Read in తెలుగు / ಕನ್ನಡ / தமிழ் / देवनागरी / English (IAST)
– ಪೂರ್ವಪೀಠಿಕಾ –
ಶ್ರೀಮದ್ರುಕ್ಮಿಮಹೀಪಾಲವಂಶರಕ್ಷಾಮಣಿಃ ಸ್ಥಿರಃ |
ರಾಜಾ ಹರಿಹರಃ ಕ್ಷೋಣೀಂ ರಕ್ಷತ್ಯಂಬುಧಿಮೇಖಲಾಮ್ || ೧ ||
ಸ ರಾಜಾ ಸರ್ವತಂತ್ರಜ್ಞಃ ಸಮಭ್ಯರ್ಚ್ಯ ವರಪ್ರದಮ್ |
ದೇವಂ ಶ್ರಿಯಃ ಪತಿಂ ಸ್ತುತ್ಯಾ ಸಮಸ್ತೌದ್ವೇದವೇದಿತಮ್ || ೨ ||
ತಸ್ಯ ಹೃಷ್ಟಾಶಯಃ ಸ್ತುತ್ಯಾ ವಿಷ್ಣುರ್ಗೋಪಾಂಗನಾವೃತಃ |
ಸ ಪಿಂಛಶ್ಯಾಮಲಂ ರೂಪಂ ಪಿಂಛೋತ್ತಂಸಮದರ್ಶಯತ್ || ೩ ||
ಸ ಪುನಃ ಸ್ವಾತ್ಮವಿನ್ಯಸ್ತಚಿತ್ತಂ ಹರಿಹರಂ ನೃಪಮ್ |
ಅಭಿಷಿಚ್ಯ ಕೃಪಾವರ್ಷೈರಭಾಷತ ಕೃತಾಂಜಲಿಮ್ || ೪ ||
ಶ್ರೀಭಗವಾನುವಾಚ |
ಮಾಮವೇಹಿ ಮಹಾಭಾಗ ಕೃಷ್ಣಂ ಕೃತ್ಯವಿದಾಂ ವರ |
ಪುರಃ ಸ್ಥಿತೋಽಸ್ಮಿ ತ್ವದ್ಭಕ್ತ್ಯಾ ಪೂರ್ಣಾಃ ಸಂತು ಮನೋರಥಾಃ || ೫ ||
ಸಂರಕ್ಷಣಾಯ ಶಿಷ್ಟಾನಾಂ ದುಷ್ಟಾನಾಂ ಶಿಕ್ಷಣಾಯ ಚ |
ಸಮೃದ್ಧ್ಯೈ ವೇದಧರ್ಮಾಣಾಂ ಮಮಾಂಶಸ್ತ್ವಮಿಹೋದಿತಃ || ೬ ||
ರಾಜನ್ನಾಮಸಹಸ್ರೇಣ ರಾಮೋ ನಾಮ್ನಾಂ ಸ್ತುತಸ್ತ್ವಯಾ |
ಸೋಽಹಂ ಸರ್ವವಿದಸ್ತಸ್ಮಾತ್ ಪ್ರಸನ್ನೋಽಸ್ಮಿ ವಿಶೇಷತಃ || ೭ ||
ಮಾಮಪಿ ತ್ವಂ ಮಹಾಭಾಗ ಮದೀಯಚರಿತಾತ್ಮನಾ |
ಸಂಪ್ರೀಣಯ ಸಹಸ್ರೇಣ ನಾಮ್ನಾಂ ಸರ್ವಾರ್ಥದಾಯಿನಾಮ್ || ೮ ||
ಪರಾಶರೇಣ ಮುನಿನಾ ವ್ಯಾಸೇನಾಮ್ನಾಯದರ್ಶಿನಾ |
ಸ್ವಾತ್ಮಭಾಜಾ ಶುಕೇನಾಪಿ ಸೂಕ್ತೇಽಪ್ಯೇತದ್ವಿಭಾವಿತಮ್ || ೯ ||
ತಂ ಹಿ ತ್ವಮನುಸಂಧೇಹಿ ಸಹಸ್ರಶಿರಸಂ ಪ್ರಭುಮ್ |
ದತ್ತಾಸ್ಯೇಷು ಮಯಾ ನ್ಯಸ್ತಂ ಸಹಸ್ರಂ ರಕ್ಷಯಿಷ್ಯತಿ || ೧೦ ||
ಇದಂ ವಿಶ್ವಹಿತಾರ್ಥಾಯ ರಸನಾರಂಗಗೋಚರಮ್ |
ಪ್ರಕಾಶಯ ತ್ವಂ ಮೇದಿನ್ಯಾಂ ಪರಮಾಗಮಸಮ್ಮತಮ್ || ೧೧ ||
ಇದಂ ಶಠಾಯ ಮೂರ್ಖಾಯ ನಾಸ್ತಿಕಾಯ ವಿಕೀರ್ಣಿನೇ |
ಅಸೂಯಿನೇಽಹಿತಾಯಾಪಿ ನ ಪ್ರಕಾಶ್ಯಂ ಕದಾಚನ || ೧೨ ||
ವಿವೇಕಿನೇ ವಿಶುದ್ಧಾಯ ವೇದಮಾರ್ಗಾನುಸಾರಿಣೇ |
ಆಸ್ತಿಕಾಯಾತ್ಮನಿಷ್ಠಾಯ ಸ್ವಾತ್ಮನ್ಯನುಸೃತೋದಯಮ್ |
ಕೃಷ್ಣನಾಮಸಹಸ್ರಂ ವೈ ಕೃತಧೀರೇತದೀರಯೇತ್ || ೧೩ ||
ಅಸ್ಯ ಶ್ರೀಕೃಷ್ಣ ಸಹಸ್ರನಾಮ ಸ್ತೋತ್ರಮಂತ್ರಸ್ಯ ಪರಾಶರ ಋಷಿಃ, ಅನುಷ್ಟುಪ್ ಛಂದಃ, ಶ್ರೀಕೃಷ್ಣಃ ಪರಮಾತ್ಮಾ ದೇವತಾ, ಶ್ರೀಕೃಷ್ಣೇತಿ ಬೀಜಂ, ಶ್ರೀವಲ್ಲಭೇತಿ ಶಕ್ತಿಃ, ಶಾರ್ಙ್ಗೀತಿ ಕೀಲಕಂ, ಶ್ರೀಕೃಷ್ಣಪ್ರೀತ್ಯರ್ಥೇ ಜಪೇ ವಿನಿಯೋಗಃ ||
ಧ್ಯಾನಮ್ –
ಕೇಷಾಂ ಚಿತ್ಪ್ರೇಮ ಪುಂಸಾಂ ವಿಗಳಿತಮನಸಾಂ ಬಾಲಲೀಲಾವಿಲಾಸಂ
ಕೇಷಾಂ ಗೋಪಾಲಲೀಲಾಂಕಿತರಸಿಕತನುರ್ವೇಣುವಾದ್ಯೇನ ದೇವಮ್ |
ಕೇಷಾಂ ವಾಮಾಸಮಾಜೇ ಜನಿತಮನಸಿಜೋ ದೈತ್ಯದರ್ಪಾಪಹೈವಂ
ಜ್ಞಾತ್ವಾ ಭಿನ್ನಾಭಿಲಾಷಂ ಸ ಜಯತಿ ಜಗತಾಮೀಶ್ವರಸ್ತಾದೃಶೋಽಭೂತ್ || ೧ ||
ಕ್ಷೀರಾಬ್ಧೌ ಕೃತಸಂಸ್ತವಃ ಸುರಗಣೈರ್ಬ್ರಹ್ಮಾದಿಭಿಃ ಪಂಡಿತೈಃ
ಪ್ರೋದ್ಭೂತೋ ವಸುದೇವಸದ್ಮನಿ ಮುದಾ ಚಿಕ್ರೀಡ ಯೋ ಗೋಕುಲೇ |
ಕಂಸಧ್ವಂಸಕೃತೇ ಜಗಾಮ ಮಧುರಾಂ ಸಾರಾಮಸದ್ವಾರಕಾಂ
ಗೋಪಾಲೋಽಖಿಲಗೋಪಿಕಾಜನಸಖಃ ಪಾಯಾದಪಾಯಾತ್ ಸ ನಃ || ೨ ||
ಫುಲ್ಲೇಂದೀವರಕಾಂತಿಮಿಂದುವದನಂ ಬರ್ಹಾವತಂಸಪ್ರಿಯಂ
ಶ್ರೀವತ್ಸಾಂಕಮುದಾರಕೌಸ್ತುಭಧರಂ ಪೀತಾಂಬರಂ ಸುಂದರಮ್ |
ಗೋಪೀನಾಂ ನಯನೋತ್ಪಲಾರ್ಚಿತತನುಂ ಗೋಗೋಪಸಂಘಾವೃತಂ
ಗೋವಿಂದಂ ಕಲವೇಣುವಾದನರತಂ ದಿವ್ಯಾಂಗಭೂಷಂ ಭಜೇ || ೩ ||
– ಸ್ತೋತ್ರಮ್ –
ಓಂ | ಕೃಷ್ಣಃ ಶ್ರೀವಲ್ಲಭಃ ಶಾರ್ಙ್ಗೀ ವಿಷ್ವಕ್ಸೇನಃ ಸ್ವಸಿದ್ಧಿದಃ |
ಕ್ಷೀರೋದಧಾಮಾ ವ್ಯೂಹೇಶಃ ಶೇಷಶಾಯೀ ಜಗನ್ಮಯಃ || ೧ ||
ಭಕ್ತಿಗಮ್ಯಸ್ತ್ರಯೀಮೂರ್ತಿರ್ಭಾರಾರ್ತವಸುಧಾಸ್ತುತಃ |
ದೇವದೇವೋ ದಯಾಸಿಂಧುರ್ದೇವೋ ದೇವಶಿಖಾಮಣಿಃ || ೨ ||
ಸುಖಭಾವಃ ಸುಖಾಧಾರೋ ಮುಕುಂದೋ ಮುದಿತಾಶಯಃ |
ಅವಿಕ್ರಿಯಃ ಕ್ರಿಯಾಮೂರ್ತಿರಧ್ಯಾತ್ಮಸ್ವಸ್ವರೂಪವಾನ್ || ೩ ||
ಶಿಷ್ಟಾಭಿಲಕ್ಷ್ಯೋ ಭೂತಾತ್ಮಾ ಧರ್ಮತ್ರಾಣಾರ್ಥಚೇಷ್ಟಿತಃ |
ಅಂತರ್ಯಾಮೀ ಕಾಲರೂಪಃ ಕಾಲಾವಯವಸಾಕ್ಷಿಕಃ || ೪ ||
ವಸುಧಾಯಾಸಹರಣೋ ನಾರದಪ್ರೇರಣೋನ್ಮುಖಃ |
ಪ್ರಭೂಷ್ಣುರ್ನಾರದೋದ್ಗೀತೋ ಲೋಕರಕ್ಷಾಪರಾಯಣಃ || ೫ ||
ರೌಹಿಣೇಯಕೃತಾನಂದೋ ಯೋಗಜ್ಞಾನನಿಯೋಜಕಃ |
