Read in తెలుగు / ಕನ್ನಡ / தமிழ் / देवनागरी / English (IAST)
|| rāvaṇivadhaḥ ||
sa hatāśvō mahātējā bhūmau tiṣṭhanniśācaraḥ |
indrajitparamakruddhaḥ samprajajvāla tējasā || 1 ||
tau dhanvinau jighāṁsantāvanyōnyamiṣubhirbhr̥śam |
vijayēnābhiniṣkrāntau vanē gajavr̥ṣāviva || 2 ||
nibarhayantaścānyōnyaṁ tē rākṣasavanaukasaḥ |
bhartāraṁ na jahuryuddhē sampatantastatastataḥ || 3 ||
tatastānrākṣasānsarvānharṣayanrāvaṇātmajaḥ |
stuvānō harṣamāṇaśca idaṁ vacanamabravīt || 4 ||
tamasā bahulēnēmāḥ saṁsaktāḥ sarvatō diśaḥ |
nēha vijñāyatē svō vā parō vā rākṣasōttamāḥ || 5 ||
dhr̥ṣṭaṁ bhavantō yudhyantu harīṇāṁ mōhanāya vai |
ahaṁ tu rathamāsthāya āgamiṣyāmi samyugam || 6 ||
tathā bhavantaḥ kurvantu yathēmē kānanaukasaḥ |
na yuddhyēyurdurātmānaḥ praviṣṭē nagaraṁ mayi || 7 ||
ityuktvā rāvaṇasutō vañcayitvā vanaukasaḥ |
pravivēśa purīṁ laṅkāṁ rathahētōramitrahā || 8 ||
sa rathaṁ bhūṣayitvā tu ruciraṁ hēmabhūṣitam |
prāsāsiśatasampūrṇaṁ yuktaṁ paramavājibhiḥ || 9 ||
adhiṣṭhitaṁ hayajñēna sūtēnāptōpadēśinā |
ārurōha mahātējā rāvaṇiḥ samitiñjayaḥ || 10 ||
sa rākṣasagaṇairmukhyairvr̥tō mandōdarīsutaḥ |
niryayau nagarāttūrṇaṁ kr̥tāntabalacōditaḥ || 11 ||
sō:’bhiniṣkramya nagarādindrajitparavīrahā |
abhyayājjavanairaśvairlakṣmaṇaṁ savibhīṣaṇam || 12 ||
tatō rathastamālōkya saumitrī rāvaṇātmajam |
vānarāśca mahāvīryā rākṣasaśca vibhīṣaṇaḥ || 13 ||
vismayaṁ paramaṁ jagmurlāghavāttasya dhīmataḥ |
rāvaṇiścāpi saṅkruddhō raṇē vānarayūthapān || 14 ||
pātayāmāsa bāṇaughaiḥ śataśō:’tha sahasraśaḥ |
sa maṇḍalīkr̥tadhanū rāvaṇiḥ samitiñjayaḥ || 15 ||
harīnabhyahanatkruddhaḥ paraṁ lāghavamāsthitaḥ |
tē vadhyamānā harayō nārācairbhīmavikramāḥ || 16 ||
saumitriṁ śaraṇaṁ prāptāḥ prajāpatimiva prajāḥ |
tataḥ samarakōpēna jvalitō raghunandanaḥ || 17 ||
cicchēda kārmukaṁ tasya darśayanpāṇilāghavam |
sō:’nyatkārmukamādaya sajyaṁ cakrē tvaranniva || 18 ||
tadapyasya tribhirbāṇairlakṣmaṇō nirakr̥ntata |
athainaṁ chinnadhanvānamāśīviṣaviṣōpamaiḥ || 19 ||
vivyādhōrasi saumitrī rāvaṇiṁ pañcabhiḥ śaraiḥ |
tē tasya kāyaṁ nirbhidya mahākārmukaniḥsr̥tāḥ || 20 ||
nipēturdharaṇīṁ bāṇā raktā iva mahōragāḥ |
sa bhinnavarmā rudhiraṁ vamanvaktrēṇa rāvaṇiḥ || 21 ||
jagrāha kārmukaśrēṣṭhaṁ dr̥ḍhajyaṁ balavattaram |
sa lakṣmaṇaṁ samuddiśya paraṁ lāghavamāsthitaḥ || 22 ||
vavarṣa śaravarṣāṇi varṣāṇīva purandaraḥ |
muktamindrajitā tattu śaravarṣamarindamaḥ || 23 ||
avārayadasambhrāntō lakṣmaṇaḥ sudurāsadam |
darśayāmāsa ca tadā rāvaṇiṁ raghunandanaḥ || 24 ||
asambhrāntō mahātējāstadadbhutamivābhavat |
tatastānrākṣasānsarvāṁstribhirēkaikamāhavē || 25 ||
