Read in తెలుగు / ಕನ್ನಡ / தமிழ் / देवनागरी / English (IAST)
|| విభీషణపథ్యోపదేశః ||
తతః ప్రత్యుషసి ప్రాప్తే ప్రాప్తధర్మార్థనిశ్చయః |
రాక్షసాధిపతేర్వేశ్మ భీమకర్మా విభీషణః || ౧ ||
శైలాగ్రచయసంకాశం శైలశృంగమివోన్నతమ్ |
సువిభక్తమహాకక్ష్యం మహాజనపరిగ్రహమ్ || ౨ ||
మతిమద్భిర్మహామాత్రైరనురక్తైరధిష్ఠితమ్ |
రాక్షసైశ్చాప్తపర్యాప్తైః సర్వతః పరిరక్షితమ్ || ౩ ||
మత్తమాతంగనిఃశ్వాసైర్వ్యాకులీకృతమారుతమ్ |
శంఖఘోషమహాఘోషం తూర్యనాదానునాదితమ్ || ౪ ||
ప్రమదాజనసంబాధం ప్రజల్పితమహాపథమ్ |
తప్తకాంచననిర్యూహం భూషణోత్తమభూషితమ్ || ౫ ||
గంధర్వాణామివావాసమాలయం మరుతామివ |
రత్నసంచయసంబాధం భవనం భోగినామివ || ౬ ||
తం మహాభ్రమివాదిత్యస్తేజోవిస్తృతరశ్మిమాన్ |
అగ్రజస్యాలయం వీరః ప్రవివేశ మహాద్యుతిః || ౭ ||
పుణ్యాన్ పుణ్యాహఘోషాంశ్చ వేదివిద్భిరుదాహృతాన్ |
శుశ్రావ సుమహాతేజా భ్రాతుర్విజయసంశ్రితాన్ || ౮ ||
పూజితాన్ దధిపాత్రైశ్చ సర్పిర్భిః సుమనోక్షతైః |
మంత్రవేదవిదో విప్రాన్ దదర్శ సుమహాబలః || ౯ ||
స పూజ్యమానో రక్షోభిర్దీప్యమానః స్వతేజసా |
ఆసనస్థం మహాబాహుర్వవందే ధనదానుజమ్ || ౧౦ ||
స రాజదృష్టిసంపన్నమాసనం హేమభూషితమ్ |
జగామ సముదాచారం ప్రయుజ్యాచారకోవిదః || ౧౧ ||
స రావణం మహాత్మానం విజనే మంత్రిసన్నిధౌ |
ఉవాచ హితమత్యర్థం వచనం హేతునిశ్చితమ్ || ౧౨ ||
ప్రసాద్య భ్రాతరం జ్యేష్ఠం సాంత్వేనోపస్థితక్రమః |
దేశకాలార్థసంవాదీ దృష్టలోకపరావరః || ౧౩ ||
యదా ప్రభృతి వైదేహీ సంప్రాప్తేమాం పురీం తవ |
తదా ప్రభృతి దృశ్యంతే నిమిత్తాన్యశుభాని నః || ౧౪ ||
సస్ఫులింగః సధూమార్చిః సధూమకలుషోదయః |
మంత్రసం‍ధుక్షితోఽప్యగ్నిర్న సమ్యగభివర్ధతే || ౧౫ ||
అగ్నిష్ఠేష్వగ్నిశాలాసు తథా బ్రహ్మస్థలీషు చ |
సరీసృపాణి దృశ్యంతే హవ్యేషు చ పిపీలికాః || ౧౬ ||
గవాం పయాంసి స్కన్నాని విమదా వీరకుంజరాః |
దీనమశ్వాః ప్రహేషంతే న చ గ్రాసాభినందినః || ౧౭ ||
ఖరోష్ట్రాశ్వతరా రాజన్ భిన్నరోమాః స్రవంతి నః |
న స్వభావేఽవతిష్ఠంతే విధానైరపి చింతితాః || ౧౮ ||
వాయసాః సంఘశః క్రూరాః వ్యాహరంతి సమంతతః |
సమవేతాశ్చ దృశ్యంతే విమానాగ్రేషు సంఘశః || ౧౯ ||
గృధ్రాశ్చ పరిలీయంతే పురీముపరి పిండితాః |
ఉపపన్నాశ్చ సంధ్యే ద్వే వ్యాహరంత్యశివం శివాః || ౨౦ ||
క్రవ్యాదానాం మృగాణాం చ పురద్వారేషు సంఘశః |
శ్రూయంతే విపులా ఘోషాః సవిస్ఫూర్జథునిఃస్వనాః || ౨౧ ||
తదేవం ప్రస్తుతే కార్యే ప్రాయశ్చిత్తమిదం క్షమమ్ |
రోచతే యది వైదేహీ రాఘవాయ ప్రదీయతామ్ || ౨౨ ||
ఇదం చ యది వా మోహాల్లోభాద్వా వ్యాహృతం మయా |
తత్రాపి చ మహారాజ న దోషం కర్తుమర్హసి || ౨౩ ||
అయం చ దోషః సర్వస్య జనస్యాస్యోపలక్ష్యతే |
రక్షసాం రాక్షసీనాం చ పురస్యాంతః పురస్య చ || ౨౪ ||
శ్రావణే చాస్య మంత్రస్య నివృత్తాః సర్వమంత్రిణః |
అవశ్యం చ మయా వాచ్యం యద్దృష్టమపి వా శ్రుతమ్ || ౨౫ ||
సంప్రధార్య యథాన్యాయం తద్భవాన్ కర్తుమర్హతి |
ఇతి స్మ మంత్రిణాం మధ్యే భ్రాతా భ్రాతరమూచివాన్ |
రావణం రక్షసశ్రేష్ఠం పథ్యమేతద్విభీషణః || ౨౬ ||
హితం మహార్థం మృదు హేతుసంహితం
వ్యతీతకాలాయతిసంప్రతిక్షమమ్ |
నిశమ్య తద్వాక్యముపస్థితజ్వరః
ప్రసంగవానుత్తరమేతదబ్రవీత్ || ౨౭ ||
భయం న పశ్యామి కుతశ్చిదప్యహం
న రాఘవః ప్రాప్స్యతి జాతు మైథిలీమ్ |
సురైః సహేంద్రైరపి సంగతః కథం
మమాగ్రతః స్థాస్యతి లక్ష్మణాగ్రజః || ౨౮ ||
ఇతీదముక్త్వా సురసైన్యనాశనో
మహాబలః సంయతి చండవిక్రమః |
దశాననో భ్రాతరమాప్తవాదినం
విసర్జయామాస తదా విభీషణమ్ || ౨౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే దశమః సర్గః || ౧౦ ||
యుద్ధకాండ ఏకాదశః సర్గః (౧౧) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.