Read in తెలుగు / ಕನ್ನಡ / தமிழ் / English (IAST)
<< ನಾರಾಯಣೀಯಂ ಅಷ್ಟಪಞ್ಚಾಶತ್ತಮದಶಕಮ್
ಏಕೋನಷಷ್ಟಿತಮದಶಕಮ್ (೫೯) – ವೇಣುಗಾನವರ್ಣನಮ್
ತ್ವದ್ವಪುರ್ನವಕಲಾಯಕೋಮಲಂ
ಪ್ರೇಮದೋಹನಮಶೇಷಮೋಹನಮ್ |
ಬ್ರಹ್ಮತತ್ತ್ವಪರಚಿನ್ಮುದಾತ್ಮಕಂ
ವೀಕ್ಷ್ಯ ಸಮ್ಮುಮುಹುರನ್ವಹಂ ಸ್ತ್ರಿಯಃ || ೫೯-೧ ||
ಮನ್ಮಥೋನ್ಮಥಿತಮಾನಸಾಃ ಕ್ರಮಾ-
ತ್ತ್ವದ್ವಿಲೋಕನರತಾಸ್ತತಸ್ತತಃ |
ಗೋಪಿಕಾಸ್ತವ ನ ಸೇಹಿರೇ ಹರೇ
ಕಾನನೋಪಗತಿಮಪ್ಯಹರ್ಮುಖೇ || ೫೯-೨ ||
ನಿರ್ಗತೇ ಭವತಿ ದತ್ತದೃಷ್ಟಯ-
ಸ್ತ್ವದ್ಗತೇನ ಮನಸಾ ಮೃಗೇಕ್ಷಣಾಃ |
ವೇಣುನಾದಮುಪಕರ್ಣ್ಯ ದೂರತ-
ಸ್ತ್ವದ್ವಿಲಾಸಕಥಯಾಭಿರೇಮಿರೇ || ೫೯-೩ ||
ಕಾನನಾನ್ತಮಿತವಾನ್ಭವಾನಪಿ
ಸ್ನಿಗ್ಧಪಾದಪತಲೇ ಮನೋರಮೇ |
ವ್ಯತ್ಯಯಾಕಲಿತಪಾದಮಾಸ್ಥಿತಃ
ಪ್ರತ್ಯಪೂರಯತ ವೇಣುನಾಲಿಕಾಮ್ || ೫೯-೪ ||
ಮಾರಬಾಣಧುತಖೇಚರೀಕುಲಂ
ನಿರ್ವಿಕಾರಪಶುಪಕ್ಷಿಮಣ್ಡಲಮ್ |
ದ್ರಾವಣಂ ಚ ದೃಷದಾಮಪಿ ಪ್ರಭೋ
ತಾವಕಂ ವ್ಯಜನಿ ವೇಣುಕೂಜಿತಮ್ || ೫೯-೫ ||
ವೇಣುರನ್ಧ್ರತರಲಾಙ್ಗುಲೀದಲಂ
ತಾಲಸಞ್ಚಲಿತಪಾದಪಲ್ಲವಮ್ |
ತತ್ಸ್ಥಿತಂ ತವ ಪರೋಕ್ಷಮಪ್ಯಹೋ
ಸಂವಿಚಿನ್ತ್ಯ ಮುಮುಹುರ್ವ್ರಜಾಙ್ಗನಾಃ || ೫೯-೬ ||
ನಿರ್ವಿಶಙ್ಕಭವದಙ್ಗದರ್ಶಿನೀಃ
ಖೇಚರೀಃ ಖಗಮೃಗಾನ್ಪಶೂನಪಿ |
ತ್ವತ್ಪದಪ್ರಣಯಿ ಕಾನನಂ ಚ ತಾಃ
ಧನ್ಯಧನ್ಯಮಿತಿ ನನ್ವಮಾನಯನ್ || ೫೯-೭ ||
ಆಪಿಬೇಯಮಧರಾಮೃತಂ ಕದಾ
ವೇಣುಭುಕ್ತರಸಶೇಷಮೇಕದಾ |
ದೂರತೋ ಬತ ಕೃತಂ ದುರಾಶಯೇ-
ತ್ಯಾಕುಲಾ ಮುಹುರಿಮಾಃ ಸಮಾಮುಹನ್ || ೫೯-೮ ||
ಪ್ರತ್ಯಹಂ ಚ ಪುನರಿತ್ಥಮಙ್ಗನಾ-
ಶ್ಚಿತ್ತಯೋನಿಜನಿತಾದನುಗ್ರಹಾತ್ |
ಬದ್ಧರಾಗವಿವಶಾಸ್ತ್ವಯಿ ಪ್ರಭೋ
ನಿತ್ಯಮಾಪುರಿಹ ಕೃತ್ಯಮೂಢತಾಮ್ || ೫೯-೯ ||
ರಾಗಸ್ತಾವಜ್ಜಾಯತೇ ಹಿ ಸ್ವಭಾವಾ-
ನ್ಮೋಕ್ಷೋಪಾಯೋ ಯತ್ನತಃ ಸ್ಯಾನ್ನ ವಾ ಸ್ಯಾತ್ |
ತಾಸಾಂ ತ್ವೇಕಂ ತದ್ವಯಂ ಲಬ್ಧಮಾಸೀತ್
ಭಾಗ್ಯಂ ಭಾಗ್ಯಂ ಪಾಹಿ ಮಾಂ ಮಾರುತೇಶ || ೫೯-೧೦ ||
[** ವಾತಾಲಯೇಶ **]
ಇತಿ ಏಕೋನಷಷ್ಟಿತಮದಶಕಂ ಸಮಾಪ್ತಮ್ |
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.