avidhyatparamakruddhaḥ śīghrāstraṁ sampradarśayan |
rākṣasēndrasutaṁ cāpi bāṇaughaiḥ samatāḍayat || 26 ||
sō:’tividdhō balavatā śatruṇā śatrughātinā |
asaktaṁ prēṣayāmāsa lakṣmaṇāya bahūn śarān || 27 ||
tānaprāptān śitairbāṇaiścicchēda raghunandanaḥ |
sārathērasya ca raṇē rathinō rathasattamaḥ || 28 ||
śirō jahāra dharmātmā bhallēnānataparvaṇā |
asūtāstē hayāstatra rathamūhuraviklavāḥ || 29 ||
maṇḍalānyabhidhāvantastadadbhutamivābhavat |
amarṣavaśamāpannaḥ saumitrirdr̥ḍhavikramaḥ || 30 ||
pratyaviddhyaddhayāṁstasya śarairvitrāsayanraṇē |
amr̥ṣyamāṇastatkarma rāvaṇasya sutō balī || 31 ||
vivyādha daśabhirbāṇaiḥ saumitriṁ tamamarṣaṇam |
tē tasya vajrapratimāḥ śarāḥ sarpaviṣōpamāḥ || 32 ||
vilayaṁ jagmurāhatya kavacaṁ kāñcanaprabham |
abhēdyakavacaṁ matvā lakṣmaṇaṁ rāvaṇātmajaḥ || 33 ||
lalāṭē lakṣmaṇaṁ bāṇaiḥ supuṅkhaistribhirindrajit |
avidhyatparamakruddhaḥ śīghrāstraṁ ca pradarśayan || 34 ||
taiḥ pr̥ṣatkairlalāṭasthaiḥ śuśubhē raghunandanaḥ |
raṇāgrē samaraślāghī triśr̥ṅga iva parvataḥ || 35 ||
sa tathā hyarditō bāṇai rākṣasēna mahāmr̥dhē |
tamāśu prativivyādha lakṣmaṇaḥ pañcabhiḥ śaraiḥ || 36 ||
vikr̥ṣyēndrajitō yuddhē vadanē śubhakuṇḍalē |
lakṣmaṇēndrajitau vīrau mahābalaśarāsanau || 37 ||
anyōnyaṁ jaghnaturbāṇairviśikhairbhīmavikramau |
tataḥ śōṇitadigdhāṅgau lakṣmaṇēndrajitāvubhau || 38 ||
raṇē tau rējaturvīrau puṣpitāviva kiṁśukau |
tau parasparamabhyētya sarvagātrēṣu dhanvinau || 39 ||
ghōrairvivyadhaturbāṇaiḥ kr̥tabhāvāvubhau jayē |
tataḥ samarakōpēna samyuktō rāvaṇātmajaḥ || 40 ||
vibhīṣaṇaṁ tribhirbāṇairvivyādha vadanē śubhē |
ayōmukhaistrirbhirviddhvā rākṣasēndraṁ vibhīṣaṇam || 41 ||
ēkaikēnābhivivyādha tānsarvānhariyūthapān |
tasmai dr̥ḍhataraṁ kruddhō jaghāna gadayā hayān || 42 ||
vibhīṣaṇō mahātējā rāvaṇēḥ sa durātmanaḥ |
sa hatāśvādavaplutya rathānnihatasārathēḥ || 43 ||
rathaśaktiṁ mahātējāḥ pitr̥vyāya mumōca ha |
tāmāpatantīṁ samprēkṣya sumitrānandavardhanaḥ || 44 ||
cicchēda niśitairbāṇairdaśadhā sā:’patadbhuvi |
tasmai dr̥ḍhadhanuḥ kruddhō hatāśvāya vibhīṣaṇaḥ || 45 ||
vajrasparśasamānpañca sasarjōrasi mārgaṇān |
tē tasya kāyaṁ nirbhidya rukmapuṅkhā nimittagāḥ || 46 ||
babhūvurlōhitā digdhā raktā iva mahōragāḥ |
sa pitr̥vyāya saṅkruddha indrajiccharamādadē || 47 ||
uttamaṁ rakṣasāṁ madhyē yamadattaṁ mahābalaḥ |
taṁ samīkṣya mahātējā mahēṣuṁ tēna saṁhitam || 48 ||
lakṣmaṇō:’pyādadē bāṇamanyaṁ bhīmaparākramaḥ |
kubērēṇa svayaṁ svapnē svasmai dattaṁ mahātmanā || 49 ||
durjayaṁ durviṣahyaṁ ca sēndrairapi surāsuraiḥ |
tayōstē dhanuṣī śrēṣṭhē bāhubhiḥ parighōpamaiḥ || 50 ||
vikr̥ṣyamāṇē balavat krauñcāviva cukūjatuḥ |