ಮಹಾಗುಹಾಂತರ್ನಿಕ್ಷಿಪ್ತಃ ಪುರಾಣವಪುರಾತ್ಮವಾನ್ || ೬ ||
ಶೂರವಂಶೈಕಧೀಃ ಶೌರಿಃ ಕಂಸಶಂಕಾವಿಷಾದಕೃತ್ |
ವಸುದೇವೋಲ್ಲಸಚ್ಛಕ್ತಿರ್ದೇವಕ್ಯಷ್ಟಮಗರ್ಭಗಃ || ೭ ||
ವಸುದೇವಸುತಃ ಶ್ರೀಮಾನ್ ದೇವಕೀನಂದನೋ ಹರಿಃ |
ಆಶ್ಚರ್ಯಬಾಲಃ ಶ್ರೀವತ್ಸಲಕ್ಷ್ಮವಕ್ಷಾಶ್ಚತುರ್ಭುಜಃ || ೮ ||
ಸ್ವಭಾವೋತ್ಕೃಷ್ಟಸದ್ಭಾವಃ ಕೃಷ್ಣಾಷ್ಟಮ್ಯಂತಸಂಭವಃ |
ಪ್ರಾಜಾಪತ್ಯರ್ಕ್ಷಸಂಭೂತೋ ನಿಶೀಥಸಮಯೋದಿತಃ || ೯ ||
ಶಂಖಚಕ್ರಗದಾಪದ್ಮಪಾಣಿಃ ಪದ್ಮನಿಭೇಕ್ಷಣಃ |
ಕಿರೀಟೀ ಕೌಸ್ತುಭೋರಸ್ಕಃ ಸ್ಫುರನ್ಮಕರಕುಂಡಲಃ || ೧೦ ||
ಪೀತವಾಸಾ ಘನಶ್ಯಾಮಃ ಕುಂಚಿತಾಂಚಿತಕುಂತಲಃ |
ಸುವ್ಯಕ್ತವ್ಯಕ್ತಾಭರಣಃ ಸೂತಿಕಾಗೃಹಭೂಷಣಃ || ೧೧ ||
ಕಾರಾಗಾರಾಂಧಕಾರಘ್ನಃ ಪಿತೃಪ್ರಾಗ್ಜನ್ಮಸೂಚಕಃ |
ವಸುದೇವಸ್ತುತಃ ಸ್ತೋತ್ರಂ ತಾಪತ್ರಯನಿವಾರಣಃ || ೧೨ ||
ನಿರವದ್ಯಃ ಕ್ರಿಯಾಮೂರ್ತಿರ್ನ್ಯಾಯವಾಕ್ಯನಿಯೋಜಕಃ |
ಅದೃಷ್ಟಚೇಷ್ಟಃ ಕೂಟಸ್ಥೋ ಧೃತಲೌಕಿಕವಿಗ್ರಹಃ || ೧೩ ||
ಮಹರ್ಷಿಮಾನಸೋಲ್ಲಾಸೋ ಮಹೀಮಂಗಳದಾಯಕಃ |
ಸಂತೋಷಿತಸುರವ್ರಾತಃ ಸಾಧುಚಿತ್ತಪ್ರಸಾದಕಃ || ೧೪ ||
ಜನಕೋಪಾಯನಿರ್ದೇಷ್ಟಾ ದೇವಕೀನಯನೋತ್ಸವಃ |
ಪಿತೃಪಾಣಿಪರಿಷ್ಕಾರೋ ಮೋಹಿತಾಗಾರರಕ್ಷಕಃ || ೧೫ ||
ಸ್ವಶಕ್ತ್ಯುದ್ಘಾಟಿತಾಶೇಷಕಪಾಟಃ ಪಿತೃವಾಹಕಃ |
ಶೇಷೋರಗಫಣಾಚ್ಛತ್ರಃ ಶೇಷೋಕ್ತಾಖ್ಯಾಸಹಸ್ರಕಃ || ೧೬ ||
ಯಮುನಾಪೂರವಿಧ್ವಂಸೀ ಸ್ವಭಾಸೋದ್ಭಾಸಿತವ್ರಜಃ |
ಕೃತಾತ್ಮವಿದ್ಯಾವಿನ್ಯಾಸೋ ಯೋಗಮಾಯಾಗ್ರಸಂಭವಃ || ೧೭ ||
ದುರ್ಗಾನಿವೇದಿತೋದ್ಭಾವೋ ಯಶೋದಾತಲ್ಪಶಾಯಕಃ |
ನಂದಗೋಪೋತ್ಸವಸ್ಫೂರ್ತಿರ್ವ್ರಜಾನಂದಕರೋದಯಃ || ೧೮ ||
ಸುಜಾತಜಾತಕರ್ಮಶ್ರೀರ್ಗೋಪೀಭದ್ರೋಕ್ತಿನಿರ್ವೃತಃ |
ಅಲೀಕನಿದ್ರೋಪಗಮಃ ಪೂತನಾಸ್ತನಪೀಡನಃ || ೧೯ ||
ಸ್ತನ್ಯಾತ್ತಪೂತನಾಪ್ರಾಣಃ ಪೂತನಾಕ್ರೋಶಕಾರಕಃ |
ವಿನ್ಯಸ್ತರಕ್ಷಾಗೋಧೂಳಿರ್ಯಶೋದಾಕರಲಾಲಿತಃ || ೨೦ ||
ನಂದಾಘ್ರಾತಶಿರೋಮಧ್ಯಃ ಪೂತನಾಸುಗತಿಪ್ರದಃ |
ಬಾಲಃ ಪರ್ಯಂಕನಿದ್ರಾಳುರ್ಮುಖಾರ್ಪಿತಪದಾಂಗುಳಿಃ || ೨೧ ||
ಅಂಜನಸ್ನಿಗ್ಧನಯನಃ ಪರ್ಯಾಯಾಂಕುರಿತಸ್ಮಿತಃ |
ಲೀಲಾಕ್ಷಸ್ತರಳಾಲೋಕಃ ಶಕಟಾಸುರಭಂಜನಃ || ೨೨ ||
ದ್ವಿಜೋದಿತಸ್ವಸ್ತ್ಯಯನೋ ಮಂತ್ರಪೂತಜಲಾಪ್ಲುತಃ |
ಯಶೋದೋತ್ಸಂಗಪರ್ಯಂಕೋ ಯಶೋದಾಮುಖವೀಕ್ಷಕಃ || ೨೩ ||
ಯಶೋದಾಸ್ತನ್ಯಮುದಿತಸ್ತೃಣಾವರ್ತಾದಿದುಸ್ಸಹಃ |
ತೃಣಾವರ್ತಾಸುರಧ್ವಂಸೀ ಮಾತೃವಿಸ್ಮಯಕಾರಕಃ || ೨೪ ||
ಪ್ರಶಸ್ತನಾಮಕರಣೋ ಜಾನುಚಂಕ್ರಮಣೋತ್ಸುಕಃ |
ವ್ಯಾಲಂಬಿಚೂಲಿಕಾರತ್ನೋ ಘೋಷಗೋಪಪ್ರಹರ್ಷಣಃ || ೨೫ ||
ಸ್ವಮುಖಪ್ರತಿಬಿಂಬಾರ್ಥೀ ಗ್ರೀವಾವ್ಯಾಘ್ರನಖೋಜ್ಜ್ವಲಃ |
ಪಂಕಾನುಲೇಪರುಚಿರೋ ಮಾಂಸಲೋರುಕಟೀತಟಃ || ೨೬ ||
ಘೃಷ್ಟಜಾನುಕರದ್ವಂದ್ವಃ ಪ್ರತಿಬಿಂಬಾನುಕಾರಕೃತ್ |
ಅವ್ಯಕ್ತವರ್ಣವಾಗ್ವೃತ್ತಿಃ ಸ್ಮಿತಲಕ್ಷ್ಯರದೋದ್ಗಮಃ || ೨೭ ||
ಧಾತ್ರೀಕರಸಮಾಲಂಬೀ ಪ್ರಸ್ಖಲಚ್ಚಿತ್ರಚಂಕ್ರಮಃ |
ಅನುರೂಪವಯಸ್ಯಾಢ್ಯಶ್ಚಾರುಕೌಮಾರಚಾಪಲಃ || ೨೮ ||
ವತ್ಸಪುಚ್ಛಸಮಾಕೃಷ್ಟೋ ವತ್ಸಪುಚ್ಛವಿಕರ್ಷಣಃ |
ವಿಸ್ಮಾರಿತಾನ್ಯವ್ಯಾಪಾರೋ ಗೋಪಗೋಪೀಮುದಾವಹಃ || ೨೯ ||
ಅಕಾಲವತ್ಸನಿರ್ಮೋಕ್ತಾ ವ್ರಜವ್ಯಾಕ್ರೋಶಸುಸ್ಮಿತಃ |
ನವನೀತಮಹಾಚೋರೋ ದಾರಕಾಹಾರದಾಯಕಃ || ೩೦ ||
ಪೀಠೋಲೂಖಲಸೋಪಾನಃ ಕ್ಷೀರಭಾಂಡವಿಭೇದನಃ |
ಶಿಕ್ಯಭಾಂಡಸಮಾಕರ್ಷೀ ಧ್ವಾಂತಾಗಾರಪ್ರವೇಶಕೃತ್ || ೩೧ ||
ಭೂಷಾರತ್ನಪ್ರಕಾಶಾಢ್ಯೋ ಗೋಪ್ಯುಪಾಲಂಭಭರ್ತ್ಸಿತಃ |
ಪರಾಗಧೂಸರಾಕಾರೋ ಮೃದ್ಭಕ್ಷಣಕೃತೇಕ್ಷಣಃ || ೩೨ ||
ಬಾಲೋಕ್ತಮೃತ್ಕಥಾರಂಭೋ ಮಿತ್ರಾಂತರ್ಗೂಢವಿಗ್ರಹಃ |
ಕೃತಸಂತ್ರಾಸಲೋಲಾಕ್ಷೋ ಜನನೀಪ್ರತ್ಯಯಾವಹಃ || ೩೩||
ಮಾತೃದೃಶ್ಯಾತ್ತವದನೋ ವಕ್ತ್ರಲಕ್ಷ್ಯಚರಾಚರಃ |
ಯಶೋದಾಲಾಲಿತಸ್ವಾತ್ಮಾ ಸ್ವಯಂ ಸ್ವಾಚ್ಛಂದ್ಯಮೋಹನಃ || ೩೪ ||
ಸವಿತ್ರೀಸ್ನೇಹಸಂಶ್ಲಿಷ್ಟಃ ಸವಿತ್ರೀಸ್ತನಲೋಲುಪಃ |
ನವನೀತಾರ್ಥನಾಪ್ರಹ್ವೋ ನವನೀತಮಹಾಶನಃ || ೩೫ ||
ಮೃಷಾಕೋಪಪ್ರಕಂಪೋಷ್ಠೋ ಗೋಷ್ಠಾಂಗಣವಿಲೋಕನಃ |
ದಧಿಮಂಥಘಟೀಭೇತ್ತಾ ಕಿಂಕಿಣೀಕ್ವಾಣಸೂಚಿತಃ || ೩೬ ||
