ||
ಅರ್ಚಯೇನ್ನಾಮಸಾಹಸ್ರೈಸ್ತಸ್ಯ ಮುಕ್ತಿಃ ಕರೇ ಸ್ಥಿತಾ |
ಯಸ್ತು ನಾಮಸಹಸ್ರೇಣ ಶುಕ್ರವಾರೇ ಸಮರ್ಚಯೇತ್ || ೫೮ ||
ಚಕ್ರರಾಜೇ ಮಹಾದೇವೀಂ ತಸ್ಯ ಪುಣ್ಯಫಲಂ ಶೃಣು |
ಸರ್ವಾನ್ಕಾಮಾನವಾಪ್ಯೇಹ ಸರ್ವಸೌಭಾಗ್ಯಸಂಯುತಃ || ೫೯ ||
ಪುತ್ರಪೌತ್ರಾದಿಸಂಯುಕ್ತೋ ಭುಕ್ತ್ವಾ ಭೋಗಾನ್ಯಥೇಪ್ಸಿತಾನ್ |
ಅಂತೇ ಶ್ರೀಲಲಿತಾದೇವ್ಯಾಃ ಸಾಯುಜ್ಯಮತಿದುರ್ಲಭಮ್ || ೬೦ ||
ಪ್ರಾರ್ಥನೀಯಂ ಶಿವಾದ್ಯೈಶ್ಚ ಪ್ರಾಪ್ನೋತ್ಯೇವ ನ ಸಂಶಯಃ |
ಯಃ ಸಹಸ್ರಂ ಬ್ರಾಹ್ಮಣಾನಾಮೇಭಿರ್ನಾಮಸಹಸ್ರಕೈಃ || ೬೧ ||
ಸಮರ್ಚ್ಯ ಭೋಜಯೇದ್ಭಕ್ತ್ಯಾ ಪಾಯಸಾಪೂಪಷಡ್ರಸೈಃ |
ತಸ್ಮೈ ಪ್ರೀಣಾತಿ ಲಲಿತಾ ಸ್ವಸಾಮ್ರಾಜ್ಯಂ ಪ್ರಯಚ್ಛತಿ || ೬೨ ||
ನ ತಸ್ಯ ದುರ್ಲಭಂ ವಸ್ತು ತ್ರಿಷು ಲೋಕೇಷು ವಿದ್ಯತೇ |
ನಿಷ್ಕಾಮಃ ಕೀರ್ತಯೇದ್ಯಸ್ತು ನಾಮಸಾಹಸ್ರಮುತ್ತಮಮ್ || ೬೩ ||
ಬ್ರಹ್ಮಜ್ಞಾನಮವಾಪ್ನೋತಿ ಯೇನ ಮುಚ್ಯೇತ ಬಂಧನಾತ್ |
ಧನಾರ್ಥೀ ಧನಮಾಪ್ನೋತಿ ಯಶೋಽರ್ಥೀ ಚಾಪ್ನುಯಾದ್ಯಶಃ || ೬೪ ||
ವಿದ್ಯಾರ್ಥೀ ಚಾಪ್ನುಯಾದ್ವಿದ್ಯಾಂ ನಾಮಸಾಹಸ್ರಕೀರ್ತನಾತ್ |
ನಾನೇನ ಸದೃಶಂ ಸ್ತೋತ್ರಂ ಭೋಗಮೋಕ್ಷಪ್ರದಂ ಮುನೇ || ೬೫ ||
ಕೀರ್ತನೀಯಮಿದಂ ತಸ್ಮಾದ್ಭೋಗಮೋಕ್ಷಾರ್ಥಿಭಿರ್ನರೈಃ |
ಚತುರಾಶ್ರಮನಿಷ್ಠೈಶ್ಚ ಕೀರ್ತನೀಯಮಿದಂ ಸದಾ || ೬೬ ||
ಸ್ವಧರ್ಮಸಮನುಷ್ಠಾನವೈಕಲ್ಯಪರಿಪೂರ್ತಯೇ |
ಕಲೌ ಪಾಪೈಕಬಹುಲೇ ಧರ್ಮಾನುಷ್ಠಾನವರ್ಜಿತೇ || ೬೭ ||
ನಾಮಸಂಕೀರ್ತನಂ ಮುಕ್ತ್ವಾ ನೃಣಾಂ ನಾನ್ಯತ್ಪರಾಯಣಮ್ |