tābhyāṁ tau dhanuṣi śrēṣṭhē saṁhitau sāyakōttamau || 51 ||
vikr̥ṣyamāṇau vīrābhyāṁ bhr̥śaṁ jajvalatuḥ śriyā |
tau bhāsayantāvākāśaṁ dhanurbhyāṁ viśikhau cyutau || 52 ||
mukhēna mukhamāhatya sannipētaturōjasā |
sannipātastayōrāsīccharayōrghōrarūpayōḥ || 53 ||
sadhūmavisphuliṅgaśca tajjōgnirdāruṇō:’bhavat |
tau mahāgrahasaṅkāśāvanyōnyaṁ sannipatya ca || 54 ||
saṅgrāmē śatadhā yāntau mēdinyāṁ vinipētatuḥ |
śarau pratihatau dr̥ṣṭvā tāvubhau raṇamūrdhani || 55 ||
vrīḍitau jātarōṣau ca lakṣmaṇēndrajitau tadā |
susaṁrabdhastu saumitrirastraṁ vāruṇamādadē || 56 ||
raudraṁ mahēndrajidyuddhē vyasr̥jadyudhi niṣṭhitaḥ |
tēna tadvihataṁ tvastraṁ vāruṇaṁ paramādbhutam || 57 ||
tataḥ kruddhō mahātējā indrajitsamitiñjayaḥ |
āgnēyaṁ sandadhē dīptaṁ sa lōkaṁ saṅkṣipanniva || 58 ||
saurēṇāstrēṇa tadvīrō lakṣmaṇaḥ pratyavārayat |
astraṁ nivāritaṁ dr̥ṣṭvā rāvaṇiḥ krōdhamūrchitaḥ || 59 ||
āsuraṁ śatrunāśāya ghōramastraṁ samādadē |
tasmāccāpādviniṣpēturbhāsvarāḥ kūṭamudgarāḥ || 60 ||
śūlāni ca bhuśuṇḍyaśca gadāḥ khaḍgāḥ paraśvadhāḥ |
taddr̥ṣṭvā lakṣmaṇaḥ saṅkhyē ghōramastramathāsuram || 61 ||
avāryaṁ sarvabhūtānāṁ sarvaśatruvināśanam |
māhēśvarēṇa dyutimāṁstadastraṁ pratyavārayat || 62 ||
tayōḥ sutumulaṁ yuddhaṁ sambabhūvādbhutōpamam |
gaganasthāni bhūtāni lakṣmaṇaṁ paryavārayan || 63 ||
bhairavābhirutē bhīmē yuddhē vānararakṣasām |
bhūtairbahubhirākāśaṁ vismitairāvr̥taṁ babhau || 64 ||
r̥ṣayaḥ pitarō dēvā gandharvā garuḍōragāḥ |
śatakratuṁ puraskr̥tya rarakṣurlakṣmaṇaṁ raṇē || 65 ||
athānyaṁ mārgaṇaśrēṣṭhaṁ sandadhē rāghavānujaḥ |
hutāśanasamasparśaṁ rāvaṇātmajadāraṇam || 66 ||
supatramanuvr̥ttāṅgaṁ suparvāṇaṁ susaṁsthitam |
suvarṇavikr̥taṁ vīraḥ śarīrāntakaraṁ śaram || 67 ||
durāvāraṁ durviṣahyaṁ rākṣasānāṁ bhayāvaham |
āśīviṣaviṣaprakhyaṁ dēvasaṅghaiḥ samarcitam || 68 ||
yēna śakrō mahātējā dānavānajayatprabhuḥ |
purā daivāsurē yuddhē vīryavānharivāhanaḥ || 69 ||
tadaindramastraṁ saumitriḥ samyugēṣvaparājitam |
śaraśrēṣṭhaṁ dhanuḥ śrēṣṭhē naraśrēṣṭhō:’bhisandadhē || 70 ||
sandhāyāmitradalanaṁ vicakarṣa śarāsanam |
sajyamāyamya durdharṣaṁ kālō lōkakṣayē yathā || 71 ||
sandhāya dhanuṣi śrēṣṭhē vikarṣannidamabravīt |
lakṣmīvām̐llakṣmaṇō vākyamarthasādhakamātmanaḥ || 72 ||
dharmātmā satyasandhaśca rāmō dāśarathiryadi |
pauruṣē cāpratidvandvaḥ śarainaṁ jahi rāvaṇim || 73 ||
ityuktvā bāṇamākarṇaṁ vikr̥ṣya tamajihmagam |
lakṣmaṇaḥ samarē vīraḥ sasarjēndrajitaṁ prati || 74 ||
aindrāstrēṇa samāyōjya lakṣmaṇaḥ paravīrahā |
sa śiraḥ saśirastrāṇaṁ śrīmajjvalitakuṇḍalam || 75 ||
pramathyēndrajitaḥ kāyātpātayāmāsa bhūtalē |