ಹೈಯಂಗವೀನರಸಿಕೋ ಮೃಷಾಶ್ರುಶ್ಚೌರ್ಯಶಂಕಿತಃ |
ಜನನೀಶ್ರಮವಿಜ್ಞಾತಾ ದಾಮಬಂಧನಿಯಂತ್ರಿತಃ || ೩೭ ||
ದಾಮಾಕಲ್ಪಶ್ಚಲಾಪಾಂಗೋ ಗಾಢೋಲೂಖಲಬಂಧನಃ |
ಆಕೃಷ್ಟೋಲೂಖಲೋಽನಂತಃ ಕುಬೇರಸುತಶಾಪವಿತ್ || ೩೮ ||
ನಾರದೋಕ್ತಿಪರಾಮರ್ಶೀ ಯಮಳಾರ್ಜುನಭಂಜನಃ |
ಧನದಾತ್ಮಜಸಂಘುಷ್ಟೋ ನಂದಮೋಚಿತಬಂಧನಃ || ೩೯ ||
ಬಾಲಕೋದ್ಗೀತನಿರತೋ ಬಾಹುಕ್ಷೇಪೋದಿತಪ್ರಿಯಃ |
ಆತ್ಮಜ್ಞೋ ಮಿತ್ರವಶಗೋ ಗೋಪೀಗೀತಗುಣೋದಯಃ || ೪೦ ||
ಪ್ರಸ್ಥಾನಶಕಟಾರೂಢೋ ಬೃಂದಾವನಕೃತಾಲಯಃ |
ಗೋವತ್ಸಪಾಲನೈಕಾಗ್ರೋ ನಾನಾಕ್ರೀಡಾಪರಿಚ್ಛದಃ || ೪೧ ||
ಕ್ಷೇಪಣೀಕ್ಷೇಪಣಪ್ರೀತೋ ವೇಣುವಾದ್ಯವಿಶಾರದಃ |
ವೃಷವತ್ಸಾನುಕರಣೋ ವೃಷಧ್ವಾನವಿಡಂಬನಃ || ೪೨ ||
ನಿಯುದ್ಧಲೀಲಾಸಂಹೃಷ್ಟಃ ಕೂಜಾನುಕೃತಕೋಕಿಲಃ |
ಉಪಾತ್ತಹಂಸಗಮನಃ ಸರ್ವಜಂತುರುತಾನುಕೃತ್ || ೪೩ ||
ಭೃಂಗಾನುಕಾರೀ ದಧ್ಯನ್ನಚೋರೋ ವತ್ಸಪುರಸ್ಸರಃ |
ಬಲೀ ಬಕಾಸುರಗ್ರಾಹೀ ಬಕತಾಲುಪ್ರದಾಹಕಃ || ೪೪ ||
ಭೀತಗೋಪಾರ್ಭಕಾಹೂತೋ ಬಕಚಂಚುವಿದಾರಣಃ |
ಬಕಾಸುರಾರಿರ್ಗೋಪಾಲೋ ಬಾಲೋ ಬಾಲಾದ್ಭುತಾವಹಃ || ೪೫ ||
ಬಲಭದ್ರಸಮಾಶ್ಲಿಷ್ಟಃ ಕೃತಕ್ರೀಡಾನಿಲಾಯನಃ |
ಕ್ರೀಡಾಸೇತುನಿಧಾನಜ್ಞಃ ಪ್ಲವಂಗೋತ್ಪ್ಲವನೋಽದ್ಭುತಃ || ೪೬ ||
ಕಂದುಕಕ್ರೀಡನೋ ಲುಪ್ತನಂದಾದಿಭವವೇದನಃ |
ಸುಮನೋಽಲಂಕೃತಶಿರಾಃ ಸ್ವಾದುಸ್ನಿಗ್ಧಾನ್ನಶಿಕ್ಯಭೃತ್ || ೪೭ ||
ಗುಂಜಾಪ್ರಾಲಂಬನಚ್ಛನ್ನಃ ಪಿಂಛೈರಲಕವೇಷಕೃತ್ |
ವನ್ಯಾಶನಪ್ರಿಯಃ ಶೃಂಗರವಾಕಾರಿತವತ್ಸಕಃ || ೪೮ ||
ಮನೋಜ್ಞಪಲ್ಲವೋತ್ತಂಸಪುಷ್ಪಸ್ವೇಚ್ಛಾತ್ತಷಟ್ಪದಃ |
ಮಂಜುಶಿಂಜಿತಮಂಜೀರಚರಣಃ ಕರಕಂಕಣಃ || ೪೯ ||
ಅನ್ಯೋನ್ಯಶಾಸನಃ ಕ್ರೀಡಾಪಟುಃ ಪರಮಕೈತವಃ |
ಪ್ರತಿಧ್ವಾನಪ್ರಮುದಿತಃ ಶಾಖಾಚತುರಚಂಕ್ರಮಃ || ೫೦ ||
ಅಘದಾನವಸಂಹರ್ತಾ ವ್ರಜವಿಘ್ನವಿನಾಶನಃ |
ವ್ರಜಸಂಜೀವನಃ ಶ್ರೇಯೋನಿಧಿರ್ದಾನವಮುಕ್ತಿದಃ || ೫೧ ||
ಕಾಳಿಂದೀಪುಲಿನಾಸೀನಃ ಸಹಭುಕ್ತವ್ರಜಾರ್ಭಕಃ |
ಕಕ್ಷಾಜಠರವಿನ್ಯಸ್ತವೇಣುರ್ವಲ್ಲವಚೇಷ್ಟಿತಃ || ೫೨ ||
ಭುಜಸಂಧ್ಯಂತರನ್ಯಸ್ತಶೃಂಗವೇತ್ರಃ ಶುಚಿಸ್ಮಿತಃ |
ವಾಮಪಾಣಿಸ್ಥದಧ್ಯನ್ನಕಬಳಃ ಕಲಭಾಷಣಃ || ೫೩ ||
ಅಂಗುಳ್ಯಂತರವಿನ್ಯಸ್ತಫಲಃ ಪರಮಪಾವನಃ |
ಅದೃಶ್ಯತರ್ಣಕಾನ್ವೇಷೀ ವಲ್ಲವಾರ್ಭಕಭೀತಿಹಾ || ೫೪ ||
ಅದೃಷ್ಟವತ್ಸಪವ್ರಾತೋ ಬ್ರಹ್ಮವಿಜ್ಞಾತವೈಭವಃ |
ಗೋವತ್ಸವತ್ಸಪಾನ್ವೇಷೀ ವಿರಾಟ್ಪುರುಷವಿಗ್ರಹಃ || ೫೫ ||
ಸ್ವಸಂಕಲ್ಪಾನುರೂಪಾರ್ಥವತ್ಸವತ್ಸಪರೂಪಧೃತ್ |
ಯಥಾವತ್ಸಕ್ರಿಯಾರೂಪೋ ಯಥಾಸ್ಥಾನನಿವೇಶನಃ || ೫೬ ||
ಯಥಾವ್ರಜಾರ್ಭಕಾಕಾರೋ ಗೋಗೋಪೀಸ್ತನ್ಯಪಃ ಸುಖೀ |
ಚಿರಾದ್ಬಲೋಹಿತೋ ದಾಂತೋ ಬ್ರಹ್ಮವಿಜ್ಞಾತವೈಭವಃ || ೫೭ ||
ವಿಚಿತ್ರಶಕ್ತಿರ್ವ್ಯಾಲೀನಸೃಷ್ಟಗೋವತ್ಸವತ್ಸಪಃ |
ಬ್ರಹ್ಮತ್ರಪಾಕರೋ ಧಾತೃಸ್ತುತಃ ಸರ್ವಾರ್ಥಸಾಧಕಃ || ೫೮ ||
ಬ್ರಹ್ಮ ಬ್ರಹ್ಮಮಯೋಽವ್ಯಕ್ತಸ್ತೇಜೋರೂಪಃ ಸುಖಾತ್ಮಕಃ |
ನಿರುಕ್ತಂ ವ್ಯಾಕೃತಿರ್ವ್ಯಕ್ತೋ ನಿರಾಲಂಬನಭಾವನಃ || ೫೯ ||
ಪ್ರಭವಿಷ್ಣುರತಂತ್ರೀಕೋ ದೇವಪಕ್ಷಾರ್ಥರೂಪಧೃತ್ |
ಅಕಾಮಃ ಸರ್ವವೇದಾದಿರಣೀಯಃ ಸ್ಥೂಲರೂಪವಾನ್ || ೬೦ ||
ವ್ಯಾಪೀ ವ್ಯಾಪ್ಯಃ ಕೃಪಾಕರ್ತಾ ವಿಚಿತ್ರಾಚಾರಸಮ್ಮತಃ |
ಛಂದೋಮಯಃ ಪ್ರಧಾನಾತ್ಮಾ ಮೂರ್ತಾಮೂರ್ತದ್ವಯಾಕೃತಿಃ || ೬೧ ||
ಅನೇಕಮೂರ್ತಿರಕ್ರೋಧಃ ಪರಃ ಪ್ರಕೃತಿರಕ್ರಮಃ |
ಸಕಲಾವರಣೋಪೇತಃ ಸರ್ವದೇವೋ ಮಹೇಶ್ವರಃ || ೬೨ ||
ಮಹಾಪ್ರಭಾವನಃ ಪೂರ್ವವತ್ಸವತ್ಸಪದರ್ಶಕಃ |
ಕೃಷ್ಣಯಾದವಗೋಪಾಲೋ ಗೋಪಾಲೋಕನಹರ್ಷಿತಃ || ೬೩ ||
ಸ್ಮಿತೇಕ್ಷಾಹರ್ಷಿತಬ್ರಹ್ಮಾ ಭಕ್ತವತ್ಸಲವಾಕ್ಪ್ರಿಯಃ |
ಬ್ರಹ್ಮಾನಂದಾಶ್ರುಧೌತಾಂಘ್ರಿರ್ಲೀಲಾವೈಚಿತ್ರ್ಯಕೋವಿದಃ || ೬೪ ||
ಬಲಭದ್ರೈಕಹೃದಯೋ ನಾಮಾಕಾರಿತಗೋಕುಲಃ |
ಗೋಪಾಲಬಾಲಕೋ ಭವ್ಯೋ ರಜ್ಜುಯಜ್ಞೋಪವೀತವಾನ್ || ೬೫ ||
ವೃಕ್ಷಚ್ಛಾಯಾಹತಾಶಾಂತಿರ್ಗೋಪೋತ್ಸಂಗೋಪಬರ್ಹಣಃ |
ಗೋಪಸಂವಾಹಿತಪದೋ ಗೋಪವ್ಯಜನವೀಜಿತಃ || ೬೬|
ಗೋಪಗಾನಸುಖೋನ್ನಿದ್ರಃ ಶ್ರೀದಾಮಾರ್ಜಿತಸೌಹೃದಃ |
ಸುನಂದಸುಹೃದೇಕಾತ್ಮಾ ಸುಬಲಪ್ರಾಣರಂಜನಃ || ೬೭ ||
