Read in తెలుగు / ಕನ್ನಡ / தமிழ் / English (IAST)
ಷಣ್ಣವತಿತಮದಶಕಮ್ (೯೬) – ಭಗವದ್ವಿಭೂತಯಃ ತಥಾ ಜ್ಞಾನಕರ್ಮಭಕ್ತಿಯೋಗಾಃ |
ತ್ವಂ ಹಿ ಬ್ರಹ್ಮೈವ ಸಾಕ್ಷಾತ್ ಪರಮುರುಮಹಿಮನ್ನಕ್ಷರಾಣಾಮಕಾರ-
ಸ್ತಾರೋ ಮನ್ತ್ರೇಷು ರಾಜ್ಞಾಂ ಮನುರಸಿ ಮುನಿಷು ತ್ವಂ ಭೃಗುರ್ನಾರದೋಽಪಿ |
ಪ್ರಹ್ಲಾದೋ ದಾನವಾನಾಂ ಪಶುಷು ಚ ಸುರಭಿಃ ಪಕ್ಷಿಣಾಂ ವೈನತೇಯೋ
ನಾಗಾನಾಮಸ್ಯನನ್ತಃ ಸುರಸರಿದಪಿ ಚ ಸ್ರೋತಸಾಂ ವಿಶ್ವಮೂರ್ತೇ || ೯೬-೧ ||
ಬ್ರಹ್ಮಣ್ಯಾನಾಂ ಬಲಿಸ್ತ್ವಂ ಕ್ರತುಷು ಚ ಜಪಯಜ್ಞೋಽಸಿ ವೀರೇಷು ಪಾರ್ಥಃ
ಭಕ್ತಾನಾಮುದ್ಧವಸ್ತ್ವಂ ಬಲಮಸಿ ಬಲಿನಾಂ ಧಾಮ ತೇಜಸ್ವಿನಾಂ ತ್ವಮ್ |
ನಾಸ್ತ್ಯನ್ತಸ್ತ್ವದ್ವಿಭೂತೇರ್ವಿಕಸದತಿಶಯಂ ವಸ್ತು ಸರ್ವಂ ತ್ವಮೇವ
ತ್ವಂ ಜೀವಸ್ತ್ವಂ ಪ್ರಧಾನಂ ಯದಿಹ ಭವದೃತೇ ತನ್ನ ಕಿಞ್ಚಿತ್ಪ್ರಪಞ್ಚೇ || ೯೬-೨ ||
ಧರ್ಮಂ ವರ್ಣಾಶ್ರಮಾಣಾಂ ಶ್ರುತಿಪಥವಿಹಿತಂ ತ್ವತ್ಪರತ್ವೇನ ಭಕ್ತ್ಯಾ
ಕುರ್ವನ್ತೋಽನ್ತರ್ವಿರಾಗೇ ವಿಕಸತಿ ಶನಕೈಸ್ಸನ್ತ್ಯಜನ್ತೋ ಲಭನ್ತೇ |
ಸತ್ತಾಸ್ಫೂರ್ತಿಪ್ರಿಯತ್ವಾತ್ಮಕಮಖಿಲಪದಾರ್ಥೇಷು ಭಿನ್ನೇಷ್ವಭಿನ್ನಂ
ನಿರ್ಮೂಲಂ ವಿಶ್ವಮೂಲಂ ಪರಮಮಹಮಿತಿ ತ್ವದ್ವಿಬೋಧಂ ವಿಶುದ್ಧಮ್ || ೯೬-೩ ||
ಜ್ಞಾನಂ ಕರ್ಮಾಪಿ ಭಕ್ತಿಸ್ತ್ರಿತಯಮಿಹ ಭವತ್ಪ್ರಾಪಕಂ ತತ್ರ ತಾವ-
ನ್ನಿರ್ವಿಣ್ಣಾನಾಮಶೇಷೇ ವಿಷಯ ಇಹ ಭವೇತ್ ಜ್ಞಾನಯೋಗೇಽಧಿಕಾರಃ |
ಸಕ್ತಾನಾಂ ಕರ್ಮಯೋಗಸ್ತ್ವಯಿ ಹಿ ವಿನಿಹಿತೋ ಯೇ ತು ನಾತ್ಯನ್ತಸಕ್ತಾಃ
ನಾಪ್ಯತ್ಯನ್ತಂ ವಿರಕ್ತಾಸ್ತ್ವಯಿ ಚ ಧೃತರಸಾ ಭಕ್ತಿಯೋಗೋ ಹ್ಯಮೀಷಾಮ್ || ೯೬-೪ ||
ಜ್ಞಾನಂ ತ್ವದ್ಭಕ್ತತಾಂ ವಾ ಲಘು ಸುಕೃತವಶಾನ್ಮರ್ತ್ಯಲೋಕೇ ಲಭನ್ತೇ
ತಸ್ಮಾತ್ತತ್ರೈವ ಜನ್ಮ ಸ್ಪೃಹಯತಿ ಭಗವನ್ ನಾಕಗೋ ನಾರಕೋ ವಾ |
ಆವಿಷ್ಟಂ ಮಾಂ ತು ದೈವಾದ್ಭವಜಲನಿಧಿಪೋತಾಯಿತೇ ಮರ್ತ್ಯದೇಹೇ
ತ್ವಂ ಕೃತ್ವಾ ಕರ್ಣಧಾರಂ ಗುರುಮನುಗುಣವಾತಾಯಿತಸ್ತಾರಯೇಥಾಃ || ೯೬-೫ ||
