Aranya Kanda Sarga 33 – அரண்யகாண்ட³ த்ரயஸ்த்ரிம்ஶ꞉ ஸர்க³꞉ (33)

Read in తెలుగు / ಕನ್ನಡ / தமிழ் / देवनागरी / English (IAST)

ஸ்தோத்ரநிதி → வால்மீகி ராமாயணே அரண்யகாண்ட³ → அரண்யகாண்ட³ த்ரயஸ்த்ரிம்ஶ꞉ ஸர்க³꞉ (33)

॥ ராவணநிந்தா³ ॥

தத꞉ ஶூர்பணகா² தீ³நா ராவணம் லோகராவணம் ।
அமாத்யமத்⁴யே ஸங்க்ருத்³தா⁴ பருஷம் வாக்யமப்³ரவீத் ॥ 1 ॥

ப்ரமத்த꞉ காமபோ⁴கே³ஷு ஸ்வைரவ்ருத்தோ நிரங்குஶ꞉ ।
ஸமுத்பந்நம் ப⁴யம் கோ⁴ரம் போ³த்³த⁴வ்யம் நாவபு³த்⁴யஸே ॥ 2 ॥

ஸக்தம் க்³ராம்யேஷு போ⁴கே³ஷு காமவ்ருத்தம் மஹீபதிம் ।
லுப்³த⁴ம் ந ப³ஹு மந்யந்தே ஶ்மஶாநாக்³நிமிவ ப்ரஜா꞉ ॥ 3 ॥

ஸ்வயம் கார்யாணி ய꞉ காலே நாநுதிஷ்ட²தி பார்தி²வ꞉ ।
ஸ து வை ஸஹ ராஜ்யேந தைஶ்ச கார்யைர்விநஶ்யதி ॥ 4 ॥

அயுக்தசாரம் து³ர்த³ர்ஶமஸ்வாதீ⁴நம் நராதி⁴பம் ।
வர்ஜயந்தி நரா தூ³ராந்நதீ³பங்கமிவ த்³விபா꞉ ॥ 5 ॥

யே ந ரக்ஷந்தி விஷயமஸ்வாதீ⁴நா நராதி⁴ப꞉ ।
தே ந வ்ருத்³த்⁴யா ப்ரகாஶந்தே கி³ரய꞉ ஸாக³ரே யதா² ॥ 6 ॥

ஆத்மவத்³பி⁴ர்விக்³ருஹ்ய த்வம் தே³வக³ந்த⁴ர்வதா³நவை꞉ ।
அயுக்தசாரஶ்சபல꞉ கத²ம் ராஜா ப⁴விஷ்யஸி ॥ 7 ॥

த்வம் து பா³லஸ்வபா⁴வச்ச பு³த்³தி⁴ஹீநஶ்ச ராக்ஷஸ ।
ஜ்ஞாதவ்யம் து ந ஜாநீஷே கத²ம் ராஜா ப⁴விஷ்யஸி ॥ 8 ॥

யேஷாம் சாரஶ்ச கோஶஶ்ச நயஶ்ச ஜயதாம் வர ।
அஸ்வாதீ⁴நா நரேந்த்³ராணாம் ப்ராக்ருதைஸ்தே ஜநை꞉ ஸமா꞉ ॥ 9 ॥

யஸ்மாத் பஶ்யந்தி தூ³ரஸ்தா²ந் ஸர்வாநர்தா²ந்நராதி⁴பா꞉ ।
சாரேண தஸ்மாது³ச்யந்தே ராஜாநோ தீ³ர்க⁴சக்ஷுஷ꞉ ॥ 10 ॥

அயுக்தசாரம் மந்யே த்வாம் ப்ராக்ருதை꞉ ஸசிவைர்வ்ருதம் ।
ஸ்வஜநம் ச ஜநஸ்தா²நம் ஹதம் யோ நாவபு³த்⁴யஸே ॥ 11 ॥

சதுர்த³ஶ ஸஹஸ்ராணி ரக்ஷஸாம் க்ரூரகர்மணாம் ।
ஹதாந்யேகேந ராமேண க²ரஶ்ச ஸஹதூ³ஷண꞉ ॥ 12 ॥