ತಾಲೀವನಕೃತಕ್ರೀಡೋ ಬಲಪಾತಿತಧೇನುಕಃ |
ಗೋಪೀಸೌಭಾಗ್ಯಸಂಭಾವ್ಯೋ ಗೋಧೂಳಿಚ್ಛುರಿತಾಲಕಃ || ೬೮ ||
ಗೋಪೀವಿರಹಸಂತಪ್ತೋ ಗೋಪಿಕಾಕೃತಮಜ್ಜನಃ |
ಪ್ರಲಂಬಬಾಹುರುತ್ಫುಲ್ಲಪುಂಡರೀಕಾವತಂಸಕಃ || ೬೯ ||
ವಿಲಾಸಲಲಿತಸ್ಮೇರಗರ್ಭಲೀಲಾವಲೋಕನಃ |
ಸ್ರಗ್ಭೂಷಣಾನುಲೇಪಾಢ್ಯೋ ಜನನ್ಯುಪಹೃತಾನ್ನಭುಕ್ || ೭೦ ||
ವರಶಯ್ಯಾಶಯೋ ರಾಧಾಪ್ರೇಮಸಲ್ಲಾಪನಿರ್ವೃತಃ |
ಯಮುನಾತಟಸಂಚಾರೀ ವಿಷಾರ್ತವ್ರಜಹರ್ಷದಃ || ೭೧ ||
ಕಾಳಿಯಕ್ರೋಧಜನಕಃ ವೃದ್ಧಾಹಿಕುಲವೇಷ್ಟಿತಃ |
ಕಾಳಿಯಾಹಿಫಣಾರಂಗನಟಃ ಕಾಳಿಯಮರ್ದನಃ || ೭೨ ||
ನಾಗಪತ್ನೀಸ್ತುತಿಪ್ರೀತೋ ನಾನಾವೇಷಸಮೃದ್ಧಿಕೃತ್ |
ಅವಿಷ್ವಕ್ತದೃಗಾತ್ಮೇಶಃ ಸ್ವದೃಗಾತ್ಮಸ್ತುತಿಪ್ರಿಯಃ || ೭೩ ||
ಸರ್ವೇಶ್ವರಃ ಸರ್ವಗುಣಃ ಪ್ರಸಿದ್ಧಃ ಸರ್ವಸಾತ್ವತಃ |
ಅಕುಂಠಧಾಮಾ ಚಂದ್ರಾರ್ಕದೃಷ್ಟಿರಾಕಾಶನಿರ್ಮಲಃ || ೭೪ ||
ಅನಿರ್ದೇಶ್ಯಗತಿರ್ನಾಗವನಿತಾಪತಿಭೈಕ್ಷದಃ |
ಸ್ವಾಂಘ್ರಿಮುದ್ರಾಂಕನಾಗೇಂದ್ರಮೂರ್ಧಾ ಕಾಳಿಯಸಂಸ್ತುತಃ || ೭೫ ||
ಅಭಯೋ ವಿಶ್ವತಶ್ಚಕ್ಷುಃ ಸ್ತುತೋತ್ತಮಗುಣಃ ಪ್ರಭುಃ |
ಅಹಮಾತ್ಮಾ ಮರುತ್ಪ್ರಾಣಃ ಪರಮಾತ್ಮಾ ದ್ಯುಶೀರ್ಷವಾನ್ || ೭೬ ||
ನಾಗೋಪಾಯನಹೃಷ್ಟಾತ್ಮಾ ಹ್ರದೋತ್ಸಾರಿತಕಾಳಿಯಃ |
ಬಲಭದ್ರಸುಖಾಲಾಪೋ ಗೋಪಾಲಿಂಗನನಿರ್ವೃತಃ || ೭೭ ||
ದಾವಾಗ್ನಿಭೀತಗೋಪಾಲಗೋಪ್ತಾ ದಾವಾಗ್ನಿನಾಶನಃ |
ನಯನಾಚ್ಛಾದನಕ್ರೀಡಾಲಂಪಟೋ ನೃಪಚೇಷ್ಟಿತಃ || ೭೮ ||
ಕಾಕಪಕ್ಷಧರಃ ಸೌಮ್ಯೋ ಬಲವಾಹಕಕೇಳಿಮಾನ್ |
ಬಲಘಾತಿತದುರ್ಧರ್ಷಪ್ರಲಂಬೋ ಬಲವತ್ಸಲಃ || ೭೯ ||
ಮುಂಜಾಟವ್ಯಗ್ನಿಶಮನಃ ಪ್ರಾವೃಟ್ಕಾಲವಿನೋದವಾನ್ |
ಶಿಲಾನ್ಯಸ್ತಾನ್ನಭೃದ್ದೈತ್ಯಸಂಹರ್ತಾ ಶಾದ್ವಲಾಸನಃ || ೮೦ ||
ಸದಾಪ್ತಗೋಪಿಕೋದ್ಗೀತಃ ಕರ್ಣಿಕಾರಾವತಂಸಕಃ |
ನಟವೇಷಧರಃ ಪದ್ಮಮಾಲಾಂಕೋ ಗೋಪಿಕಾವೃತಃ || ೮೧ ||
ಗೋಪೀಮನೋಹರಾಪಾಂಗೋ ವೇಣುವಾದನತತ್ಪರಃ |
ವಿನ್ಯಸ್ತವದನಾಂಭೋಜಶ್ಚಾರುಶಬ್ದಕೃತಾನನಃ || ೮೨ ||
ಬಿಂಬಾಧರಾರ್ಪಿತೋದಾರವೇಣುರ್ವಿಶ್ವವಿಮೋಹನಃ |
ವ್ರಜಸಂವರ್ಣಿತಃ ಶ್ರಾವ್ಯವೇಣುನಾದಃ ಶ್ರುತಿಪ್ರಿಯಃ || ೮೩ ||
ಗೋಗೋಪಗೋಪೀಜನ್ಮೇಪ್ಸುಬ್ರಹ್ಮೇಂದ್ರಾದ್ಯಭಿವಂದಿತಃ |
ಗೀತಸ್ರುತಿಸರಿತ್ಪೂರೋ ನಾದನರ್ತಿತಬರ್ಹಿಣಃ || ೮೪ ||
ರಾಗಪಲ್ಲವಿತಸ್ಥಾಣುರ್ಗೀತಾನಮಿತಪಾದಪಃ |
ವಿಸ್ಮಾರಿತತೃಣಗ್ರಾಸಮೃಗೋ ಮೃಗವಿಲೋಭಿತಃ || ೮೫ ||
ವ್ಯಾಘ್ರಾದಿಹಿಂಸ್ರಸಹಜವೈರಹರ್ತಾ ಸುಗಾಯನಃ |
ಗಾಢೋದೀರಿತಗೋಬೃಂದಪ್ರೇಮೋತ್ಕರ್ಣಿತತರ್ಣಕಃ || ೮೬ ||
ನಿಷ್ಪಂದಯಾನಬ್ರಹ್ಮಾದಿವೀಕ್ಷಿತೋ ವಿಶ್ವವಂದಿತಃ |
ಶಾಖೋತ್ಕರ್ಣಶಕುಂತೌಘಶ್ಛತ್ರಾಯಿತಬಲಾಹಕಃ || ೮೭ ||
ಪ್ರಸನ್ನಃ ಪರಮಾನಂದಶ್ಚಿತ್ರಾಯಿತಚರಾಚರಃ |
ಗೋಪಿಕಾಮದನೋ ಗೋಪೀಕುಚಕುಂಕುಮಮುದ್ರಿತಃ || ೮೮ ||
ಗೋಪಕನ್ಯಾಜಲಕ್ರೀಡಾಹೃಷ್ಟೋ ಗೋಪ್ಯಂಶುಕಾಪಹೃತ್ |
ಸ್ಕಂಧಾರೋಪಿತಗೋಪಸ್ತ್ರೀವಾಸಾಃ ಕುಂದನಿಭಸ್ಮಿತಃ || ೮೯ ||
ಗೋಪೀನೇತ್ರೋತ್ಪಲಶಶೀ ಗೋಪಿಕಾಯಾಚಿತಾಂಶುಕಃ |
ಗೋಪೀನಮಸ್ಕ್ರಿಯಾದೇಷ್ಟಾ ಗೋಪ್ಯೇಕಕರವಂದಿತಃ || ೯೦ ||
ಗೋಪ್ಯಂಜಲಿವಿಶೇಷಾರ್ಥೀ ಗೋಪಕ್ರೀಡಾವಿಲೋಭಿತಃ |
ಶಾಂತವಾಸಸ್ಫುರದ್ಗೋಪೀಕೃತಾಂಜಲಿರಘಾಪಹಃ || ೯೧ ||
ಗೋಪೀಕೇಳಿವಿಲಾಸಾರ್ಥೀ ಗೋಪೀಸಂಪೂರ್ಣಕಾಮದಃ |
ಗೋಪಸ್ತ್ರೀವಸ್ತ್ರದೋ ಗೋಪೀಚಿತ್ತಚೋರಃ ಕುತೂಹಲೀ || ೯೨ ||
ಬೃಂದಾವನಪ್ರಿಯೋ ಗೋಪಬಂಧುರ್ಯಜ್ವಾನ್ನಯಾಚಿತಾ |
ಯಜ್ಞೇಶೋ ಯಜ್ಞಭಾವಜ್ಞೋ ಯಜ್ಞಪತ್ನ್ಯಭಿವಾಂಛಿತಃ || ೯೩ ||
ಮುನಿಪತ್ನೀವಿತೀರ್ಣಾನ್ನತೃಪ್ತೋ ಮುನಿವಧೂಪ್ರಿಯಃ |
ದ್ವಿಜಪತ್ನ್ಯಭಿಭಾವಜ್ಞೋ ದ್ವಿಜಪತ್ನೀವರಪ್ರದಃ || ೯೪ ||
ಪ್ರತಿರುದ್ಧಸತೀಮೋಕ್ಷಪ್ರದೋ ದ್ವಿಜವಿಮೋಹಿತಾ |
ಮುನಿಜ್ಞಾನಪ್ರದೋ ಯಜ್ವಸ್ತುತೋ ವಾಸವಯಾಗವಿತ್ || ೯೫ ||
ಪಿತೃಪ್ರೋಕ್ತಕ್ರಿಯಾರೂಪಶಕ್ರಯಾಗನಿವಾರಣಃ |
ಶಕ್ರಾಽಮರ್ಷಕರಃ ಶಕ್ರವೃಷ್ಟಿಪ್ರಶಮನೋನ್ಮುಖಃ || ೯೬ ||
ಗೋವರ್ಧನಧರೋ ಗೋಪಗೋಬೃಂದತ್ರಾಣತತ್ಪರಃ |
ಗೋವರ್ಧನಗಿರಿಚ್ಛತ್ರಚಂಡದಂಡಭುಜಾರ್ಗಳಃ || ೯೭ ||
ಸಪ್ತಾಹವಿಧೃತಾದ್ರೀಂದ್ರೋ ಮೇಘವಾಹನಗರ್ವಹಾ |