ಲೌಕಿಕಾದ್ವಚನಾನ್ಮುಖ್ಯಂ ವಿಷ್ಣುನಾಮಾನುಕೀರ್ತನಮ್ || ೬೮ ||
ವಿಷ್ಣುನಾಮಾಸಹಸ್ರಾಚ್ಚ ಶಿವನಾಮೈಕಮುತ್ತಮಮ್ |
ಶಿವನಾಮಸಹಸ್ರಾಚ್ಚ ದೇವ್ಯಾ ನಾಮೈಕಮುತ್ತಮಮ್ || ೬೯ ||
ದೇವೀನಾಮಸಹಸ್ರಾಣಿ ಕೋಟಿಶಃ ಸಂತಿ ಕುಂಭಜ |
ತೇಷು ಮುಖ್ಯಂ ದಶವಿಧಂ ನಾಮಸಾಹಸ್ರಮುಚ್ಯತೇ || ೭೦ ||
ಗಂಗಾ ಭವಾನೀ ಗಾಯತ್ರೀ ಕಾಳೀ ಲಕ್ಷ್ಮೀಃ ಸರಸ್ವತೀ |
ರಾಜರಾಜೇಶ್ವರೀ ಬಾಲಾ ಶ್ಯಾಮಲಾ ಲಲಿತಾ ದಶ || ೭೧ ||
ರಹಸ್ಯನಾಮಸಾಹಸ್ರಮಿದಂ ಶಸ್ತಂ ದಶಸ್ವಪಿ |
ತಸ್ಮಾತ್ಸಂಕೀರ್ತಯೇನ್ನಿತ್ಯಂ ಕಲಿದೋಷನಿವೃತ್ತಯೇ || ೭೨ ||
ಮುಖ್ಯಂ ಶ್ರೀಮಾತೃನಾಮೇತಿ ನ ಜಾನಂತಿ ವಿಮೋಹಿತಾಃ |
ವಿಷ್ಣುನಾಮಪರಾಃ ಕೇಚಿಚ್ಛಿವನಾಮಪರಾಃ ಪರೇ || ೭೩ ||
ನ ಕಶ್ಚಿದಪಿ ಲೋಕೇಷು ಲಲಿತಾನಾಮತತ್ಪರಃ |
ಯೇನಾನ್ಯದೇವತಾನಾಮ ಕೀರ್ತಿತಂ ಜನ್ಮಕೋಟಿಷು || ೭೪ ||
ತಸ್ಯೈವ ಭವತಿ ಶ್ರದ್ಧಾ ಶ್ರೀದೇವೀನಾಮಕೀರ್ತನೇ |
ಚರಮೇ ಜನ್ಮನಿ ಯಥಾ ಶ್ರೀವಿದ್ಯೋಪಾಸಕೋ ಭವೇತ್ || ೭೫ ||
ನಾಮಸಾಹಸ್ರಪಾಠಶ್ಚ ತಥಾ ಚರಮಜನ್ಮನಿ |
ಯಥೈವ ವಿರಳಾ ಲೋಕೇ ಶ್ರೀವಿದ್ಯಾರಾಜವೇದಿನಃ || ೭೬ ||
ತಥೈವ ವಿರಲೋ ಗುಹ್ಯನಾಮಸಾಹಸ್ರಪಾಠಕಃ |
ಮಂತ್ರರಾಜಜಪಶ್ಚೈವ ಚಕ್ರರಾಜಾರ್ಚನಂ ತಥಾ || ೭೭ ||
ರಹಸ್ಯನಾಮಪಾಠಶ್ಚ ನಾಲ್ಪಸ್ಯ ತಪಸಃ ಫಲಮ್ |
ಅಪಠನ್ನಾಮಸಾಹಸ್ರಂ ಪ್ರೀಣಯೇದ್ಯೋ ಮಹೇಶ್ವರೀಮ್ || ೭೮ ||
ಸ ಚಕ್ಷುಷಾ ವಿನಾ ರೂಪಂ ಪಶ್ಯೇದೇವ ವಿಮೂಢಧೀಃ |
ರಹಸ್ಯನಾಮಸಾಹಸ್ರಂ ತ್ಯಕ್ತ್ವಾ ಯಃ ಸಿದ್ಧಿಕಾಮುಕಃ || ೭೯ ||