ಅವ್ಯಕ್ತಂ ಮಾರ್ಗಯನ್ತಃ ಶ್ರುತಿಭಿರಪಿ ನಯೈಃ ಕೇವಲಜ್ಞಾನಲುಬ್ಧಾಃ
ಕ್ಲಿಶ್ಯನ್ತೇಽತೀವ ಸಿದ್ಧಿಂ ಬಹುತರಜನುಷಾಮನ್ತ ಏವಾಪ್ನುವನ್ತಿ |
ದೂರಸ್ಥಃ ಕರ್ಮಯೋಗೋಽಪಿ ಚ ಪರಮಫಲೇ ನನ್ವಯಂ ಭಕ್ತಿಯೋಗ-
ಸ್ತ್ವಾಮೂಲಾದೇವ ಹೃದ್ಯಸ್ತ್ವರಿತಮಯಿ ಭವತ್ಪ್ರಾಪಕೋ ವರ್ಧತಾಂ ಮೇ || ೯೬-೬ ||
ಜ್ಞಾನಾಯೈವಾತಿಯತ್ನಂ ಮುನಿರಪವದತೇ ಬ್ರಹ್ಮತತ್ತ್ವಂ ತು ಶ್ರುಣ್ವನ್
ಗಾಢಂ ತ್ವತ್ಪಾದಭಕ್ತಿಂ ಶರಣಮಯತಿ ಯಸ್ತಸ್ಯ ಮುಕ್ತಿಃ ಕರಾಗ್ರೇ |
ತ್ವದ್ಧ್ಯಾನೇಽಪೀಹ ತುಲ್ಯಾ ಪುನರಸುಕರತಾ ಚಿತ್ತಚಾಞ್ಚಲ್ಯಹೇತೋ-
ರಭ್ಯಾಸಾದಾಶು ಶಕ್ಯಂ ತದಪಿ ವಶಯಿತುಂ ತ್ವತ್ಕೃಪಾಚಾರುತಾಭ್ಯಾಮ್ || ೯೬-೭ ||
ನಿರ್ವಿಣ್ಣಃ ಕರ್ಮಮಾರ್ಗೇ ಖಲು ವಿಷಮತಮೇ ತ್ವತ್ಕಥಾದೌ ಚ ಗಾಢಂ
ಜಾತಶ್ರದ್ಧೋಽಪಿ ಕಾಮಾನಯಿ ಭುವನಪತೇ ನೈವ ಶಕ್ನೋಮಿ ಹಾತುಮ್ |
ತದ್ಭೂಯೋ ನಿಶ್ಚಯೇನ ತ್ವಯಿ ನಿಹಿತಮನಾ ದೋಷಬುದ್ಧ್ಯಾ ಭಜಂಸ್ತಾನ್
ಪುಷ್ಣೀಯಾಂ ಭಕ್ತಿಮೇವ ತ್ವಯಿ ಹೃದಯಗತೇ ಮಙ್ಕ್ಷು ನಙ್ಕ್ಷ್ಯನ್ತಿ ಸಙ್ಗಾಃ || ೯೬-೮ ||
ಕಶ್ಚಿತ್ಕ್ಲೇಶಾರ್ಜಿತಾರ್ಥಕ್ಷಯವಿಮಲಮತಿರ್ನುದ್ಯಮಾನೋ ಜನೌಘೈಃ
ಪ್ರಾಗೇವಂ ಪ್ರಾಹ ವಿಪ್ರೋ ನ ಖಲು ಮಮ ಜನಃ ಕಾಲಕರ್ಮಗ್ರಹಾ ವಾ |
ಚೇತೋ ಮೇ ದುಃಖಹೇತುಸ್ತದಿಹ ಗುಣಗಣಂ ಭಾವಯತ್ಸರ್ವಕಾರೀ-
ತ್ಯುಕ್ತ್ವಾ ಶಾನ್ತೋ ಗತಸ್ತ್ವಾಂ ಮಮ ಚ ಕುರು ವಿಭೋ ತಾದೃಶೀ ಚಿತ್ತಶಾನ್ತಿಮ್ || ೯೬-೯ ||
ಐಲಃ ಪ್ರಾಗುರ್ವಶೀಂ ಪ್ರತ್ಯತಿವಿವಶಮನಾಃ ಸೇವಮಾನಶ್ಚಿರಂ ತಾಂ
ಗಾಢಂ ನಿರ್ವಿದ್ಯ ಭೂಯೋ ಯುವತಿಸುಖಮಿದಂ ಕ್ಷುದ್ರಮೇವೇತಿ ಗಾಯನ್ |
ತ್ವದ್ಭಕ್ತಿಂ ಪ್ರಾಪ್ಯ ಪೂರ್ಣಃ ಸುಖತರಮಚರತ್ತದ್ವದುದ್ಧೂತಸಙ್ಗಂ
ಭಕ್ತೋತ್ತಂಸಂ ಕ್ರಿಯಾ ಮಾಂ ಪವನಪುರಪತೇ ಹನ್ತ ಮೇ ರುನ್ಧಿ ರೋಗಾನ್ || ೯೬-೧೦ ||
ಇತಿ ಷಣ್ಣವತಿತಮದಶಕಂ ಸಮಾಪ್ತಂ
ಸಂಪೂರ್ಣ ನಾರಾಯಣೀಯಂ ನೋಡಿ.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.