tadrākṣasatanūjasya chinnaskandhaṁ śirō mahat || 76 ||
tapanīyanibhaṁ bhūmau dadr̥śē rudhirōkṣitam |
hatastu nipapātāśu dharaṇyāṁ rāvaṇātmajaḥ || 77 ||
kavacī saśirastrāṇō vidhvastaḥ saśarāsanaḥ |
cukruśustē tataḥ sarvē vānarāḥ savibhīṣaṇāḥ || 78 ||
hr̥ṣyantō nihatē tasmindēvā vr̥travadhē yathā |
athāntarikṣē dēvānāmr̥ṣīṇāṁ ca mahātmanām || 79 ||
abhijajñē ca sannādō gandharvāpsarasāmapi |
patitaṁ tamabhijñāya rākṣasī sā mahācamūḥ || 80 ||
vadhyamānā diśō bhējē haribhirjitakāśibhiḥ |
vānarairvadhyamānāstē śastrāṇyutsr̥jya rākṣasāḥ || 81 ||
laṅkāmabhimukhāḥ sastrurnaṣṭasañjñāḥ pradhāvitāḥ |
dudruvurbahudhā bhītā rākṣasāḥ śataśō diśaḥ || 82 ||
tyaktvā praharaṇānsarvē paṭ-ṭiśāsiparaśvadhān |
kēcillaṅkāṁ paritrastāḥ praviṣṭā vānarārditāḥ || 83 ||
samudrē patitāḥ kēcitkēcitparvatamāśritāḥ |
hatamindrajitaṁ dr̥ṣṭvā śayānaṁ samarakṣitau || 84 ||
rākṣasānāṁ sahasrēṣu na kaścitpratyadr̥śyata |
yathāstaṅgata ādityē nāvatiṣṭhanti raśmayaḥ || 85 ||
tathā tasminnipatitē rākṣasāstē gatā diśaḥ |
śāntaraśmirivādityō nirvāṇa iva pāvakaḥ || 86 ||
sa babhūva mahātējā vyapāstagatajīvitaḥ |
praśāntapīḍābahulō naṣṭāriṣṭaḥ pratāpavān || 87 ||
babhūva lōkaḥ patitē rākṣasēndrasutē tadā |
harṣaṁ ca śakrō bhagavānsaha sarvaiḥ surarṣabhaiḥ || 88 ||
jagāma nihatē tasminrākṣasē pāpakarmaṇi |
ākāśē cāpi dēvānāṁ śuśruvē dundubhisvanaḥ || 89 ||
nr̥tyadbhirapsarōbhiśca gandharvaiśca mahātmabhiḥ |
vavr̥ṣuḥ puṣpavarṣāṇi tadadbhutamabhūttadā || 90 ||
praśaśaṁsurhatē tasminrākṣasē krūrakarmaṇi |
śuddhā āpō diśaścaiva jahr̥ṣurdaityadānavāḥ || 91 ||
ājagmuḥ patitē tasminsarvalōkabhayāvahē |
ūcuśca sahitāḥ sarvē dēvagandharvadānavāḥ || 92 ||
vijvarāḥ śāntakaluṣā brāhmaṇā vicarantviti |
tatō:’bhyanandan saṁhr̥ṣṭāḥ samarē hariyūthapāḥ || 93 ||
tamapratibalaṁ dr̥ṣṭvā hataṁ nairr̥tapuṅgavam |
vibhīṣaṇō hanūmāṁśca jāmbavāṁścarkṣayūthapaḥ || 94 ||
vijayēnābhinandantastuṣṭuvuścāpi lakṣmaṇam |
kṣvēlantaśca nadantaśca garjantaśca plavaṅgamāḥ || 95 ||
labdhalakṣā raghusutaṁ parivāryōpatasthirē |
lāṅgūlāni pravidhyantaḥ sphōṭayantaśca vānarāḥ || 96 ||
lakṣmaṇō jayatītyēvaṁ vākyaṁ viśrāvayaṁstadā |
anyōnyaṁ ca samāśliṣya kapayō hr̥ṣṭamānasāḥ |
cakruruccāvacaguṇā rāghavāśrayajāḥ kathāḥ || 97 ||
tadasukaramathābhivīkṣya hr̥ṣṭāḥ
priyasuhr̥dō yudhi lakṣmaṇasya karma |
paramamupalabhanmanaḥ praharṣaṁ
vinihatamindraripuṁ niśamya dēvāḥ || 98 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē ēkanavatitamaḥ sargaḥ || 91 ||
yuddhakāṇḍa dvinavatitamaḥ sargaḥ (92) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē yuddhakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.