ಭುಜಾಗ್ರೋಪರಿವಿನ್ಯಸ್ತಕ್ಷ್ಮಾಧರಕ್ಷ್ಮಾಭೃದಚ್ಯುತಃ || ೯೮ ||
ಸ್ವಸ್ಥಾನಸ್ಥಾಪಿತಗಿರಿರ್ಗೋಪೀದಧ್ಯಕ್ಷತಾರ್ಚಿತಃ |
ಸುಮನಃ ಸುಮನೋವೃಷ್ಟಿಹೃಷ್ಟೋ ವಾಸವವಂದಿತಃ || ೯೯ ||
ಕಾಮಧೇನುಪಯಃಪೂರಾಭಿಷಿಕ್ತಃ ಸುರಭಿಸ್ತುತಃ |
ಧರಾಂಘ್ರಿರೋಷಧೀರೋಮಾ ಧರ್ಮಗೋಪ್ತಾ ಮನೋಮಯಃ || ೧೦೦ ||
ಜ್ಞಾನಯಜ್ಞಪ್ರಿಯಃ ಶಾಸ್ತ್ರನೇತ್ರಃ ಸರ್ವಾರ್ಥಸಾರಥಿಃ |
ಐರಾವತಕರಾನೀತವಿಯದ್ಗಂಗಾಪ್ಲುತೋ ವಿಭುಃ || ೧೦೧ ||
ಬ್ರಹ್ಮಾಭಿಷಿಕ್ತೋ ಗೋಗೋಪ್ತಾ ಸರ್ವಲೋಕಶುಭಂಕರಃ |
ಸರ್ವವೇದಮಯೋ ಮಗ್ನನಂದಾನ್ವೇಷೀ ಪಿತೃಪ್ರಿಯಃ || ೧೦೨ ||
ವರುಣೋದೀರಿತಾತ್ಮೇಕ್ಷಾಕೌತುಕೋ ವರುಣಾರ್ಚಿತಃ |
ವರುಣಾನೀತಜನಕೋ ಗೋಪಜ್ಞಾತಾತ್ಮವೈಭವಃ || ೧೦೩ ||
ಸ್ವರ್ಲೋಕಾಲೋಕಸಂಹೃಷ್ಟಗೋಪವರ್ಗಸ್ತ್ರಿವರ್ಗದಃ |
ಬ್ರಹ್ಮಹೃದ್ಗೋಪಿತೋ ಗೋಪದ್ರಷ್ಟಾ ಬ್ರಹ್ಮಪದಪ್ರದಃ || ೧೦೪ ||
ಶರಚ್ಚಂದ್ರವಿಹಾರೋತ್ಕಃ ಶ್ರೀಪತಿರ್ವಶಕಃ ಕ್ಷಮಃ |
ಭಯಾಪಹೋ ಭರ್ತೃರುದ್ಧಗೋಪಿಕಾಧ್ಯಾನಗೋಚರಃ || ೧೦೫ ||
ಗೋಪಿಕಾನಯನಾಸ್ವಾದ್ಯೋ ಗೋಪೀನರ್ಮೋಕ್ತಿನಿರ್ವೃತಃ |
ಗೋಪಿಕಾಮಾನಹರಣೋ ಗೋಪಿಕಾಶತಯೂಥಪಃ || ೧೦೬ ||
ವೈಜಯಂತೀಸ್ರಗಾಕಲ್ಪೋ ಗೋಪಿಕಾಮಾನವರ್ಧನಃ |
ಗೋಪಕಾಂತಾಸುನಿರ್ದೇಷ್ಟಾ ಕಾಂತೋ ಮನ್ಮಥಮನ್ಮಥಃ || ೧೦೭ ||
ಸ್ವಾತ್ಮಾಸ್ಯದತ್ತತಾಂಬೂಲಃ ಫಲಿತೋತ್ಕೃಷ್ಟಯೌವನಃ |
ವಲ್ಲವೀಸ್ತನಸಕ್ತಾಕ್ಷೋ ವಲ್ಲವೀಪ್ರೇಮಚಾಲಿತಃ || ೧೦೮ ||
ಗೋಪೀಚೇಲಾಂಚಲಾಸೀನೋ ಗೋಪೀನೇತ್ರಾಬ್ಜಷಟ್ಪದಃ |
ರಾಸಕ್ರೀಡಾಸಮಾಸಕ್ತೋ ಗೋಪೀಮಂಡಲಮಂಡನಃ || ೧೦೯ ||
ಗೋಪೀಹೇಮಮಣಿಶ್ರೇಣಿಮಧ್ಯೇಂದ್ರಮಣಿರುಜ್ಜ್ವಲಃ |
ವಿದ್ಯಾಧರೇಂದುಶಾಪಘ್ನಃ ಶಂಖಚೂಡಶಿರೋಹರಃ || ೧೧೦ ||
ಶಂಖಚೂಡಶಿರೋರತ್ನಸಂಪ್ರೀಣಿತಬಲೋಽನಘಃ |
ಅರಿಷ್ಟಾರಿಷ್ಟಕೃದ್ದುಷ್ಟಕೇಶಿದೈತ್ಯನಿಷೂದನಃ || ೧೧೧ ||
ಸರಸಃ ಸಸ್ಮಿತಮುಖಃ ಸುಸ್ಥಿರೋ ವಿರಹಾಕುಲಃ |
ಸಂಕರ್ಷಣಾರ್ಪಿತಪ್ರೀತಿರಕ್ರೂರಧ್ಯಾನಗೋಚರಃ || ೧೧೨ ||
ಅಕ್ರೂರಸಂಸ್ತುತೋ ಗೂಢೋ ಗುಣವೃತ್ತ್ಯುಪಲಕ್ಷಿತಃ |
ಪ್ರಮಾಣಗಮ್ಯಸ್ತನ್ಮಾತ್ರಾವಯವೀ ಬುದ್ಧಿತತ್ಪರಃ || ೧೧೩ ||
ಸರ್ವಪ್ರಮಾಣಪ್ರಮಥೀ ಸರ್ವಪ್ರತ್ಯಯಸಾಧಕಃ |
ಪುರುಷಶ್ಚ ಪ್ರಧಾನಾತ್ಮಾ ವಿಪರ್ಯಾಸವಿಲೋಚನಃ || ೧೧೪ ||
ಮಧುರಾಜನಸಂವೀಕ್ಷ್ಯೋ ರಜಕಪ್ರತಿಘಾತಕಃ |
ವಿಚಿತ್ರಾಂಬರಸಂವೀತೋ ಮಾಲಾಕಾರವರಪ್ರದಃ || ೧೧೫ ||
ಕುಬ್ಜಾವಕ್ರತ್ವನಿರ್ಮೋಕ್ತಾ ಕುಬ್ಜಾಯೌವನದಾಯಕಃ |
ಕುಬ್ಜಾಂಗರಾಗಸುರಭಿಃ ಕಂಸಕೋದಂಡಖಂಡನಃ || ೧೧೬ ||
ಧೀರಃ ಕುವಲಯಾಪೀಡಮರ್ದನಃ ಕಂಸಭೀತಿಕೃತ್ |
ದಂತಿದಂತಾಯುಧೋ ರಂಗತ್ರಾಸಕೋ ಮಲ್ಲಯುದ್ಧವಿತ್ || ೧೧೭ ||
ಚಾಣೂರಹಂತಾ ಕಂಸಾರಿರ್ದೇವಕೀಹರ್ಷದಾಯಕಃ |
ವಸುದೇವಪದಾನಮ್ರಃ ಪಿತೃಬಂಧವಿಮೋಚನಃ || ೧೧೮ ||
ಉರ್ವೀಭಯಾಪಹೋ ಭೂಪ ಉಗ್ರಸೇನಾಧಿಪತ್ಯದಃ |
ಆಜ್ಞಾಸ್ಥಿತಶಚೀನಾಥಃ ಸುಧರ್ಮಾನಯನಕ್ಷಮಃ || ೧೧೯ ||
ಆದ್ಯೋ ದ್ವಿಜಾತಿಸತ್ಕರ್ತಾ ಶಿಷ್ಟಾಚಾರಪ್ರದರ್ಶಕಃ |
ಸಾಂದೀಪನಿಕೃತಾಭ್ಯಸ್ತವಿದ್ಯಾಭ್ಯಾಸೈಕಧೀಸ್ಸುಧೀಃ || ೧೨೦ ||
ಗುರ್ವಭೀಷ್ಟಕ್ರಿಯಾದಕ್ಷಃ ಪಶ್ಚಿಮೋದಧಿಪೂಜಿತಃ |
ಹತಪಂಚಜನಪ್ರಾಪ್ತಪಾಂಚಜನ್ಯೋ ಯಮಾರ್ಚಿತಃ || ೧೨೧ ||
ಧರ್ಮರಾಜಜಯಾನೀತಗುರುಪುತ್ರ ಉರುಕ್ರಮಃ |
ಗುರುಪುತ್ರಪ್ರದಃ ಶಾಸ್ತಾ ಮಧುರಾಜನಮಾನದಃ || ೧೨೨ ||
ಜಾಮದಗ್ನ್ಯಸಮಭ್ಯರ್ಚ್ಯೋ ಗೋಮಂತಗಿರಿಸಂಚರಃ |
ಗೋಮಂತದಾವಶಮನೋ ಗರುಡಾನೀತಭೂಷಣಃ || ೧೨೩ ||
ಚಕ್ರಾದ್ಯಾಯುಧಸಂಶೋಭೀ ಜರಾಸಂಧಮದಾಪಹಃ |
ಸೃಗಾಲಾವನಿಪಾಲಘ್ನಃ ಸೃಗಾಲಾತ್ಮಜರಾಜ್ಯದಃ || ೧೨೪ ||
ವಿಧ್ವಸ್ತಕಾಲಯವನೋ ಮುಚುಕುಂದವರಪ್ರದಃ |
ಆಜ್ಞಾಪಿತಮಹಾಂಭೋಧಿರ್ದ್ವಾರಕಾಪುರಕಲ್ಪನಃ || ೧೨೫ ||
ದ್ವಾರಕಾನಿಲಯೋ ರುಕ್ಮಿಮಾನಹಂತಾ ಯದೂದ್ವಹಃ |
ರುಚಿರೋ ರುಕ್ಮಿಣೀಜಾನಿಃ ಪ್ರದ್ಯುಮ್ನಜನಕಃ ಪ್ರಭುಃ || ೧೨೬ ||
ಅಪಾಕೃತತ್ರಿಲೋಕಾರ್ತಿರನಿರುದ್ಧಪಿತಾಮಹಃ |
ಅನಿರುದ್ಧಪದಾನ್ವೇಷೀ ಚಕ್ರೀ ಗರುಡವಾಹನಃ || ೧೨೭ ||
ಬಾಣಾಸುರಪುರೀರೋದ್ಧಾ ರಕ್ಷಾಜ್ವಲನಯಂತ್ರಜಿತ್ |
ಧೂತಪ್ರಮಥಸಂರಂಭೋ ಜಿತಮಾಹೇಶ್ವರಜ್ವರಃ || ೧೨೮ ||
