Read in తెలుగు / ಕನ್ನಡ / தமிழ் / English (IAST)
ದ್ವಿಚತ್ವಾರಿಂಶದಶಕಮ್ (೪೨) – ಶಕಟಾಸುರವಧಮ್ |
ಕದಾಪಿ ಜನ್ಮರ್ಕ್ಷದಿನೇ ತವ ಪ್ರಭೋ ನಿಮನ್ತ್ರಿತಜ್ಞಾತಿವಧೂಮಹೀಸುರಾ |
ಮಹಾನಸಸ್ತ್ವಾಂ ಸವಿಧೇ ನಿಧಾಯ ಸಾ ಮಹಾನಸಾದೌ ವವೃತೇ ವ್ರಜೇಶ್ವರೀ || ೪೨-೧ ||
ತತೋ ಭವತ್ತ್ರಾಣನಿಯುಕ್ತಬಾಲಕ-ಪ್ರಭೀತಿಸಙ್ಕ್ರನ್ದನಸಙ್ಕುಲಾರವೈಃ |
ವಿಮಿಶ್ರಮಶ್ರಾವಿ ಭವತ್ಸಮೀಪತಃ ಪರಿಸ್ಫುಟದ್ದಾರುಚಟಚ್ಚಟಾರವಃ || ೪೨-೨ ||
ತತಸ್ತದಾಕರ್ಣನಸಂಭ್ರಮಶ್ರಮ-ಪ್ರಕಮ್ಪಿವಕ್ಷೋಜಭರಾ ವ್ರಜಾಙ್ಗನಾಃ |
ಭವನ್ತಮನ್ತರ್ದದೃಶುಃ ಸಮನ್ತತೋ ವಿನಿಷ್ಪತದ್ದಾರುಣದಾರುಮಧ್ಯಗಮ್ || ೪೨-೩ ||
ಶಿಶೋರಹೋ ಕಿಂ ಕಿಮಭೂದಿತಿ ದ್ರುತಂ ಪ್ರಧಾವ್ಯ ನನ್ದಃ ಪಶುಪಾಶ್ಚ ಭೂಸುರಾಃ |
ಭವನ್ತಮಾಲೋಕ್ಯ ಯಶೋದಯಾ ಧೃತಂ ಸಮಾಶ್ವಸನ್ನಶ್ರುಜಲಾರ್ದ್ರಲೋಚನಾಃ || ೪೨-೪ ||
ಕಸ್ಕೋ ನು ಕೌತಸ್ಕುತ ಏಷ ವಿಸ್ಮಯೋ ವಿಶಙ್ಕಟಂ ಯಚ್ಛಕಟಂ ವಿಪಾಟಿತಮ್ |
ನ ಕಾರಣಂ ಕಿಞ್ಚಿದಿಹೇತಿ ತೇ ಸ್ಥಿತಾಃ ಸ್ವನಾಸಿಕಾದತ್ತಕರಾಸ್ತ್ವದೀಕ್ಷಕಾಃ || ೪೨-೫ ||
ಕುಮಾರಕಸ್ಯಾಸ್ಯ ಪಯೋಧರಾರ್ಥಿನಃ ಪ್ರರೋದನೇ ಲೋಲಪದಾಂಬುಜಾಹತಮ್ |
ಮಯಾ ಮಯಾ ದೃಷ್ಟಮನೋ ವಿಪರ್ಯಗಾದಿತೀಶ ತೇ ಪಾಲಕಬಾಲಕಾ ಜಗುಃ || ೪೨-೬ ||
ಭಿಯಾ ತದಾ ಕಿಞ್ಚಿದಜಾನತಾಮಿದಂ ಕುಮಾರಕಾಣಾಮತಿದುರ್ಘಟಂ ವಚಃ |
ಭವತ್ಪ್ರಭಾವಾವಿದುರೈರಿತೀರಿತಂ ಮನಾಗಿವಾಶಙ್ಕ್ಯತ ದೃಷ್ಟಪೂತನೈಃ || ೪೨-೭ ||
ಪ್ರವಾಲತಾಮ್ರಂ ಕಿಮಿದಂ ಪದಂ ಕ್ಷತಂ ಸರೋಜರಮ್ಯೌ ನು ಕರೌ ವಿರೋಜಿತೌ |
ಇತಿ ಪ್ರಸರ್ಪತ್ಕರುಣಾತರಙ್ಗಿತಾ-ಸ್ತ್ವದಙ್ಗಮಾಪಸ್ಪೃಶುರಙ್ಗನಾಜನಾಃ || ೪೨-೮ ||
ಅಯೇ ಸುತಂ ದೇಹಿ ಜಗತ್ಪತೇಃ ಕೃಪಾತರಙ್ಗಪಾತಾತ್ಪರಿಪಾತಮದ್ಯ ಮೇ |
ಇತಿ ಸ್ಮ ಸಙ್ಗೃಹ್ಯ ಪಿತಾ ತ್ವದಙ್ಗಕಂ ಮುಹುರ್ಮುಹುಃ ಶ್ಲಿಷ್ಯತಿ ಜಾತಕಣ್ಟಕಃ || ೪೨-೯ ||
ಅನೋನಿಲೀನಃ ಕಿಲ ಹನ್ತುಮಾಗತಃ ಸುರಾರಿರೇವಂ ಭವತಾ ವಿಹಿಂಸಿತಃ |
ರಜೋಽಪಿ ನೋ ದೃಷ್ಟಮಮುಷ್ಯ ತತ್ಕಥಂ ಸ ಶುದ್ಧಸತ್ತ್ವೇ ತ್ವಯಿ ಲೀನವಾನ್ಧ್ರುವಮ್ || ೪೨-೧೦ ||
ಪ್ರಪೂಜಿತೈಸ್ತತ್ರ ತತೋ ದ್ವಿಜಾತಿಭಿರ್ವಿಶೇಷತೋ ಲಂಭಿತಮಙ್ಗಲಾಶಿಷಃ |
ವ್ರಜಂ ನಿಜೈರ್ಬಾಲ್ಯರಸೈರ್ವಿಮೋಹಯನ್ಮರುತ್ಪುರಾಧೀಶ ರುಜಾಂ ಜಹೀಹಿ ಮೇ || ೪೨-೧೧ ||
ಇತಿ ದ್ವಿಚತ್ವಾರಿಂಶದಶಕಂ ಸಮಾಪ್ತಮ್ |
ನಾರಾಯಣೀಯಂ ತ್ರಿಚತ್ವಾರಿಂಶದಶಕಮ್ >>
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.