ಸ ಭೋಜನಂ ವಿನಾ ನೂನಂ ಕ್ಷುನ್ನಿವೃತ್ತಿಮಭೀಪ್ಸತಿ |
ಯೋ ಭಕ್ತೋ ಲಲಿತಾದೇವ್ಯಾಃ ಸ ನಿತ್ಯಂ ಕೀರ್ತಯೇದಿದಮ್ || ೮೦ ||
ನಾನ್ಯಥಾ ಪ್ರೀಯತೇ ದೇವೀ ಕಲ್ಪಕೋಟಿಶತೈರಪಿ |
ತಸ್ಮಾದ್ರಹಸ್ಯನಾಮಾನಿ ಶ್ರೀಮಾತುಃ ಪ್ರಯತಃ ಪಠೇತ್ || ೮೧ ||
ಇತಿ ತೇ ಕಥಿತಂ ಸ್ತೋತ್ರಂ ರಹಸ್ಯಂ ಕುಂಭಸಂಭವ |
ನಾವಿದ್ಯಾವೇದಿನೇ ಬ್ರೂಯಾನ್ನಾಭಕ್ತಾಯ ಕದಾಚನ || ೮೨ ||
ಯಥೈವ ಗೋಪ್ಯಾ ಶ್ರೀವಿದ್ಯಾ ತಥಾ ಗೋಪ್ಯಮಿದಂ ಮುನೇ |
ಪಶುತುಲ್ಯೇಷು ನ ಬ್ರೂಯಾಜ್ಜನೇಷು ಸ್ತೋತ್ರಮುತ್ತಮಮ್ || ೮೩ ||
ಯೋ ದದಾತಿ ವಿಮೂಢಾತ್ಮಾ ಶ್ರೀವಿದ್ಯಾರಹಿತಾಯ ಚ |
ತಸ್ಮೈ ಕುಪ್ಯಂತಿ ಯೋಗಿನ್ಯಃ ಸೋಽನರ್ಥಃ ಸುಮಹಾನ್ ಸ್ಮೃತಃ || ೮೪ ||
ರಹಸ್ಯನಾಮಸಾಹಸ್ರಂ ತಸ್ಮಾತ್ಸಂಗೋಪಯೇದಿದಮ್ |
ಸ್ವಾತಂತ್ರೇಣ ಮಯಾ ನೋಕ್ತಂ ತವಾಪಿ ಕಲಶೋದ್ಭವ || ೮೫ ||
ಲಲಿತಾಪ್ರೇರಣೇನೈವ ಮಯೋಕ್ತಂ ಸ್ತೋತ್ರಮುತ್ತಮಮ್ |
ತೇನ ತುಷ್ಟಾ ಮಹಾದೇವೀ ತವಾಭೀಷ್ಟಂ ಪ್ರದಾಸ್ಯತಿ || ೮೬ ||
ಶ್ರೀಸೂತ ಉವಾಚ |
ಇತ್ಯುಕ್ತ್ವಾ ಶ್ರೀಹಯಗ್ರೀವೋ ಧ್ಯಾತ್ಯಾ ಶ್ರೀಲಲಿತಾಂಬಿಕಾಮ್ |
ಆನಂದಮಗ್ನಹೃದಯಃ ಸದ್ಯಃ ಪುಲಕಿತೋಽಭವತ್ || ೮೭ ||
ಇತಿ ಶ್ರೀಬ್ರಹ್ಮಾಂಡಪುರಾಣೇ ಉತ್ತರಖಂಡೇ ಶ್ರೀಹಯಗ್ರೀವಾಗಸ್ತ್ಯಸಂವಾದೇ ಶ್ರೀಲಲಿತಾಸಹಸ್ರನಾಮಸ್ತೋತ್ರ ಫಲನಿರೂಪಣಂ ನಾಮ ತೃತೀಯೋಽಧ್ಯಾಯಃ |
ಇನ್ನಷ್ಟು ಶ್ರೀ ಲಲಿತಾ ಸ್ತೋತ್ರಗಳು ನೋಡಿ.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.