ಷಟ್ಚಕ್ರಶಕ್ತಿನಿರ್ಜೇತಾ ಭೂತಭೇತಾಳಮೋಹಕೃತ್ |
ಶಂಭುತ್ರಿಶೂಲಜಿಚ್ಛಂಭುಜೃಂಭಣಃ ಶಂಭುಸಂಸ್ತುತಃ || ೧೨೯ ||
ಇಂದ್ರಿಯಾತ್ಮೇಂದುಹೃದಯಃ ಸರ್ವಯೋಗೇಶ್ವರೇಶ್ವರಃ |
ಹಿರಣ್ಯಗರ್ಭಹೃದಯೋ ಮೋಹಾವರ್ತನಿವರ್ತನಃ || ೧೩೦ ||
ಆತ್ಮಜ್ಞಾನನಿಧಿರ್ಮೇಧಾಕೋಶಸ್ತನ್ಮಾತ್ರರೂಪವಾನ್ |
ಇಂದ್ರೋಽಗ್ನಿವದನಃ ಕಾಲನಾಭಃ ಸರ್ವಾಗಮಾಧ್ವಗಃ || ೧೩೧ ||
ತುರೀಯಸರ್ವಧೀಸಾಕ್ಷೀ ದ್ವಂದ್ವಾರಾಮಾತ್ಮದೂರಗಃ |
ಅಜ್ಞಾತಪಾರೋ ವಶ್ಯಶ್ರೀರವ್ಯಾಕೃತವಿಹಾರವಾನ್ || ೧೩೨ ||
ಆತ್ಮಪ್ರದೀಪೋ ವಿಜ್ಞಾನಮಾತ್ರಾತ್ಮಾ ಶ್ರೀನಿಕೇತನಃ |
ಬಾಣಬಾಹುವನಚ್ಛೇತ್ತಾ ಮಹೇಂದ್ರಪ್ರೀತಿವರ್ಧನಃ || ೧೩೩ ||
ಅನಿರುದ್ಧನಿರೋಧಜ್ಞೋ ಜಲೇಶಾಹೃತಗೋಕುಲಃ |
ಜಲೇಶವಿಜಯೀ ವೀರಃ ಸತ್ರಾಜಿದ್ರತ್ನಯಾಚಕಃ || ೧೩೪ ||
ಪ್ರಸೇನಾನ್ವೇಷಣೋದ್ಯುಕ್ತೋ ಜಾಂಬವದ್ಧೃತರತ್ನದಃ |
ಜಿತರ್ಕ್ಷರಾಜತನಯಾಹರ್ತಾ ಜಾಂಬವತೀಪ್ರಿಯಃ || ೧೩೫ ||
ಸತ್ಯಭಾಮಾಪ್ರಿಯಃ ಕಾಮಃ ಶತಧನ್ವಶಿರೋಹರಃ |
ಕಾಳಿಂದೀಪತಿರಕ್ರೂರಬಂಧುರಕ್ರೂರರತ್ನದಃ || ೧೩೬ ||
ಕೈಕೇಯೀರಮಣೋ ಭದ್ರಾಭರ್ತಾ ನಾಗ್ನಜಿತೀಧವಃ |
ಮಾದ್ರೀಮನೋಹರಃ ಶೈಬ್ಯಾಪ್ರಾಣಬಂಧುರುರುಕ್ರಮಃ || ೧೩೭ ||
ಸುಶೀಲಾದಯಿತೋ ಮಿತ್ರವಿಂದಾನೇತ್ರಮಹೋತ್ಸವಃ |
ಲಕ್ಷ್ಮಣಾವಲ್ಲಭೋ ರುದ್ಧಪ್ರಾಗ್ಜ್ಯೋತಿಷಮಹಾಪುರಃ || ೧೩೮ ||
ಸುರಪಾಶಾವೃತಿಚ್ಛೇದೀ ಮುರಾರಿಃ ಕ್ರೂರಯುದ್ಧವಿತ್ |
ಹಯಗ್ರೀವಶಿರೋಹರ್ತಾ ಸರ್ವಾತ್ಮಾ ಸರ್ವದರ್ಶನಃ || ೧೩೯ ||
ನರಕಾಸುರವಿಚ್ಛೇತ್ತಾ ನರಕಾತ್ಮಜರಾಜ್ಯದಃ |
ಪೃಥ್ವೀಸ್ತುತಃ ಪ್ರಕಾಶಾತ್ಮಾ ಹೃದ್ಯೋ ಯಜ್ಞಫಲಪ್ರದಃ || ೧೪೦ ||
ಗುಣಗ್ರಾಹೀ ಗುಣದ್ರಷ್ಟಾ ಗೂಢಸ್ವಾತ್ಮಾ ವಿಭೂತಿಮಾನ್ |
ಕವಿರ್ಜಗದುಪದ್ರಷ್ಟಾ ಪರಮಾಕ್ಷರವಿಗ್ರಹಃ || ೧೪೧ ||
ಪ್ರಪನ್ನಪಾಲನೋ ಮಾಲೀ ಮಹದ್ಬ್ರಹ್ಮವಿವರ್ಧನಃ |
ವಾಚ್ಯವಾಚಕಶಕ್ತ್ಯರ್ಥಃ ಸರ್ವವ್ಯಾಕೃತಸಿದ್ಧಿದಃ || ೧೪೨ ||
ಸ್ವಯಂಪ್ರಭುರನಿರ್ವೇದ್ಯಃ ಸ್ವಪ್ರಕಾಶಶ್ಚಿರಂತನಃ |
ನಾದಾತ್ಮಾ ಮಂತ್ರಕೋಟೀಶೋ ನಾನಾವಾದನಿರೋಧಕಃ || ೧೪೩ ||
ಕಂದರ್ಪಕೋಟಿಲಾವಣ್ಯಃ ಪರಾರ್ಥೈಕಪ್ರಯೋಜಕಃ |
ಅಮರೀಕೃತದೇವೌಘಃ ಕನ್ಯಕಾಬಂಧಮೋಚನಃ || ೧೪೪ ||
ಷೋಡಶಸ್ತ್ರೀಸಹಸ್ರೇಶಃ ಕಾಂತಃ ಕಾಂತಾಮನೋಭವಃ |
ಕ್ರೀಡಾರತ್ನಾಚಲಾಹರ್ತಾ ವರುಣಚ್ಛತ್ರಶೋಭಿತಃ || ೧೪೫ ||
ಶಕ್ರಾಭಿವಂದಿತಃ ಶಕ್ರಜನನೀಕುಂಡಲಪ್ರದಃ |
ಅದಿತಿಪ್ರಸ್ತುತಸ್ತೋತ್ರೋ ಬ್ರಾಹ್ಮಣೋದ್ಘುಷ್ಟಚೇಷ್ಟನಃ || ೧೪೬ ||
ಪುರಾಣಸ್ಸಂಯಮೀ ಜನ್ಮಾಲಿಪ್ತಃ ಷಡ್ವಿಂಶಕೋಽರ್ಥದಃ |
ಯಶಸ್ಯನೀತಿರಾದ್ಯಂತರಹಿತಃ ಸತ್ಕಥಾಪ್ರಿಯಃ || ೧೪೭ ||
ಬ್ರಹ್ಮಬೋಧಃ ಪರಾನಂದಃ ಪಾರಿಜಾತಾಪಹಾರಕಃ |
ಪೌಂಡ್ರಕಪ್ರಾಣಹರಣಃ ಕಾಶಿರಾಜನಿಷೂದನಃ || ೧೪೮ ||
ಕೃತ್ಯಾಗರ್ವಪ್ರಶಮನೋ ವಿಚಕ್ರವಧದೀಕ್ಷಿತಃ |
ಕಂಸವಿಧ್ವಂಸನಃ ಸಾಂಬಜನಕೋ ಡಿಂಭಕಾರ್ದನಃ || ೧೪೯ ||
ಮುನಿರ್ಗೋಪ್ತಾ ಪಿತೃವರಪ್ರದಃ ಸವನದೀಕ್ಷಿತಃ |
ರಥೀ ಸಾರಥ್ಯನಿರ್ದೇಷ್ಟಾ ಫಾಲ್ಗುನಃ ಫಾಲ್ಗುನಿಪ್ರಿಯಃ || ೧೫೦ ||
ಸಪ್ತಾಬ್ಧಿಸ್ತಂಭನೋದ್ಭೂತೋ ಹರಿಃ ಸಪ್ತಾಬ್ಧಿಭೇದನಃ |
ಆತ್ಮಪ್ರಕಾಶಃ ಪೂರ್ಣಶ್ರೀರಾದಿನಾರಾಯಣೇಕ್ಷಿತಃ || ೧೫೧ ||
ವಿಪ್ರಪುತ್ರಪ್ರದಶ್ಚೈವ ಸರ್ವಮಾತೃಸುತಪ್ರದಃ |
ಪಾರ್ಥವಿಸ್ಮಯಕೃತ್ಪಾರ್ಥಪ್ರಣವಾರ್ಥಪ್ರಬೋಧನಃ || ೧೫೨ ||
ಕೈಲಾಸಯಾತ್ರಾಸುಮುಖೋ ಬದರ್ಯಾಶ್ರಮಭೂಷಣಃ |
ಘಂಟಾಕರ್ಣಕ್ರಿಯಾಮೌಢ್ಯಾತ್ತೋಷಿತೋ ಭಕ್ತವತ್ಸಲಃ || ೧೫೩ ||
ಮುನಿಬೃಂದಾದಿಭಿರ್ಧ್ಯೇಯೋ ಘಂಟಾಕರ್ಣವರಪ್ರದಃ |
ತಪಶ್ಚರ್ಯಾಪರಶ್ಚೀರವಾಸಾಃ ಪಿಂಗಜಟಾಧರಃ || ೧೫೪ ||
ಪ್ರತ್ಯಕ್ಷೀಕೃತಭೂತೇಶಃ ಶಿವಸ್ತೋತಾ ಶಿವಸ್ತುತಃ |
ಕೃಷ್ಣಾಸ್ವಯಂವರಾಲೋಕಕೌತುಕೀ ಸರ್ವಸಮ್ಮತಃ || ೧೫೫ ||
ಬಲಸಂರಂಭಶಮನೋ ಬಲದರ್ಶಿತಪಾಂಡವಃ |
ಯತಿವೇಷಾರ್ಜುನಾಭೀಷ್ಟದಾಯೀ ಸರ್ವಾತ್ಮಗೋಚರಃ || ೧೫೬ ||
ಸುಭದ್ರಾಫಾಲ್ಗುನೋದ್ವಾಹಕರ್ತಾ ಪ್ರೀಣಿತಫಾಲ್ಗುನಃ |
ಖಾಂಡವಪ್ರೀಣಿತಾರ್ಚಿಷ್ಮಾನ್ಮಯದಾನವಮೋಚನಃ || ೧೫೭ ||
ಸುಲಭೋ ರಾಜಸೂಯಾರ್ಹಯುಧಿಷ್ಠಿರನಿಯೋಜಕಃ |