ருஷீணாமப⁴யம் த³த்தம் க்ருதக்ஷேமாஶ்ச த³ண்ட³கா꞉ ।
த⁴ர்ஷிதம் ச ஜநஸ்தா²நம் ராமேணாக்லிஷ்டகர்மணா ॥ 13 ॥

த்வம் து லுப்³த⁴꞉ ப்ரமத்தஶ்ச பராதீ⁴நஶ்ச ராவண ।
விஷயே ஸ்வே ஸமுத்பந்நம் ப⁴யம் யோ நாவபு³த்⁴யஸே ॥ 14 ॥

தீக்ஷ்ணமல்பப்ரதா³தாரம் ப்ரமத்தம் க³ர்விதம் ஶட²ம் ।
வ்யஸநே ஸர்வபூ⁴தாநி நாபி⁴தா⁴வந்தி பார்தி²வம் ॥ 15 ॥

அதிமாநிநமக்³ராஹ்யமாத்மஸம்பா⁴விதம் நரம் ।
க்ரோதி⁴நம் வ்யஸநே ஹந்தி ஸ்வஜநோ(அ)பி மஹீபதிம் ॥ 16 ॥

நாநுதிஷ்ட²தி கார்யாணி ப⁴யேஷு ந பி³பே⁴தி ச ।
க்ஷிப்ரம் ராஜ்யாச்ச்யுதோ தீ³நஸ்த்ருணைஸ்துல்யோ ப⁴விஷ்யதி ॥ 17 ॥

ஶுஷ்கை꞉ காஷ்டை²ர்ப⁴வேத்கார்யம் லோஷ்டைரபி ச பாம்ஸுபி⁴꞉ ।
ந து ஸ்தா²நாத் பரிப்⁴ரஷ்டை꞉ கார்யம் ஸ்யாத்³வஸுதா⁴தி⁴பை꞉ ॥ 18 ॥

உபபு⁴க்தம் யதா² வாஸ꞉ ஸ்ரஜோ வா ம்ருதி³தா யதா² ।
ஏவம் ராஜ்யாத்பரிப்⁴ரஷ்ட꞉ ஸமர்தோ²(அ)பி நிரர்த²க꞉ ॥ 19 ॥

அப்ரமத்தஶ்ச யோ ராஜா ஸர்வஜ்ஞோ விஜிதேந்த்³ரிய꞉ ।
க்ருதஜ்ஞோ த⁴ர்மஶீலஶ்ச ஸ ராஜா திஷ்ட²தே சிரம் ॥ 20 ॥

நயநாப்⁴யாம் ப்ரஸுப்தோ(அ)பி ஜாக³ர்தி நயசக்ஷுஷா ।
வ்யக்தக்ரோத⁴ப்ரஸாத³ஶ்ச ஸ ராஜா பூஜ்யதே ஜநை꞉ ॥ 21 ॥

த்வம் து ராவண து³ர்பு³த்³தி⁴ர்கு³ணைரேதைர்விவர்ஜித꞉ ।
யஸ்ய தே(அ)விதி³தஶ்சாரை ரக்ஷஸாம் ஸுமஹாந் வத⁴꞉ ॥ 22 ॥

பராவமந்தா விஷயேஷு ஸங்க³தோ
ந தே³ஶகாலப்ரவிபா⁴க³தத்த்வவித் ।
அயுக்தபு³த்³தி⁴ர்கு³ணதோ³ஷநிஶ்சயே
விபந்நராஜ்யோ ந சிராத்³விபத்ஸ்யஸே ॥ 23 ॥

இதி ஸ்வதோ³ஷாந் பரிகீர்திதாம்ஸ்தயா
ஸமீக்ஷ்ய பு³த்³த்⁴யா க்ஷணதா³சரேஶ்வர꞉ ।
த⁴நேந த³ர்பேண ப³லேந சாந்விதோ
விசிந்தயாமாஸ சிரம் ஸ ராவண꞉ ॥ 24 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே அரண்யகாண்டே³ த்ரயஸ்த்ரிம்ஶ꞉ ஸர்க³꞉ ॥ 33 ॥

---

ஸம்பூர்ண வால்மீகி ராமாயணே அரண்யகாண்ட³ பார்க்க.