ಭೀಮಾರ್ದಿತಜರಾಸಂಧೋ ಮಾಗಧಾತ್ಮಜರಾಜ್ಯದಃ || ೧೫೮ ||
ರಾಜಬಂಧನನಿರ್ಮೋಕ್ತಾ ರಾಜಸೂಯಾಗ್ರಪೂಜನಃ |
ಚೈದ್ಯಾದ್ಯಸಹನೋ ಭೀಷ್ಮಸ್ತುತಃ ಸಾತ್ವತಪೂರ್ವಜಃ || ೧೫೯ ||
ಸರ್ವಾತ್ಮಾರ್ಥಸಮಾಹರ್ತಾ ಮಂದರಾಚಲಧಾರಕಃ |
ಯಜ್ಞಾವತಾರಃ ಪ್ರಹ್ಲಾದಪ್ರತಿಜ್ಞಾಪ್ರತಿಪಾಲಕಃ || ೧೬೦ ||
ಬಲಿಯಜ್ಞಸಭಾಧ್ವಂಸೀ ದೃಪ್ತಕ್ಷತ್ರಕುಲಾಂತಕಃ |
ದಶಗ್ರೀವಾಂತಕೋ ಜೇತಾ ರೇವತೀಪ್ರೇಮವಲ್ಲಭಃ || ೧೬೧ ||
ಸರ್ವಾವತಾರಾಧಿಷ್ಠಾತಾ ವೇದಬಾಹ್ಯವಿಮೋಹನಃ |
ಕಲಿದೋಷನಿರಾಕರ್ತಾ ದಶನಾಮಾ ದೃಢವ್ರತಃ || ೧೬೨ ||
ಅಮೇಯಾತ್ಮಾ ಜಗತ್ಸ್ವಾಮೀ ವಾಗ್ಮೀ ಚೈದ್ಯಶಿರೋಹರಃ |
ದ್ರೌಪದೀರಚಿತಸ್ತೋತ್ರಃ ಕೇಶವಃ ಪುರುಷೋತ್ತಮಃ || ೧೬೩ ||
ನಾರಾಯಣೋ ಮಧುಪತಿರ್ಮಾಧವೋ ದೋಷವರ್ಜಿತಃ |
ಗೋವಿಂದಃ ಪುಂಡರೀಕಾಕ್ಷೋ ವಿಷ್ಣುಶ್ಚ ಮಧುಸೂದನಃ || ೧೬೪ ||
ತ್ರಿವಿಕ್ರಮಸ್ತ್ರಿಲೋಕೇಶೋ ವಾಮನಃ ಶ್ರೀಧರಃ ಪುಮಾನ್ |
ಹೃಷೀಕೇಶೋ ವಾಸುದೇವಃ ಪದ್ಮನಾಭೋ ಮಹಾಹ್ರದಃ || ೧೬೫ ||
ದಾಮೋದರಶ್ಚತುರ್ವ್ಯೂಹಃ ಪಾಂಚಾಲೀಮಾನರಕ್ಷಣಃ |
ಸಾಲ್ವಘ್ನಸ್ಸಮರಶ್ಲಾಘೀ ದಂತವಕ್ತ್ರನಿಬರ್ಹಣಃ || ೧೬೬ ||
ದಾಮೋದರಪ್ರಿಯಸಖಃ ಪೃಥುಕಾಸ್ವಾದನಪ್ರಿಯಃ |
ಘೃಣೀ ದಾಮೋದರಃ ಶ್ರೀದೋ ಗೋಪೀಪುನರವೇಕ್ಷಕಃ || ೧೬೭ ||
ಗೋಪಿಕಾಮುಕ್ತಿದೋ ಯೋಗೀ ದುರ್ವಾಸಸ್ತೃಪ್ತಿಕಾರಕಃ |
ಅವಿಜ್ಞಾತವ್ರಜಾಕೀರ್ಣಪಾಂಡವಾಲೋಕನೋ ಜಯೀ || ೧೬೮ ||
ಪಾರ್ಥಸಾರಥ್ಯನಿರತಃ ಪ್ರಾಜ್ಞಃ ಪಾಂಡವದೌತ್ಯಕೃತ್ |
ವಿದುರಾತಿಥ್ಯಸಂತುಷ್ಟಃ ಕುಂತೀಸಂತೋಷದಾಯಕಃ || ೧೬೯ ||
ಸುಯೋಧನತಿರಸ್ಕರ್ತಾ ದುರ್ಯೋಧನವಿಕಾರವಿತ್ |
ವಿದುರಾಭಿಷ್ಠುತೋ ನಿತ್ಯೋ ವಾರ್ಷ್ಣೇಯೋ ಮಂಗಳಾತ್ಮಕಃ || ೧೭೦ ||
ಪಂಚವಿಂಶತಿತತ್ತ್ವೇಶಶ್ಚತುರ್ವಿಂಶತಿದೇಹಭಾಕ್ |
ಸರ್ವಾನುಗ್ರಾಹಕಃ ಸರ್ವದಾಶಾರ್ಹಸತತಾರ್ಚಿತಃ || ೧೭೧ ||
ಅಚಿಂತ್ಯೋ ಮಧುರಾಲಾಪಃ ಸಾಧುದರ್ಶೀ ದುರಾಸದಃ |
ಮನುಷ್ಯಧರ್ಮಾನುಗತಃ ಕೌರವೇಂದ್ರಕ್ಷಯೇಕ್ಷಿತಾ || ೧೭೨ ||
ಉಪೇಂದ್ರೋ ದಾನವಾರಾತಿರುರುಗೀತೋ ಮಹಾದ್ಯುತಿಃ |
ಬ್ರಹ್ಮಣ್ಯದೇವಃ ಶ್ರುತಿಮಾನ್ ಗೋಬ್ರಾಹ್ಮಣಹಿತಾಶಯಃ || ೧೭೩ ||
ವರಶೀಲಃ ಶಿವಾರಂಭಃ ಸುವಿಜ್ಞಾನವಿಮೂರ್ತಿಮಾನ್ |
ಸ್ವಭಾವಶುದ್ಧಃ ಸನ್ಮಿತ್ರಃ ಸುಶರಣ್ಯಃ ಸುಲಕ್ಷಣಃ || ೧೭೪ ||
ಧೃತರಾಷ್ಟ್ರಗತೋ ದೃಷ್ಟಿಪ್ರದಃ ಕರ್ಣವಿಭೇದನಃ |
ಪ್ರತೋದಧೃದ್ವಿಶ್ವರೂಪವಿಸ್ಮಾರಿತಧನಂಜಯಃ || ೧೭೫ ||
ಸಾಮಗಾನಪ್ರಿಯೋ ಧರ್ಮಧೇನುರ್ವರ್ಣೋತ್ತಮೋಽವ್ಯಯಃ |
ಚತುರ್ಯುಗಕ್ರಿಯಾಕರ್ತಾ ವಿಶ್ವರೂಪಪ್ರದರ್ಶಕಃ || ೧೭೬ ||
ಬ್ರಹ್ಮಬೋಧಪರಿತ್ರಾತಪಾರ್ಥೋ ಭೀಷ್ಮಾರ್ಥಚಕ್ರಭೃತ್ |
ಅರ್ಜುನಾಯಾಸವಿಧ್ವಂಸೀ ಕಾಲದಂಷ್ಟ್ರಾವಿಭೂಷಣಃ || ೧೭೭ ||
ಸುಜಾತಾನಂತಮಹಿಮಾ ಸ್ವಪ್ನವ್ಯಾಪಾರಿತಾರ್ಜುನಃ |
ಅಕಾಲಸಂಧ್ಯಾಘಟನಶ್ಚಕ್ರಾಂತರಿತಭಾಸ್ಕರಃ || ೧೭೮ ||
ದುಷ್ಟಪ್ರಮಥನಃ ಪಾರ್ಥಪ್ರತಿಜ್ಞಾಪರಿಪಾಲಕಃ |
ಸಿಂಧುರಾಜಶಿರಃಪಾತಸ್ಥಾನವಕ್ತಾ ವಿವೇಕದೃಕ್ || ೧೭೯ ||
ಸುಭದ್ರಾಶೋಕಹರಣೋ ದ್ರೋಣೋತ್ಸೇಕಾದಿವಿಸ್ಮಿತಃ |
ಪಾರ್ಥಮನ್ಯುನಿರಾಕರ್ತಾ ಪಾಂಡವೋತ್ಸವದಾಯಕಃ || ೧೮೦ ||
ಅಂಗುಷ್ಠಾಕ್ರಾಂತಕೌಂತೇಯರಥಃ ಶಕ್ತೋಽಹಿಶೀರ್ಷಜಿತ್ |
ಕಾಲಕೋಪಪ್ರಶಮನೋ ಭೀಮಸೇನಜಯಪ್ರದಃ || ೧೮೧ ||
ಅಶ್ವತ್ಥಾಮವಧಾಯಾಸತ್ರಾತಪಾಂಡುಸುತಃ ಕೃತೀ |
ಇಷೀಕಾಸ್ತ್ರಪ್ರಶಮನೋ ದ್ರೌಣಿರಕ್ಷಾವಿಚಕ್ಷಣಃ || ೧೮೨ ||
ಪಾರ್ಥಾಪಹಾರಿತದ್ರೌಣಿಚೂಡಾಮಣಿರಭಂಗುರಃ |
ಧೃತರಾಷ್ಟ್ರಪರಾಮೃಷ್ಟಭೀಮಪ್ರತಿಕೃತಿಸ್ಮಯಃ || ೧೮೩ ||
ಭೀಷ್ಮಬುದ್ಧಿಪ್ರದಃ ಶಾಂತಃ ಶರಚ್ಚಂದ್ರನಿಭಾನನಃ |
ಗದಾಗ್ರಜನ್ಮಾ ಪಾಂಚಾಲೀಪ್ರತಿಜ್ಞಾಪರಿಪಾಲಕಃ || ೧೮೪ ||
ಗಾಂಧಾರೀಕೋಪದೃಗ್ಗುಪ್ತಧರ್ಮಸೂನುರನಾಮಯಃ |
ಪ್ರಪನ್ನಾರ್ತಿಭಯಚ್ಛೇತ್ತಾ ಭೀಷ್ಮಶಲ್ಯವ್ಯಥಾಪಹಃ || ೧೮೫ ||
ಶಾಂತಃ ಶಾಂತನವೋದೀರ್ಣಸರ್ವಧರ್ಮಸಮಾಹಿತಃ |
ಸ್ಮಾರಿತಬ್ರಹ್ಮವಿದ್ಯಾರ್ಥಪ್ರೀತಪಾರ್ಥೋ ಮಹಾಸ್ತ್ರವಿತ್ || ೧೮೬ ||
ಪ್ರಸಾದಪರಮೋದಾರೋ ಗಾಂಗೇಯಸುಗತಿಪ್ರದಃ |
ವಿಪಕ್ಷಪಕ್ಷಕ್ಷಯಕೃತ್ಪರೀಕ್ಷಿತ್ಪ್ರಾಣರಕ್ಷಣಃ || ೧೮೭ ||
ಜಗದ್ಗುರುರ್ಧರ್ಮಸೂನೋರ್ವಾಜಿಮೇಧಪ್ರವರ್ತಕಃ |
ವಿಹಿತಾರ್ಥಾಪ್ತಸತ್ಕಾರೋ ಮಾಸಕಾತ್ಪರಿವರ್ತದಃ || ೧೮೮ ||
ಉತ್ತಂಕಹರ್ಷದಾತ್ಮೀಯದಿವ್ಯರೂಪಪ್ರದರ್ಶಕಃ |
ಜನಕಾವಗತಸ್ವೋಕ್ತಭಾರತಃ ಸರ್ವಭಾವನಃ || ೧೮೯ ||
ಅಸೋಢಯಾದವೋದ್ರೇಕೋ ವಿಹಿತಾಪ್ತಾದಿಪೂಜನಃ |
ಸಮುದ್ರಸ್ಥಾಪಿತಾಶ್ಚರ್ಯಮುಸಲೋ ವೃಷ್ಣಿವಾಹಕಃ || ೧೯೦ ||
ಮುನಿಶಾಪಾಯುಧಃ ಪದ್ಮಾಸನಾದಿತ್ರಿದಶಾರ್ಥಿತಃ |
ಸೃಷ್ಟಿಪ್ರತ್ಯವಹಾರೋತ್ಕಃ ಸ್ವಧಾಮಗಮನೋತ್ಸುಕಃ || ೧೯೧ ||
ಪ್ರಭಾಸಾಲೋಕನೋದ್ಯುಕ್ತೋ ನಾನಾವಿಧನಿಮಿತ್ತಕೃತ್ |
ಸರ್ವಯಾದವಸಂಸೇವ್ಯಃ ಸರ್ವೋತ್ಕೃಷ್ಟಪರಿಚ್ಛದಃ || ೧೯೨ ||
ವೇಲಾಕಾನನಸಂಚಾರೀ ವೇಲಾನಿಲಹೃತಶ್ರಮಃ |
ಕಾಲಾತ್ಮಾ ಯಾದವೋಽನಂತಃ ಸ್ತುತಿಸಂತುಷ್ಟಮಾನಸಃ || ೧೯೩ ||
ದ್ವಿಜಾಲೋಕನಸಂತುಷ್ಟಃ ಪುಣ್ಯತೀರ್ಥಮಹೋತ್ಸವಃ |
ಸತ್ಕಾರಾಹ್ಲಾದಿತಾಶೇಷಭೂಸುರಃ ಸುರವಲ್ಲಭಃ || ೧೯೪ ||
ಪುಣ್ಯತೀರ್ಥಾಪ್ಲುತಃ ಪುಣ್ಯಃ ಪುಣ್ಯದಸ್ತೀರ್ಥಪಾವನಃ |
ವಿಪ್ರಸಾತ್ಕೃತಗೋಕೋಟಿಃ ಶತಕೋಟಿಸುವರ್ಣದಃ || ೧೯೫ ||
ಸ್ವಮಾಯಾಮೋಹಿತಾಶೇಷವೃಷ್ಣಿವೀರೋ ವಿಶೇಷವಿತ್ |
ಜಲಜಾಯುಧನಿರ್ದೇಷ್ಟಾ ಸ್ವಾತ್ಮಾವೇಶಿತಯಾದವಃ || ೧೯೬ ||
ದೇವತಾಭೀಷ್ಟವರದಃ ಕೃತಕೃತ್ಯಃ ಪ್ರಸನ್ನಧೀಃ |
ಸ್ಥಿರಶೇಷಾಯುತಬಲಃ ಸಹಸ್ರಫಣಿವೀಕ್ಷಣಃ || ೧೯೭ ||
ಬ್ರಹ್ಮವೃಕ್ಷವರಚ್ಛಾಯಾಸೀನಃ ಪದ್ಮಾಸನಸ್ಥಿತಃ |
ಪ್ರತ್ಯಗಾತ್ಮಾ ಸ್ವಭಾವಾರ್ಥಃ ಪ್ರಣಿಧಾನಪರಾಯಣಃ || ೧೯೮ ||
ವ್ಯಾಧೇಷುವಿದ್ಧಪೂಜ್ಯಾಂಘ್ರಿರ್ನಿಷಾದಭಯಮೋಚನಃ |
ಪುಲಿಂದಸ್ತುತಿಸಂತುಷ್ಟಃ ಪುಲಿಂದಸುಗತಿಪ್ರದಃ || ೧೯೯ ||
ದಾರುಕಾರ್ಪಿತಪಾರ್ಥಾದಿಕರಣೀಯೋಕ್ತಿರೀಶಿತಾ |
ದಿವ್ಯದುಂದುಭಿಸಂಯುಕ್ತಃ ಪುಷ್ಪವೃಷ್ಟಿಪ್ರಪೂಜಿತಃ || ೨೦೦ ||
ಪುರಾಣಃ ಪರಮೇಶಾನಃ ಪೂರ್ಣಭೂಮಾ ಪರಿಷ್ಟುತಃ |
ಶುಕವಾಗಮೃತಾಬ್ಧೀಂದುಃ ಗೋವಿಂದೋ ಯೋಗಿನಾಂ ಪತಿಃ || ೨೦೧ ||
ವಸುದೇವಾತ್ಮಜಃ ಪುಣ್ಯೋ ಲೀಲಾಮಾನುಷವಿಗ್ರಹಃ |
ಜಗದ್ಗುರುರ್ಜಗನ್ನಾಥೋ ಗೀತಾಮೃತಮಹೋದಧಿಃ || ೨೦೨ ||
ಪುಣ್ಯಶ್ಲೋಕಸ್ತೀರ್ಥಪಾದೋ ವೇದವೇದ್ಯೋ ದಯಾನಿಧಿಃ |
ನಾರಾಯಣೋ ಯಜ್ಞಮೂರ್ತಿಃ ಪನ್ನಗಾಶನವಾಹನಃ |
ಪತಿರಾದ್ಯಃ ಪರಂ ಬ್ರಹ್ಮ ಪರಮಾತ್ಮಾ ಪರಾತ್ಪರಃ || ೨೦೩ ||
ಶ್ರೀಪರಮಾತ್ಮಾ ಪರಾತ್ಪರಃ ಓಂ ನಮಃ ಇತಿ ||
– ಫಲಶ್ರುತಿಃ –
ಇದಂ ಸಹಸ್ರಂ ಕೃಷ್ಣಸ್ಯ ನಾಮ್ನಾಂ ಸರ್ವಾರ್ಥದಾಯಕಮ್ |
ಅನಂತರೂಪೀ ಭಗವಾನ್ ವ್ಯಾಖ್ಯಾತಾಽಽದೌ ಸ್ವಯಂಭುವೇ || ೨೦೪ ||
ತೇನ ಪ್ರೋಕ್ತಂ ವಸಿಷ್ಠಾಯ ತತೋ ಲಬ್ಧಾ ಪರಾಶರಃ |
ವ್ಯಾಸಾಯ ತೇನ ಸಂಪ್ರೋಕ್ತಂ ಶುಕೋ ವ್ಯಾಸಾದವಾಪ್ತವಾನ್ || ೨೦೫ ||
ತಚ್ಛಿಷ್ಯೈರ್ಬಹುಭಿರ್ಭೂಮೌ ಖ್ಯಾಪಿತಂ ದ್ವಾಪರೇ ಯುಗೇ |
ಕೃಷ್ಣಾಜ್ಞಯಾ ಹರಿಹರಃ ಕಲೌ ಪ್ರಾಖ್ಯಾಪಯದ್ವಿಭುಃ || ೨೦೬ ||
ಇದಂ ಪಠತಿ ಭಕ್ತ್ಯಾ ಯಃ ಶೃಣೋತಿ ಚ ಸಮಾಹಿತಃ |
ಸ್ವಸಿದ್ಧ್ಯೈ ಪ್ರಾರ್ಥಯಂತ್ಯೇನಂ ತೀರ್ಥಕ್ಷೇತ್ರಾದಿದೇವತಾಃ || ೨೦೭ ||
ಪ್ರಾಯಶ್ಚಿತ್ತಾನ್ಯಶೇಷಾಣಿ ನಾಲಂ ಯಾನಿ ವ್ಯಪೋಹಿತುಮ್ |
ತಾನಿ ಪಾಪಾನಿ ನಶ್ಯಂತಿ ಸಕೃದಸ್ಯ ಪ್ರಶಂಸನಾತ್ || ೨೦೮ ||
ಋಣತ್ರಯವಿಮುಕ್ತಸ್ಯ ಶ್ರೌತಸ್ಮಾರ್ತಾನುವರ್ತಿನಃ |
ಋಷೇಸ್ತ್ರಿಮೂರ್ತಿರೂಪಸ್ಯ ಫಲಂ ವಿಂದೇದಿದಂ ಪಠನ್ || ೨೦೯ ||
ಇದಂ ನಾಮಸಹಸ್ರಂ ಯಃ ಪಠತ್ಯೇತಚ್ಛೃಣೋತಿ ಚ |
ಶಿವಲಿಂಗಸಹಸ್ರಸ್ಯ ಸ ಪ್ರತಿಷ್ಠಾಫಲಂ ಲಭೇತ್ || ೨೧೦ ||
ಇದಂ ಕಿರೀಟೀ ಸಂಜಪ್ಯ ಜಯೀ ಪಾಶುಪತಾಸ್ತ್ರಭಾಕ್ |
ಕೃಷ್ಣಸ್ಯ ಪ್ರಾಣಭೂತಃ ಸನ್ ಕೃಷ್ಣಂ ಸಾರಥಿಮಾಪ್ತವಾನ್ || ೨೧೧ ||
ದ್ರೌಪದ್ಯಾ ದಮಯಂತ್ಯಾ ಚ ಸಾವಿತ್ರ್ಯಾ ಚ ಸುಶೀಲಯಾ |
ದುರಿತಾನಿ ಜಿತಾನ್ಯೇತಜ್ಜಪಾದಾಪ್ತಂ ಚ ವಾಂಛಿತಮ್ || ೨೧೨ ||
ಕಿಮಿದಂ ಬಹುನಾ ಶಂಸನ್ಮಾನವೋ ಮೋದನಿರ್ಭರಃ |
ಬ್ರಹ್ಮಾನಂದಮವಾಪ್ಯಾಂತೇ ಕೃಷ್ಣಸಾಯೂಜ್ಯಮಾಪ್ನುಯಾತ್ || ೨೧೩ ||
ಇತಿ ಶ್ರೀವಿಷ್ಣುಧರ್ಮೋತ್ತರ ಪುರಾಣೇ ಶ್ರೀ ಕೃಷ್ಣ ಸಹಸ್ರನಾಮ ಸ್ತೋತ್ರಮ್ ||
ಇನ್ನಷ್ಟು ಶ್ರೀ ಕೃಷ್ಣ ಸ್ತೋತ್ರಗಳು ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.